MATTHAI 4

Jesu A Kize-etna

(Mrk 1:12-13; Luk 4:1-13)

1Tua ciangin Dawimangpaʼ ze-etna a thuak dingin Kha Siangtho in gamlak ah Jesu a paipih hi.#Heb 2:18; 4:15 2Jesu in sun sawm li le zan sawm li sung an ne loin om khin ahih manin a gil a kial hi. 3Tua ciangin ama kiangah Dawimangpa hong pai a, “Pasianʼ Tapa na hih takpi leh hih suangte anlum a suah nadingin thu pia in,” a ci hi. 4Ahi zongin Jesu in, “Lai Siangtho sungah,

‘Anlum bek tawh

mite nungta lo a,

Pasian genkhiat thute tawh

nungta zaw hi,’

ci-in kigelh hi lo ahi hiam?” ci-in a dawng hi.#Thkna 8:3

5Tua ciangin Dawimangpa in gamlak panin Jerusalem khua ah Jesu paipih a, biakinn khumzang a sang pen munah a kah toh pih khit ciangin, 6“Pasianʼ Tapa taktak na hih leh Lai Siangtho sungah,

‘Pasian in

nang a hong kem dingin

a vantung mite

hong sawl ding hi.

Na khete le suang

a kitah khak loh nadingin

vantung mite in a khut uh tawh

nang hong dom ding hi,’

ci-in kigelh ahih manin, hih lai panin tuak suk in,” a ci hi.#La 91:11-12 7Jesu in, “Lai Siangtho mahah, ‘Na Topa Pasian na ze-et kei in,’ ci-in gen hi lo ahi hiam?” ci-in a dawng hi.#Thkna 6:16

8Tua ciangin Dawimangpa in mual sang mahmah khat ah Jesu paipih to a, leitung kumpi gam khempeuh le a hoihna teng a lah khit ciangin, 9“Ka mai ah kunin kei hong bia lecin hihte khempeuh nangma tungah kong pia ding hi,” a ci hi. 10Jesu in, “Satan aw, tai khia in. Lai Siangtho in, ‘Na Topa Pasian bek bia inla, ama na bek sem in,’ ci hi lo ahi hiam?” ci-in a dawng hi.#Thkna 6:13 11Tua ciangin Dawimangpa paikhia a, vantung mite hong pai-in Jesu huhin an a vak uh hi.

Jesu in Galilee gamah A Nasep Kipan

(Mrk 1:14-15; Luk 4:14-15)

12Jesu in Johan a kimatna thu a zak ciangin Galilee gam sungah va kihem hi.#Mat 14:3; Mrk 6:17; Luk 3:19-20 13Galilee gam Nazareth khua ah omsuak loin paikhia leuleu a, Zebulun le Naftali gam sung Galilee Tuili gei-a om Kapernaum khua ah a va teeng hi.#Joh 2:12 14Tua bangin a va teenna pen kamsang pa Isaiah thugen a tun nading ahi hi. Tua a genna ah,

15“Gentail miteʼ teenna

Galilee gam sung,

Jordan Gun gal khat,

Tuipi lam pangah a om

Zebulun le Naftali gam!

16Khuamial sunga a teeng mite in

khuavak lianpi mu ding uh hi.

Sihna gam khuamial sungah

a teeng mite tungah

khuavak hong taang ding hi,”

ci hi.#Isa 9:1-2 17Tua hun a kipan Jesu in thuhilh ding kipan a, “Vantung ki-ukna hong nai ta ahih manin kisikin na om zia uh kheel un,” ci-in thu a hilh hi.#Mat 3:2

Jesu in Ngabeng Mi Li Sam

(Mrk 1:16-20; Luk 5:1-11)

18Galilee Tuili gei ah Jesu a pai laitakin ngabeng Peter a kici Simon le a nau Andru, ngen tawh nga khuhin a om a mu hi. 19Jesu in amaute kiangah, “Kei hong zui un; nga mat bangin pawl tampi a ngah thei mi kong suaksak ding hi,” ci hi. 20Amau tegel in zong a ngente uh nusia-in Jesu a zui pah uh hi. 21Tua lai panin a paikhiat khit uh ciangin Zebedi tapa James le Johan-te unau, a pa uh tawh gunkuang sungah ngen puah in a om mu leuleu a, amau tegel zong a sam hi. 22Amau tegel in zong gunkuang le a pa uh nusia-in Jesu a zui pah uh hi.

Jesu in Mihonpi tungah Na Sem

(Luk 6:17-19)

23Galilee gam sung khempeuh ah Jesu pai kawikawi a, amauʼ kikhopna innte ah thu hilhin, vantung ki-ukna hangin lungdamna thute hilh a, natna tuamtuam a nei cina khempeuh a damsak hi.#Mat 9:35; Mrk 1:39 24Syria gam sung khempeuh ah ama thu kizel ahih manin dawivei mi, sibup mi, khut zaw khe zaw mi a kipanin natna satna a tuamtuam a nei mi khempeuh ama kiangah hong kipuak a, amah in a vekpi-in a damsak hi. 25Galilee gam, Khuapi Sawmte gam, Jerusalem khua, Judea gam le Jordan Gun gal khat gam panin mi tampi tak in Jesu a zui uh hi.

Currently Selected:

MATTHAI 4: TBR17

Highlight

Copy

Compare