یوحنّا روایت 10
10
یاخشی چوبان
1«دوغروسونی سئزه دیئرم؛ قویون آغیلینا قاپیدان گئرمهیئب، آیری بئر یردن آشیب-گئرن آدام، اوغری و حرامیدئر. 2آمّا قاپیدان گئرن قویونلارین چوبانیدیر. 3قاپیچی قاپینی اونا آچار و قویونلار اونون سسئنه قولاق آسارلار؛ چوبان اؤز قویونلارینی آدلاری ائنن چاغیرار و اشئیه چیخاردار. 4بوتون قویونلارینی اشئیه چیخارداندان سورا، اولارین قاباغیندا گِدَر و قویونلار اونون دالیسیجا گدرلر، چونکی اونون سسئنی تانیییرلار. 5اولار اؤزگه آدامین دالیسیجا گتمزلر، بلکی اوندان قاچارلار، چونکی اؤزگه آدامین سسئنی تانیمیرلار.»
6عئسا بو مثلی اولارا ددی، آمّا او آداملار اونون ددئیئنی آنلامادیلار.
7اونون اوچون عئسا گئنه اولارا ددی: «دوغروسونی سئزه دیئرم؛ قویونلار اوچون ’قاپی‘ منم؛ 8مندن قاباق گلنلرئن هامیسی اوغری و حرامی ائدی، آمّا قویونلار اولارین سسئنه قولاق آسمادیلار. 9’قاپی‘ منم. مندن گئرنلرئن هامیسی نئجات تاپاجاق؛ ائچهری گئرهجکلر، اشئیه چیخاجاقلار و اوتلوق تاپاجاقلار. 10اوغری گلمز مگر اوغورلاماق، اؤلدورمک و هلاک اله مک اوچون؛ من گلمئشم کی، اولار حیاتا صاحئب اولسونلار و اونا آرتیقلیق ائنان صاحئب اولسونلار.
11یاخشی چوبان منم. یاخشی چوبان قویونلاردان اؤتری جانیندان کِچَر. 12چوبان اولمایان و اوجرته ائشلهین آدام کی، قویونلارین صاحئبی دیئل، قوردون گلدئیئنی گؤرونجه، قویونلاری بوراخیب قاچار و قورد اولاری قاپیب داغیدار. 13اوجرته ائشلهین آدام قاچار، چونکی اوجرته ائشلهیئر و قویونلارین قیدئنده دیئل. 14یاخشی چوبان منم. من اؤز قویونلاریمی تانیییرام و قویونلاریم دا منی تانیییرلار، 15اله کی، گؤیده کی آتا منی تانیییر و من ده آتانی تانیییرام. من قویونلاردان اؤتری جانیمدان کچئرم. 16بو آغیلدان اولمایان آیری قویونلاریم دا وار کی، اولاری گتئرمهلییَم. اولار سسئمی اشئدهجکلر و بئر چوبانی اولان سوری اولاجاقلار. 17بونون اوچون آتا منی چوخ سوئر کی، من اؤز جانیمدان کچئرم، اِله کی، اونی گئنه آلام. 18هچ کس اونی مندن آلمیر، بلکی من اؤزوم اونی ورئرم. اونی ورمهیه ده ائختئیاریم وار، اونی گئنه آلماغا دا. بو حؤکمی آتامدان آلمیشام.»
19عئسانین بو سؤزلرئنه گؤره یهودئلرئن آراسیندا گئنه ده ائختئلاف دوشدی. 20اولاردان چوخلاری دیئردئلر: «او دلی اولوب و ائبلئس روحا اسئردئر؛ نه اوچون اونا قولاق آسیرسیز؟» 21اؤزگه لری ده دیئردئلر: «دلی بئر آدام مگر کور بئر آدامین گؤزلرئنی آچا بئلر؟»
یهودئلرئن ائمانسیزلیغی
22اوندان سورا، اورشلئم شهرئنده معبدئن وقف بایرامی یتئشدی. قیش ائدی، 23و عئسا معبدده، سولیمانین ایوانیندا گزئردی. 24یهودئلر عئسانین اطرافینا ییغیلیب اونا ددئلر: «نه واختا کئمی بئزی شک ائچئنده ساخلایاجاقسان؟ اگر وعدهسی ورئلمئش مسئح سنسن، آچیقجا بئزه ده.» 25عئسا اولارا جاواب وردی: «سئزه ددئم و سئز ائنانمیرسیز. گؤیده کی آتامین آدیندا گؤردویوم ائشلر منئم حاقّیمدا شهادت ورئرلر. 26آمّا سئز ائنانمیرسیز، چونکی منئم قویونلاریمدان دیئلسئز. 27منئم قویونلاریم منئم سسئمی اشئدئرلر؛ من اولاری تانیییرام و اولار منئم دالیمجا گلئرلر. 28من اولارا ابدی حیات ورئرم و اولار هچ واخت هلاک اولمازلار. هچ کس ده اولاری منئم الئمدن قاپا بئلمز. 29منئم گؤیده کی آتام کی اولاری منه ورئب، هامیدان بؤیوکدور و هچ کس قادئر دیئل کی اولاری گؤیده کی آتانین الئندن قاپا. 30من و آتا بئرئک.»
31یهودئلر اونی داشلاماق اوچون گئنه داش گؤتوردولر. 32عئسا اولارا ددی: «سئزه آتادان چوخ یاخشی ائشلر گؤرستدئم. بو ائشلرئن هانسیندان اؤتری منی داشلاییرسیز؟» 33یهودئلر اونا جاواب وردئلر: «سنی یاخشی بئر ائش اوچون داشلامیریق، بلکی کوفر دانیشدیغین اوچون سنی داشلاییریق، اونون اوچون کی، بئر ائنسان اولان حالدا اؤزونی تاری الهیئرسن.» 34عئسا اولارا جاواب وردی: «مگر سئزئن موقدّس یازیلاریزدا یازیلماییب کی، ”ددئم: سئز تاریلارسیز؟“ 35تارینین موقدّس کلامی پوزولماز. اگر تاری اونون سؤزلرئنی قبول الهین آداملاری ”تاریلار“ چاغیریر، 36”تارینین اوغلویام“ ددئیئم اوچون، گؤیده کی آتا طرفئندن موقدّس اولونوب دونیایا گؤندَرئلمئش آداما نجه ”کوفر دیئرسن“ دئیه بئلرسئز؟ 37اگر آتامین ائشلرئنی گؤرمورم، منه ائنانمایین. 38آمّا اگر گؤرورم، حتّا اگر منه ائنانمیرسیز دا، الهدئیئم ائشلره ائنانین کی، آتانین منده و منئم ده آتادا اولدوغومی بئلئب آنلایاسیز.» 39او واخت گئنه اونی توتماغا اَللَشدئلر، آمّا عئسا اولارین الئندن چیخدی.
40و گئنه اوردون چایینین او بئری تایینا، یحیانین اوّلده تعمئد وردئیی یره گتدی و اوردا قالدی. 41چوخ آداملار اونون یانینا گلئب ددئلر: «یحیا حقئقتن هچ بئر مؤجوزه الهمهدی، آمّا بو آدامین حاقّیندا ددئیی بوتون سؤزلر دوغری ائدی.» 42و اوردا چوخ آداملار اونا ائمان گتئردئلر.
Currently Selected:
یوحنّا روایت 10: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
