Romiól 16

Imandár ókkol ore sólam

1Foibi nam or añárar ze bóin Kinkíriya cóor ot asé de zomát or háadem, híbar baabute añí tuáñra re mocuwara dir de, 2tuáñra híba re Malik or name endilla gori gosíloiyo zendilla Allar pak bonda ókkol ore gosílowar zorur, aar híba ze modot olla tuáñrar muútac ó, híba re híyan diiyo, kiyólla-hoilé híba ye añré cóo boóut maincóre modot goijjé.

3Prisíla re edde Ekúila re añí sólam díyi hoiyó, zetará Mosih Isár bútore añr fúañti ham-goróya, 4zetará añr lla bóuli nizor zan hótorat félaiye. Ítarar cúkur siríf añí gorí de no bólke Beyohúdi ókkol or tamám zomát ókkole yó goré.

5Ítarar gór ot zoma ó de zomát twa re yó sólam díyi hoiyó.

Añr adorja Ipenítus ore yó sólam díyi hoiyó, zibá Ecíya elaka ttu Mosihr foóila ummot.

6Moriyam ore yó sólam díyi hoiyó, zibá ye tuáñra lla bicí meénnot goijjé.

7Andrunikus edde Juúniya re yó sólam díyi hoiyó, zetará añr koumi manúc aar añr fúañti ziyól háiṭṭil. Sáhabi gún or bútore ítara bicí namdár; ítara Mosihr bútore añr age lóti asé.

8Ampeliyatas ore yó sólam díyi hoiyó, zibá Malik or bútore añr adorja.

9Mosihr bútore añárar sáañti ham-goróya Urban ore edde añr adorja Istakus ore yó añí sólam díyi hoiyó.

10Apelis ore yó sólam díyi hoiyó, zibá re Mosihr ummot de híyan sóiyi faa giyéh.

Aristobulus or gór ṭíya re yó sólam díyi hoiyó.

11Hérodiyon ore yó sólam díyi hoiyó, zibá añr koumi manúc. Héndilla, Narkissus or gór ṭíya re yó díyi hoiyó, zetará Malik or bútore asé.

12Turféna edde Turfósima re yó sólam díyi hoiyó, zetará Malik or ham-goróya.

Adorja bóin Ferísa re yó sólam díyi hoiyó, zibá ye kúb meénnot or sáañte Malik or ham goijjé.

13Malik or basíloiya manúc Rufus ore edde yóggwar maa re yó sólam díyi hoiyó. Yóggwar maa añr óu maa.

14Asinkiritus, Felegon, Harmis, Patorobas, Hermas edde ítarar fúañti ar ze imandár báiboináin asé ítara re yó sólam díyi hoiyó.

15Filologus edde Juliya re, Neriyus edde íbar bóin ore, Olimpas ore edde ítarar fúañti Allar ze pak bonda ókkol asé ítara beggún ore yó sólam díyi hoiyó.

16Tuáñra ezzon ore ezzone pak dile appá dí sólam zano.

Mosihr tamám zomát ókkole tuáñra re sólam zanar.

Ahéri Nosíyot

17Yala, báiboináin ókkol, añí tuáñra re aros gorír, tuáñra faiyó de taalim or ulḍa zetará faáṭa-faáṭi edde bazá ókkol foida goré, ítarar uore nozor rakíyo, aar ítara ttu duré tákiyo. 18Kiyólla-hoilé héndilla manúc ókkole toh añárar Malik Mosihr hédmot gorér de no, bólke nizor feṭ faler deh. Ítara miṛá-miṛá edde tuládiya hotá ókkol hoói cáda-cída manúc ókkol or dil ot daga deh. 19Tuáñrar fórmadarir hóbor toh beggún or han ot foóñicce, hétolla añí tuáñra re lói bicí kúci; montor añí saái de, tuáñra gom ham or buddíman ó aar kuham ottu maasum táko.

20Cánti dooya Alla ye Cóitan ore bicí hára tuáñrar foor tole di ficífelaibo.

Añárar Malik Isár rahámot tuáñrar uore zari tákouk.

21Añr fúañti ham-goróya Timóti ye tuáñra re sólam zanar; héndilla, añr koumi manúc Lukíyas, Yason edde Sosipatere yó zanar.

22Añí Tertiyus, zar áta e ceñṛí gán lekér, añr torfóttu yó tuáñra re Malik or name sólam.

23Gayus, zibár gór ot añí Pául táki aar fura zomát zoma ó, íba ye yó tuáñra re sólam zanar.

Héndilla, cóor or kecíyar#16:23 Ṭiañ-foicár ísaf rakár zimmadar Erastuse edde bái Kuwartuse yó tuáñra re sólam zanar.

24Añárar Malik Isár rahámot tuáñra beggún or uore zari tákouk.

25Alla, zibá níki Isá Mosihr baabute añí tobolik gorí de kúchóbor mozin tuáñra re mozbut goríbar kaabel, Íba ye boóut zobana lóti hé kúchóbor or gufon niyot ore lukai raikkíl, 26montor yala hé niyot zahér gorá gíyeh, aar agor nobi ókkole leikké de kitab or duara edde abadulabadi Allar hókume híyan tamám koum ókkol or hañse zanaidiya zar, zeéne ítara iman aní fórmadar bone. 27Hé lehár giyani Allar taarif Isá Mosihr duara abadulabad ówat tákouk. Aamin.

Currently Selected:

Romiól 16: RST

Highlight

Copy