Romans 1
1
1သတင်းကောင်းကိုကြေညာရန် တမန်တော်အဖြစ် ဘုရားရှင်ရွေးချယ်၍ ခန့်ထားသောသူ၊ ခရစ်တော်ယေရှု၏ အစေအပါးဖြစ်သော 2ကျွန်ုပ်ပေါလုသည် စာရေးလိုက်ပါ၏။ ရှေးအခါက ဘုရားရှင်သည် မိမိ၏ အရိယာသူတော်စင်များအားဖြင့် ထိုသတင်းကောင်းကို 3ကတိထားတော်မူခဲ့ကြောင်းအား ကျမ်းစာတော်ကဖော်ပြခဲ့၏။ ထိုသတင်းကောင်းမှာ ဘုရားရှင်၏သားတော် ငါတို့၏အရှင်သခင်ဖြစ်တော်မူသည့် ယေရှုခရစ်တော်အကြောင်းပင်ဖြစ်ပေသည်။ ထိုအရှင်သည် လူ့ဇာတိအားဖြင့် ဒါဝိဒ်မင်းမှ ဆင်းသက်တော်မူခဲ့သည်။ 4ဘုရားရှင်၏ ဇာတိအားဖြင့် ဘုရားရှင်၏ သားတော်ဖြစ်ကြောင်းကို ပေါ်လွင်ထင်ရှားစေရန် ဘုရားရှင်သည် မဟာတန်ခိုးတော်အားဖြင့် ထိုအရှင်ကိုသေခြင်းမှ အသက်ပြန်ရှင်စေတော်မူခဲ့၏။ 5ဘုရားရှင်သည် ထိုအရှင်အားဖြင့် ငါ့အားခရစ်တော်အတွက်ကြောင့် ထူးမြတ်သည့် တမန်တော်ရာထူးကို ပေးသနားတော်မူ၏။ လူမျိုးအပေါင်းတို့သည် ယုံကြည်၍လိုက်နာကြစေရန် ဘုရားရှင်သည် ငါ့အား ထိုသူအပေါင်းတို့ထံသို့ စေလွှတ်တော်မူ၏။ 6ရောမမြို့၌ နေထိုင်ကြသော သင်တို့သည်လည်း ယေရှုခရစ်တော်၏ တပည့်များအဖြစ် ဘုရားရှင် ရွေးကောက်တော်မူသောသူများဖြစ်သောကြောင့် ထိုလူတို့တွင် အပါအဝင်ဖြစ်ကြ၏။ 7ဘုရားရှင်ချစ်မြတ်နိုးတော်မူသောကြောင့် မိမိ၏လူမျိုးများအား တော်ဝင်မျိုးနွယ်များ ဖြစ်လာစေရန် ရွေးကောက်တော်မူသည့် ရောမအသင်းတော်ဝင်အပေါင်းတို့ထံသို့ ဤစာကို ရေးလိုက်ပါသည်။ ငါတို့၏အဖ ဘုရားရှင်နှင့် ယေရှုခရစ်ထံတော်မှ ကျေးဇူးတော်နှင့် ငြိမ်သက်ခြင်းအား သင်တို့ ခံစားကြရပါစေ။ 8သင်တို့၏ ယုံကြည်ခြင်းအကြောင်းသတင်းသည် ကမ္ဘာတစ်ဝန်းလုံးသို့ ပျံ့နှံ့လျက်ရှိသဖြင့် ငါသည် သင်တို့အားလုံးအတွက် ယေရှုခရစ်တော်ကို အမှီပြု၍ ဉီးစွာပထမ ဘုရားရှင်၏ ကျေးဇူးတော်ကို ချီးမွမ်းပါ၏။ 9သားတော်၏အကြောင်း မင်္ဂလာသတင်းကောင်းကို ကြေညာခြင်းအားဖြင့် ငါသည်ဘုရားရှင်၏ အမှုတော်ကို စိတ်နှလုံးအကြွင်းမဲ့ ထမ်းဆောင်လျက်ရှိ၏။ 10ငါသည် ဆုတောင်းပတ္ထနာ ပြုသည့်အခါတိုင်း