Psalms 88
88
1ကျွန်ုပ်ကို ကယ်တင်တော်မူသော အရှင်ဖြစ်တော်မူသည့် ဘုရားရှင်၊ ကျွန်ုပ်သည် အရှင်၏ရှေ့၌နေ့ညမပြတ် အော်ဟစ်တောင်းလျှောက်ပါ၏။ 2ကျွန်ုပ်၏ဆုတောင်းသံသည် အရှင်၏ရှေ့တော်သို့ရောက်ပါစေသော။ ကျွန်ုပ်၏ဟစ်ကြော်သံကို ဂရုစိုက်နားထောင်တော်မူပါ။ 3အကြောင်းမူကား ကျွန်ုပ်၏စိတ်ဝိညာဉ်သည် ဘေးအန္တရာယ်နှင့် ပြည့်လျက်ရှိပါ၏. ကျွန်ုပ်၏အသက်သည်လည်း မရဏာနိုင်ငံနှင့်ကပ်နေပါပြီ။ 4ကျွန်ုပ်သည် သေတွင်းထဲသို့ ဆင်းသွားသောသူတို့တွင် ရေတွက်ခြင်းခံရပြီး အားမရှိသောသူကဲ့သို့ဖြစ်ပါ၏။ 5သတ်ဖြတ်ခြင်းခံရပြီး သင်္ချိုင်းတွင်း၌ လဲလျောင်းနေကြသူများတည်းဟူသော နောက်တစ်ဖန် အရှင်၏အောက်မေ့ခြင်းကို မခံရဘဲ လက်တော်၏မဟခြင်းမှ အဆက်ပြတ်နေသောသူများကဲ့သို့ သေသောသူတို့အလယ်တွင် ပစ်ထားခြင်းခံရပါ၏။ 6အရှင်သည် ကျွန်ုပ်ကို အမှောင်၊ အနက်ဆုံး တွင်းနက်ထဲ၌ ချထားတော်မူပြီ။ 7အရှင်၏အမျက်ဒေါသည် ကျွန်ုပ်အပေါ်၌ လေးလံလျက်ရှိပါ၏။ အရှင်၏လှိုင်းလုံးရှိသမျှတို့သည်လည်း ကျွန်ုပ်ကို ဖုံးလွှမ်းလျက်ရှိ၏။ 8အရှင်သည် ကျွန်ုပ်၏အသိမိတ်ဆွေများကို ကျွန်ုပ်နှင့်ဝေးကွာစေတော်မူပါပြီ။ ကျွန်ုပ်ကို သူတို့အတွက် စက်ဆုပ်ရွံရှာဖွယ်ဖြစ်စေတော်မူပါပြီ။ ကျွန်ုပ်သည် ပိတ်မိနေသဖြင့် မထွက်နိုင်ပါ။ 9ဖိစီးနှိပ်စက်မှုကြောင့် ကျွန်ုပ်၏မျက်စိမှုန်ဝါးနေပါ၏။ အို ဘုရားရှင်၊ ကျွန်ုပ်သည် အရှင်ကို နေ့စဉ်နေ့တိုင်းခေါ်လျက် အရှင့်ထံ ကျွန်ုပ်၏လက်ကို ဆန့်တန်းနေပါ၏။ 10အရှင်သည် သေလွန်သောသူတို့အတွက် အံ့ဖွယ်သောအမှုတို့ကို ပြုတော်မူပါသလော။ သေသူ၏ဝိညာဉ်များသည် ထ၍ အရှင်၏ကျေးဇူးတော်ကို ချီးမွမ်းကြပါသလော။ 11အရှင်၏မေတ္တာကရုဏာတော်ကို သင်္ချိုင်းတွင်း၌လည်းကောင်း၊ အရှင်၏သစ္စာတော်ကို ပျက်စီးခြင်းသာသနာတော်၌လည်းကောင်း ပြောကြားကြပါသလော။ 12အရှင်ပြုတော်မူသော အံ့ဖွယ်သောအမှုတို့ကို အမှောင်ထဲ၌လည်းကောင်း၊ အရှင်၏ဖြောင့်မတ်ခြင်းကို မေ့လျော့ရာပြည်၌လည်းကောင်း သိမှတ်ကြပါသလော။ 13အို ဘုရားရှင်၊ ကျွန်ုပ်မူကား အရှင့်ထံ အကူအညီအော်ဟစ်တောင်းခံပါ၏။ နံနက်အချိန်၌ ကျွန်ုပ်၏ဆုတောင်းချက်သည် အရှင်ထံသို့ ရောက်ပါ၏။ 14အို ဘုရားရှင်၊ အရှင်သည် အဘယ်ကြောင့် ကျွန်ုပ်၏စိတ်ဝိညာဉ်ကို စွန့်ပယ်၍ ကျွန်ုပ်ထံမှ မျက်နှာလွှဲတော်မူပါသနည်း။ 15ကျွန်ုပ်သည် ငယ်ရွယ်စဉ်မှစ၍ နှိပ်ခံရလျက် သေလုနီးပါဖြစ်ရပါ၏။ အရှင်နှင့်ဆိုင်သော ကြောက်ရွံ့ထိတ်လန့်ဖွယ်ရာများနှင့် ကြုံ၍စိတ်ပျက်အားငယ်ရပါ၏။ 16အရှင်၏ပြင်းထန်သောအမျက်တော်သည် ကျွန်ုပ်ကို လွှမ်းမိုးသွား၍ အရှင်၏ကြောက်မက်ဖွယ်ရာများသည် ကျွန်ုပ်ကို ဖယ်ရှားသုတ်သင်ကြပါ၏။ 17ထိုအရာတို့သည် ရေကဲ့သို ကျွန်ုပ်ကို တစ်နေ့လုံးဝိုင်းထား၍ အဘက်ဘက်မှ ကျွန်ုပ်ကို ဝန်းရံကြပါ၏။ 18ချစ်သောသူနှင့်မိတ်ဆွေကို အရှင်သည် ကျွန်ုပ်နှင့် ဝေးကွာစေတော်မူ၏။ ကျွန်ုပ်သည် မှောင်မိုက်ခြင်းနှင့်သာ မိတ်ဖွဲ့ရပါ၏။
Currently Selected:
Psalms 88: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
