Acts 26
26
1ထို့နောက် အဂြိပ္ပမင်းကြီးက ပေါလုအား "သင်၏အကြောင်းကို သင်ကိုယ်တိုင်ပြောဆိုခွင့်ပေး၏" ဟုပြောဆိုသဖြင့် ပေါလုသည်လည်း လက်ကိုဆန့်၍ 2"အရှင်အဂြိပ္ပမင်းကြီး၊ ဂျူးလူမျိုးများသည် ကျွန်ုပ်အပေါ်တွင် စွဲဆိုထားသည့် စွပ်စွဲချက်များအား ယနေ့၌ အရှင်မင်းကြီး၏ရှေ့တွင် ချေပပြောဆိုခွင့်ရခြင်းသည် ကျွန်ုပ်အတွက် ကံကောင်းထောက်မပါ၏။ 3အထူးသဖြင့် အရှင်မင်းကြီးသည် ဂျူးလူမျိုးများ၏ ဓလေ့ထုံးစံများနှင့် အငြင်းပွားမှုများအား ကောင်းစွာသိသည့်သူ တစ်ယောက်ဖြစ်၍ ကျွန်ုပ်၏လျှောက်ထားချက်အား စိတ်ရှည်စွာဖြင့် နားထောင်ပေးရန် ကျွန်ုပ်တောင်းဆိုပါ၏။ 4ကျွန်ုပ်သည် ငယ်စဉ်ကတည်းကပင် မည်သို့နေထိုင်အသက်ရှင်ခဲ့သည်ဆိုခြင်းအား ဂျူးလူမျိုးများအားလုံး သိကြပါ၏။ ကျွန်ုပ်၏တိုင်းပြည်မှ အစပြု၍ ဂျေရုဆလင်မြို့သို့ရောက်သည်အထိ ကျွန်ုပ်၏ဘဝတစ်လျှောက်လုံးအား မည်သို့ကုန်ဆုံးခဲ့သည် ဆိုသည်ကိုလည်း သူတို့သိကြပါ၏။ 5သူတို့သည် ကျွန်ုပ်၏အကြောင်းအား အစအဆုံး သိကြသူများဖြစ်၍ ကျွန်ုပ်သည် ယခင်က ကျွန်ုပ်တို့၏ ဘာသာရေးအဖွဲ့အစည်းများထဲတွင် စည်းကမ်းအတင်းကျပ်ဆုံးဖြစ်သည့် ဖာရိရှဲအဖွဲ့ဝင်တစ်ယောက်ဖြစ်ခဲ့သည် ဆိုသည်ကိုလည်း သူတို့သက်သေခံလိုပါက သက်သေထွက်ဆိုနိုင်ကြပါ၏။ 6ဘုရားရှင်သည် ကျွန်ုပ်တို့၏ ဘိုးဘေးများအား ပေးခဲ့သောကတိတော်တည်မည်ဟု ကျွန်ုပ်မျှော်လင့်သည့်အတွက် ယခုကျွန်ုပ်သည် ဤနေရာတွင် အစစ်ဆေးခံနေရခြင်းဖြစ်ပါ၏။ 7ကျွန်ုပ်တို့၏ ဂျူးအမျိုးအနွယ် တစ်ဆယ့်နှစ်ပါးတို့သည်လည်း ဤကတိတော်သည် ပြည့်စုံလာမည်ဆိုသည့် မျှော်လင့်ချက်နှင့် နေ့ညမပြတ် ဘုရားရှင်အား စိတ်အားထက်သန်စွာဖြင့် ဝတ်ပြုကိုးကွယ်နေကြခြင်းဖြစ်ပါ၏။ အရှင်မင်းကြီး၊ ယခုကျွန်ုပ်သည်လည်း ထိုမျှော်လင့်ချက်ကြောင့် ဤဂျူးလူမျိုးများ၏ စွပ်စွဲခြင်းကို ခံနေရခြင်းဖြစ်ပါ၏။ 8ဘုရားရှင်သည် သေလွန်ပြီးသောသူတို့အား အသက်ပြန်ရှင်စေနိုင်သည် ဆိုသည်ကို သင်တို့သည် အဘယ်ကြောင့် မယုံကြည်နိုင် ဖြစ်နေရသနည်း။ 