حوارئلرئن ائشلری 8
8
شاعول کئلئسایا جفا چکدئرئر
1شاعول دا استئفانین اؤلدورولمهسئنه راضی ائدی.
او گونده اورشلئمدهکی کئلئسانین ضئدّئنه بؤیوک بئر جفا قالخدی؛ و حوارئلردن باشقا هامی، یهودئیه و سامئرهنئن هر یانینا داغیلدیلار. 2دوروستکار آداملار استئفانی دفن الهیئب، اونون اوچون بؤیوک یاس توتدولار. 3آمّا شاعول کئلئسانی وئران الهیئردی؛ اِودن اِوه گئرئردی و کئشئلر و آروادلاری سورویوب، زئندانا آتیردی.
فئلئپوس سامئرهده
4بله ده داغیلانلار هر یری گزئب، تارینین کلامینی اعلان الهیئردئلر. 5فئلئپوس دا سامئرهنئن بئر شهرئنه گدئب، مسئحی اورانین خالقینا اعلان الهدی. 6جاماعات فئلئپوسون گؤرستدئیی علامتلری اشئدئب گؤرنده، بئرلئکده اونون ددئکلرئنه قولاق آسدیلار. 7چونکی خبئث روحلاری اولان بئر چوخ آدامدان، روحلار اوجا سس ائنن چیغیریب چیخیردیلار؛ چوخ ائفلئج و علئل ده شفا تاپیردی. 8و او شهرده بؤیوک شادلیق وار ائدی.
جادوگر شمعون
9آمّا او شهرده شمعون آدیندا بئر آدام وار ائدی کی، قاباقجادان جادوگرلئک الهیئردی و سامئره خالقینی حیران الهیئب، بؤیوک بئر آدام اولدوغونی ائدّئعا الهیئردی. 10و اولارین هامیسی، کئچئکدن بؤیوکونه قدر، اونا قولاق آسیب دیئردئلر: «تارینین او بؤیوک قودرتی کی دیئلئر، بو آدامدیر.» 11اولار اونا گؤره اونا قولاق آسیردیلار کی، چوخ واخت ائدی کی اولاری اؤز جادولاری ائنن حیرته سالمیشدی. 12آمّا او زامان کی، تارینین پادشاهلیغی و عئسا مسئحئن آدی بارهده ائنجئلئن خوش خبرئنی اعلان الهین فئلئپوسا ائناندیلار، تعمئد آلدیلار؛ هم کئشئلر، هم ده آروادلار. 13حتّا شمعون اؤزی ده ائمان گتئردی و تعمئد آلاندان سورا فئلئپوسون یانیندا قالدی و باشورن علامتلر و بؤیوک مؤجوزهلری گؤروب دائم حیرتلهنئردی.
14اورشلئمده اولان حوارئلر سامئرهلیلرئن تارینین کلامینی قبول الهدئکلر اِشئدنده، پطروس و یوحنّانی اولارین یانینا گؤندَردئلر. 15اولار دا گلئب سامئرهلیلر اوچون دوعا الهدئلر کی، تارینین موقدّس روحونی آلسینلار. 16چونکی موقدّس روح اولارین هچ بئرئنئن اوستونه حله انمهمئشدی، آنجاق رب عئسانین آدیندا تعمئد آلمیشدیلار. 17پطروس و یوحنّا اَللرئنی اولارین اوستونه قویان زامان، اولار موقدّس روحی آلدیلار.
18شمعون حوارئلرئن اَللرئنی قویماق ائنان موقدّس روحون ورئلدئیئنی گؤرنده، اولارا پول تکلئف الهیئب، 19ددی: «منه ده بو ائقتئداری ورئن کی، کئمئن اوستونه اَللرئمی قویسام، موقدّس روحی آلسین.»
20آمّا پطروس اونا ددی: «گوموشون سن ائنن بئرلئکده محو اولسون! چونکی گومان اله دئن کی، تارینین عطاسینا پول ائنان صاحئب اولا بئلرسن. 21سنئن بو ائشده نه پایین وار نه ده قئسمتئن، چونکی تارینین حوضوروندا اورهیئن دوز دیئل. 22بونا گؤره بو پئسلئیئندن تؤوبه اله و ربّه دوعا اله کی، بلکه اورهیئنده اولان نئیّت باغیشلانسین. 23چونکی گؤرورم کی، آجیلیق زهری ائنن دولی و پئسلئک بندئندهسن.»
