ZEKHARIAH 12
12
Mailam Hunah Jerusalem A Suahtak nading
1Vanpi zalin leitung piangsak a, mihingte tungah nuntakna a pia Topa in Israel mite tawh kisai-in thu gen a, 2“Leenggahzu bangin Jerusalem khuapi ka bawl dinga, a kiim a om minam dangte in a nek ciangin khamin a hoi ding uh hi. Jerusalem khuapi a umcih uh ciangin Judah gam khuapi dangte zong umcih ding uh hi. 3Tua hun hong tun ciangin suangtumpi gik mahmah bangin Jerusalem khuapi ka bawl dinga, likkhiat a sawm minam khat peuhpeuh in liamlawh ding hi. Leitung minamdang khempeuh kipawlin Jerusalem a sim ding uh hi. 4Tua ni ciangin a sakolte uh ka lausak dinga, a sakol tung tuangte uh ka haisak ding hi. Ahi zongin Judah mite ka kem dinga, a galte uhʼ sakolte, a mit ka tawsak ding hi. 5Tua ciangin Judah minamte in, ‘Jerusalem-a a teeng mite, Vanglian Topa ahi amauʼ Pasianʼ hangin thahat uh hi,’ ci ding uh hi.
6“Tua ni ciangin Judah minamte, tulak kaang le buhphual kaang ka bangsak dinga, a kiim a om minam dangte khempeuh a susia ding uh hi. Ahi zongin Jerusalem mite, a khuapi sungah lungmuangin a om hithiat ding uh hi.
7“Tua ciangin Judah galkapte tungah gualzawhna ka pia masa dinga, Davidʼ suanlekhakte le Jerusalem khua miteʼ minthanna pen Judah midangteʼ minthanna sangin lian zaw tuan lo ding hi. 8Tua ni ciangin Topa in Jerusalem-a a teeng mite hu dinga, a gina lo pente nangawn David zahin thahat ding hi. Davidʼ suanlekhakte in Topaʼ vantungmi le Pasian mahmah bangin amaute a makai ding uh hi. 9Jerusalem sim ding a hanciam minam khempeuh tua ni ciangin ka susia ding hi.
10“Davidʼ suanlekhakte le Jerusalem khua miteʼ tungah hehpihna lungsim le thungetna lungsim ka guan ding hi. Amaute in a sut lup uh mipa enin, ta khat neihsun a sihsuah mite bangin kap ding uh a, tacil a khuaisuahte bangin nakpi takin kapin thum ding uh hi.#Joh 19:37; Mang 1:7 11Tua hun laitakin Jerusalem khua sungah kapin thumna pen Megiddo zanglei-a Hadad-rimmon pasianʼ sihna hangin kahna le thumna zah mahin nasia ding hi. 12Gam sung khempeuh ah a inn kuankuanin dahin kap ding uh hi. Davidʼ suanlekhakte sung panin a inn kuankuanin kapin, a zite uh zong a tuam mahin kap ding uh hi. Nathanʼ suanlekhakte zong a inn kuankuanin kapin, a zite uh zong a tuam mahin kap ding uh hi. 13Leviʼ suanlekhakte le a zite, Shimeiʼ suanlekhakte le a zite, 14le beh dang khempeuhte zong a behbehin, a zite uh tawh a tuam ciatin kapin a thum ding uh hi.#Mat 24:30; Mang 1:7
Currently Selected:
ZEKHARIAH 12: TBR17
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
