یوحنّا روایت 19
19
عئسا اؤلومه محکوم اولور
1او زامان پئلاط عئسانی توتوب، امر الهدی اونا شالّاق وورسونلار. 2سربازلاردا تئکانلاردان بئر تاج هؤروب اونون باشینا قویدولار و اونا قیرمیزی رنگئنده بئر پالتار گیدئردئلر. 3و اونون یانینا گلئب ددئلر: «سالام، ای یهودئلرئن پادشاهی.» و اونا شئلّه ووروردولار.
4پئلاط گئنه اشئیه گدئب یهودئلره ددی: «باخین، اونی سئزئن یانیزا گتئرئرم کی، بئله سئز من اوندا هچ بئر تقصئر تاپمادیم.» 5او واخت عئسا، باشیندا تئکاندان تاج و اَینئنده قیرمیزی بئر پالتار، اشئیه چیخدی. پئلاط یهودئلره ددی: «باخین، او آدام!» 6معبدئن باش کاهئنلری و موحافئظلر عئسانی گؤرن زامان چیغیریب ددئلر: «چارمیخا چک! چارمیخا چک!» پئلاط اولارا ددی: « سئز اؤزوز اونی آپارین و چارمیخا چکئن. من اوندا هچ بئر تقصئر تاپمادیم.» 7یهودئلر جاواب وردئلر: «بئزئم بئر قانونوموز وار و او قانونا گؤره بو آدام گرک اؤله، چونکی دیئر تارینین اوغلودور.»
8پئلاط بو سؤزی اشئدن واخت لاپ چوخ قورخدی 9و گئنه سارایا قاییدیب عئسایا ددی: «سن هاردانسان؟» آمّا عئسا اونا جاواب ورمهدی. 10او واخت پئلاط اونا ددی: «منه جاواب ورمئرسن؟ بئلمئرسن کی، سنی هم چارمیخا چکمهیه قودرتئم وار، هم ده آزاد اله مه یه؟» 11عئسا جاواب وردی: «اگر بو قودرت سنه یوخاریدان ورئلمهسَیدی، منئم اوستومده هچ بئر قودرتئن اولمازدی. اونا گؤره ده، او آدامین گوناهی کی، منی سنه تسلئم الهیئب، داها بؤیوکدور.» 12بو زاماندان پئلاط عئسانی آزاد الهمهیه اللشدی، آمّا یهودئلر قیشقیریب دیئردئلر: «اگر بو آدامی بوراخاسان، آرتیق ائمپراطورون دوستی دیئلسن. پادشاهلیق ادّعاسی الهین بئر آدام ائمپراطورون ضئدّئنه دانیشیر.»
13پئلاط بو سؤزلری اِشئدنده عئسانی اشئیه گتئردی و «داش دؤشهمه» دیئلن یرده حؤکم کورسوسونده اوتوردی. بو یره عئبرانی دئلئنده «جابّاتا» دیئلئر. 14او گون مایاسیز چؤرک پاسخا بایرامینین حاضیرلیق گونی ائدی. تقرئبن ناهارچاغی ساعات اون ائکئیه یاخین ائدی. پئلاط یهودئلره ددی: «باخین، سئزئن پادشاهیز!» 15یهودئلر چیغیردیلار: «محو اولسون، محو اولسون. چارمیخا چک!» پئلاط اولارا ددی: «پادشاهیزی چارمیخا چکئم؟» معبدئن باش کاهئنلری جاواب وردئلر: «قیصردن باشقا هچ پادشاهیمیز یوخدور.» 16او زامان پئلاط عئسانی چارمیخا چکئلمک اوچون اولارا تحوئل وردی.
عئسا چارمیخا چکئلئر
اولار عئسانی آلیب آپاردیلار. 17عئسا چارمیخی دالیندا کلّه دیئلن بئر یره گتئرئلدی. بو یره عئبرانی دئلئنده جولجوتا دیئردئلر. 18اولار اوردا عئسانی چارمیخا چکدئلر. اونونان برابر ائکی نفری ده بئرئنی اونون بئر طرفئنده و او بئرئسئنی اونون او بئری طرفئنده چارمیخا چکدئلر و عئسا اورتادا قالدی. 19پئلاط بئر تخته یازیب اونی چارمیخین باشینا ووردی. بو تختهده یازیلمیشدی؛ «ناصئرهلی عئسا، یهودئلرئن پادشاهی.» 20یهودئلردن چوخلاری بو یازینی اوخودولار، چونکی عئسانین چارمیخا چکئلدئیی یر شهرئن یاخینلیغیندا ائدی و بو یازی عئبرانی، یونانی، و لاتین دئلئنده یازیلمیشدی. 21او واخت یهودئلرئن باش کاهئنلری پئلاطا ددئلر: «یازما؛ یهودئلرئن پادشاهی، یاز؛ بو آدام ” من یهودئلرئن پادشاهییام“دیئردی.» 22پئلاط جاواب وردی: «یازدیغیمی یازمیشام.»
