2 Corinthians 1
1
1ဘုရားရင်၏အလိုတော်အတိုင်း ယေရှုခရစ်တော်၏ သဝကအဖြစ် ရွေးကောက်တော်မူခြင်းခံရသော ကျွန်ုပ်ပေါလု စာရေးလိုက်ပါသည်။ ဤစာသည် အကျွန်ုပ်နှင့် အကျွန်ုပ်တို့၏ညီ တိမောသေတို့သည် ကောရိန္သုမြို့ရှိ ဘုရားရှင်၏အသင်းတော်နှင့် အခါယပြည်တစ်ဝန်းလုံး၌ နေထိုင်သော ယုံကြည်သူအားလုံးထံသို့ ပို့လိုက်သောစာ ဖြစ်သည်။ 2အကျွန်ုပ်တို့အဖဘုရားရှင်နှင့်အရှင်ယေရှုခရစ်ထံတော်မှကျေးဇူးတော်နှင့်ငြိမ်သက်ခြင်းသည် သင်တို့အပေါ်သို့သက်ရောက်ပါစေ။ 3အကျွန်ုပ်တို့၏အရှင်ယေရှုခရစ်တော်၏ အဖဘုရားရှင်ကိုချီးမွမ်းပါသည်။ ဘုရားရှင်သည် အကျွန်ုပ်တို့၏ ကရုဏာရှင်ဖြစ်ပြီး နှစ်သိမ့်မှုအလုံးစုံကိုလည်းပေးတော်မူသောဘုရားရှင်ဖြစ်တော်မူသည်။ 4ဆင်းရဲဒုက္ခအမျိုးမျိုးကို အကျွန်ုပ်တို့ခံရသောအခါ ဘုရားရှင်သည် အကျွန်ုပ်တို့ကိုနှစ်သိမ့်ပေးတော်မူသည်။ ဤသည်မှာ ဘုရားသခင်ရှင်သည် အကျွန်ုပ်တို့ကိုနှစ်သိမ့်ပေးတော်မူသကဲ့သို့ အကျွန်ုပ်တို့သည်လည်း ဆင်းရဲဒုက္ခကြုံသော အခြားသူတို့ကိုနှစ်သိမ့်ပေးနိုင်ရန်ဖြစ်သည်။ 5ယေရှုခရစ်တော်ကြောင့် အကျွန်ုပ်တို့ကြုံတွေ့ရသော ဆင်းရဲဒုက္ခသည် များပြားလှသောကြောင့် ယေရှုခရစ်တော်အားဖြင့် အကျွန်ုပ်တို့ခံစားရသော နှစ်သိမ့်မှုသည်လည်း များပြားလှသည်။ 6အကျွန်ုပ်တို့ ဆင်းရဲဒုက္ခခံရလျှင် ထိုအရာသည် သင်တို့နှစ်သိမ့်ခံရရန်နှင့် ကယ်တင်ခြင်းခံရရန်အတွက်ဖြစ် သည်။ အကျွန်ုပ်တို့နှစ်သိမ့်ခြင်းခံရလျှင်လည်း ထိုအရာသည် သင်တို့နှစ်သိမ့်ခြင်းခံရရန်အတွက်ဖြစ်သည်။ အကျွန်ုပ်တို့ ခံရသောဆင်းရဲဒုက္ခမျိုးကို သင်တို့ကြုံတွေ့ရသောအခါ ထိုနှစ်သိမ့်ခြင်းသည် သင်တို့အား သည်းခံနိုင်စွမ်းကိုဖြစ်စေသည်။ 7သင်တို့ဆက်လက်၍ သည်းခံနိုင်မည်ဟု အကျွန်ုပ်တို့ခိုင်မြဲစွာ မျှော်လင့်ပါသည်။ အဘယ်ကြောင့်ဆိုသော် သင်တို့သည် ဆင်းရဲဒုက္ခကို အကျွန်ုပ်တို့နှင့်အတူမျှဝေခံစားရသကဲ့သို့ နှစ်သိမ့်ခြင်းကိုလည်းမျှဝေခံစားရမည်ကို အကျွန်ုပ်တို့ သိသောကြောင့်ဖြစ်သည်။ 8အကျွန်ုပ်၏ညီအစ်ကိုမောင်နှမတို့၊ အာရှပြည်၌ အကျွန်ုပ်တို့ခံခဲ့ရသော ဆင်းရဲဒုက္ခကို သင်တို့ မသိဘဲမနေစေလိုပါ။ အကျွန်ုပ်တို့သည် မိမိတို့ခံနိုင်ရည်စွမ်းထက် ကျော်လွန်သော ဆင်းရဲဒုက္ခကိုခံခဲ့ရသဖြင့် အသက်ရှင်ရန်ပင် မျှော်လင့်ချက်ကင်းမဲ့ခဲ့သည်။ 9သေဒဏ်စီရင်ခြင်းခံရပြီဟုပင် အကျွန်ုပ်တို့ထင်မှတ်ခဲ့ကြသည်။ သို့သော် ဤသို့ဖြစ်ပျက်ရခြင်းက အကျွန်ုပ်တို့ သည် မိမိကိုယ်ကိုယ်အားမကိုးဘဲ သေလွန်သောသူတို့ကို ပြန်လည်ရှင်သန်ထမြောက်စေတော်မူသော ဘုရားရှင်ကိုသာ အားကိုးရန်ဖြစ်သည်။ 10ဘုရားရှင်သည် အကျွန်ုပ်တို့ကို ထိုမျှလောက်ကြီးမားသော သေဘေးမှကယ်တင်တော်မူပြီ။ ထပ်မံ၍လည်း ကယ်တင်တော်မူလိမ့်မည်။ ဆက်လက်၍ ကယ်တင်တော်မူလိမ့်မည်ဟု ကိုယ်တော်ကို အကျွန်ုပ်တို့ မျှော်လင့်ကြသည်။ 11သင်တို့သည်လည်း အကျွန်ုပ်တို့ကို ဆုတောင်းခြင်းဖြင့် ကူညီနေကြသည်ဖြစ်၍ လူများစွာတို့၏ ဆုတောင်းခြင်းကို ဘုရားရှင်အဖြေပေးတော်မူလိမ့်မည်။ ထို့ကြောင့် များစွာသောလူတို့သည် အကျွန်ုပ်တို့ ခံစားရသောဆုကျေးဇူးများကိုထောက်၍ အကျွန်ုပ်တို့အတွက် ဘုရားရှင်ကိုကျေးဇူးတင်ကြလိမ့်မည်။ 12အကျွန်ုပ်တို့ လိပ်ပြာသန့်စွာ သက်သေခံသည့် ဂုဏ်ယူဝံ့ကြွားဝါစရာသည်ကား အကျွန်ုပ်တို့သည် ဤလောက၌ အထူးသဖြင့် သင်တို့ရှေ့၌ လူ့ဉာဏ်ကိုအမှီမပြုဘဲ ဘုရားရှင်၏ ကျေးဇူးတော်ကိုအမှီပြု၍ ဘုရားရှင်ထံမှလာသော ရိုးသားဖြူစင်ခြင်းတို့ဖြင့်နေထိုင်ခဲ့ကြောင်းဖြစ်သည်။ 13အကျွန်ုပ်တို့သည် သင်တို့ဖတ်ရှု၍ နားလည်နိုင်သော အကြောင်းအရာများမှအပ အခြားမည်သည့်အကြောင်းအရာကိုမျှ သင်တို့ထံမရေးခဲ့ကြပေ။ 14ထို့ကြောင့် သင်တို့သည် အကျွန်ုပ်တို့ကို တစ်စိတ်တစ်ဒေသသိထားသည်နှင့်အညီ အရှင်ဖြစ်တော်မူသောကိုယ်တော်ယေရှု ပြန်လည်ကြွလာမည့် နေ့ရက်၌အကျွန်ုပ်တို့သည် သင်တို့အတွက် ဂုဏ်ယူဝင့်ကြွားစရာဖြစ်သကဲ့သို့ သင်တို့သည်လည်း အကျွန်ုပ်တို့အတွက် ဂုဏ်ယူဝင့်ကြွားစရာဖြစ်ကြောင်းကို သင်တို့စုံလင်စွာသိကြလိမ့်မည်ဟု အကျွန်ုပ်မျှော်လင့်ပါသည်။ 15အကျွန်ုပ်သည် ဤသို့ယုံကြည်စိတ်ချသဖြင့် သင်တို့သည်ကျေးဇူးတော်ကိုနှစ်ကြိမ်ခံစားရစေရန် သင်တို့ထံသို့ ဦးစွာလာ၍ 16သင်တို့နေရာကိုဖြတ်ပြီးလျှင် မာကေဒေါနိပြည်သို့သွားပြီးနောက် တစ်ဖန်မာကေဒေါနိပြည်မှ သင်တို့ထံသို့ပြန်လာ၍ သင်တို့၏အကူအညီဖြင့် ယုဒပြည်သို့သွားရန်စီစဉ်ထားသည်။ 17ဤသို့ စီစဉ်သောအခါ အကျွန်ုပ်သည်ပေါ့ပေါ့တန်တန်စီစဉ်သည်ဟု သင်တို့ထင်သလော။ အကျွန်ုပ်သည် အစီအစဉ်များကိုချမှတ်ရာတွင် တစ်ချိန်တည်း၌ “ဟုတ်ပါသည်” ဟူ၍လည်းကောင်း၊ “မဟုတ်ပါ” ဟူ၍လည်းကောင်း စကားနှစ်ခွဖြင့် ပြောဆိုတတ်သောဤလောကသားများနှင့်တူသလော။ 18ဘုရားရှင်သစ္စာရှိတော်မူသည်နှင့်အမျှ သင်တို့အားပြောဆိုသော အကျွန်ုပ်တို့၏စကားသည် “ဟုတ်ပါသည်” နှင့် “မဟုတ်ပါ” ဟူ၍နှစ်ခွဖြစ်သည်မဟုတ်။ 19အကျွန်ုပ်မှစ၍ သိလွာနုနှင့် တိမောသေတို့သည် သင်တို့အားဟောပြောခဲ့သော ဘုရားရှင်၏ သားတော် ယေရှုခရစ်တော်သည် “ဟုတ်ပါသည်” နှင့် “မဟုတ်ပါ” ကြားတွင်ယိမ်းယိုင်သောအရှင်မဟုတ်ပေ။ ထိုအရှင်၌ “ဟုတ်ပါသည်” ဟူ၍သာရှိသည်။ 20ဘုရားရှင်၏ ကတိတော်ရှိသမျှတို့သည် ထိုအရှင်၌ “ဟုတ်ပါသည်” ဟူ၍ဖြစ်ကြသည်။ ထို့ကြောင့် အကျွန်ုပ်တို့သည် ဘုရားရှင်၏ ဘုန်းတော်ကို ထင်ရှားစေရန် ယေရှုခရစ်တော်အားဖြင့် “အာမင်” ဟူ၍ဆိုကြသည်။ 21စင်စစ်အကျွန်ုပ်တို့နှင့် သင်တို့ကို ယေရှုခရစ်တော်၌မြဲမြံစွာရပ်တည်စေ၍ ဘိသိက်ပေးတော်မူသောအရှင်သည် ဘုရားရှင်ဖြစ်တော်မူသည်။ 22ထိုဘုရားရှင်သည် အကျွန်ုပ်တို့ကို မိမိပိုင်သော လူများအဖြစ်တံဆိပ်ခတ်နှိပ်တော်မူ၍ ဖြစ်လာမည့်အရာများအတွက် အာမခံချက်ပေးလျက် အကျွန်ုပ်တို့၏ စိတ်နှလုံးထဲ၌ ဝိညာဉ်တော်ကို စရန်အဖြစ် သွင်းပေးတော်မူသည်။ 23ကောရိန္သုမြို့သို့ အကျွန်ုပ်ပြန်မလာရခြင်းအကြောင်းရင်းမှာ အကျွန်ုပ်၏ပြင်းထန်သောဆုံးမခြင်းမှ သင်တို့ကို လွတ်စေလိုသောကြောင့်ဖြစ်ကြောင်း ဘုရားရှင်ကို တိုင်တည်၍ အကျွန်ုပ်ပြောသည်။ 24သင်တို့သည်မည်သည့်အရာကိုယုံကြည်ရမည်ကိုသင်တို့အားအမိန့်ပေးရန်အကျွန်ုပ်တို့ကြိုးစားနေခြင်းမဟုတ်။ သင်တို့၏ယုံကြည်ခြင်းသည်ခိုင်မာလျက်ရှိကြောင်းအကျွန်ုပ်တို့သိကြသည်။ အကျွန်ုပ်တို့သည်သင်တို့၏ရွှင်လန်းဝမ်းမြောက်မှုအတွက်သင်တို့နှင့်အတူလုပ်ဆောင်နေခြင်းသာဖြစ်သည်။
Currently Selected:
2 Corinthians 1: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
