Romans 14
14
1ဘုရားရှင်အား ယုံကြည်ကိုးစားမှု အားနည်းသူကို လက်ခံကြလော့။ သို့ရာတွင် သူ၏ထင်မြင်ယူဆချက်များနှင့် ပတ်သတ်၍ သူနှင့်အငြင်းအခုံ မပြုကြနှင့်။။ 2ယုံကြည်ခြင်းခိုင်မာသူသည် မည်သည့်အစားအစာကိုမဆို စားနိုင်၏။ ယုံကြည်ခြင်း မခိုင်မာသူသည် ဟင်းသီးဟင်းရွက်များကိုသာလျှင် စားတတ်၏။ 3မည်သည့်အစားအစာကိုမဆို စားတတ်သောသူသည် ထိုသို့မစားတတ်သောသူအား အထင်မသေးနှင့်။ ဟင်းသီးဟင်းရွက်သာ စားတတ်သောသူကလည်း မည်သည့်အစားအစာကိုမဆို စားတတ်သူကို ပြစ်တင်ဝေဖန်မှုမပြုနှင့်။ အဘယ်ကြောင့်ဆိုသော် မည်သည့်အစားအစာကိုမဆို စားတတ်သူအား ဘုရားရှင်သည် လက်ခံတော်မူပြီး ဖြစ်သောကြောင့်ဖြစ်သည်။ 4သင်သည် မည်သူသည့်အတွက် သူတပါး၏အစေခံကို စစ်ကြောစီရင်နိုင်သနည်း။ ထိုအစေခံ၏ အလုပ်သည် ကျေနပ်ဖွယ်ဖြစ်သည်၊ မဖြစ်သည်ကိုဆိုသည်ကို သူ၏သခင်က ဆုံးဖြတ်လိမ့်မည်။ သူ၏အလုပ်သည် ကျေနပ်ဖွယ်ဖြစ်လိမ့်မည်။ အဘယ်ကြောင့်ဆိုသော် ဘုရားရှင်သည် သူ့အား ကူညီမစတော်မူနိုင်သောကြောင့် ဖြစ်သည်။ 5လူတစ်ချို့တို့က နေ့ရက်တစ်ရက်သည် အခြားနေ့ရက်ထက်ပို၍ အရေးကြီးသည်ဟု ယူဆကြ၏။ အချို့သောသူတို့ကမူ နေ့ရက်များအားလုံးသည် အရေးကြီးသည်ဟု ယူဆကြသည်။ သူတို့သည် မည်သို့ပင် ယူဆစေကာမူ မိမိတို့မှန်ကန်သည်ဟု စိတ်ချယုံကြည်စိတ်ရှိကြရမည်။ 6နေ့ထူးနေ့မြတ်ကို စောင့်ထိန်းသူသည် ဘုရားရှင်၏ဂုဏ်တော်ကို ချီးမွမ်းရန်အတွက် စောင့်ထိန်းခြင်းဖြစ်၏။ မည်သည့် အစားအစာများကိုမဆို စားတတ်သူသည်လည်း အရှင်ဘုရား၏ ဂုဏ်တော်ကို ချီးမွမ်းရန်အတွက် စားခြင်းဖြစ်သည်။ သူသည်လည်း ထိုအစားအစာအတွက် ဘုရားရှင်၏ကျေးဇူးတော်ကို ချီးမွမ်းရန်အတွက် ရှောင်ကြဉ်ခြင်းဖြစ်၏။ သူသည်လည်း ဘုရားရှင်၏ ကျေးဇူးတော်ကိုချီးမွမ်းခြင်းဖြစ်သည်။ 7ကျွန်ုပ်တို့အထဲမှ မည်သူကမျှ တစ်ကိုယ်တည်းအတွက်သာ အသက်မရှင်ကြပေ။ တစ်ကိုယ်တည်း အတွက်သာ သေဆုံးခြင်းမရှိကြပေ။။ 8ကျွန်ုပ်တို့ အသက်ရှင်လျှင်လည်း အရှင်ဘုရား၏အတွက်ဖြစ်၍ သေဆုံးလျှင်လည်း အရှင်ဘုရား၏ အတွက်ဖြစ်၏။ ထိုကြောင့် ကျွန်ုပ်တို့သည် အသက်ရှင်သည်ဖြစ်စေ၊ သေသည်ဖြစ်စေ ဘုရားရှင်ပိုင်ဆိုင်ရာဖြစ်သည်။ 9အဘယ်ကြောင့်ဆိုသော် ခရစ်တော်သည် သေသူရှင်သူတို့၏ အရှင်သခင်ဖြစ်လိုသောကြောင့် အသေခံ၍ အသက်ပြန်ရှင်တော်မူသောကြောင့်ဖြစ်သည်။ 10ထို့ကြောင့်သင်တို့သည် အဘယ်ကြောင့် မိမိတို့၏ ခရစ်ယာန်ညီတစ်ကိုများကို စစ်ကြောစီရင်ကြသနည်း။ အဘယ်ကြောင့် သူတို့အား အထင်သေးကြသနည်း။ ငါတို့အားလုံးပင် တရားစီရင်ခံရရန် ဘုရားရှင်၏ တရားပလ္လင်တော်ရှေ့သို့ ရောက်ကြရမည်ဖြစ်၏။ 11ကျမ်းစာတော်တွင်၊ "ဘုရားရှင် မိန့်တော်မူသည်ကား 'ငါသည် အသက်ရှင်သောဘုရားဖြစ်သောကြောင့် ငါ၏ရှေ့၌ လူတိုင်းပျပ်ဝပ်ကြရလိမ့်မည်။ ငါသည် ဘုရားဖြစ်တော်မူကြောင်း လူတိုင်းကဝန်ခံကြရလိမ့်မည်' " ဟူ၍ဆိုသည်။ 12သို့ဖြစ်၍ ငါတို့အားလုံးသည် မိမိတို့ပြုခဲ့သမျှကို ဘုရားရှင်အား အစီအရင်ခံကြရမည်။ 13ထို့ကြောင့် ငါတို့သည် အချင်းချင်းအား စစ်ကြောစီရင်မှုမပြုဘဲ နေထိုင်ကြပါမည်။ ညီအစ်ကိုချင်းတို့အား ထိမိ၍ လဲကျစရာဖြစ်စေသည့် အပြုအမူများကို ရှောင်ကြပါမည်။ 14မည်သည့်အစားအစာမဆို ကတိအတိုင်း မညစ်ညမ်းကြောင်းကို ကျွန်ုပ်သည် အရှင်ယေရှုအား အမှီပြုလျက် အသေအချာသိသည်ဖြစ်၏။ သို့သော်လည်း အစားအစာသည် ညစ်ညမ်းသည်ဟု ယုံကြည်လျှင် ယုံကြည်သူအဖို့သာ ညစ်ညမ်းစေသည်ဖြစ်၏။ 15အကယ်၍ သင်သည် မိမိစားသော အစားအစာအားဖြင့် ညီအစ်ကိုတစ်စုံတစ်ယောက်အား စိတ်အနှောင့်အယှက် ဖြစ်စေပါမူ ထိုသူ၏အပေါ်တွင် မေတ္တာတရားကင်းမဲ့စွာ ပြုကျင့်ရာရောက်သည်။ ထိုသူအတွက် ခရစ်တော်သည် အသေခံတော်မူခဲ့သည်ဖြစ်ရာ တစ်စုံတစ်ခုသောအစားအစာကို သင်သည်စားခြင်းကြောင့် ထိုသူအား အကျိုးမနည်းပါစေနှင့်။ 16သင်တို့ကောင်းသည်ဟု ထင်မြင်ယူဆမှုသည် ကဲ့ရဲ့စရာမဖြစ်စေနှင့်။ 17ငါတို့အား ဘုရားရှင်က အုပ်စိုးတော်မူခြင်းဆိုသည်မှာ အစားအသောက်နှင့် မသက်ဆိုင်ပေ။ ဉာဏ်အလင်းတော်မှ ရရှိသောငြိမ်သက်ခြင်း ၊ဝမ်းမြောက်ခြင်းတို့နှင့်သာ သက်ဆိုင်၏။ 18ဤနည်းအားဖြင့် ခရစ်တော်၏အမှုတော်ကို ဆောင်ရွက်သူအား ဘုရားရှင်သည် နှစ်သက်တော်မူ၏။ လူတို့ကလည်း ချီးမွမ်းကြ၏။ 19သို့ဖြစ်၍ ငြိမ်းချမ်းစွာနေထိုင်မှုကို ပြုစုပေးမည့်အရာများနှင့် တစ်ယောက်ကိုတစ်ယောက် ဝိညာဉ်ခွန်အားပြည့်စေမည့် အရာများကို အမြဲကြိုးစားပြုလုပ်ကြရမည်ဖြစ်၏။ 20အစားအစာတစ်စုံတစ်ရာ စားသောက်မှုအတွက်ကြောင့် ယုံကြည်ခြင်းမခိုင်မာသေးသူကို အကျိုးမနည်းစေနှင့်။ အစားအစာမှန်သမျှသည် စားသင့်သောအရာဖြစ်သော်လည်း ထိုအစားအစာများကို အစားသုံးခြင်းဖြင့် သူတစ်ပါးတို့အား မှောက်မှားစေသူ၌ ဆိုးကျိုးဖြစ်စေ၏။ 21အသားစားခြင်း၊ စပျစ်ရည်သောက်ခြင်းစသော သင်၏ညီအစ်ကိုအား ထိမိ၍လဲကျစေရန် မည်သည့်အရာကိုမျှ မပြုသင့်ပေ။ 22ဤကိစ္စများနှင့်ပတ်သက်၍ သင်မည်သို့ ပြုမူသည်ဆိုသည်မှာ သင်နှင့်ဘုရားရှင်သာ သက်ဆိုင်၏။ မိမိမှန်ကန်သည်ဟု ယုံကြည်သည့်အတိုင်းဆောင်ရွက်၍ အရှက်အကြောက်စိတ်ရှိသူသည် မင်္ဂလာရှိ၏။ 23သို့ရာတွင် သံသယရှိသောစိတ်နှင့် အစားအစာတစုံတစ်ရာကို စားသုံးသောသူအား ဘုရားရှင်သည် ပြစ်ဒဏ်စီရင်တော်မူလိမ့်မည်။ အဘယ်ကြောင့်ဆိုသော် ယုံကြည်မှုပေါ်၌ မူတည်၍ မပြုသောကြောင့် ဖြစ်သည်။ ယုံကြည်မှုအပေါ်၌ မူတည်ခြင်းမရှိဘဲ ပြုလုပ်သမျှတို့သည် အပြစ်ဖြစ်၏။
Currently Selected:
Romans 14: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