23سربازلار عئسانی چارمیخا چکندن سورا اونون پالتارلارینی دؤرد یره بؤلدولر و هر بئرئسی بئر پای گؤتوردی. اونون کؤینهیئنی ده گؤتوردولر، آمّا کؤینک تئکئشسئز و باشدان باشا بئر توخوما ائدی. 24اونا گؤره ده بئربئرلرئنه ددئلر: «بونی ییرتمایاق. گلئن اونون کئمئن اولماسینا پوشک آتاق.» و بولار اونا گؤره اولدی کی، موقدّس کئتابین ددئیی سؤز یرئنه یتئشسئن کی دیئر:
«اولار پالتارلاریمی اؤز آرالاریندا بؤلدولر
و کؤینهیئم اوچون پوشک آتدیلار.»
پس سربازلار بله الهدئلر.
25عئسانین چارمیخی یانیندا اونون آناسی، خالاسی، کلوپاسین آروادی مریم و مجدللی مریم دورموشدولار. 26عئسا آناسی و اونون یانیندا سودئیی شاگئردئن دوردوغونی گؤرنده آناسینا ددی: «آنا، باخ، سنئن اوغلون!» 27سورا دا او شاگئرده ددی: «باخ، سنئن آنان.» و او زاماندان او شاگئرد عئسانین آناسینی اؤز اِوئنه آپاردی.
عئسانین اؤلومی
28بوندان سورا، عئسا بوتون ائشلرئن تامام اولدوغونی بئلدی و موقدّس کئتابدا دیئلن سؤزون یرئنه یتئشمهسی اوچون «سوسوزام» ددی. 29اوردا دولی بئر قاب تورش شراب قویولموشدی. تورش شرابا بئر تئکه ابری باتیریب اونی بئر زوفا بوداغینا تاخدیلار و عئسانین آغزینا ساری اوزاتدیلار. 30عئسا سئرکهنی داددی و سورا ددی: «هر شی یرئنه یتئشدی.» و باشینی اَیئب روحونی تسلئم الهدی.
31او گون موقدّس شنبه بایرامین حاضیرلیق گونی ائدی و یهودئلر موقدّس شنبه گونونده جسدلرئن چارمیخدا قالماسینی ائستهمئردئلر، چونکی او شنبه بؤیوک بئر گون ائدی. اونا گؤره ده پئلاطدان ائستهدئلر کی، اولارین قیچلاری سیندیریلسین و چارمیخدان گؤتورولسون. 32بونا گؤره سربازلار گلئب بئرئنجی آدامین، سورا دا عئسانین او بئری یانیندا چارمیخا چکئلمئش آدامین قیچلارینی سیندیردیلار. 33آمّا اوندا کی عئسانین یانینا گلدئلر و اؤلدویونی گؤردولر اونون قیچلارینی سیندیرمادیلار. 34آمّا، سربازلاردان بئری اونون بؤیرونه نئزه ووردی و او آندا اوردان قان و سو آخدی. 35بونی گؤرن شهادت ورئر کی، سئز ده ائمان گتئرهسئز. اونون شهادتی دوغرودور و او بئلئر کی حقئقتی دیئر. 36بو شیلرئن هامیسی باشوردی کی، موقدّس کئتابین یازدیغی بو سؤز یرئنه یتئشسئن کی دیئر: «اونون سوموکلرئندن هچ بئری سینمایاجاق.» 37و گئنه آیری بئر یازی دیئر: «نئزه ووردوقلاری آداما باخاجاقلار.»
عئسانین باسدیریلماسی
38بو حادئثهلردن سورا، آراماتایلی یوسئف پئلاطدان ائجازه ائستهدی کی، عئسانین جسدئنی گؤتورسون. او، عئسانین شاگئردی ائدی، آمّا یهودئلرئن قورخوسوندان اؤزونی گئزلهدئردی. پئلاط بو ائشه ائجازه وردی و او دا گلئب عئسانین جسدئنی گؤتوردی. 39نئقودئموس دا کی، اوّلجه گجه قارانلیغیندا عئسانین یانینا گلمئشدی، اؤزی ائنن اوتوز کئلویا یاخین قاریشمیش مور و عؤد گتئردی. 40او زامان عئسانین جسدئنی گؤتوروب عطئرلر ائنن کفنه بوکدولر. نجه کی، یهودئلرئن دفن عادتی ائدی. 41عئسانین چارمیخا چکئلدئیی یرده بئر باغ وار ائدی و بو باغدا تزه بئر مقبره قازیلمیشدی کی، اونون ائچئنه بو زامانا قدر هچ کسی قویمامیشدیلار. 42یهودئلرئن موقدّس شنبه حاضیرلیق گونی اولدوغونا گؤره، و مقبرهنئن یاخینلیغینا گؤره عئسانین جسدئنی اورایا قویدولار.
Currently Selected:
یوحنّا روایت 19: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
