3 John 1
1
1အသက်ကြီးသူဖြစ်သော ကျွန်ုပ်ယောဟန်ထံမှ ချစ်လှစွာသောဂါယုထံသို့စာရေးလိုက်၏။ 2ချစ်လှစွာသောမိတ်ဆွေ၊ သင် အစစ အရာရာအဆင်ပြေပြီး ကိုယ်၏ကျန်းမာခြင်း ၊စိတ်၏ချမ်းသာခြင်းအပေါင်းနှင့်ပြည့်စုံပါစေလို့ ကျွန်ုပ်ဆုတောင်းမေတ္တာ ပို့သလိုက်ပါ၏။ 3ကိုယ်တော်၏တပည့်များက သင်သည် ဘုရားရှင်၏သမ္မာတရားတော်ကို လိုက်နာကျင့် သုံးလျှက်ရှိကြောင်း လာရောက်ပြောပြ၍ ကျွန်ုပ်အလွန်ပင်ဝမ်းမြောက်ပျော်ရွှင်မိပါ၏။ 4ကျွန်ုပ်အား ဝမ်းမြောက်ပျော်ရွှင်မှု အဖြစ်ရဆုံး အကြောင်းအရာမှာ ကျွန်ုပ်၏ သားသမီးသဖွယ်ချစ်ခင်ရပါသော တပည့်များသည် သမ္မာတရားတော်နှင့်အညီ လိုက်နာကျင့်သုံးနေကြခြင်းပင် ဖြစ်၏။ 5ချစ်လှစွာသောမိတ်ဆွေ၊ သင်သည်ယုံကြည်သူညီအစ်ကိုမောင်နှမအချင်းချင်းအား ကူညီရိုင်းပင်းတတ်ပါ၏။ 6ထိုသူတို့သည် သင်၏ချစ်ခြင်းမေတ္တာအကြောင်းကို အသင်းတော်ရှေ့၌ သက်သေခံကြ၏။ သင်သည် ထိုသူတို့ကို ဘုရားရှင်၏အလိုတော်အတိုင်း ခရီးဆက်နိုင်ကြစေရန် ကူညီလျှင် ကောင်းမှုပြုခြင်းဖြစ်ပေလိမ့်မည်။ 7အဘယ်ကြောင့်ဆိုသော် ထိုသူတို့သည် ဘုရားရှင်ကို မကိုးကွယ်သောသူတို့ထံမှ မည်သူ့အကူအညီကိုမျှမယူူဘဲ ကိုယ်တော်၏အမည်နာမတော်အတွက် ခရီးပြုနေကြသောကြောင့်ဖြစ်၏။ 8သို့ရာတွင် ကျွန်ုပ်တို့သည် ဘုရားရှင်၏သမ္မာတရားတော် ပြန့်ပွားရေး အတွက် ဖြန့်ဝေသည့်လုပ်ငန်းတွင် ထိုသူတို့အား လုပ်ဖော်ကိုင်ဖက်များအနေဖြင့် ကူညီစောင့်ရှောက်ခြင်းပြုသင့်၏။ 9ကျွန်ုပ်သည် အသင်းတော်ထံသို့ အခြားယုံကြည်သူများကိုကူညီရန်စာရေးသားခဲ့သော်လည်း အသင်းတော်၏ ခေါင်းဆောင်နေရာ ရယူလိုသော ‘ဒယောတရပ်’ ဆိုသူက ကျွန်ုပ်၏စကားကို လက်မခံခဲ့ပေ။ 10ထို့ကြောင့် ကျွန်ုပ်ရောက်လာသောအခါ ကျွန်ုပ်အားမလိုမုန်းထား၍ စွပ်စွဲတိုက်ခိုက်နေသည့်သူ့အား လူသိရှင်ကြားပြောပြပါမည်။ သူသည် ကျွန်ုပ်တို့အကြောင်းကို ဆိုညစ်သောစကားများဖြင့် မဟုတ်မမှန်ပြောဆို၏။ ဤမျှနှင့်မကျေနပ်ဘဲ သူကိုယ်တိုင်ပင်လျှင် ယုံကြည်သူတို့ကို လက်မခံ၊ လက်ခံလိုသောသူတို့ကိုလည်း တားမြစ်၍ အသင်းတော်မှ နှင်ထုတ်တတ်၏။ 11ချစ်လှစွာ သောမိတ်ဆွေ ၊ မကောင်းသောအကျင့်ဆိုးများကို အတုမယူကြပါနှင့်။ စံနမူနာကောင်းကို သာအတုယူကြပါ။ ကောင်းသောအမူအကျင့်များကိုသာပြုမူသောသူတို့သည် ဘုရားရှင်ကို ယုံကြည်လက်ခံသူများဖြစ်ပြီး ဆိုးယုတ်သောအကျင့်ဆိုးကို ကျင့်သောသူတို့သည် ဘုရားရှင်အား ယုံကြည်လက်ခံသူများမဟုတ်ပေ။ 12‘ဒေမာတရိ’ ၏ကောင်းကြောင်းကို လူတိုင်းသာမက သမ္မာတရားကိုယ်တိုင်က သက်သေခံ၏။ ကျွန်ုပ်တို့သည်လည်း သက်သေခံကြ၏။ ကျွန်ုပ်တို့၏သက်သေခံချက်များသည် မှန်ကန်ကြောင်း သင်သိ၏။ 13ကျွန်ုပ်သည် များစွာသောအကြောင်းအရာတို့ကို သင်တို့ထံရေးရန်ရှိသော်လည်း မှင်နှင့် မှင်တံဖြစ်မရေးလိုတော့ပါ။ 14ကျွန်ုပ်သည် မကြာမီသင့်ထံသို့လာရောက်၍ မျက်နှာစုံညီ တွေ့ဆုံ ပြောဆိုနိုင်လိမ့်မည်ဟု မျှော်လင့်ထား၏။ 15သင်တို့အပေါ်ငြိမ်းချမ်းခြင်းများသက်ရောက်ကြပါစေ။ ဤအရပ်၌ရှိသော မိတ်ဆွေများသည်လည်း သင့်ကိုနှုတ်ဆက်လိုက်ကြ၏။ ထိုအရပ်ရှိမိတ်ဆွေများကိုလည်း တစ်ဦးချင်း အမည်နှင့်တကွ နှုတ်ဆက်လော့။
Currently Selected:
3 John 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.