Psalms 86
86
1အို ဘုရားရှင်၊ ဂရုစိုက်နားထောင်လျက် ကျွန်ုပ်ကို ထူးတော်မူပါ။ အကြောင်းမူကား ကျွန်ုပ်သည် အဖိနှိပ်ခံရသောသူ၊ နွမ်းပါးသောသူဖြစ်ပါ၏။ 2ကွန်ုပ်သည် ဘုရားတရားကိုင်းရှိုင်းသောသူဖြစ်၍ ကျွန်ုပ်၏စိတ်ဝိညာဉ်ကို စောင့်ရှောက်တော်မူပါ။ အရှင်သည် ကျွန်ုပ်၏ဘုရားဖြစ်တော်မူပါ၏။ အရှင်ကို ယုံကြည်ကိုးစားသော အရှင်၏အစေခံကို ကယ်တင်တော်မူပါ။ 3အို ဘုရားရှင်၊ ကျွန်ုပ်ကို သနားတော်မူပါ။ အကြောင်းမူကား ကျွန်ုပ်သည် အရှင်ကို တစ်နေ့လုံးခေါ်ပါ၏။ 4အို ဘုရားရှင်၊ အရှင့်အစေအပါး၏စိတ်ဝိညာဉ်ကို ဝမ်းမြောက်စေတော်မူပါ။ အကြောင်းမူကား အကျွန်ုပ်၏စိတ်ဝိညာဉ်သည် အရှင်ကို မှီဝဲဆည်းကပ်သောကြောင့်ဖြစ်၏။ 5အကြောင်းမူကား အို ဘုရားရှင်၊ ကိုယ်တော်သည် ကောင်းမြတ်၍ ခွင့်လွှတ်တော်မူတတ်သောကြောင့်ဖြစ်၏။ အရှင်ကို ခေါ်သောသူအပေါင်းတို့အပေါ်၌လည်း မေတ္တာကရုဏာတော်ကြွယ်ဝတော်မူ 6အို ဘုရားရှင်၊ ကျွန်ုပ်၏ ဆုတောင်းချက်ကို စူးစိုက်နားထောင်တော်မူပါ။ ကျွန်ုပ်အသနားခံသော အသံကို အာရုံစိုက်တော်မူပါ။ 7အရှင်သည် ကျွန်ုပ်ကို ထူးတော်မူမည်ဖြစ်သောကြောင့် ကျွန်ုပ်သည် ဆင်းရဲဒုက္ခရောက်သောကာလ၌ အရှင်ကိုခေါ်ပါမည်။ 8အို ဘုရားရှင်၊ ဘုရားများထဲတွင် အရှင်နှင့်တူသောဘုရားမရှိပါ။ အရှင်ပြုတော်မူသော အမှုများနှင့်တူသော အမှုလည်းမရှိပါ။ 9အို ဘုရားရှင်၊ အရှင်ဖန်ဆင်းတော်မူသော လူမျိုးအပေါင်းတို့သည် ရှေ့တော်သို့လာ၍ ပျပ်ဝပ်ကြလိမ့်မည်။ အရှင်၏နာမတော်ကိုလည်း ဂုဏ်ပြုချီးမွမ်းကြပါလိမ့်မည်။ 10အကြောင်းမူကား အရှင်သည် ကြီးမြတ်သော အံ့ဖွယ်သောအမှုတို့ကို ပြုလုပ်တော်မူ၏။ အရှင်တစ်ပါးတည်းသာလျှင် ဘုရားရှင် ဖြစ်တော်မူ၏။ 11အို ဘုရားရှင်၊ အရှင်၏လမ်းကို ကျွန်ုပ်အားသွန်သင်ပြသတော်မူပါ။ ကျွန်ုပ်သည် အရှင်၏သမ္မာတရား၌ လျှောက်လှမ်းပါမည်။ အရှင်၏နာမတော်ကို ကြောက်ရွံ့မည့်အကြောင်း ကျွန်ုပ်၏စိတ်ကို စုစည်းတော်မူပါ။ 12အို ကျွန်ုပ်၏အရှင်ဖြစ်တော်မူသော ဘုရားရှင်၊ ကျွန်ုပ်သည် အရှင်၏ကျေးဇူးတော်ကို စိတ်နှလုံးအကြွင်းမဲ့ချီးမွမ်း၍ အရှင်၏နာမတော်ကို အစဉ်အမြဲဂုဏ်ပြုချီးမွမ်းပါမည်။ 13အကြောင်းမူကား ကျွန်ုပ်အပေါ်ထားရှိသော အရှင်၏မေတ္တာကရုဏာတော်သည် ကြီးမားလှပါ၏။ အရှင်သည် ကျွန်ုပ်၏ စိတ်ဝိညာဉ်ကို နက်ရှိုင်းသော မရဏာနိုင်ငံမှ ကယ်နုတ်တော်မူပြီ။ 14အို ဘုရားရှင်၊ မာနထောင်လွှားသောသူတို့သည် ကျွန်ုပ်ကို ဆန့်ကျင်လျက် ထကြွကြပါ၏။ ကြမ်းကြုတ်သောလူတစ်စုသည်လည်း ကျွန်ုပ်၏အသက်ကို ရန်ရှာကြပါ၏။ သူတို့သည် အရှင်ကို ဦးထိပ်ထားခြင်းမရှိကြပါ။ 15သို့သော် အို ဘုရားရှင်၊ အရှင်သည် သနားစုံမက်တတ်သောသဘော၊ ကျေးဇူးပြုတတ်သောသဘောနှင့်ပြည့်စုံသော ဘုရားရှင်ဖြစ်တော်မူပြီး စိတ်ရှည်သောသဘော၊ သမ္မာတရားနှင့် မေတ္တာကရုဏာကြွယ်ဝသော သဘောရှိတော်မူ၏။ 16ကျွန်ုပ်ဘက်သို့လှည့်၍ ကျွန်ုပ်ကို သနားတော်မူပါ။ အရှင်၏အစွမ်းသတ္တိကို အရှင်၏အစေခံအားပေး၍ အရှင့်၏အစေခံဖြစ်သူ၏သားကို ကယ်တင်တော်မူပါ။ 17ကျွန်ုပ်ကို မုန်းသောသူတို့သည် မြင်၍ အရှက်ကွဲကြမည့်အကြောင်း ကောင်းမြတ်တော်မူခြင်း၏ အမှတ်လက္ခဏာကို ကျွန်ုပ်အား ပြတော်မူပါ။ အကြောင်းမူကား အို ဘုရားရှင်၊ အရှင်သည် ကျွန်ုပ်ကို ကူညီမစ၍ ကျွန်ုပ်ကို နှစ်သိမ့်ပေးတော်မူပြီ။
Currently Selected:
Psalms 86: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