သင်တို့အားအစဉ်သတိရကြောင်းကို ဘုရားရှင်သည် သက်သေဖြစ်တော်မူ၏။ ဘုရားရှင် အလိုတော်ရှိပါက မကြာမီတွင် သင်တို့ထံသို့ ငါလာနိုင်ရန်အတွက် လမ်းဖွင့်ပေးတော်မူရန် ဆုတောင်းပါ၏။ 11သင်တို့သည် တည်ကြည်ကြံ့ခိုင်ကြစေရန် သင်တို့အား ဝိညာဉ်ဆုကျေးဇူးကို ဝေမျှလိုသဖြင့် ငါသည် သင်တို့နှင့် အလွန်တွေ့ဆုံလိုပါ၏။ 12တစ်နည်းအားဖြင့်ဆိုသော် ထိုသို့တွေ့ဆုံမိကြသောအခါ သင်တို့နှင့်ငါသည် မိမိတို့အသီးသီး၏ ယုံကြည်ခြင်းကို ဝေမျှ၍ အပြန်အလှန်အားပေးနိုင်လိမ့်မည်ဖြစ်သည်။ 13ညီအစ်ကိုတို့၊ အစ္စရေးလူမျိုးမဟုတ်သူ လူမျိုးခြားများထံတွင် အမှုတော်ဆောင်ရာ၌ အောင်မြင်ခဲ့သည့် နည်းတူ သင်တို့ထံတွင်လည်း အောင်မြင်နိုင်စေရန်အတွက် ငါသည် သင်တို့ထံသို့လာရန် အကြိမ်ကြိမ် ကြံစည်ခဲ့၏။ သို့သော်လည်း အကျိုး အကြောင်းမညီညွတ်သဖြင့် မလာဖြစ်ခဲ့ကြောင်းကို သင်တို့အားသိစေလို၏။ 14ယဉ်ကျေးသောသူ၊ ရိုင်းစိုင်းသောသူ၊ ပညာရှိသောသူ၊ ပညာမဲ့သောသူ၊ ရှိရှိသမျှသောသူတို့အတွက် ငါ့ထံတွင် တာဝန်ရှိသဖြင့်၊ 15သတင်းကောင်းအား ရောမမြို့ရှိသင်တို့အားလည်း ကြေညာရန် ငါသည် စိတ်အားထက်သန်လျက်ရှိ၏။ 16ငါသည် သတင်းကောင်းကို အသေအချာပင် ယုံကြည်စိတ်ချ၏။ ထိုသတင်းကောင်းသည် ဉီးစွာအားဖြင့် အစ္စရေးလူမျိုး၊ ထို့နောက်တွင် လူမျိုးခြားများထဲမှ ယုံကြည်သူအပေါင်းတို့အား ကယ်တင်သော ဘုရားရှင်၏ တန်ခိုးတော်ဖြစ်၏။ 17ဘုရားရှင်သည် လူတို့အား မည်သို့သောနည်းဖြင့် မိမိနှင့်မှန်ကန်စွာ ဆက်ဆံစေတော်မူသည်ကို မင်္ဂလာသတင်းကောင်းသည် ပေါ်လွင်ထင်ရှားစေ၏။ ထိုနည်းမှာ အစမှအဆုံးထိတိုင်အောင် ယုံကြည်ခြင်း အပေါ်တွင် အခြေခံသည့်နည်းဖြစ်၏။ ထို့ကြောင့် ကျမ်းစာတွင် "ယုံကြည်ခြင်းအားဖြင့် ဘုရားရှင်နှင့် မှန်ကန်စွာ ဆက်ဆံသူသည် အသက်ရှင်လိမ့်မည်" ဟုဖော်ပြထားပါသည်။ 18အမှန်တရားအား လူတို့သိကြစေရန် တားဆီးပိတ်ပင်သော၊ ဆိုးညစ်သောအမှုကို ပြုကျင့်ကြသော ဘုရားမဲ့သူတို့၏ အပြစ်ဒုစရိုက်နှင့် ဆိုးညစ်မှုအပေါင်းတို့အပေါ်သို့ ကောင်းကင်မှ ဘုရားရှင်၏ အမျက်တော်သည် သက်ရောက်လျက်ရှိကြောင်း ပေါ်လွင်ထင်ရှားလာပြီဖြစ်၏။ 19ထိုသူတို့အား ဘုရားရှင်ကိုယ်တော်တိုင် ရှင်းလင်းစွာ ဖော်ပြတော်မူသဖြင့် ကိုယ်တော်၏ အကြောင်းနှင့် ပတ်သက်၍ သိနိုင်ခွင့်ရှိသမျှသော အကြောင်းအရာတို့အား ရှင်းလင်းစွာသိကြရ၏။ ဤအကြောင်းကြောင့် ဘုရားရှင်သည် သူတို့အား ဒဏ်ခတ်တော်မူခြင်းဖြစ်၏။ 20ကမ္ဘာလောကအား ဘုရားရှင် ဖန်ဆင်းတော်မူသည့်အချိန်မှစ၍ လူတို့သည် ကိုယ်တော်၏ ထာဝရတန်ခိုးတော်နှင့် ဘုရားရှင်၏ဖြစ်တည်တော်မူခြင်း တည်းဟူသော မျက်စိဖြင့်မမြင်နိုင်သည့် ဂုဏ်အင်္ဂါများကို ကောင်းစွာသိနားလည်နိုင်လေသည်။ သူတို့သည် ဤသို့သော ကိုယ်တော်၏ ဂုဏ်အင်္ဂါလက္ခဏာများကို မမြင်နိုင်သော်လည်း သိနိုင်ကြ၏။ ထိုသို့သိနိုင်ခြင်းမှာ သူတို့သည် ဘုရားရှင် ဖန်ဆင်းတော်မူသော အရာများကို တွေ့မြင်နိုင်သောကြောင့်ဖြစ်၏။ ထို့ကြောင့် ထိုသူတို့ထံတွင် မိမိတို့ကျူးလွန်ထားသည့် အပြစ်များအတွက် ဆင်ခြေပေးစရာ မရှိတော့ပေ။ 21သူတို့သည် ဘုရားရှင်ကို သိကြသော်လည်း ကိုယ်တော်၏ ဂုဏ်တော်ကျေးဇူးတော်ကို ချီးမွမ်းသင့်လျက်နှင့် မချီးမွမ်းကြ။ ချီးမွမ်းကြမည့်အစား အကျိုးမဲ့သည့်အရာများကိုသာ တွေးတောဆင်ခြင်လျက်နေကြ၏။ သူတို့၏ အသိဉာဏ်ကင်းမဲ့သည် စိတ်နှလုံးများသည်လည်း အမှောင်ဖုံး၍နေကြ၏။ 22သူတို့သည် မိမိကိုယ်မိမိ ပညာရှိဟုဆိုကြသော်လည်း အမှန်မှာ ပညာမဲ့သူများဖြစ်ကြ၏။ 23သေခြင်းတရားကင်းသည့် ဘုရားရှင်အား ဝတ်ပြုကိုးကွယ်ကြမည့်အစား သေမျိုးဖြစ်သည့် လူ၊ ငှက်၊ ခြေလေးချောင်းသတ္တဝါ၊ သို့မဟုတ် တွားတွားသတ္တဝါများ၏ ပုံသဏ္ဌာန်ကို ဆောင်လျက်ရှိသော ရုပ်တုများကို ကိုးကွယ်၍ ဝတ်ပြုကြလေသည်။ 24ထိုအကြောင်းကြောင့် ဘုရားရှင်သည် ထိုသူတို့အားမိမိတို့၏ ကိလေသာ စိတ်ဆွဲဆောင်ရာနောက်သို့ လိုက်ပါစေရန်လည်းကောင်း၊ အချင်းချင်းအား ကိုယ်ခန္ဓာအသရေပျက်စေရန်လည်းကောင်း စွန့်ပစ်၍ ထားတော်မူ၏။ 25သူတို့သည် ဘုရားရှင်၏ တရားမှန်ကို အမှားနှင့် လဲလှယ်ခဲ့ကြ၏။ ဖန်ဆင်းတော်မူသော အရှင်အစား အဖန်ဆင်းခံအရာများကိုသာ ကိုးကွယ်ဝတ်ပြုကြ၏။ ဖန်ဆင်းတော်မူသောအရှင်၏ ဂုဏ်တော်ကို ထာဝစဉ် ချီးမွမ်းထောပနာ ပြုကြပါစေ။ အာမင်။ 26သို့ဖြစ်၍ ဘုရားရှင်သည် သူတို့အားရှက်ဖွယ်ကောင်းသည့် ကိလေသာ၏လက်သို့ အပ်တော်မူခဲ့၏။ မိန်းမတို့ပင်လျှင် ဓမ္မတာထုံးစံအစား ဆန့်ကျင်သော ထုံးစံကို ကျင့်ကြ၏။ 27အလားတူပင် ယောက်ျားတို့သည်လည်း မိန်မများနှင့် ဓမ္မတာထုံးစံအတိုင်း ဆက်ဆံမှုကိုမပြုဘဲ ယောက်ျားအချင်းချင်း ရာဂမီးတောက်လောင်လျက်ရှိကြ၏။ ယောက်ျားတို့သည် အချင်းချင်း ရှက်ကြောက်ဖွယ်သော အမှုတို့ကိုပြုကြသဖြင့် မိမိတို့၏ဆိုးညစ်သော အပြစ်အတွက် ထိုက်သင့်သည့် အပြစ်ဒဏ်ကိုခံကြရ၏။ 28ထိုသူတို့သည် ဘုရားရှင်ကို ဘုရားဟူ၍ မအောက်မေ့ကြသဖြင့် ဘုရားရှင်သည် သူတို့အား စွန့်ပြစ်တော်မူ၏။ ထို့ကြောင့် သူတို့သည် မှန်ကန်စွာစဉ်းစားဆင်ခြင်နိုင်စွမ်း မရှိတော့ဘဲ မပြုကျင့်သင့်သော အရာများကို ပြုကျင့်ကြကုန်၏။ 29သူတို့သည် ဖြောင့်မတ်မှုမရှိခြင်း၊ ညစ်ညမ်းခြင်း၊ လောဘကြီးခြင်း၊ မလိုမုန်းထားမှုများနှင့် ပြည့်နေကြပြီဖြစ်၏။ သူတို့သည် မနာလိုခြင်း၊ လူသတ်ခြင်း၊ ပဋိပက္ခဖြစ်ခြင်း၊ လှည့်ဖြားခြင်းနှင့် မကောင်းသောရည်ရွယ်ချက်များဖြင့် ပြည့်နှက်နေကြသည်။ သူတို့သည် အတင်းအဖျင်း များလည်း ပြောဆိုကြ၏။ 30သူတစ်ပါး၏ အသရေကို ဖျက်ကြ၏။ ဘုရားရှင်ကို မုန်းသူ၊ စော်ကားသူ၊ မာန်မာန ထောင်လွှားလျက် ကြွားဝါသူများ ဖြစ်လာကြ၏။ မကောင်းမှုအမျိုးမျိုးတို့ကို တီထွင်ကြံစည်တတ်ကြ၏။ မိမိတို့မိဘများ၏ စကားကို နားမထောင်ကြ။ 31အရှက်အကြောက်စိတ် မရှိကြ။ ကတိမတည်ကြ။ ကြင်နာသနားတတ်သည့်စိတ်လည်း မရှိကြ။ 32ဤသို့သော အကျင့်ရှိသူတို့သည် သေဒဏ်ခံထိုက်သည်ဟု ဘုရားရှင် ပြဌာန်းထားသည့်အချက်ကို ဆန့်ကျင်ပြီး ဆက်လက်၍ ပြုကျင့်ကြသည်သာမက၊ ဤသို့ပြုကြသူများကိုလည်း အားပေးအားမြှောက်ပြုကြလေသည်။
Currently Selected:
Romans 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
