MATTHAI 12

Nungzuite in Sabbath Ni-in Mangbuhvui Zut

(Mrk 2:23-28; Luk 6:1-5)

1Tua zawh a sawt loin Sabbath ni khatin mangbuh lo nawkin Jesu a pai hi. A nungzuite a gil uh kial ahih manin mangbuh vuite zutin a ne uh hi.#Thkna 23:25 2Farisi mite in a muh uh ciangin Jesu kiangah, “En in, Sabbath ni-in i hih dingin a kilawm lo gamtatna na nungzuite gamta uh hi,” a ci uh hi. 3Jesu in amaute kiangah, “David le a kikholhpihte a gilkial laitakun Davidʼ gamtatna thu sim ngei lo na hi uh hiam? 4Pasianʼ inn sungah amah lut a, siampite lobuang, amah le a kikholhpihte in a nek theih ding ahi lo Ompihna Anlum la-in amah le a kikholhpihte in a ne uh hi.#1Sam 21:1-6 #Siam 24:9 5Tua ahih kei leh zong siampite in Sabbath sim mahin biakinn sungah Sabbath thukham khial napi-in mawhsakna a ngah tuan lohna thu uh, Moses Thukham sungah sim ngei lo na hi uh hiam?#Gam 28:9-10 6Note kiangah kong genin ah: Tua biakinn sangin a lian zaw khat hih lai ah hong om hi. 7Lai Siangtho sungah, ‘Ganhing tawh biak ding ka deih kei a, migitna ka deih zaw hi,’ a cihnopna thu teltakin thei le-uhcin a mawh lopi kimlai na mawhsak kei ding uh hi.#Mat 9:13; Hos 6:6 8Bang hang hiam cih leh Mihing Tapa pen Sabbath ni a ukpa ahi hi,” ci-in a dawng hi.

Khut Langkhat Zaw Mipa

(Mrk 3:1-6; Luk 6:6-11)

9Tua lai panin Jesu pai suakin amau kikhopna inn sungah a lut hi. 10Tua lai ah a khut lang khat a zaw mi khat a na om hi. Jesu gamta khial hi, ci-in a mawhna a zong nuam mi pawl khat tua lai ah om uh ahih manin tua mite in Jesu kiangah, “Sabbath ni-in cina damsak ding a kilawm mah ahi hiam?” ci-in a dong uh hi. 11Jesu in amaute kiangah, “Note khatpeuh in tuu khat nei unla, Sabbath ni-in dum sungah tua tuu kia leh, tua tuu va lenin kai khiato ding hi lo na hi uh hiam?#Luk 14:5 12Mi pen tuu sangin nakpi takin manpha zaw ahih manin Sabbath ni-in a hoih sep ding a kilawm ahi hi,” ci-in a dawn khit ciangin 13a mipa kiangah, “Na khut zan in,” a ci hi. A mipa in zong a khut zan pah a, midangte mah bangin hoihtakin a damkik hi. 14Ahi zongin Farisi mite paikhia uh a, Jesu a thah theih nading uh vai a hawm uh hi.

Pasianʼ Teel Nasem pa

15Jesu in amah a kisawmna thu a theih ciangin tua mun panin a paikhia hi. Mi tampi in amah hong zui uh hi. Amah in cina mi khempeuh damsak a, 16-17Pasian in kamsang Isaiah tungtawnin a gen thu a tun theih nadingin, kuama kiangah ama thu a gen loh nadingun thu a pia hi. Tua a genna ah,

18“Keimah in ka teel sa

ka nasem pa, ka it mahmah,

ka lungkimna pa en un.

Keima Kha

ama tungah ka pia dinga,

Gentail mite tungah

upna man a pulak ding hi.

19Amah in thu seel loin,

a aw sangsak lo dinga,

kong lak ah zong

a awging kiza lo ding hi.

20Amah in a zawngkhal mite

dop bawl dinga,

a cimawh mite tungah

migi ding hi.

Thuman thutang

a gualzawhsak mateng

khawl ngei lo ding hi.

21Gentail mite in amah bek mah

lametin nei ding uh hi,”

ci hi.#Isa 42:1-4

Jesu le Beelzebul

(Mrk 3:19-30; Luk 11:14-23)

22Tua ciangin mi pawl khat in Jesu kiangah mit tawt le pau theih loh a thuah dawivei mi khat hong paipih uh hi. Jesu in amah damsak ahih manin amah hong pau thei-in khua zong hong mu thei hi. 23Tua ciangin mi khempeuh in lamdang sa mahmah uh a, “Hih pa, i lam etet Davidʼ suan hi lo ding ahi hiam?” a ci uh hi. 24Ahi zongin Farisi mite in hih thu a zak uh ciangin, “Dawimangpa Beelzebul min tawh dawi a hawl khia hi lel hi,” a ci uh hi.#Mat 9:34; 10:25 25Jesu in amauteʼ ngaihsutna thei ahih manin amaute kiangah, “Gam khat peuhpeuh, a gam mite kiphelkhamin pawl khat le pawl khat kido le-uh tua gam a sia suak ding hi; khua khat ahi a, innkuan khat ahi zongin kiphelkhamin kido le-uh kip lo ding hi. 26Tua mah bangin Satan le Satan kihawl khia le-uh a ukna bangci kip theih ding ahi hiam? 27Keimah in Beelzebul vangliatna tawh dawite hawl khia ka hih leh na mipihte un a kuaʼ vangliatna tawh hawl khia ahi uh hiam? Na mipihte un na ngaihsut khialhna uh hong kilangsak hi. 28Noteʼ ngaihsut bang hi loin, Pasianʼ Kha in dawi hawlkhiat nading vangliatna kei tungah hong pia ahih manin note lakah Pasianʼ ukna hun hong kipan khin ahihna hong kilang hi. 29Mi khatpeuh in mi thahat khat paʼ inn sungah lutin a neihsate a laksak theih nadingin tua inn nei a thahatpa a hencip masak phot ding kisam hi. A hencip zawh khit ciang bekin a inn ah lutin a neihsate la thei pan hi. 30Kei hong pawlpih lo peuhmah keima lang hi uh a, kei hong kaihkhop pih lo peuhmah a thehthang ahi uh hi.#Mrk 9:40 31Tua ahih manin note kiangah kong genin ah: Mihingteʼ kampau khialhna le gamtat khialhnate kimaisak thei dinga, ahi zongin Kha Siangtho langpangin a gensiate kimaisak lo ding hi. 32Mihing Tapa langpangin a gensiate a mawhna uh kimaisak thei dinga, ahi zongin Kha Siangtho langpangin a gensiate pen tu hun a kipan a tawntungin a mawhna uh kimaisak lo ding hi.#Luk 12:10

