Psalms 83
83
1အို ဘုရားရှင်၊ နှုတ်ဆိတ်နေတော်မမူပါနှင့်။ အို ဘုရားရှင်၊ တိတ်ဆိတ်စွာနေတော်မမူပါနှင့်၊ ငြိမ်သက်စွာနေတော်မမူပါနှင့်။ 2အရှင်၏ရန်သူတို့သည် ဆူပူသောင်းကျန်းကြပြီး အရှင့်ကိုမုန်းသောသူတို့သည် ခေါင်းထောင်လာကြပါ၏။ 3သူတို့သည် ကိုယ်တော်၏လူမျိုးတော်တို့အပေါ် ဉာဏ်နီဉာဏ်နက်ထုတ်၍ ကိုယ်တော်ကာကွယ်ထားသောသူတို့အပေါ် ဆန့်ကျင်ရန်ကြံစည်ကြပါ၏။ 4သူတို့က “လာကြ၊ အစ္စရေးဟူသောအမည်နာမကို နောက်တစ်ဖန် အောက်မေ့စရာအကြောင်းမရှိစေခြင်းငှာ သူတို့ကို လူမျိုးတစ်မျိုးအဖြစ်မှ ပယ်ဖျက်ကြကုန်စို့” ဟု ဆိုကြပါ၏။ 5သူတို့သည် စိတ်သဘောထား တညီတညွတ်တည်းဖြင့် ကြံစည်ကြ၍ ကိုယ်တော်ကိုဆန့်ကျင်လျက် မဟာမိတ်ဖွဲ့ကြပါ၏။ 6ထိုသူတို့တွင် ဧဒုံပြည်သားများနှင့်ဣရှမေလလူမျိုးများ၊ မောဘပြည်သားများနှင့်ဟာဂရိလူမျိုးများ၊ 7ဂေဗလလူမျိုး၊ အမ္မုန်လူမျိုးနှင့်အာမလက်လူမျိုးများ၊ တိုင်ရာမြို့သားများနှင့် ဖိလိတ္တိပြည်သားများ ပါဝင်ကြပါ၏။ 8အဆီးရီးယားလူမျိုးတို့သည်လည်း သူတို့နှင့်အတူပူးပေါင်းလျက် လောတ၏အမျိုးအနွယ်များအတွက် လက်ရုံးအင်အားဖြစ်ကြပါ၏။ 9မိဒျန်လူမျိုးတို့အပေါ်၌လည်းကောင်း၊ ကိရှုန်ချောင်းနားတွင် သိသရနှင့်ယာဘိန်မင်းကြီးတို့အပေါ်၌လည်းကောင်း အရှင်ပြုသကဲ့သို့ သူတို့အပေါ်၌ ပြုတော်မူပါ။ 10သူတို့သည် အင်္ဒေါရအရပ်တွင် ဖျက်ဆီးခြင်းခံရ၍ မြေကြီးပေါ်မှ မြေဆွေးဖြစ်ကြပါပြီ။ 11သူတို့၏မျိုးရိုးမြင့်မြတ်သူတို့ကို ဩရဘနှင့်ဇေဘကဲ့သို့လည်းကောင်း၊ သူတို့၏မင်းညီမင်းသားအပေါင်းတို့ကို ဇေဘဟနှင့် ဇာလမုန္နကဲ့သို့လည်းကောင်း ဖြစ်စေတော်မူပါ။ 12ထိုသူတို့က “ဘုရားရှင်ပိုင်သောစားကျက်များကို ငါတို့အတွက်သိမ်းယူကြကုန်စို့” ဟု ဆိုကြ၏။ 13အို ကျွန်ုပ်၏ဘုရားရှင်၊ သူတို့ကို လေတိုက်ရာသို့လုံးထွေးပါသွားတတ်သော ချုံပင်ကဲ့သို့လည်းကောင်း၊ လေတိုက်ရာသို့လွင့်ပါသွားတတ်သည့် ကောက်ရိုးမျှင်ကဲ့သို့လည်းကောင်း ဖြစ်စေတော်မူပါ။ 14မီးသည် တောကိုလောင်သကဲ့သို့လည်းကောင်း၊ မီးလျှံသည် တောင်ကို လောင်ကျွမ်းသကဲ့သို့လည်းကောင်း၊ 15အရှင်၏မုန်တိုင်းအားဖြင့် သူတို့ကိုလိုက်လံညှဉ်းဆဲ၍ ကိုယ်တော်၏လေပွေအားဖြင့် သူတို့ကိုထိတ်လန့်တုန်လှုပ်စေတော်မူပါ။ 16အို ဘုရားရှင်၊ သူတို့သည် အရှင်၏နာမတော်ကိုရှာကြစေရန် သူတို့၏မျက်နှာကို အရှက်ကွဲခြင်းနှင့်ပြည့်စေတော်မူပါ။ 17သူတို့သည် အစဉ်အမြဲအရှက်ကွဲ၍ ထိတ်လန့်ကြရပါစေသော။ ဂုဏ်သရေညှိုး၍ ပျက်စီးကြရပါစေသော။ 18ထိုသို့ဖြင့် ဘုရားရှင်ဟူသောနာမတော်ရှိသည့် အရှင်တစ်ပါးတည်းသာလျှင် ကမ္ဘာမြေတစ်ခွင်လုံး၌ အမြင့်ဆုံးသောအရှင်ဖြစ်ကြောင်းကို သူတို့သိကြပါစေသော။
Currently Selected:
Psalms 83: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
