2 Timothy 4
4
1ကျွန်ုပ်သည် အသက်ရှင်သောသူနှင့် သေသောသူတို့ကို တရားစီရင်မည့်ယေရှုခရစ်တော်၏ ရှေ့တော်၌လည်းကောင်း၊ ဘုရားရှင်ရှေ့တော်၌လည်းကောင်း ကိုယ်တော်၏ပေါ်ထွန်းခြင်းနှင့် ကိုယ်တော်၏သာသနာတော်ကိုအကြောင်းပြု၍ သင့်အား အလေးအနက်တိုက်တွန်းလိုက်ပါ၏။ 2အခွင့်အခါသင့်သည်ဖြစ်စေ၊ မသင့်သည်ဖြစ်စေ အဆင်သင့်ပြင်ဆင်ကာ နှုတ်ကပတ်တော်ကို ဟောပြောလော့။ အလွန်စိတ်ရှည်စွာ သွန်သင်၍ အမှားအားထောက်ပြခြင်း၊ ဆုံးမခြင်း၊ အားပေးတိုက်တွန်းခြင်းတို့ကို ပြုလော့။ 3အကြောင်းမူကား လူတို့သည် မှန်ကန်သောဩဝါဒကို နာခံခြင်းမပြုတော့ဘဲ မိမိတို့အလိုဆန္ဒများကို လိုက်၍ မိမိတို့ကြားလိုသည့်စကားများပြောဆိုမည့် ဆရာများကိုသာ ဆည်းပူးကြလိမ့်မည်။ 4သမ္မာတရားကို နားမထောင်ဘဲ ဒဏ္ဍာရီများကိုသာ နားထောင်ကြလိမ့်မည်။ 5သို့သော်လည်း သင်သည် အရာရာ၌ သတိရှိလော့။ ဆင်းရဲဒုက္ခကို သည်းခံ၍ ကောင်းမြတ်သော သတင်းဟောပြောသူဆောင်ရွက်ရမည့် အမှုကို ပြုလျက် အမှုတော်ကို အပြည့်အဝဆောင်ရွက်လော့။ 6အကြောင်းမူကား ကျွန်ုပ်သည် သွန်းလောင်းပူဇော်ခြင်းကို ခံနေရပြီး ကျွန်ုပ်သည် ဤလောကမှ ထွက်ခွာရတော့မည့်အချိန် နီးကပ်လာပြီ။ 7တိုက်ပွဲကောင်းကို ကျွန်ုပ်တိုက်ခဲ့ပြီ။ တာအဆုံးတိုင်အောင် ပြေးခဲ့ပြီ။ ယုံကြည်ခြင်းတရားကို စောင့်ထိန်းခဲ့ပြီ။ 8ယခုအခါ ဖြောင့်မတ်ခြင်းဆုသရဖူသည် ကျွန်ုပ်အတွက် အသင့်ရှိနေ၏။ ထိုနေ့တွင် ဖြောင့်မတ်စွာ တရားစီရင်သူဖြစ်တော်မူသော အရှင်သည် ထိုဆုသရဖူကို ကျွန်ုပ်အား ပေးတော်မူလိမ့်မည်။ ကျွန်ုပ်တစ်ဦးတည်းသာမက ကိုယ်တော်ပေါ်ထွန်းမည်ကို လိုလားတောင့်တသူအားလုံးတို့ကိုလည်း ပေးတော်မူလိမ့်မည်။ 9ကျွန်ုပ်ထံသို့ အမြန်ဆုံးလာရန် ကြိုးစားလော့။ 10အကြောင်းမူကား ဒေမသည် ဤလောကကို ချစ်၍ ကျွန်ုပ်ကို စွန့်ခွာပြီး သက်သာလောနိတ်မြို့သို့ သွားလေပြီ။ ကရက္ကေသည် ဂလာတိပြည်သို့ သွားပြီ။ တိတုသည် ဒါလမာတိပြည်သို့ သွားပြီ။ 11လုကာတစ်ဦးတည်းသာ ကျွန်ုပ်နှင့်အတူရှိ၏။ မာကုကို သင်နှင့်အတူ ခေါ်ခဲ့လော့။ အကြောင်းမူကား အမှုတော်ဆောင်ရွက်ရာတွင် သူသည် ကျွန်ုပ်အတွက် အသုံးဝင်သူဖြစ်၏။ 12ကျွန်ုပ်သည် တုခိတ်ကို ဧဖက်မြို့သို့ စေလွှတ်လိုက်၏။ 13သင်လာသောအခါ တရောမြို့တွင် ကာပုထံ၌ ကျွန်ုပ်အပ်ထားခဲ့သော ဝတ်ရုံနှင့်တကွ ကျမ်းစာလိပ်များ အထူးသဖြင့် သားရေကျမ်းစာလိပ်ကို ယူခဲ့လော့။ 14ကြေးသွန်းလုပ်ငန်းလုပ်ကိုင်သူ အလက်ဇန္ဒြားသည် ကျွန်ုပ်ကို အလွန်ဆိုးရွားစွာပြုခဲ့၏။ သူပြုခဲ့သည့် အပြုအမူများအတွက် အရှင်စီရင်တော်မူလိမ့်မည်။ 15သူ့ကို သတိထားလော့။ အကြောင်းမူကား သူသည် ကျွန်ုပ်တို့၏သတင်းစကားများကို အပြင်းအထန်ဆန့်ကျင်သူဖြစ်၏။ 16ကျွန်ုပ်၏အမှုကို ပထမဆုံးအကြိမ် ချေပပြောဆိုရာတွင် မည်သူမျှ ကျွန်ုပ်ဘက်၌ မနေဘဲ လူတိုင်းကျွန်ုပ်ကို စွန့်ပစ်ခဲ့ကြ၏။ ဤအရာကြောင့် အရှင်သည် ထိုသူတို့ကို အပြစ်တင်တော်မမူပါစေနှင့်။ 17သို့သော် ကျွန်ုပ်သည် လူမျိုးခြားတို့ကြားသိစေခြင်းငှာ သတင်းစကားကို ပြည့်စုံစွာ ဟောပြောရန်အတွက် အရှင်သည် ကျွန်ုပ်ဘက်မှ ရပ်တည်၍ ခွန်အားပေးတော်မူခဲ့၏။ ဤသို့ဖြင့် ကျွန်ုပ်ကို ခြင်္သေ၏ခံတွင်းမှ ကယ်တင်တော်မူ၏။ 18အရှင်သည် ကျွန်ုပ်ကို ဘေးအန္တရာယ်အပေါင်းတို့မှကယ်တင်တော်မူ၍ မိမိ၏ရွှေမြို့တော်တွင်ရှိသော သာသနာတော်သို့ ဘေးကင်းစွာ ပို့ဆောင်တော်မူလိမ့်မည်။ ကိုယ်တော်သည် အစဉ်ထာဝရ ဘုန်းတန်ခိုးကြီးမြတ်တော်မူပါစေသော။ အာမင်။ 19ပြစ်ကိလ၊ အာကုလတို့နှင့်အတူ ဩနေသိဖော်၏ အိမ်သူအိမ်သားတို့ကို နှုတ်ဆက်ပေးလော့။ 20ဧရတ္တုသည် ကောရိန္သုမြို့တွင် နေရစ်ခဲ့၏။ တရောဖိမ်မှာမူ နာမကျန်းဖြစ်သောကြောင့် မိလက်မြို့တွင် ကျွန်ုပ်ထားခဲ့၏။ 21ဆောင်းရာသီ မရောက်မီ အမြန်ဆုံးလာနိုင်ရန် ကြိုးစားလော့။ ဥဗုလု၊ ပုဒေ၊ လိနုနှင့် ကလောဒိတို့မှစ၍ ညီအစ်ကိုမောင်နှမအပေါင်းတို့က သင့်ကို နှုတ်ဆက်လိုက်ကြ၏။ 22အရှင်သည် သင်၏စိတ်ဝိညာဉ်နှင့်အတူ ရှိပါစေသော။ ကျေးဇူးတော်သည် သင်တို့အပေါ် သက်ရောက်ပါစေသော။
Currently Selected:
2 Timothy 4: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
