Lukás 3
3
Bápṭismadoya Yaháyar tobolik
(Mot 3:1-12; Mak 1:1-8; Yoh 1:19-28)
1Tibiriyus Káisar#3:1 Girík ot Káisar hoó de híyan nam no, híyan ekkán Rom raijjor baáñcca ókkol or lokób. or hókumot fundóro bosór soler de októt, zeñtté Pontiyus Filat accíl de Yohúdiyar hákim, aar Hérud accíl de Galil or hókumot-goróya, yóggwar bái Filíp accíl de Itúriyar edde Trakonitis elakar hókumot-goróya, Laiséniyas accíl de Abilenir hókumot-goróya, 2Boro imam accíl de Hánan edde Káiyafas, héñtte Allar kalam moidan elakat Zakaríyahr fua Yaháyar hañse nazil óiye. 3Tói yóggwa Jordán hál or sairókul or elaka beggún ot zai tobolik gorér de, gunár maf fai bolla touwá gorí bápṭisma loito. 4Zendilla nobi Yesáyahr kitab ot leikká asé:
“Moidan zagat ezzone guzori-guzori eén hoór,
‘Mabud or foñt toiyar goró,
Íbar rasta uzu goró.
5Fottí gúna bóra zaybo,
fottí faár edde murá fúwan gorá zaybo.
Behañsúra foñt ókkol uzu gorá zaybo,
ṭeéilameila rasta ókkol fúwan gorá zaybo,
6aar fura insán zati ye Allar nejat dekíbo.’ ”#3:6 Yesáyah 40:3-5
7Hétunot yóggwa ye zetará yóggwa ttu bápṭisma loito aiccé ítara re hoór de, “Ó háf or fuain ókkol! Aibár gozzob ottu dáizayboi lla tuáñra re hone úñciyari díye? 8Touwá lói mil há de héndilla gulagala ókkol dóro, aar nizor dil ot endilla howát no doijjo de ki, ‘Añára ttu toh baf ísafe Ibrahím asé.’ Añí tuáñra re hoóir, Alla ye sailé e cíl lun ottu yó Ibrahím olla fuain foida gorí fare. 9Aar ehón toh gas or gurat kuróil raká gíyeh. Hétolla, ze gas ot gom gula no dóre, yíba re haṛi ooin ot félaidiya zaybo.”
10Manúc cúne yóggwa ttu fusár gorér de, “Tóoile añára ttu kii gorár zorur?”
11Yóggwa ye ítara re zuwabe hoór de, “Zar ttu duwá kuruta asé, íte nái de ítare eggwá doo, aar zar ttu hána asé, íte yó héndilla goró.”
12Házana-tulóya ókkol óu bápṭisma loito aiccé; ítara yóggwa re hoór de, “Úzur, añára ttu kii gorár zorur?”
13Yóggwa ye ítara re hoór de, “Ain ot asé de yár túaro barái no loiyo.”
14Héndilla, fóous ókkole yó yóggwa ttu fusár gorér de, “Añára ká, añára ttu kii gorár zorur?”
Yóggwa ye ítara re hoór de, “Kiyó ttu dómki dí kessú no loiyo, honókiyor uore misá elzam no lagaiyó, nizor muzuri loi kúci táikko.”
15Zeñtté manúc cún acár hálot ot accíl, aar ítara beggúne nizor dile-dile Yaháyar baabute báfat accíl de, yóggwa Mosih ói né no, 16hétunot Yaháya ye zuwabe ítara beggún ore hoór de, “Añí toh tuáñra re fanít éna bápṭisma díh; montor zibár tokka añr túaro ḍoóñr Íba aiyér; añí Íbar cenṭár or fíta kúli bolla úddwa laayek no. Íba ye tuáñra re Pak-Ruh edde ooin loi bápṭisma díbo. 17Íba ttu Nizor kula Nizor át ot asé, Nizor hóñla re cúndorgori sáf gorí bolla edde giyuñ ókkol ore dolagorí gudam ot rakí bolla; montor Íba ye suwa gún ore honódin no nifé de ooin ot furat difélaibo.”
