حوارئلرئن ائشلری 14
14
ائقونئیهده
1و اِله اولدی کی، ائقونئیه شهرئنده پولوس و بارنابا بئرلئکده یهودئلرئن عئبادتگاهلارینا گتدئلر و اِله دانیشدیلار کی، هم یهودئلردن، هم ده قیرییهودئلردن بئر بؤیوک خالق ائمان گتئردی. 2آمّا ائمان گتئرمهین یهودئلر قیرییهودئلری قیزیشدیریب، ذهئنلرئنی قارداشلارین ضئدّئنه بولاندیردیلار. 3بله ده پولوس و بارنابا اوردا اوزون بئر مودّت قالیب، ربّئن حاقّیندا جسارت ائنن دانیشیردیلار. رب ده اؤز فیضئنئن کلامینا شهادت ورئب، اولارین اَلی ائنن علامتلر و عجایئبلر یارادیردی. 4آمّا شهرئن خالقی ائکی یره بؤلوندی؛ بعضئلری یهودئلرئن طرفئنی توتموشدی، بعضئلری ده حوارئلرئن. 5او زامان کی، قیرییهودئلر و یهودئلر، ریئسلری ائنن بئرلئکده بئر سوئیقصد حاضیرلادیلار کی، پولوس و بارنابانی روسوای الهیئب داشلاسینلار، 6اولار بوندان خبردار اولوب، لئکایونیانین لئستره و دِربه شهرلرئنه و اطرافلارینا قاچدیلار. 7و اوردا ائنجئلئن خوش خبرئنی اعلان الهمهیه داوام وردئلر.
پولوس و بارنابا لئستره و دِربه ده
8لئسترهده آیاقلاری چولاق بئر آدام اوتورموشدی؛ او آنادان شل دوغولموشدی و هچ یرئمهمئشدی. 9بو آدام پولوسون دانیشدیغینا قولاق آسیردی. پولوس اونا گؤز دئکدی و اونون صاغالماغی اوچون ائمانی اولدوغونی گؤرنده، 10اوجا سَس ائنن اونا ددی: «آیاقلارین اوستونده دوز دایان!» او دا یرئندن آتیلیب یرئمهیه باشلادی.
11پولوسون نه الهدئیئنی گؤرَن خالق، اوجا سَس ائنن لئکایونیا دئلئنده ددئلر: «آللاهلار ائنسانلار شکلئنه دؤنوب آرامیزا اِنئبلر.» 12اولار بارنابانی ’زِعوس‘، پولوسی دا باش ناطئق اولدوغی اوچون ’هِرمِس‘ چاغیریردیلار. 13شهرئن اِشئیئنده اولان زِعوس معبدئنئن کاهئنی ده شهرئن دروازاسینین یانینا اؤکوزلر و گولدستهلر گتئردی و ائستهیئردی کی، خالق ائنان بئرلئکده اولار اوچون قوربان کسسئن.
14آمّا حوارئلر یعنی بارنابا و پولوس، بونی اشئدن واخت، پالتارلارینی ییرتیب، خالقین اورتاسینا آتیلدیلار و قیشقیریب 15ددئلر: «کئشئلر، نه اوچون بولاری الهیئرسئز؟ بئز ده سئزئن طبئعتئزه بنزهین ائنسانلاریق و سئزه ائنجئلئن خوش خبرئنی اعلان الهدئک کی، سئز بو باطئل شیلردن دئری تاری طرفئنه دؤنهسئز؛ او تاری کی، گؤیی، یری، دهنزی، و اولارین ائچئندهکی هر شیی یاراتدی. 16تاری، قدئمکی نسئللرده بوتون مئلّتلره ائجازه ورمئشدی کی، اؤز یوللارینا گتسئنلر. 17آمّا گئنه ده اؤزونی شهادتسئز بوراخمادی. یاخشیلیق الهدی و گؤیدن سئزه یاغیش و ثمرهلی فصئللر ورئب اورَکلرئزی یمک و شادلیق ائنان دویوردی.» 18حتّا بو شیلری دئیندن سورا دا، گوج ائنن خالقی اولارا قوربان تقدئم الهمکدن اَل چکدئردئلر.
19آمّا یهودئلر انطاکئیه و ائقونئیه شهرلرئندن گلئب خالقی قیزیشدیردیلار. اولار پولوسی داشا باسیب، شهردن اشئیه سورودولر و گومان الهدئلر کی اؤلوب. 20آمّا او زامان کی، شاگئردلر اونون اطرافینا ییغیلمیشدیلار، او دوردی و شهره گئردی و صاباحی گون بارنابا ائنن دِربهیه گتدئلر.
پولوس ائنطاکئیه یه قاییدیر
21اولار ائنجئلئن خوش خبرئنی او شهره اعلان الهیئب بئر چوخ آدامی شاگئرد الهیندن سورا، لئسترهیه، ائقونئیهیه و انطاکئیهیه قاییتدیلار. 22اولار شاگئردلرئن جانلارینی قووّتلندئرئب اولاری تشوئق الهیئردئلر کی، ائماندا مؤحکم دایانسینلار و دیئردئلر کی، «بئز تارینین پادشاهلیغینا چوخ اذئیّتلر ائنن گئرمهلییئک.» 23اولار هر کئلئسادا ائمانلی لار اوچون آغساقّاللار تعیئن الهدئلر و اوروج آغیز ائنان دوعا الهیئب اولاری ائمان گتئردئکلری ربّه تاپشیردیلار.
24اوندان سورا پئسئدئیه منطقهسئندن کچئب پامفئلئیه منطقهسئنه گلدئلر. 25اولار پِرجهده کلامی دانیشاندان سورا آتالیایا گتدئلر.
26و گمی ائنن انطاکئیهیه قاییتدیلار، او یره کی، یرئنه یتئردئکلری ائش اوچون اوردا تارینین فیضئنه تاپشیریلمیشدیلار. 27اورایا یتئشئب کئلئسانی بئر یره ییغدیقلاری زامان، اولارا نقل الهدئلر کی، تاری اولارین واسئطهسی ائنن نهلر الهدی و نجه ائمان قاپیسینی قیرییهودئلرئن اوزونه آچدی. 28اولار شاگئردلر ائنن بئرلئکده اوزون زامان اوردا قالدیلار.
Currently Selected:
حوارئلرئن ائشلری 14: CAB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
