ZEKHARIAH 10
10
Topa in A Mite A Hotkhiatna
1Singkung lopa a sel hunin
Topa kiang pan guah ngen un.
Meii kaisakin, guah zusak a,
ankung khempeuh a dumsak pa,
Topa ahi hi.
2Mihingte in milim peuh thudotin
nei uh a,
a thu ngahte uh zuau thu le
a mawkna hi lel hi.
Mang khia thei-a kineite in
lam lakkhial uh a,
amauʼ hehnepnate a mawknapi hi lel hi.
Tua ahih manin tuu bangin
mite mangthang uh a,
makai a neih loh manun
gimna a ngah uh hi.#Mat 9:36; Mrk 6:34
3Ka mi a makaite tungah
ka heh suak mahmah a,
amaute gim ka pia ding hi.
Judah mite pen
Vanglian Topa ahi keima aʼ hi a,
amaute limtakin kemin,
ka sakol galkap thahatte
a suak ding uh hi.
4Amaute sung pan mi makaite,
galkap maangte, gam ukte,
hong khang khia ding uh hi.
5Kongzing buannawng lakah
a galte uh a tuancil gawp galkapte bangin
amaute gualzo ding uh a,
Topa in a ompih manin
amaute in gal a sim uh ciangin
a galteʼ sakol galkapte zo gawp ding uh hi.
6Judah mite ka thahatsak dinga,
Israel mite ka hon khia ding hi.
Amaute ka khasiat dinga,
inn ah ka ciahpih ding hi.
Amaute cikmah hunin
ka nial ngei loh bang keekin
nuam takin a om ding uh hi.
Kei pen Topa, amauʼ Pasian ka hi a,
amauʼ thungetnate ka pia ding hi.
7Israel mite, galkap hatte bang ding uh a,
zukham lungnuam,
bang ding uh hi.
A suan a khakte un
hih gualzawhna phawkin
lungdam ding uh a,
Topaʼ bawlna hangin kipak ding uh hi.
8Amaute samin ka kaikhawm dinga,
amaute hon khia-in a nidang zahin
mi tampi ka phasak ding hi.
9Minam dangte lakah
amaute ka thehthang hangin
a gamlapi panin
kei hong phawk ding uh hi.
Amaute le a tate uh suakta-in,
a vekpi-un inn zuanin
hong ciah khawm ding uh hi.
10Egypt le Assiria gam panin
amaute ka ciah pihkik dinga,
a gam a lei uh ah
ka tengsak ding hi.
Gilead gam le Lebanon gamah zong ka tengsak dinga,
gam khempeuh ah mi a dim ding hi.
11Amaute in lungkhamna tuipi
a phutkhak uh ciangin
keimah in tuihualte ka vatmai dinga,
Nail gun tui thukte kangcip ding hi.
Assiria mite ka niamkhiat dinga,
Egypt in a vangliatna taan ding hi.
12Ka mite ka thahatsak dinga,
amaute in kei hong bia-in
ka thu hong mang ding uh hi,
Topa in ci hi.
Currently Selected:
ZEKHARIAH 10: TBR17
Highlight
Copy
Compare
Share
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