24آمّا شمعون جاواب ورئب ددی: «منئم اوچون سئز اؤزوز ربّه دوعا الهیئن کی، ددئکلرئزدن هچ بئری باشیما گلمهسئن.»
25و بله ده پطروس و یوحنا، شهادت ورئب ربّئن کلامینی بیان الهیندن سورا، سامئرهنئن بئر چوخ کندئنده خوش خبری اعلان الهیئب اورشلئمه قاییتدیلار.
فئلئپوس و حبشهلی خاجه
26ربّئن بئر ملهیی فئلئپوسا ددی: «دور جنوب طرفئنه، اورشلئمدن غزّهیه گدن چؤل یولونا گت.» 27او دا دوروب گتدی. بئر حبشهلی خاجه کی، کَنداکه آدیندا حبشه ملکهسئنئن سارایینین بئر وزئری و اونون بوتون خزئنهسئنئن اوستونه مودئر ائدی، اوردا ائدی؛ او عئبادت اوچون اورشلئمه گلمئشدی. 28او اؤز دئیارینا قاییداندا عاراباسیندا اوتورموشدی و اِشَعیا پیغمبرئن کئتابینی اوخویوردی. 29موقدّس روح فئلئپوسا ددی: «یاخینلاش و او عارابایا قوشول.»
30فئلئپوس عارابایا ساری قاچدی و اشئتدی کی، خاجه اِشَعیا پیغمبرئن کئتابینی اوخویور. پس اونا ددی: «آیا اوخودوغونی هچ آنلاییرسان؟»
31او ددی: «آخی، نجه آنلایا بئلهرم اگر بئری منی هئدایت الهمهسه؟!» او فئلئپوسی دعوت الهدی کی، عارابایا مئنئب، اونون یانیندا اوتورسون. 32موقدّس یازیلاردان اوخودوغی متن بو ائدی:
«قویون کئمی کسئلمهیه آپاریلدی؛
و نجه بئر قوزی، اونی قیرخانین قاباغیندا دئلسئزدئر،
او دا اله آغزینی بله آچمادی.
33حقئر اولوندوغی زامان، عدالت اونا ورئلمهدی؛
اونون نسلئنی کئم بیان الئیهبئلر؟
چونکی حیاتی یر اوزوندن گؤتورولدی.»
34خاجه فئلئپوسا جاواب ورئب ددی: «تمنّا الهیئرم، دِه گؤروم، پیغمبر بونی کئمئن حاقّیندا دیئر؟ اؤزی حاقّیندا، یوخسا بئر اؤزگهسئنئن؟» 35فئلئپوس آغزینی آچدی و بو موقدّس یازیدان باشلاییب، عئسانین بارهسئنده کی خوش خبری اونا اعلان الهدی.
36یول ائنان گدنده اولار سو اولان یره یتئشدئلر و خاجه ددی: «باخ، بوردا سو وار! تعمئد آلماغیما نه مانع وار؟!» 37فئلئپوس ددی: «اگر بوتون اورهیئن ائنن ائناناسان، اولار.» او دا جاواب ورئب ددی: «ائنانیرام کی، عئسا مسئح تارینین اوغلودور.»
38خاجه امر الهدی کی، عارابا دایانسین و اولارین ائکئسی ده سویا گئردئلر؛ هم فئلئپوس، هم ده خاجه. و فئلئپوس اونی تعمئد وردی. 39سودان چیخدیقلاری زامان، ربّئن روحی فئلئپوسی گؤتوروب آپاردی و خاجه آرتیق اونی گؤرمهدی، و سوئنه-سوئنه اؤز یولونا گتدی. 40آمّا فئلئپوس اؤزونی اَشدود شهرئنده تاپدی و قیصرئیّه شهرئنه گلنه کئمی، یولوندا ائنجئلئن خوش خبرئنی بوتون شهرلرده اعلان الهیئردی.
Currently Selected:
حوارئلرئن ائشلری 8: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
