Romiól 3

Alla hámica sóiyi táke

1Héen óile, Yohúdi ókkol ottu kii fáida asé? Ázomi gorár kii kimot asé? 2Becók, hárr mikká ttu bicí fáida asé. Ebbe agor gán óilde, Alla ye ítarar hañse Íbar kalam nazil gorí bolla ítara re bóraca goijjíl.

3Ítara kessú ye beimani goijjé de óile yo kii óiye? Ítara beimani goijjé bóuli kí Alla ye yó beimani goríbo né? 4Bilkúl no! Bólke fottí manúc misá ṭóorile yo, Alla sóiyi ṭóorar zorur, zendilla pak-kalam ot asé,

“Tuáñr hotá ye sábut goré de, Tuñí hámica sóiyi táko,

aar Tuáñre elzam laga zah de októt Tuñí ziti aiyó.”#3:4 Zobur 51:4

5Montor añárar kuhame zodi Allar hók bisar zahér ó, tóoile añára kii hoitám? Alla ye añára re sáñza dé de híyan nainsáfi no ór ne? Becók híyan óilde insán or ekkán nozoriya. 6Héndilla bilkúl no! Arnóile Alla ye duniyair bisar keéngori gorí faribó? 7Hodúne endilla hoibó, “Añr misá hotáye zodi Alla hámica sóiyi táke de híyan zahér ó aar híyane Íbar mohíma ó, tóoile Íba ye añré gunágar ísafe kiyá bisar goré?” 8Héndilla hoó de ítara endilla yó hoibó, ziyán añára hoói bóuli hoói hodúne añárar bodnam goré, ki hoilé, “Aiyó, añára burai gorígoi, kiyólla-hoilé zetó burai gorí fare héto gom.” Hé bodnam-goróya ókkole ítarar laayek sáñza hámaha fai zaybo.

Forhésgar kiyé nái

9Yala añára kii hoitám? Añára Yohúdi ókkol kí Beyohúdi ókkol or túaro beétor? Bilkúl no; añára toh age yó hoóilam, tamám Yohúdi ókkol edde Beyohúdi ókkol gunár kobzat asé. 10Zendilla pak-kalam ot asé,

“Forhésgar honókiye nái, ekzon úddwa nái;

11buz ola kiyé nái,

honókiye Allar talac no goré.

12Beggún manúc sóiyi ttu lorigiyói,

beggún ekku fúañti bigiṛigiyoi;

gom ham goré de honókiye nái,

ekzon úddwa nái.”#3:12 Zobur 14:1-3; 53:1-3; Giyanor-ustat 7:20

13“Ítarar muk fooñsa lac or kúla hobor or ḍóilla;

ítara nizor zire férokbazi goré,”#3:13 Zobur 5:9

“Ítarar uñṭ ot háf or bic asé.”#3:13 Zobur 140:3

14“Ítarar muk gozzobe furaiya; ítarar hotát honó miṛá nái.”#3:14 Zobur 10:7

15“Kún gorí bolla ítara duñri zaa;

16ítara zeṛé zaa héṛe dónco edde mosibot foida goré.

17Cánti góri tákar rasta ítara no siné.”#3:17 Yesáyah 59:7,8

18“Ítarar dil ot Allar honó ḍoor nái.”#3:18 Zobur 36:1

19Yala añára zani de, Córiyote ziín hoó híin uitará re beh hoó zetará Córiyot or tole asé; zeéne honó insán ottu hoibár kessú no táke, aar fura duniyai ttu Allar hañse ísafkitab diya fore, 20kiyólla-hoilé Córiyot amól gorí honó insán Íbar nozor ot forhésgar no ṭóoribo, kiyólla-hoilé Córiyot or duara toh gunár zankari éna aiyé.

Iman or duara forhésgari

21Montor yala toh Alla ye maincóre Córiyot sára keéngori forhésgar bóuli kobul goré de rasta híyan zahér óiye, ziyán or baabute Tourat Córif ot edde nobi ókkol or kitab ot óu zikír asé. 22Rasta híyan óilde, zetará Isá Mosihr uore iman ané ítara beggún ore nizor-nizor imane Alla ye forhésgar bóuli kobul goré; rasta híyan ot Yohúdi edde Beyohúdi honó forók nái, 23kiyólla-hoilé beggúne toh guná goijjé, aar Allar mohíma ttu maárum óigiyoi. 24Montor Mosih Isár bútore asé de azadir usílaye Alla ye beggún ore Nizor rahámot or hádiya ísafe forhésgar bóuli kobul goré. 25Alla ye Íba re Nizor lou báca báy endilla koffara ísafe peec goijjé ziyán or uore iman aníle gunár maf faa zah. Híyan lói Alla ye daháiye de, Íba oñtté yó Insáfwala accíl zeñtté insáne goijjíl de gunár sáñza no di Íba ye cóoi-cóoi accíl. 26Héndilla gorí Íba ye e októt sábut goijjé de ki, Íba insáfwala, aar zee niki Isár uore iman ané ítare Íba ye forhésgar bóuli kobul goré.

27Tóoile borái goríbar kii asé? Kessú nái. Hon córiyot olla bóuli nái de? Amól or né? No, bólke iman or córiyot olla bóuli. 28Hétolla añára dóri de ki, manúc forhésgar ṭóore de nizor imane, Córiyot or amóle no. 29Tóoile Alla ki siríf Yohúdi ókkol or Alla? Íba kí Beyohúdi ókkol or óu Alla no? Becók, Íba Beyohúdi ókkol or óu Alla, 30kiyólla-hoilé Alla toh ekgwá éna asé, zibá ye Yohúdi ókkol ore forhésgar bóuli kobul goríbo de yó imane, aar Beyohúdi ókkol ore goríbo de yó imane. 31Tóoile kí añára imane Córiyot ore baatel gorír? Bilkúl no! Bólke, añára Córiyot zari rakí deh.

Currently Selected:

Romiól 3: RST

Highlight

Copy