ZEKHARIAH 4
4
Meivak khuam le Oliv Kungte
1Kei tawh a kiho vantungmi mah hong paikik a, a ihmu kimlai a kiphong bang keekin kei hong khanglosak hi. 2Amah in, “Bang na mu hiam?” ci-in hong dong hi. Kei zong, “Kham tawh a kibawl meivak khuam khat ka mu hi. Tua meivak khuam in meivak sagih nei a, meivak tui koih nading hai khat zong a khuam dawnah om hi. Tua meivak sagihte in meivak khau nei ciat uh hi. 3Meivak khuam gei ah oliv kung nih zong om a, meivak khuam lang tuakah om uh hi,” ci-in ka dawng hi.#Mang 11:4 4Tua ciangin kei zong vantungmi kiangah, “Sia aw, hihte bang a cihnopna ahi hiam?” ci-in ka dot ciangin 5amah in, “A cihnopna thei lo na hi hiam?” ci-in hong dawng a, kei zong, “Sia aw, ka thei kei hi,” ci-in ka dawngkik hi.
6Tua ciangin vantungmi in kei kiangah, “Topa in Zerubbabel tungah hih bangin thu gen hi: Galkap tam neihna hang hi lo, nangma vangliatna hang zong hi lo, keima tung panin na ngah vangliatna bek tawh na ma na tun zo ding hi.#Ezr 5:2 7Thuhaksa pente nangawn in na ma hong khaktan zo lo ding hi. Biakinn na lamkik dinga, a khupna suang na cian laitakin, mite in ‘Hoih mahmah hi,’ ci-in awng ngeingai ding uh hi, hong ci hi,” a ci hi. 8Topa in kei tungah thu hong gen hi. 9Amah in, “Zerubbabel in biakinn bulpi phut khin a, biakinn lam zong a zo ding hi. Tua ciangin ka mite in, amaute kiangah nang kong sawlna thu hong thei ding uh hi. 10A maa uh a telh loh manun ka mite lungkia uh a, ahi zongin Zerubbabel in biakinn lam nasep a makaihna a muh uh ciangin a lung uh damkik ding hi,” hong ci hi.
Vantungmi in, “Meivak sagihte pen, leitung khempeuh a etna Topaʼ mittang sagih ahi hi,” hong ci hi.#Mang 5:6 11Tua ciangin kei zong ama kiangah, “Meivak khuam pang tuak a om oliv kung nihte bang a cihnopna ahi hiam?#Mang 11:4 12Oliv thau a luan khiatna kham tuizawl nihteʼ gei-a om oliv hiang nihte bang a cihnopna ahi hiam?” ci-in ka dong hi. 13Amah in, “Thei lo na hi hiam?” ci-in hong dong a, kei zong, “Sia aw, thei kei ing,” ci-in ka dawng hi. 14Tua ciangin amah in, “Leitung khempeuhʼ Topaʼ na a sem dingin Pasian in teelin sathau a nilh mi nihte a cihnopna ahi hi,” hong ci hi.
Currently Selected:
ZEKHARIAH 4: TBR17
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
