MATTHAI 21

Gualzawhna tawh Jerusalem-a Lutna

(Mrk 11:1-11; Luk 9:28-40; Joh 12:12-19)

1Jerusalem khuanai, Bethfage khua a omna Oliv Mual a tun uh ciangin Jesu in a nungzuite nih ma sawl a, 2“Mai-a a om khua ah va pai un. Na tun uh ciangin la nuta khau a kikhih na mu ding uh hi. Hong sut unla hong kai un. 3Mi khatpeuh in hong paupih leh, ‘Topa in deih hi,’ ci le-uhcin hong paisak pah ding hi,” ci-in a vaikhak hi. 4Hih thu pen kamsang paʼ thugenna a tun nadingin a piang ahi hi. 5Tua a genna ah,

“En un, na kumpipa uh hong pai hi.

Kiniamkhiatna tawh lapi tung le la no tungah

tuangin hong pai hi,

ci-in Zion khua mite kiangah

gen un,” a ci hi.#Zek 9:9

6Nungzui tegel zong Jesu sawl bangin va pai uh hi. 7Amaute in a la nuta hong paipih uh a, a tungah a puante uh a phah khit uh ciangin Jesu a tuang hi. 8Mihon tampite in ama pai nading lampi ah a puante uh na phah uh a, a dangte in nisuh hiangte satin lampi ah a na phah uh hi. 9A mai-a pai mihonte le a nung a zui mihonte awng uh a, “Davidʼ suan Jesu in phatna ngah tahen! Topaʼ min tawh hong pai pa in thupha ngah tahen! A sangpen a om Pasian in phatna ngah tahen!” a ci uh hi.#La 118:25-26 10Jerusalem khua sung a tun uh ciangin khua sung mi khempeuh gamlum henhan uh a, “Hih pa kua ahi hiam?” ci-in khatlekhat a kidong uh hi. 11Mihonpite in, “Galilee gam Nazareth khua pan a kamsang Jesu hi,” ci-in a dawng uh hi.

Biakinn Siansakna

(Mrk 11:15-19; Luk 19:45-48; Joh 2:13-22)

12Tua ciangin Pasian biakna innpi huang sungah Jesu lut a, tua sungah van zuak van lei-a a om mi khempeuh a hawl khia hi. Sumkhek nasemin a om miteʼ sabuai le vakhu zuakteʼ tutnate a lumletsak gawp hi. 13Amaute kiangah, “Pasian in Lai Siangtho sungah, ‘Ka inn pen thungetna inn kici ding hi,’ ci napi-in, note in guktaakna phualpi na suaksak uh hi,” a ci hi.#Isa 56:7; Jer 7:11

14Biakinn sung Jesu kiangah mittawte le khebaite hong pai uh a, amah in amaute a damsak hi. 15Ahi zongin siampi liante le Thukham hilh siate in a nalamdang bawlte mu-in, biakinn sungah naupangte in, “Davidʼ suan Jesu in phatna ngah tahen!” ci-in a kikona a zak uh ciangin heh uh ahih manin 16Jesu kiangah, “Hih naupangteʼ otna na za hiam?” ci-in a dong uh hi. Jesu in, “Ka za hi. Lai Siangtho sungah,

‘Naungekte le naupangteʼ kam tawh

a cingtaak phatna na gensak hi,’

a cihna thu sim ngei lo na hi uh hiam?” ci-in a dawng hi.#La 8:2 17Tua ciangin Jesu in amaute nusia a, khuapi sung pan pai khia-in Bethany khua ah a giak hi.

Theikung A Kisamsiatna

(Mrk 11:12-14,20-26)

18A zingsang ciangin khuapi zuanin hong paikik laitakin Jesu a gil a kial hi. 19Lam gei ah theikung khat mu ahih manin a gei ah va pai a, ahi zongin a teh sim loh bangmah a mu kei hi. Jesu in tua theikung kiangah, “Gah ngei nawn kei in!” a cih khit phetin a theikung a si pah hi. 20Nungzuite in a muh uh ciangin lamdang sa uh ahih manin, “Bang hangin theikung tua ci sih pah ahi hiam?” a cih uh ciangin 21Jesu in, “Note kiangah a mantak a kong genin ah: Note in uplahna nei het loin, upna taktak na neih nak uh leh hih theikung tungah a piang bang na hih theih uh banah, hih mual kiang nangawn ah, ‘Na omna pan pai khia-in tuipi sung kidenna in,’ ci le-uhcin na cih bangun piang ding hi.#Mat 17:20; 1Kor 13:2 22Upna na neih nak uh leh na nget peuhpeuh uh na ngah ding uh hi,” a ci hi.

