یوحنّا روایت 17
17
عئسا شاگئردلری اوچون دوعا الهیئر
1عئسا بو سؤزلری دئیندن سورا گؤزلرئنی گؤیه قالخیزیب ددی: «آتا، ساعات یتئشئب. اوغلونا جلال ور کی، اوغول دا سنه جلال ورسئن. 2نجه کی بوتون ائنسانلار اوستونه، سن اونا قودرت وردئن کی، اونا وردئیئن ائنسانلارین هامیسینا ابدی حیات ورسئن. 3و ابدی حیات بودور کی، اولار سنی، تک حقئقی تاری و گؤندَردئیئن عئسا مسئحی تانیسینلار. 4من او ائشی کی منه تاپشیرمیشدین یرئنه یتئردئم و اله بله سنی یر اوزونده جلال وردئم. 5و ائندی سن ای آتا، اؤز یانیندا منی جلال ور. او جلال ائنان کی، دونیا یارانمامیشدان سنئن یانیندا واریم ائدی.
عئسا شاگئردلرئنه دوعا الهیئر
6من سنئن آدینی بو دونیادان منه وردئیئن ائنسانلارا تانیتدیرمیشام. اولار سنئن ائدئلر و سن اولاری منه وردئن. و سنئن ددئکلرئندن ائطاعت الهیئبلر. 7ائندی اولار بئلئبلر کی، منه وردئکلرئنئن هامیسی سندندئر. 8چونکی منه وردئیئن سؤزلری اولارا وردئم و اولار قبول الهدئلر. اولار آنلادیلار کی سنئن یانیندان گلمئشم و ائناندیلار کی، منی سن گؤندَرئبسن. 9من اولار اوچون یالواریرام؛ دونیا اوچون یوخ، منه وردئکلرئن اوچون یالواریرام. چونکی اولار سنئندئرلر. 10منئم اولان هر شی سنئندئر و سنئن اولان هر شی ده منئمدئر. و من اولاردا جلال تاپمیشام. 11آرتیق من اوزون بئر مودّت اوچون بو دونیادا دیئلم، آمّا اولار بو دونیادادیرلار. و من سنئن یانینا گلئرم. ای موقدّس آتا، منه وردئیئن آدین ائنان اولاری حئفظ اله کی، اولار دا بئزئم کئمی بئر اولسونلار. 12اولارین یانیندا اولان زامان، منه وردئیئن آدین ائنان اولاری حئفظ الهدئم و هلاکت اوغلوندان باشقا، اولاردان هچ بئری هلاک اولمادی کی، موقدّس کئتابین ددئیی سؤز یرئنه یتئشسئن. 13آمّا ائندی سنئن یانینا گلئرم و بو سؤزلری او زامان دیئرم کی حله دونیادایام، اله کی منئم شادلیغیم اولاردا کامئل اولسون. 14سنئن سؤزونی اولارا وردئم و دونیا اولاردان نئفرت الهدی. چونکی اولار بو دونیادان دیئللر، نجه کی، من بو دونیادان دیئلم. 15یالوارمیرام کی، اولاری بو دونیادان گؤتورهسن، بلکی یالواریرام کی اولاری شردن حئفظ الئیهسن. 16نجه کی، من بو دونیادان دیئلم، اولار دا بو دونیادان دیئللر. 17اولاری حقئقت ائنن موقدّس اله؛ حقئقت سنئن سؤزوندور. 18نجه کی، سن منی بو دونیایا گؤندَردئن، من ده اولاری بو دونیایا گؤندَرئرم. 19اولار اوچون من اؤزومی وقف الهیئرم، اله کی اولار دا حقئقت ائنن سنه وقف اولونسونلار.
عئسا اونا ائمان گتئرنلره دوعا الهیئر
20فقط اولار اوچون یالوارمیرام. بلکی او آداملار اوچون ده کی اولارین سؤزی ائنن منه ائمان گتئرهجکلر یالواریرام، 21اله کی هامیسی بئر اولسونلار. نجه کی، سن ای آتا مندهسن و من سندهیم، اولار دا بئزده اولسونلار کی، دونیا سنئن منی گؤندَردئیئنه ائمان گتئرسئن. 22منه وردئیئن جلالی من اولارا ورمئشم کی، بئز بئر اولدوغوموز کئمی، اولار دا بئر اولسونلار. 23من اولاردایام و سن مندهسن کی، اولار بئرلئکده کامئل اولسونلار و دونیا سنئن منی گؤندَردئینه و اولاری سودئیئنه ائنانسین، نجه کی، منی سودئن. 24ای آتا، ائستهیئرم کی، منه وردئکلرئن ده من اولان یرده من ائنن اولسونلار و سنئن منه وردئیئن جلالی گؤرسونلر. چونکی دونیانین یارانماسیندان قاباق منی سوئردئن.
25ای عادئل آتا، دونیا سنی تانیمادی، آمّا من سنی تانیدیم و بولار دا آنلادیلار کی، سن منی گؤندَرئبسن. 26سنئن آدینی اولارا بئلدئردئم و بئلدئرهجهیم، اله کی منی سودئیئن او محبّت اولاردا دا اولسون و من ده اولاردا اولوم.»
Currently Selected:
یوحنّا روایت 17: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
