Siraka 25
25
Vanhu lava faneleke ku dzunisiwa
1Ndzi tsakisiwa hi swilo swinharhu leswi landzelaka,
leswi swi sasekeke emahlweni ka Xikwembu ni vanhu:#Van'wana va ri: Ndzi xongisiwile hi tindlela tinharhu, kutani ndzi yima ndzi sasekile emahlweni ka Xikwembu ni vanhu
ntwanano exikarhi ka vamakwavo, ni xinakulobye exikarhi ka vaakelani,
ni nuna ni nsati lava va hanyaka hi ku rhula.
2Ndzi venga vanhu vanharhu lava landzelaka,
mahanyelo ya vona ma ndzi vavisa swinene:
xisiwana xa manyunyu, ni mufuwi wa mavunwa,
ni mukhalabye wa vuphukuphuku la oswaka.
3Loko u nga dyondzi vutlhari evuhlangini bya wena,
u ta byi kuma eku dyuhaleni ka wena ke?
4Ku avanyisa lokunene, ni switsundzuxo leswinene,
ni lavakulu lava baseke tinhloko, swa fambelana.
5Vutlhari, ni ku twisisa, ni switsundzuxo leswi hetisekeke,
swi fambelana ni lava dyuhaleke ni lava chavisekaka.
6Xidlodlo xa lava dyuhaleke i vutlhari lebyi enteke,
va tikurisa hi ku chava Xikwembu ntsena.
7Ndzi ta ku boxela timhaka ta vanhu va 10 lava ndzi tsakeke ku va tiva,
ngopfu-ngopfu ndzi tsaka ku tiva loyi wa vu-10 exikarhi ka vona.#Van'wana va ri: Ndzi tsakisiwile hi miehleketo ya 9, kutani ya vu-10 ndzi ta yi boxa
Ku ni munhu loyi a tsakisiwaka hi vana va yena,
ni un'wana loyi a langutelaka ku wa ka valala va yena.
8Ku katekile ni loyi a nga ni nsati wo tlhariha,
[ni nuna ni nsati lava rhandzanaka,]#Van'wana a va tsalanga marito lawa, van'wana va ri: ni murimi loyi a nga paniki homu swin'we ni mbhongolo
ni loyi a nga dyohangiki ni siku ni rin'we hi ku vulavula ka yena,
ni loyi a nga tirhelangiki munhu loyi wo pfumala vutivi.#Van'wana va ri: munhu la nga ehansi ka yena
9Ku katekile ni loyi a nga ni munghana wa xiviri,#Vanwana va ri: loyi a nga ni miehleketo leyinene
ni loyi vanhu va tsakaka ku n'wi yingisa.
10Loyi a kumeke vutlhari i nkulukumba swinene!
Kambe ku hava na un'we loyi a tlulaka loyi a chavaka Xikwembu.
11Ku chava Xikwembu ku tlula hinkwaswo,
loyi a xi chavaka a nga ringanisiwa na mani ke?
12[Ku chava Xikwembu i masungulo ya ku xi rhandza,
ku pfumela eka xona i masungulo ya ku xi namarhela.]#Van'wana a va tsalanga ndzimana leyi
Ta vavasati
13A ku na xilondza xo vava ku fana ni rirhandzu leri vavisekeke,
ku hava maxangu yo ringana ni lawa ma vangiwaka hi vavasati.
14Ku hava ku xaniseka loku tlulaka mahlomulo lama vangiwaka hi rivengo,
a ku na ku rihisela loku tlulaka ku rihisela ka valala.
15Ku hava vuxungu byo tlula bya nyoka,
a ku na ku hlundzuka loku tlulaka ku hlundzuka ka wansati.#Van'wana va ri: ku hlundzuka ka nala
16Swa antswa ndzi tshama ni nghala kumbe ni dragona,
ku ri ni ku tshama ni wansati wo biha.
17Vubihi bya wansati byi dzwiharisa nghohe ya yena,
a fana ni bere yo leva.
18Nuna wa yena ú fanele ku ya dya eka vaakelani,
laha a phofulaka ku vilela ka yena kona hi xiviti.
19Vubihi byin'wana ni byin'wana a hi nchumu loko byi pimanisiwa ni vuntswaka bya wansati.
Khombo ra mudyohi a ri wele wansati loyi!
20Wanuna wo rhula loyi a tshamaka ni nsati wo kariha,
ú fana ni mukhalabye loyi a khandziyaka xintshabyana xa sava.
21U nga tshuki u phasiwa hi vumbhurhi bya wansati,
u nga naveli wansati [hikwalaho ka rifuwo ra yena.]#Van'wana a va tsalanga marito lawa
22Emutini lowu nuna a hlayisiwaka hi nsati,
ku ni ku hlundzuka, ni ku tikurisa, ni tingana.
23Wansati wa vuntswaka ú vavisa miehleketo ya nuna wa yena,
wa n'wi khunguvanyisa ni ku n'wi tlhava mbilu.
Wansati loyi a nga tsakisiki nuna wa yena,
ú n'wi endla wanuna wo pfumala mongo, wa matsolo yo gudlagudla.#Van'wana va ri: Ndzi kombe nuna wa vutoya loyi a nga kotiki ku tsema mhaka, ndzi ta ku komba nsati loyi a nga kotiki ku tsakisa nuna wa yena
24Ku dyoha ku nghenile emisaveni hikwalaho ka wansati,
kutani hikwalaho ka yena hinkwerhu hi fanele ku fa.
25U nga pfumeleli wansati wo homboloka ku endla ku rhandza ka yena,
tanihi leswi u nga pfumeleriki mati ku pfuta.
26Loko a ala ku endla leswi u n'wi lerisaka swona,
hambana na yena!
Currently Selected:
Siraka 25: TSO89
Highlight
Copy
Compare
Share
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.