Psalms 68
68
1ဘုရားရှင်ထတော်မူသောအခါ ကိုယ်တော်၏ရန်သူတို့သည် ကွဲလွင့်သွားကြလိမ့်မည်။ ကိုယ်တော်ကိုမုန်းတီးသောသူတို့သည် ကိုယ်တော်၏ရှေ့မှ ထွက်ပြေးကြလိမ့်မည်။ 2မီးခိုးသည် လွင့်သွားသကဲ့သို့ ကိုယ်တော်သည် သူတို့ကို လွင့်သွားစေတော်မူလိမ့်မည်။ ဖယောင်းသည် မီး၏ရှေ့တွင် အရည်ပျော်သကဲ့သို့ ယုတ်မာကောက်ကျစ်သူတို့သည် ဘုရားရှင်၏ရှေ့တော်တွင် ပျက်စီးကြရလိမ့်မည်။ 3သို့သော် ဖြောင့်မတ်သောသူတို့သည် ဝမ်းမြောက်၍ ဘုရားရှင်၏ရှေ့တော်၌ ရွှင်လန်းကြလိမ့်မည်။ သူတို့သည် ဝမ်းမြောက်ခြင်းဖြင့် ရွှင်မြူးကြလိမ့်မည်။ 4ဘုရားရှင်ထံသို့ သီချင်းဆိုကြလော့။ ကိုယ်တော်၏နာမတော်ကို သီဆိုချီးမွမ်းကြလော့။ မိုးတိမ်များကို စီးတော်မူသောအရှင်ကို ချီးမွမ်းကြလော့။ ကိုယ်တော်၏ နာမတော်ကား ဘုရားရှင်ဖြစ်ပေ၏။ ကိုယ်တော်၏ရှေ့၌ ရွှင်မြူးကြလော့။ 5ဖခင်မဲ့သူတို့၏ဖခင်၊ မုဆိုးမများအတွက် တရားစီရင်တော်မူသည့်အရှင်မှာ မိမိ၏သန့်ရှင်းမြင့်မြတ်သော ကိန်းဝပ်ရာအပရပ်၌ ရှိတော်သော ဘုရားရှင်ဖြစ်ပေ၏။ 6ဘုရားရှင်သည် အထီးကျန်သောသူတို့အား အတူနေထိုင်ရန် မိသားစုကိုပေး၍ အချုပ်အနှောင်ခံရသောသူတို့ကို ကောင်းစားရာသို့ ပို့ဆောင်တော်မူ၏။ ငြင်းဆန်သောသူတို့မူကား ပူပြင်းခြောက်သွေ့အရပ်၌ နေထိုင်ကြရ၏။ 7အို ဘုရားရှင်၊ ကိုယ်တော်သည် မိမိလူမျိုးတော်၏ရှေ့မှကြွပြီး ကန္တာရမြေကိုကျော်ဖြတ်၍ ချီတက်တော်မူသောအခါ 8သိနာတောင်၏အရှင်၊ ဘုရားရှင်၏ရှေ့တော်၊ အစ္စရေးလူမျိုု့၏ဘုရားရှင်တည်းဟူသော ဘုရားရှင်၏ရှေ့တော်၌ မြေကြီးသည်တုန်ခါ၍ ကောင်းကင်သည် မိုရွာသွန်းခဲ့ပါ၏။ 9အို ဘုရားရှင်၊ ကိုယ်တော်သည် မိုးကိုများစွာရွာသွန်းစေ၍ ကိုယ်တော်၏အမွေတော်သည် အားအင်ကုန်ခန်းသောအခါ ထိုအရာအား ပြန်လည်လန်းဆန်းစေတော်မူ၏။ 10ကိုယ်တော်၏ လူမျိုးတော်သည် ထိုအရပ်၌ခြေချခဲ့ကြပါ၏။ အို ဘုရားရှင်၊ ကိုယ်တော်သည် အဖိနှိပ်ခံရသောသူတို့အတွက် ကိုယ်တော်၏ကောင်းမြတ်တော်မူခြင်းထဲမှ ပြင်ဆင်ပေးတော်မူ၏။ 11ဘုရားရှင်သည် နှုတ်ကပတ်တော်ကို မြွက်ဆိုပြောကြားခဲ့၏။ ထိုကောင်းမြတ်သောသတင်းကို ပြောကြားသောအမျိုးသမီးတို့သည် အတိုင်းမသိများပြားလှ၏။ 12စစ်တပ်များနှင့် ရှင်ဘုရင်များသည် အလျင်အမြန်ထွက်ပြေးကြ၍ အိမ်၌နေရစ်သော အမျိုးသမီးတို့သည် လုယက်ပစ္စည်းများကို ခွဲဝေကြရ၏။ 13သင်တို့သည် သိုးခြံထဲ၌အိပ်ကြရလျှင်ပင် ငွေဖြင့်ဖုံးအုပ်ထားသော ချိုးငှက်၏တောင်ပံများကဲ့သို့လည်းကောင်းဖြစ်ကြ၏။" 14အနန္တတန်ခိုးရှင်သည် ရှင်ဘုရင်တို့ကို ထိုအရပ်တွင် ကွဲလွင့်စေတော်မူသောအခါ ဇာလမုန်တောင်ပေါ်၌ နှင်းပွင့်များကျလေ၏။ 15ဘုရားရှင်၏တောင်တော်သည် ဗာရှန်တောင်ဖြစ်၏။ တောင်ထိပ်များစွာရှိသော ဗာရှန်တောင်ဖြစ်၏။ 16တောင်ထိပ်များစွာရှိသောတောင်တို့၊ ဘုရားရှင်သည် မိမိစံပယ်ရာအရပ်ဖြစ်စေလိုသောတောင်ကို သင်တို့သည် အဘယ်ကြောင့် မနာလိုစိတ်နှင့် ကြည့်နေကြသနည်း။ အမှန်စင်စစ် ဘုရားရှင်သည် ထိုအရပ်၌ အစဉ်ကိန်းဝပ်တော်မူလိမ့်မည်။ 17ဘုရားရှင်၏ စစ်ရထားတို့သည် ထောင်သောင်းမကများပြားကြ၏။ ဘုရားရှင်သည် သိနာတောင်မှာကဲ့သို့ သူတို့နှင့်အတူ သန့်ရှင်းမြင့်မြတ်ရာဌာနတော်၌ ရှိတော်မူ၏။ 18ကိုယ်တော်သည် မြင့်သောအရပ်သို့ တက်သွားသောအခါ သုံ့ပန်းတို့ကို ဖမ်းဆီးခေါ်ဆောင်သွား၍ လူတို့ထံမှမက ငြင်းဆန်သောသူတို့ထံမှပင် လက်ဆောင်များကို ခံယူတော်မူ၏။ ဤသည်ကား ထာဝရအရှင် ဘုရားရှင်သည် ထိုအရပ်၌ကိန်းဝပ်တော်မူရန်ဖြစ်၏။ 19အကျွန်ုပ်တို့၏ ဝန်ထုပ်ဝန်ပိုးများကို နေ့စဉ်နေ့တိုင်း ထမ်းပေးတော်မူသောဘုရားရှင်သည် မင်္ဂလာရှိပါစေ။ ဘုရားရှင်သည် အကျွန်ုပ်တို့ကိုကယ်တင်သောအရှင် ဖြစ်တော်မူ၏။ 20အကျွန်ုပ်တို့၏ဘုရားရှင်သည် ကယ်တင်တော်မူသောဘုရာ ဖြစ်တော်မူ၏။ သေခြင်းမှလွတ်မြောက်ခွင့်သည်လည်း အရှင်ဖြစ်တော်မူသော ဘုရားရှင်ထံမှလာ၏။ 21သို့သော် ဘုရားရှင်သည် မိမိရန်သူတို့၏ ဦးခေါင်းကိုလည်းကောင်း၊ မိမိ၏အပြစ်ဒုစရိုက်များ၌ လျှောက်လှမ်းနေသောသူ၏ ဆံထုံထုံးထားသော ဦးခေါင်းထိပ်ကိုလည်းကောင်း ကြွေမွစေတော်မူလိမ့်မည်။ 22ဘုရားရှင်က "ငါသည် သူတို့အား ဗာရှန်ပြည်မှ ပြန်ခေါ်လာမည်။ ပင်လယ်၏ရေနက်ရာအရပ်မှ ပြန်ခေါ်လာမည်။ 23ထိုသို့သောအားဖြင့် သင်၏ခြေထောက်သည် ရန်သူတို့၏သွေးကို နင်းနယ်နိုင်၍ သင့်ခွေးတို့၏လျှာသည်လည်း မိမိခွဲတမ်းကို သူတို့ထံမှရကြလိမ့်မည်" ဟု မိန့်တော်မူ ၏။ 24အို ဘုရားရှင်၊ ကိုယ်တော်၏အောင်မြင်သောစစ်ပွဲ ချီတက်တော်မူခြင်း၊ အကျွန်ုပ်ဘုရားရှင်သည် သန့်ရှင်းမြင့်မြတ်ရာဌာနတော်သို့ ကြွတော်မူခြင်းကို လူအပေါင်းတို့ တွေ့မြင်ကြရပါ၏။ 25သီချင်းသီဆိုသူများသည် ရှေ့မှလိုက်၍ တူရိယာတီးမှုတ်သူများသည် အနောက်မှလိုက်ကြပါ။ အလယ်၌ကား ပတ်သာတီးသော မိန်းမပျိုများသည် လိုက်ကြပါ၏။ 26ဘုရားရှင်အား လူထုပရိသတ်ကြီးအလယ်တွင် ချီးမွမ်းကြလော့။ ဘုရားရှင်အား အစ္စရေး၏စမ်းရေတွင်းမှ ချီးမွမ်းကြလော့။ 27ထိုအရပ်တွင် သူတို့ကိုအုပ်စိုးသည့် ဗင်္ယာမျိုးနွယ်ရှိ၍ သူတို့၏အုပ်စုထဲတွင် ယုဒမျိုးနွယ်၏အကြီးအကဲများ၊ ဇာဗုလုန်မျိုးနွယ်၏အကြီးအကဲများ ပါရှိကြပါ၏။ 28သင်၏ဘုရားရှင်သည် သင်၏အစွမ်းသတ္တိကို မိန့်မှာတော်မူပြီ။ အို ဘုရားရှင်၊ အကျွန်ုပ်တို့အတွက်ပြုတော်မူသည့်အတိုင်း တန်ခိုးတော်ကိုပြသတော်မူပါ။ 29ဂျေရုဆင်မြို့ရှိ ကိုယ်တော်၏ဗိမာန်တော်ကြောင့် ရှင်ဘုရင်တို့သည် ကိုယ်တော့်ထံသို့ လက်ဆောင်ပဏ္ဏာ ယူဆောင်လာကြပါလိမ့်မည်။ 30ကျူတောရှိ သားရဲတိရစ္ဆာန်နှင့် နွာသငယ်များအလယ်ရှိ နွားအုပ်ကြီးကို ဆုံးမတော်မူပါ။ ငွေချောင်းများရှိသောသူကို ခြေဖြင့်နင်းချေလျက် စစ်မက်နှစ်သက်တတ်သော လူမျိုးတို့အား ကစဉ့်ကလျားဖြစ်စေတော်မူပါ။ 31သံတမန်တို့သည် အီဂျစ်ပြည်မှ ရောက်လာကြလိမ့်မည်။ အီသီယိုးပီးယားပြည်သည် ဘုရားရှင်ထံသို့ မိမိ၏လက်ကိုဆန့်လိမ့်မည်။ 32ကမ္ဘာမြေကြီးပေါ်ရှိ တိုင်းနိုင်ငံတို့၊ ဘုရားရှင်ထံသို့ သီချင်းဆိုကြလော့။ ဘုရားရှင်ကို သီဆိုချီးမွမ်းကြလော့။ 33ရှေးကာလကပင်တည်ရှိသည့် အမြင့်ဆုံးကောင်းကင်ကိုစီးတော်မူသောအရှင်အား သီဆိုချီးမွမ်းကြလော့။ ကိုယ်တော်၏ တန်ခိုးကြီးသောအသံကို နားထောင်ကြလော့။ 34ဘုရားရှင်၏အစွမ်းသတ္တိကို သိမှတ်ဝန်ခံကြလော့။ ကိုယ်တော်၏ ဘုန်းအာနုဘော်သည် အစ္စရေးအပေါ်၌ရှိ၍ ကိုယ်တော်၏အစွမ်းသတ္တိသည် မိုးတိမ်တို့၌ရှိ၏။ 35အို ဘုရားရှင်၊ ကိုယ်တော်သည် ကိုယ်တော်၏သန့်ရှင်းမြင့်မြတ်ရာဌာနတော်၌ အံ့ဩဖွယ်ဖြစ်တော်မူ၏။ အစ္စရေးလူမျိုး၏ ဘုရားရှင်သည် လူမျိုးတော်အား အစွမ်းသတ္တိနှင့် ခွန်အားများကိုပေးတော်မူ၏။ ဘုရားရှင်သည် မင်္ဂလာရှိပါစေ။
Currently Selected:
Psalms 68: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