9ကျွန်ုပ်သည် ယခင်က နာဇရက်မြို့သားယေရှုအား ဆန့်ကျင်လုပ်ဆောင်သင့်သည်ဟု ယူဆခဲ့သည့်အတွက် 10ဂျေရုဆလင်မြို့တွင် ကျွန်ုပ်သည် ဘုရားရှင်၏လူမျိုးတော်များ အများအပြားကို ပုရောဟိတ်အကြီးအကဲများ၏ အာဏာနှင့် ထောင်ထဲသို့ ပို့ခဲ့ပါ၏။ သူတို့အား သေဒဏ်ချမှတ်သည့်အခါတွင်လည်း ကျွန်ုပ်သည် သဘောတူ၍ မဲဆန္ဒပေးခဲ့ပါ၏။ 11ဓမ္မာရုံများတွင်လည်း ကျွန်ုပ်သည် သူတို့အား ပြစ်ဒဏ်များပေးစေခဲ့ပြီး သူတို့၏ယုံကြည်ချက်များ ပျက်ပြားသွားစေရန် ကြိုးစားဆောင်ရွက်ခဲ့ပါ၏။ အမှန်တကယ်တော့ ကျွန်ုပ်သည် တိုင်းတစ်ပါးပြည်များတွင်ပင် သူတို့အားလိုက်ရှာပြီး ညှဉ်းဆဲခဲ့သည်အထိ သူတို့အပေါ်တွင် ဒေါသအမျက်ထွက်ခဲ့ပါ၏။ 12ထိုရည်ရွယ်ချက်နှင့်ပင် ကျွန်ုပ်သည် ပုရောဟိတ်အကြီးအကဲများ၏ အခွင့်အာဏာအား ရယူပြီး ဒမတ်စကပ်မြို့သို့ သွားသည့်အခါတွင် 13နေ၏အလင်းရောင်ထက်ပင် ပို၍တောက်ပသည့် အလင်းရောင်အား မွန်းတည့်ချိန်တွင် ကျွန်ုပ်သည်မြင်ခဲ့ရပါ၏။ ထိုအလင်းရောင်သည် ကောင်းကင်မှ ဆင်းသက်လာပြီး ကျွန်ုပ်နှင့်တကွ အတူတူရှိနေကြသည့်သူများ၏ ပတ်ပတ်လည်တွင် ထွန်းလင်း တောက်ပနေခဲ့ပါ၏။ 14ကျွန်ုပ်တို့အားလုံးသည်လည်း မြေပေါ်သို့လဲကျသွားပြီး ကျွန်ုပ်အား ဟေဗြဲဘာသာစကားနှင့် 'ရှောလု၊ ရှောလု၊ သင်သည် အဘယ်ကြောင့် ငါ့အားညှဉ်းပန်းနှိပ်စက်နေသနည်း။ သင်ယခုကဲ့သို့ လုပ်ဆောင်နေခြင်းသည် သခင်၏တုတ်ချွန်အား ပြန်၍ကန်သည့် နွားကဲ့သို့ပင် သင့်ကိုယ်သင် နာကျင်စေရန် လုပ်ဆောင်နေခြင်းပင်ဖြစ်၏' ဟုပြောသည့်အသံကို ကြားရပါ၏။ 15ကျွန်ုပ်သည်လည်း 'အရှင်သည် မည်သူဖြစ်သနည်း' ဟုမေးသည့်အခါ သူက 'ငါသည် သင်ညှဉ်းပန်းနှိပ်စက်နေသည့် ယေရှုဖြစ်၏။ 16ယခုပင် သင်သည်ထပြီး သင်၏ခြေထောက်ပေါ်တွင် သင်ရပ်လော့။ ငါသည်သင့်အား ကိုယ်ထင်ပြခြင်းသည် ယခု ငါ့အား သင်မြင်တွေ့လိုက်ရသည့် အကြောင်းနှင့် သင့်အား နောက်ပိုင်းတွင်ငါပြသမည့် အမှုအရာများကို သင်သည် ငါ၏ အမှုတော်ဆောင်အဖြစ်လည်းကောင်း၊ သက်သေအဖြစ်လည်းကောင်း တခြားသူများအား