Singkung A Gahin Kithei

(Luk 6:43-45)

33“Singgah limci a gah theih nadingin a kung a cidam phot ding kisam a, a kung gina kei leh a gah limci lo hi. Tua ahih manin singkung khat a pianzia pen a gahin hong kithei hi.#Mat 7:20; Luk 6:44 34Gul bangin ngian a zang note aw, migilo na hih uh ciangin bangci-in thuhoih gen thei mah ding na hi uh hiam? Bang hang hiam cih leh lungsim sunga thu om pen kam in a gen khia hi bek hi.#Mat 3:7; 23:33; Luk 3:7; Mat 15:18; Luk 6:45 35Mihoihte in a hoih a khol teng suah khia a, migilote in gitlohna a khol teng a suah khia ahi hi. 36Note kiangah kong genin ah: Thukhen ni ciangin mi khempeuh in phattuamna a om lo a kampaunate uh khempeuh bangin thusitna a thuak ding uh hi. 37Bang hang hiam cih leh nomau kampauna tawh kizui-in thu hong kikhen dinga, dik hi, cihna ahi a, mawh hi, cihna ahi zongin na ngah nadingun nomau kampau mah hong kibulphuh ding hi,” a ci hi.

Tu hun Migilote in Lim Khat Ngen

(Mrk 8:11-13; Luk 11:29-32)

38Tua ciangin Thukham hilh siate le Farisi mi pawl khat in Jesu kiangah, “Sia aw, nalamdang khat nong lah ding ka deih uh hi,” ci-in a ngen uh hi.#Mat 16:1; Mrk 8:11; Luk 11:16 39Ahi zongin Jesu in, “Tu hun a mite bangzahin giloin, Pasianʼ thu thei lo ahi uh hiam? Nalamdang ka bawl ding na hong ngen tazen uh hi. Jonah thu tawh kisai nalamdang longal a dang hong kilak lo ding hi.#Mat 16:4; Mrk 8:12 40Ngasa gilpi sungah sun thum le zan thum sung Jonah a om mah bangin Mihing Tapa zong sun thum le zan thum sung mah lei sungah om ding hi.#Joh 1:17 41Jonah in amaute kiangah thu a hilh ciangin a mawhna panun kisikkik uh ahih manin thukhen ni ciangin Nineveh khua mite in note mawhsakna thu hong gen ding uh hi. Note kiangah kong genin ah: Tu mahmah in note kiangah Jonah sangin a lian zaw khat a om hi.#Joh 3:5 42Leitaw lam gam kumpinu in Solomonʼ pilna thu a ngai dingin leitung phel khat kantanin hong pai ahih manin thukhen ni ciangin amah in note mawhsakna thu hong gen ding hi. Note kiangah kong genin ah: Tu mahmah in hih lai ah Solomon sangin a lian zaw khat a om hi.#1Kum 10:1-10; 2Khang 9:1-12

Dawi Hong Lutkikna

(Luk 11:24-26)

43“Mi khatpeuh sung panin dawi a kihawlkhiat khit ciangin a ten nading mun keuna zongin a vak kawikawi hi. Ahi zongin a ten nading mun a muh zawh loh ciangin, 44‘Ka pai khiatna sa inn mahah ciahkik ning,’ ci hi. A hong paikik ciangin tua inn na awng lai a, kipuah siangin hoihtakin a om a mu hi. 45Tua ciangin va paikik a, amah sangin a siahuai zaw dawi sagih hong tunpihin tua mipa sungah a teeng uh hi. Tua ahih manin tua mipa pianzia pen a masa huna sangin a sia zaw hi. Tua ahih ciangin tu hun a migilote zong hih mipaʼ pianzia mah tawh kibang ding uh hi,” a ci hi.

Jesuʼ Nu le A Naute

(Mrk 3:31-35; Luk 8:19-21)

46Tua bangin mite kiangah thu genin a om laitakin a pua lamah a nu le a naute in Jesu hopih nuamin a om uh hi. 47Tua ahih manin tua lai ah a om mite khat in Jesu kiangah, “Na nu le na naute in nang hong hopih nuamin a pua lamah om uh hi,” a ci hi. 48Ahi zongin Jesu in tua mipa kiangah, “Ka nu kua bangte hi a, ka naute kua bangte ahi uh hiam?” a cih khit ciangin 49a nungzuite lam kawk a, “Hihte pen ka nu le ka sanggamte ahi uh hi. 50Vantungah a om ka Paʼ deihna bangin a gamta mi peuhmah ka sanggam pasal, ka sanggam numei, ka nu ahi uh hi,” ci-in a dawng hi.

Currently Selected:

MATTHAI 12: TBR17

Highlight

Copy

Compare