18Héndilla aró boóut nosíyot ókkol lói Yaháya ye maincór hañse kúchóbor tobolik goijjíl. 19Lekin hókumot-goróya Hérude nizor bái or bou Hérudias ore biyá goijjíl de hétolla edde yóggwa ye ze bura ham ókkol goijjíl híin beggún olla zeñtté Yaháya ye yóggwa re bóṭboṛáiye, 20tói yóggwa ye hé bura ham beggún ot aró ekkán baráiye, híyan óilde, yóggwa ye Yaháya re ziyól ot bon gorí raikké.
Isár bápṭisma
(Mot 3:13-17; Mak 1:9-11)
21Zeñtté manúc beggúne bápṭisma loiyé, Isá ye yó bápṭisma loiyé. Íba dua gorér de októt asman kúligiyoi, 22aar Pak-Ruh hoitor or ḍóilla jisím or súrote Íbar uore lami aiccé. Aar asman ottu eggwá abas aiccé de, “Tuñí Añr adorja Fua, Añí Tuáñre lói bicí kúci.”
Isá Mosihr fissán
(Mot 1:1-17)
23Zeñtté Isá ye Allar ham gorá cúru goijjé, héñtte Íbar boc tokoriban tiríc bosór; maincé ṭáaitto de, Íba Yusúf or fua.
Yusúf óilde Hélir fua. 24Héli Mattát or fua,
Mattát Leévir fua, Leévi Melkir fua,
Melki Jannair fua, Jannai Yusúf or fua,
25Yusúf Mattatíyas or fua, Mattatíyas Ámos or fua,
Ámos Nahum or fua, Nahum Esálir fua,
Esáli Naggair fua, 26Naggai Maát or fua,
Maát Mattatíyas or fua, Mattatíyas Sémiyir fua,
Sémiyi Josék or fua, Josék Jodar fua,
27Joda Joannar fua, Joanna Resár fua,
Resá Zerubabel or fua, Zerubabel Cáltiyel or fua,
Cáltiyel Nerir fua, 28Neri Melkir fua,
Melki Addir fua, Addi Kosám or fua,
Kosám Elmadom or fua, Elmadom Er or fua,
29Er Yehócuar fua, Yehócua Eliyazar or fua,
Eliyazar Jorim or fua, Jorim Mattát or fua,
Mattát Leévir fua, 30Leévi Símiyon or fua,
Símiyon Yohúdahr fua, Yohúdah Yusúf or fua,
Yusúf Jonam or fua, Jonam Eliyakím or fua,
31Eliyakím Maleyar fua, Maleya Minnar Fua,
Minna Mattátar fua, Mattáta Natan or fua,
Natan Dawud or fua, 32Dawud Jesir fua,
Jesi Obed or Fua, Obed Boaz or fua,
Boaz Sálmon or fua, Sálmon Nacon or fua,
33Nacon Amminadab or fua, Amminadab Admin or fua,
Admin Arnir fua, Arni Hisron or fua,
Hisron Fares or fua, Fares Yohúdahr fua,
34Yohúdah Yakub or fua, Yakub Isahák or fua,
Isahák Ibrahím or fua, Ibrahím Térar fua,
Téra Nahor or fua, 35Nahor Sérug or fua,
Sérug Rau or fua, Rau Falek or fua,
Falek Eber or fua, Eber Cílahr fua,
36Cílah Kéinan or fua, Kéinan Arfakcád or fua,
Arfakcád Ceém or fua, Ceém Nuhr fua,
Nuh Lamak or fua, 37Lamak Matúcilahr fua,
Matúcilah Idiris or fua, Idiris Jared or fua,
Jared Mahálalel or fua, Mahálalel Kéinan or fua,
38Kéinan Enoc or fua, Enoc Sét or fua,
Sét Adom or fua, Adom Allar fua.
Currently Selected:
Lukás 3: RST
Highlight
Share
Copy
Want to have your highlights saved across all your devices? Sign up or sign in
The copyright is jointly and equally held by:
Copyright © 2024 The Word for the World International
Copyright © 2024 Rohingya East Asia Translation
