Romans 12
12
1သို့ဖြစ်၍ ညီအစ်ကိုတို့၊ ဘုရားရှင်သည် ငါတို့အားလွန်စွာ ကရုဏာထားတော်မူသောကြောင့် သင်တို့အား ငါတိုက်တွန်းနှိုးဆော်လိုသည်မှာ ကိုယ်တော်၏အမှုတော်ကို ဆောင်ရွက်ရန်နှင့် ကိုယ်တော်နှစ်သက်သော သက်ရှိပူဇော်သက္ကာသဖွယ်ဖြစ်ရန် သင်တို့၏ ကိုယ်ခန္ဓာကို ဆက်ကပ်ကြလော့။ ဤသည်ကား သင်တို့သည် ကိုယ်တော်အား မှန်ကန်စွာဖြင့် ဝတ်ပြုကိုးကွယ်ခြင်းပင်ဖြစ်သည်။ 2သင်တို့သည် လောကီစံနှုန်းကိုလိုက်၍ မကျင့်ကြနှင့်။ သင်တို့သည် မိမိတို့၏စိတ်နှလုံးကို ဘုရားရှင်မှ အပြည့်အဝ ပြောင်းလဲစေခြင်းအားဖြင့် စိတ်သဘောသစ်အားခံယူလျက် ပုံသဏ္ဌာန် ပြောင်းကြလော့။ ထိုသို့ပြုလျှင် ကောင်းမြတ်သောအရာ ကိုယ်တော်နှစ်သက်သောအရာ၊ အပြစ်ဆိုဖွယ်မရှိသည့် အရာတည်းဟူသော ဘုရားရှင် အလိုရှိတော်မူသည့် အရာသည် မည်သည့်အရာဖြစ်သည်ကို သင်တို့သိရှိကြလိမ့်မည်။ 3သင်တို့သည် မိမိတို့မိမိ ထင်သင့်သည်ထက် အထင်မကြီးကြစေရန် ငါခံစားရသော ဘုရားရှင်၏ ကျေးဇူးတော်ကြောင့် သင်တို့အား ငါမှာကြားလို၏။ သင်တို့အသီးသီးအား ဘုရားရှင် ပေးအပ်တော်မူသော ယုံကြည်ခြင်းပမာဏအတိုင်း မိမိကိုယ်မိမိ သင့်လျော်စွာ ထင်မြင်သုံးသပ်ကြလော့။ 4ငါတို့ခန္ဓာကိုယ်တွင် အင်္ဂါအစိတ်အပိုင်းများစွာရှိ၍ ထိုအင်္ဂါအစိတ်အပိုင်းများအားလုံးတွင် အလုပ်တာဝန် အသီးသီးရှိကြ၏။ 5ထိုနည်းတူစွာ ငါတို့သည် အရေအတွက်အားဖြင့် များပြားသော်လည်း ခရစ်တော်နှင့် တစ်လုံးတစ်ဝတည်း ဖြစ်ကြသဖြင့် ကိုယ်ခန္ဓာတစ်ခုတည်း၌ တည်လျက်ရှိကြ၏။ ငါတို့အသီးသီးသည် အချင်းချင်းဆက်စပ်လျက် ရှိသော ကိုယ်ခန္ဓာအစိတ်အပိုင်းများ ဖြစ်ကြ၏။ 6သို့ဖြစ်၍ ငါတို့အသီးသီးသည် မိမိတို့ခံစားရသည့် ကျေးဇူးတော်နှင့်အညီ ဘုရားရှင်ပေးအပ်တော်မူသည့် ဆုကျေးဇူးတော်ကို အသုံးချရမည်ဖြစ်၏။ ငါတို့ရရှိသည့် ဆုကျေးဇူးသည် ဘုရားရှင်၏ နှုတ်ကပတ်တော်ကို ဟော်ပြောနိုင်စွမ်းဖြစ်ပါက ငါတို့သည် မိမိတို့၏ယုံကြည်ခြင်းပမာဏအတိုင်း ထိုဆုကျေးဇူးတော်ကို အသုံးပြုကြရမည်ဖြစ်၏။ 7အကယ်၍ ငါတို့၏ဆုကျေးဇူးသည် သူတစ်ပါးအား ကူညီမစနိုင်စွမ်းဖြစ်ပါက ကူညီမစကြရမည်ဖြစ်၏။ ဓမ္မပညာ ပို့ချနိုင်စွမ်းဖြစ်လျှင် ဓမ္မပညာအားပို့ချကြရမည်ဖြစ်၏။ 8ငါတို့၏ဆုကျေးဇူးသည် သူတစ်ပါးကို အားပေးနိုင်စွမ်းဖြစ်ပါက အားပေးကြရမည်ဖြစ်၏။ ပေးကမ်းဝေမျှသူသည် ရက်ရောစွာဖြင့် ပေးကမ်းဝေမျှရမည်။ အာဏာရှိသူသည် လုံ့လထုတ်၍ အလုပ်လုပ်ရမည်ဖြစ်သည်။ သူတစ်ပါးတို့အား သနားကြင်နာမစသူသည် ရွှင်လန်းဝမ်းမြောက်စွာဖြင့် ကူညီမစရမည်။ 9သင်တို့၏ မေတ္တာသည် ဟန်ဆောင်မှုနှင့်လုံးဝကင်းရမည်။ သင်တို့သည် ဆိုးညစ်မှုကိုမုန်း၍ ကောင်းမြတ်မှုကို ချစ်ကြလော့။ 10သင်တို့သည် ခရစ်ယာန်ညီအစ်ကိုများအနေဖြင့် တစ်ဦးကိုတစ်ဦးချစ်ခင်ကြလော့။ တစ်ဦးကိုတစ်ဦး ချီးမွမ်းရန် လျင်မြန်ခြင်းရှိကြပါစေ။ 11မပျင်းမရိဘဲ အလုပ်ကိုကြိုးစားအားထုတ် လုပ်ကိုင်ကြလော့။ စိတ်အားထက်သန်စွာဖြင့် ဘုရားရှင်၏အမှုတော်ကို ဆောင်ရွက်ကြပါလော့။ 12သင်တို့၌ မျှော်လင့်ချက်ရှိသောကြောင့် ဝမ်းမြောက်ရွင်လမ်းကြပါလော့။ ဆင်းရဲဒုက္ခခံရသောအခါ သည်းခံကြလော့။ မပြတ်မလတ် ဆုတောင်းခြင်းပြုကြပါလော့။ 13ဆင်းရဲနွမ်းပါးသော ယုံကြည်သူတို့အား ပေးကမ်းကြလော့။ ဧည့်ဝတ်ကိုပြုကြလော့။ 14သင်တို့အား နှိပ်စက်ညှဉ်းဆဲသူတို့အား ကောင်းချီးပေးကြပါ။ သူတို့ကို မကျိန်မဆဲဘဲ ကောင်းချီးပေးကြလော့။ 15ဝမ်းမြောက်သောသူတို့နှင့်အတူ ဝမ်းမြောက်ကြလော့။ ငိုကြွေးကြသူတို့နှင့်အတူ ငိုကြွေးကြလော့။ 16အချင်းချင်းအား အလေးထား၍ ဂရုတစိုက်ဆက်ဆံကြပါ။မောက်မာမှုမရှိကြပါနှင့်။သေးငယ်သောတာဝန်တို့ကို လက်ခံကြပါ။မိမိတို့ကိုယ်ကို ပညာရှိဟူ၍ မထင်မှတ်ကြနှင့်။ 17အဘယ်သူကိုမျှ လက်စားမချေကြနှင့်။လူအပေါင်းတို့ရှေ့တွင် တင့်တယ် လျောက်ပတ်စွာ ကျင့်ကြံကြပါ။ 18လူတိုင်းနှင့် တက်နိုင်သမျှ ငြိမ်းချမ်းစွာ နေထိုင်ကြပါ။ 19မိတ်ဆွေတို့ မည်သည့်အခါတွင်မျှ လက်စားမချေကြနှင့်။ ဘုရားရှင်ကသာ အပြစ်ဒဏ်စီရင်တော်မူပါစေ။ ကျမ်းစာတော်တွင် "ထာဝရဘုရားက 'ငါသည်လက်စားချေမည်။ အပြစ်ရှိသည့်အလျောက် ငါဆပ်ပေးမည်' ဟု မိန့်တော်မူ၏" ဟုဖော်ပြသည်။ 20ထို့ကြောင့် လက်စားချေမည့်အစား ကျမ်းစာတော်တွင်ပါရှိသည့်အတိုင်း ပြုကြလော့။ ကျမ်းစာတော်က "သင်တို့၏ ရန်သူသည် စာလောင်ငတ်မွတ်နေလျှင် ကျွေးမွေးကြလော့။ ရေငတ်လျှင် သောက်ရေကို ပေးပါလော့။ ဤသို့ပြုခြင်းအားဖြင့် သင်သည် သူ့အား အရှက်ရစေလိမ့်မည်" ဟုဖော်ပြသည်။ 21မကောင်းမှုကို ပြုခြင်းအားဖြင့် အရှုံးမပေးကြနှင့်။ ကောင်းမြတ်မှုကို ပြုခြင်းအားဖြင့် မကောင်းမှုအား အနိုင်ယူကြလော့။
Currently Selected:
Romans 12: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
