Psalms 49
49
1လူမျိုးအပေါင်းတို့၊ ဤအရာကိုနားထောင်ကြလော့။ ကမ္ဘာလောက၌ နေထိုင်သူအပေါင်းတို့ စူးစိုက်၍ နားထောင်ကြလော့။ 2အယုတ်အမြတ်၊ ဆင်းရဲချမ်းသာမရွေး အရပ်တကာရှိ လူခပ်သိမ်းတို့ အတူတကွ နားထောင်ကြလော့။ 3အကျွန်ုပ်၏နှုတ်သည် ဉာဏ်ပညာစကားကို မြွက်ဆိုပါမည်။ အကျွန်ုပ်စိတ်နှလုံး၏ စဉ်းစားဆင်ခြင်မှုသည် နားလည်နိုင်စွမ်းကိုပေးပါမည်။ 4အကျွန်ုပ်သည် စကားပုံများကို ဂရုစိုက်၍ နားထောင်ပါမည်။ အကျွန်ုပ်၏ ပဟေဠိကို စောင်းတီး၍ အဓိပ္ပါယ်ဖော်ပြပါမည်။ 5အကျွန်ုပ်အား လိမ်လည်လှည့်ဖြားသောသူတို့၏ အပြစ်ဒုစရိုက်သည် အကျွန်ုပ်အားဝန်းရံ၍ အကျွန်ုပ်ဒုက္ခရောက်သော နေ့ရက်များ၌ အကျွန်ုပ်သည် အဘယ်ကြောင့် ကြောက်ရွံ့ရမည်နည်း။ 6ထိုသူတို့သည် မိမိတို့၏ ပစ္စည်းဥစ္စာကို ကိုးစား၍ မိမိတို့၏ ဓနဥစ္စာကြွယ်ဝမှု၌ ဂုဏ်ယူဝင့်ကြွားကြ၏။ 7လူသည် သူတစ်ပါးအား မည်သည့်အခါမျှ ကယ်တင်ခြင်းမပြုနိုင်။ မိမိအတွက် ရွေးနှုတ်စရာ အဖိုးအခကိုလည်း ဘုရားရှင်အား မပေးနိုင်။ 8အကြောင်းမူကား လူ၏အသက်ကိုရွေးနှုတ်ရန် အဖိုးအခသည် အလွန်ကြီး၏။ 9သို့ဖြစ်၍ လူသည် မည်သို့ဖြင့် ထာဝရအသက်ရှင်နိုင်ပါမည်နည်း။ မည်သို့ဖြင့် သင်္ချိုင်းတွင်းသို့မဆင်းဘဲ နေနိုင်ပါမည်နည်း။ 10အကြောင်းမူကား ပညာရှိသူတို့သည် သေကြရသည့်နည်းတူ မိုက်မဲသောသူနှင့် အသိတရားမဲ့သောသူသည်လည်း ပျက်စီးသွား၍ မိမိတို့ပစ္စည်းဥစ္စာကို သူတစ်ပါးတို့အတွက် ထားခဲ့ရသည်ကို လူသည်တွေ့မြင်ရလိမ့်မည်။ 11ထိုသူတို့က မိမိတို့၏အိမ်သည် အစဉ်အမြဲတည်၍ မိမိတို့နေထိုင်ရာအရပ်သည် မျိုးရိုးအစဉ်အဆက် တည်လိမ့်မည်ဟု ထင်မှတ်လျက် မြေကွက်တို့အား မိမိတို့၏ အမည်ဖြင့် မှည့်ခေါ်ကြ၏။ 12သို့သော် လူသည် ဂုဏ်အရှိန်အဝါ၌ တည်မြဲရသည်မဟုတ်။ လူသည် သေကြေပျက်စီးတတ်သော တိရစ္ဆာန်နှင့်တူ၏။ 13ဤသည်ကား မိမိကိုယ်မိမိ ယုံကြည်အားထားသောသူတို့နှင့် ထိုသူတို့၏စကားကို နှစ်သက်၍ ထိုသူတို့၏နောက်သို့လိုက်သောသူတို့၏ လမ်းဖြစ်၏။ 14သူတို့သည် မရဏနိုင်ငံအတွက် သိုးကဲ့သို့ လျာခြင်းခံရ၍ သေခြင်းသည် သူတို့ကို ထိန်းကျောင်းလိမ့်မည်။ ဖြောင့်မှန်သောသူတို့သည် နံနက်အချိန်၌ ထိုသူတို့ကို အုပ်စိုးကြလိမ့်မည်။ ထိုသူတို့၏ ရုပ်သဏ္ဌန်သည် မိမိတို့နေထိုင်ရာအရပ်မှဝေးကွာသည့် မရဏနိုင်ငံ၌ ဆွေးမြည့်ကြလိမ့်မည်။ 15သို့သော် ဘုရားရှင်သည် အကျွန်ုပ်အား ခေါ်ယူတော်မူမည်ဖြစ်သောကြောင့် အကျွန်ုပ်စိတ်ဝိညာဉ်အား မရဏနိုင်ငံ၏လက်မ ရွေးနုတ်ကယ်တင်တော်မူလိမ့်မည်။ 16လူတစ်ဦးသည် ချမ်းသာကြွယ်ဝလာ၍ သူ့အိမ်၏ ဘုန်းစည်းစိမ်တိုးပွားလာသောအခါ သင်သည် မဝံ့မရဲမဖြစ်နှင့်။ 17အကြောင်းမူကား သူသေဆုံးသောအခါ မည်သည့်အရာကိုမျှ ယူဆောင်သွားနိုင်မည်ဟုတ်။ ထိုပစ္စည်းဥစ္စာများသည် သူနှင့်အတူ သင်္ချိုင်းတွင်းသို့ လိုက်ပါသွားနိုင်မည်မဟုတ်။ 18သူသည် အသက်ရှင်နေစဉ် မိမိကိုယ်မိမိ ကောင်းချီးပေးတတ်၏။ သင်သည် မိမိအတွက် ကောင်းသောအမှုကိုပြုသည့်အခါတွင်လည်း လူတို့သည် သင့်အား ချီးမွမ်းတတ်ကြ၏။ 19သို့သော် သူသည် မိမိဘိုးဘေးတို့၏ မျိုးဆက်ရှိရာအရပ်တည်းဟူသော အလင်းအား မည်သည့်အခါတွင်မျှ မမြင်ရသည့်အရပ်သို့ ရောက်သွားလိမ့်မည် 20လူသည် ဂုဏ်အရှိန်အဝါရှိသော်လည်း အသိဉာဏ်မရှိလျှင် သေကျေပျက်စီးတတ်သော တိရစ္ဆာန်များနှင့်တူ၏။
Currently Selected:
Psalms 49: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