Jesuʼ Aana Neihna Kidong

(Mrk 11:27-33; Luk 20:1-8)

23Biakinn tual sungah Jesu lutkik a, thuhilhin a om laitakin siampi liante le upate ama kiangah hong pai uh a, “Hih nate kua thu tawh bawl a, na bawl nading kua in aana hong pia ahi hiam?” ci-in a dot uh ciangin 24Jesu in, “Kei zong thu khat kong dong masa ding hi. Na hong dawn nak uh leh kei zong kua thu tawh bawl cih kong gen ding hi. 25Johan in tuiphum theih nading thu koi lai panin ngah ahi hiam? Pasian kiang panin thu ngah ahi hiam, ahih kei leh mihingte kiang panin thu ngah ahi hiam?” a ci hi. Amaute khatlekhat kiseel uh a, “Pasian kiang pan hi,” ci lehang, “Bang hangin um lo na hi uh hiam?” hong ci ding hi. 26Ahi zongin, “Mihingte kiang pan hi,” ci leuleu lehang, mi khempeuh in Johan pen kamsang hi, ci-in ngaihsun uh ahih manin mihonte i kihta zel hi, kici uh hi. 27Tua ahih ciangin Jesu kiangah, “Ka thei kei uh hi,” ci-in a dawng uh hi. Jesu in zong amaute kiangah, “Kei zong hih nate, kua thu tawh ka bawl cih kong gen kei ding hi,” a ci hi.

Tapa Nihte Thu gentehna

28Tua ciangin Jesu in amaute kiangah, “Note in bangci ngaihsut na hi uh hiam? Mi khat in tapa nih nei hi. A ta u zaw kiangah, ‘Ka ta aw, tu ni-in leenggah lo ah va kuan in,’ ci-in a sawl ciangin 29amah in, ‘Kuan nuam kei ing,’ ci napi-in a lungsim kikheelin a kuankik hi. 30Tua ciangin a ta nau zaw kiangah tua mah bangin va ci a, ‘Pa aw, va kuan mah ning,’ ci napi-in a kuan kei hi. 31Hih tapa nihte sung panin a koi bel pen a paʼ deih bangin gamta ahi hiam?” a ci hi. Amaute in, “A ta u zaw a ta hi,” a ci uh hi. Tua ciangin Jesu in amaute kiangah, “Note kiangah a mantak a kong genin ah: Pasianʼ ukna sungah note sangin siahdongte le numei paktatte lut masa zaw ding hi. 32Bang hang hiam cih leh note kiangah Tuiphumpa Johan hong pai-in thuman lampi hong lak napi-in na um kei uh a, ahi zongin siahdongte le numei paktatte in a um uh hi. Hih thu na theih khit uh ciang nangawnin na lungsim uh na kheel nuam tuan kei uh a, na um kei veve uh hi.#Luk 3:12; 7:29-30

Leenggah Lo le A Khote Thu gentehna

(Mrk 12:1-12; Luk 20:9-19)

33“Thu gentehna dang khat na ngai lai un. Mi khat in lo zuanin leenggui suan a, a kimkot umin, leenggah cil nading bawl a, a hon nading tausang khat a lam khit ciangin lo khawhlawhte khawhlawhsakin gam dangah a pai hi.#Isa 5:1-2 34Leenggah min hun a tun ciangin ama ngah ding teng a va la dingin lo khawhlawhte kiangah a nasemte a paisak hi. 35Lo khawhlawhte in a nasemte na manin khat na sat gawp uh a, khat na thatin, khat suang tawh na deng gawp uh hi. 36Tua ciangin lo nei pa in a masa-a sangin nasem a tam zaw va paisak leuleu a, ahi zongin a masa-a mah bangin a nasemte a na bawlsia veve uh hi. 37Tua khit ciangin ka tapa paisak leng na zahtak ding uh hi, ci-in ngaihsun ahih manin a tapa a paisak hi. 38Ahi zongin lo khawhlawhte in a tapa a muh uh ciangin, ‘Hih pa pen a gamhluah ding pa ahi hi. Hong pai un; amah thatin a luah ding teng eite in la ni,’ a kici uh hi. 39Tua ahih manin amah manin that uh a, lo nawl ah a paai uh hi. 40Tua ahih ciangin leenggah lo nei pa hong pai ciangin a lo khawhlawhte bangci bawl ding ahi hiam?” ci-in a dong hi. 41Amaute in, “Tua migilote that gawp dinga, a hunhunin leenggah a pia ding lo khawhlawh dangte khosak ding hi,” a ci uh hi.

42Jesu in amaute kiangah, “Lai Siangtho sungah,

‘Innlamte in a nilkhiat suang pen

innkiu suang bulpi suak khinta hi.

Hih pen Topaʼ bawl hi a,

i muh ciangin lamdang i sa hi,’

ci-in a kigelhna sim ngei lo na hi uh hiam?#La 118:22-23 43Tua ahih ciangin note kiangah kong genin ah: Note pen Pasian hong ki-uksak nawn lo dinga, a kilawmin a gamta ding mite bek Pasian in uk ding hi. 44Hih suang tungah a kia mi khempeuh kizan gawp dinga, mi khatpeuh tungah tua suang a kiat leh zong deng zan gawp ding hi,” a ci hi.

45Siampi liante le Farisi mite in hih thu gentehna a zak uh ciangin amaute a cih nopna-in a gen ahih lam a phawk uh hi. 46Jesu a man dingin kithawi uh a, ahi zongin mihonte in kamsang khatin ngaihsun uh ahih manin mihonte a kihtak manun a man ngam kei uh hi.

Currently Selected:

MATTHAI 21: TBR17

Highlight

Copy

Compare