ပြောပြရန်ဖြစ်၏။ 17ငါသည် သင့်အား အစ္စရေးလူမျိုးများ၏လက်နှင့် ငါစေလွှတ်သည့် တိုင်းတပါးသားများ၏ လက်ထဲမှ ကယ်တင်မည်ဖြစ်၏။ 18သင်သည် သူတို့၏ မျက်လုံးများအား ဖွင့်ပေးပြီး သူတို့သည် အမှောင်ထဲမှ အလင်းဘက်သို့လည်းကောင်း၊ မာရ်နတ်၏ အာဏာစက်အောက်မှ ဘုရားရှင်ဘက်သို့ လည်းကောင်း လှည့်လာစေရမည်။ သို့မှသာ သူတို့၏ ငါ့အပေါ်တွင်ထားရှိသော ယုံကြည်ခြင်းအားဖြင့် သူတို့၏ အပြစ်ဒုစရိုက်များသည် ခွင့်လွှတ်ခြင်းခံရပြီး ဘုရားရှင်၏လူမျိုးတော်များထဲတွင် နေရာရ၍ ပါဝင်ရကြမည်ဖြစ်၏' လို့မိန့်တော်မူခဲ့၏။ 19ထို့ကြောင့် အရှင်မင်းကြီး၊ ရွှေမြို့တော်မှရရှိသည့် ဤရူပါရုံအား ကျွန်ုပ်သည် မနာခံဘဲ မနေနိုင်ခဲ့ပေ။ 20ပထမဦးစွာ ကျွန်ုပ်သည် ဒမတ်စကပ်မြို့၊ ထို့နောက် ဂျေရုဆလင်မြို့မှစပြီး အစ္စရေးတစ်ပြည်လုံးနှင့် တိုင်းတပါးသားများကြားတွင် သူတို့သည် သူတို့၏အပြစ်ဒုစရိုက်များအား နောင်တသံဝေဂရကြပြီး ဘုရားရှင်ဘက်သို့ လှည့်လာတယ်ဆိုသည့် အမှုကိစ္စများကို လုပ်ဆောင်ကြရမည်ဟု ကျွန်ုပ်သည် ဟောပြောခဲ့ပါ၏။ 21ထိုကြောင့် ဤဂျူးလူမျိုးများသည် ကျွန်ုပ်အား ဗိမာန်တော်ထဲတွင် ဖမ်းဆီးခဲ့ကြပြီး သတ်ပစ်ရန် ကြိုးစားခဲ့ကြခြင်းဖြစ်ပါ၏။ 22သို့သော် ထိုနေ့၌ပင် ကျွန်ုပ်အား ဘုရားရှင်သည် ကူညီမစခဲ့ပါ၏။ ထို့ကြောင့် ယခု ဤနေရာတွင်ရပ်၍ ကျွန်ုပ်သည် လူကြီးလူငယ်မရွေးဘဲ သက်သေခံ ထွက်ဆိုနေခြင်းပင်ဖြစ်၏။ ယခု ကျွန်ုပ်ပြောဆိုသည့်အရာသည်လည်း အရိယာသူတော်စင်များနှင့် မောရှေတို့က ဖြစ်ပျက်လာလိမ့်မည်ဟု ကြိုတင်ဟောပြောခဲ့သည့် အကြောင်းအရာပင်ဖြစ်၏။ 23မေရှိယသည် ဒုက္ခဝေဒနာကို ခံစားရမည်ဖြစ်ပြီး သေရာမှ ပြန်လည်ရှင်သန်တော်မူသည့် ပထမဦးဆုံးသူ တစ်ယောက်ဖြစ်ကာ ဂျူးလူမျိုးများနှင့် တိုင်းတပါးသားများထံသို့ ကယ်တင်ခြင်းအလင်းတရားတော်အား ကြေညာမည့်သူ ဖြစ်သည်ဆိုသည်ကို ကျွန်ုပ်သည် သက်သေခံဟောပြောခြင်းဖြစ်ပါ၏" ဟူ၍ ချေပပြောဆိုလေ၏။ 24ထိုသို့ ပေါလု ချေပလျှောက်ထားစဉ် ဘုရင်ခံဖေတ္တုက "ပေါလု၊ သင်သည် ရူးသွပ်နေပြီဖြစ်၏။ သင်သည် အတတ်ကြူး၍ သူရူးဖြစ်နေပြီဖြစ်၏" ဟုပေါလုအား ကျယ်လောင်စွာ အော်ဟစ်ပြောဆိုလေ၏။ 25ပေါလုကလည်း "လေးစားရပါသော ဘုရင်ခံဖေတ္တု၊ ကျွန်ုပ်သည် ရူးသွပ်နေခြင်း မဟုတ်ပေ။ ကျွန်ုပ်သည် အကျိုးအကြောင်းဆီလျော်သည့် အမှန်တရားကိုသာ ပြောဆိုနေခြင်းဖြစ်ပါ၏။ 26အရှင်မင်းကြီးအဂြိပ္ပ၊ အရှင်မင်းကြီးသည် ဤအကြောင်းအရာအလုံးစုံအား သိတော်မူသည်ဖြစ်၍ ကျွန်ုပ်သည် အရှင့်၏ရှေ့တော်တွင် ရဲရဲဝံ့ဝံ့လျှောက်ထားခြင်းဖြစ်ပါ၏။ ဤအကြောင်းအရာများသည် ဆိတ်ကွယ်ရာအရပ်တွင် ဖြစ်ပျက်ခဲ့ခြင်း မဟုတ်သည့်အတွက် ထိုအကြောင်းအရာအားလုံးကို အရှင်မင်းကြီး သိတော်မူပြီးဖြစ်သည်ဆိုသည်ကို ကျွန်ုပ်သည် အသေချာပင်သိပါ၏။ 27အရှင်မင်းကြီးသည် အရိယာသူတော်စင်များ၏ ဟောပြောချက်များအား ယုံကြည်ပါသလော။ အရှင်မင်းကြီး ယုံကြည်သည်ဆိုသည်ကိုလည်း ကျွန်ုပ်သိပါ၏" ဟူ၍ လျှောက်တင်လေ၏။ 28ထိုအခါ အဂြိပ္ပမင်းကြီးက "သင်သည် အချိန်တိုအတွင်းတွင် ငါ့အား ခရစ်ယာန်တစ်ယောက်ဖြစ်လာရန် သိမ်းသွင်းနိုင်မည်ဟု ထင်မှတ်နေသလော" ဟုပေါလုအား ပြေဆိုလေ၏။ 29ပေါလုကလည်း "အချိန်တိုပင်ဖြစ်စေ၊ အချိန်ကြာကြာပင်ဖြစ်စေ အရှင်မင်းကြီးသာမက ယနေ့ ကျွန်ုပ်၏စကားအား နားထောင်နေကြသူများအားလုံးသည် ဤသို့အချုပ်အနှောင်ခံရခြင်းကလွဲပြီး ကျွန်ုပ်ကဲ့သို့ ဖြစ်လာကြစေရန် ဘုရားရှင်ထံတွင် ကျွန်ုပ်ဆုတောင်းပါ၏" ဟုလျှောက်တင်လေ၏။ 30ထို့နောက် မင်းကြီး၊ ဘုရင်ခံနှင့် ဗေရနိတ်မှစ၍ အခြားလူအပေါင်းတို့သည်လည်း နေရာမှထကြ၏။ 31သူတို့သည် ထိုနေရာမှထွက်ခွာသွားပြီးနောက် "ဤလူသည် ထောင်ဒဏ်၊ သေဒဏ်များအား ခံထိုက်သည့် မည်သည့်ပြစ်မှုကိုမျှ ကျူးလွန်ထားခြင်းမရှိပေ" ဟုအချင်းချင်းပြောဆိုကြလေ၏။ 32ဂြိပ္ပမင်းကြီးကလည်း ဘုရင်ခံဖေတ္တုအား "ဤလူသည် ဧကရာဇ်ထံတွင်သာ အယူခံ ဝင်ထားခြင်းမရှိလျှင် သူ့အားလွှတ်ပေး၍ရ၏" ဟုပြောဆိုလေ၏။
Currently Selected:
Acts 26: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
