1 Corinthians 6
6
1သင်တို့သည် အချင်းချင်းငြင်းခုန်နေကြလျှင် ဘုရားရှင်၏လူများရှေ့တွင်တရားစီရင်ခြင်းကိုမခံရပဲ သာသနာပြင်ပရှိလူများရှေ့တွင်တရားစီရင်ခံရဲသလော။ 2တစ်နေ့တွင် ဘုရားရှင်၏လူများသည် ဤလောကရှိလူတို့ကိုတရားစီရင်မည်ကိုမသိကြသလော။ သန့်ရှင်းသူတို့သည် လောကီနိုင်ငံကို တရားစီရင်မည်ဟု မသိကြသလော။ သင်တို့သည် ဤလောကရှိ လူတို့ကိုတရားစီရမည်ဖြစ်လျှင် သေးငယ်သောအမှုကိစ္စများကိုစီရင်နိုင်စွမ်းမရှိသလော။ 3နောင်တစ်ချိန်တွင် အကျွန်ုပ်တို့သည် နတ်ဒေဝါများကိုပင် တရားစီရင်ရမည်ကို သင်တို့မေ့နေကြသလော။ ထို့ကြောင့် ဤလောကရှိအမှုကိစ္စများကိုပို၍စီရင်နိုင်ကြရမည်မဟုတ်လော။ 4ထိုကြောင့် သင်တို့သည် ထိုကဲ့သို့သောအမှုကိစ္စများကို ငြင်းခုံနေကြလျှင် အဘယ်ကြောင့်ယုံကြည်သူများ လေးစားအထင်ကြီးမှုမရှိသည့်လူများကို တရားစီရင်သောသူများအဖြစ်ရွေးချယ်ထားကြသနည်း။ 5သင်တို့အား အကျွန်ုပ်ဤကဲ့သို့ပြောရခြင်းမှာ သင်တို့အရှက်ရစေရန်ဖြစ်သည်။ သင်တို့ထဲ၌ ယုံကြည်သူများ ကြားအငြင်းပွဲမှုများကို စီရင်ဆုံးဖြတ်နိုင်သည့် ဉာဏ်ပညာရှိသောတစ်စုံတစ်ယောက်မျှမရှိသလော။ 6ထိုအစား သင်တို့သည်အချင်းချင်းတရားစွဲဆိုရန် မယုံကြည်သောသူများ၏ရှေ့သွားသွားကြလေသည်။ 7ဤကဲ့သို့သင်တို့အချင်းချင်း တရားစွဲဆိုနေကြခြင်းသည် သင်တို့အတွက်ကြီးမားသောဆုံးရှုံးမှုကြီးပင်ဖြစ်သည်။ မတရားစွဲဆိုခြင်းခံရသည်ကပိုကောင်းသည်မဟုတ်လော။ လိမ်လည်လှည့်စားခြင်းခံရသည်က ပို၍ကောင်းသည် မဟုတ်လော။ 8သို့သော် သင်တို့ကိုယ်တိုင်ကပင် ယုံကြည်သူအချင်းချင်းလိမ်လည်လှည့်စား၍ မတရားသောအမှုများကိုပြုလုပ် နေကြသည်။ 9ကောက်ကျစ်သောသူတို့သည် ဘုရားရှင်၏သာသနာတော်ကို အမွေမခံရသည်ကို သင်တို့မသိကြသလော။ အယူမလွှဲကြနှင့်။ မတရားသောမေထုန်၌ မှီဝဲသောသူ၊ ရုပ်တုကို ကိုးကွယ်သောသူ၊ သူတစ်ပါးသားမယားကို ပြစ်မှားသောသူ၊ အမျိုးသားအချင်းချင်းမေထုန်ပြုသောသူ၊ 10သူတစ်ပါးဥစ္စာကိုခိုးသောသူ၊ လောဘကြီးသောသူ၊ သေရည်အရက်သောက်သုံးမူးယစ်သောသူ၊ သူတစ်ပါးအားဆဲရေးတိုင်းတွာသောသူ၊ လိမ်လည်လှည့်ဖြားသောသူတို့သည် ဘုရားရှင်၏သာသနာတော်ကို အမွေရလိမ့်မည်မဟုတ်ပေ။ 11သင်တို့ထဲမှအချို့သောသူတို့သည် ထိုကဲ့သို့သောသူဖြစ်ကြသည်။ သို့သော် ယခုတွင် ယေရှုခရစ်တော်၏ အမည်နာမအားဖြင့်လည်းကောင်း၊ အကျွန်ုပ်တို့ဘုရားရှင်၏ ဉာဏ်အလင်းတော်အားဖြင့်လည်းကောင်း သင်တို့သည်သန့်စင်ခြင်းခံရပြီး ဖြောင့်မတ်မှန်ကန်သောမြင့်မြတ်သည့်သူများဖြစ်ခဲ့ကြပြီဖြစ်သည်။ 12သင်တို့ထဲမှအချို့သည် “အကျွန်ုပ်သည်အရာအားလုံးကိုလုပ်ပိုင်ခွင့်ရှိသည်” ဟုပြောဆိုကြသော်လည်း အရာအားလုံးသည်အကျိုးအမြတ်ရှိသည်တော့မဟုတ်ပေ။ သင်တို့ထဲမှအချို့သည် “အကျွန်ုပ်သည်အရာအားလုံး ကိုလုပ်ပိုင်ခွင့်ရှိသည်” ဟုပြောကြသော်လည်း အကျွန်ုပ်သည်မည်သည့်အရာကိုမျှကျွန်ခံမည်မဟုတ်ပေ။ 13သင်တို့ထဲမှအချို့သည် “အစားအစာသည် ဝမ်းအတွက်ဖြစ်ပြီး ဝမ်းသည်လည်းအစားအစာအတွက်ဖြစ်သည်” ဟုပြောကြသော်လည်း ဘုရားရှင်သည်နှစ်ခုစလုံးကိုဖျက်ဆီးလိမ့်မည်ဖြစ်သည်။ အကျွန်ုပ်တို့၏ကိုယ်ခန္ဓာသည် မေထုန်မှီဝဲရန်အတွက်မဟုတ်ပဲ အရှင်အတွက်ဖြစ်ပြီး အရှင်သည်အကျွန်ုပ်တို့၏ကိုယ်ခန္ဓာကိုစောင့်ရှောက်တော်မူ သည်။ 14ဘုရားရှင်သည် သူ၏တန်ခိုးတော်ဖြင့် အရှင့်ကို ပြန်လည်ရှင်သန်ထမြောက်စေတော်မူသည်ဖြစ်ပြီး အရှင်သည် လည်းအကျွန်ုပ်တို့ကိုပြန်လည်ရှင်သန်ထမြောက်လိမ့်မည်ဖြစ်သည်။ 15သင်တို့ကိုယ်ခန္ဓာသည် ကိုယ်တော်ယေရှု၏ကိုယ်ခန္ဓာအစိတ်အပိုင်းဖြစ်ကြောင်းကို မသိကြသလော။ သို့ဖြစ်လျှင် ယေရှုခရစ်တော်၏ကိုယ်ခန္ဓာအစိတ်အပိုင်းကိုယူ၍ ပြည့်တန်ဆာ၏အစိတ်အပိုင်းနှင့်ပေါင်းစည်း သင့်သလော။ ထိုသို့လုံးဝပြုလုပ်၍မရပေ။ 16သင်တို့သည် ပြည့်တန်ဆာနှင့်ပေါင်းဖတ်လျှင် သင်တို့၏ကိုယ်ခန္ဓာသည် ပြည့်တန်ဆာမနှင့် တစ်သားတည်းဖြစ်သွားကြသည်ကိုသင်တို့မသိကြသလော။ အဘယ်ကြောင့်ဆိုသော်ကျမ်းစာထဲတွင် “လူနှစ်ဦးသည် လူတစ်ဦးတည်းကဲ့သို့ဖြစ်သွားကြလိမ့်မည်ဖြစ်သည်” ဟုရေးသားထားသောကြောင့်ဖြစ်သည်။ 17သို့သော်အရှင်နှင့် တစ်သားတည်းဖြစ်သောမည်သူမဆိုသည် အရှင်နှင့် တစ်စိတ်တစ်ဝမ်းတည်းဖြစ်သောသူ ပင်ဖြစ်သည်။ 18မတရားသောမေထုန်ပြုကျင့်ခြင်းကိုရှောင်ကျဉ်ကြလော့။ လူတို့ပြုတတ်သော အခြားအပြစ်ဒုစရိုက်အားလုံး တို့သည် ကိုယ်ခန္ဓာ၏အပြင်မှကျူးလွန်ခြင်းဖြစ်သော်လည်း မတရားသောမေထုန်ကိုပြုသောသူတို့သည်ကား သူတို့၏ကိုယ်ခန္ဓာအားပြစ်မှားခြင်းပင်ဖြစ်သည်။ 19သင်တို့၏ကိုယ်ခန္ဓာသည် သင်တို့ဘုရားရှင်ထံမှလက်ခံရရှိထားသော သင်တို့အတွင်း၌ကိန်းဝပ်နေသည့် ဉာဏ်အလင်းတော်၏ ဗိမာန်တော်ဖြစ်သည်ကို သင်တို့မသိသလော။ သင်တို့သည် သင်တို့ကိုယ်သင်တို့ မပိုင်ဆိုင်ပေ။ 20ထို့ကြောင့် သင်တို့၏ကိုယ်ခန္ဓာဖြင့် ဘုရားရှင်၏ဂုဏ်တော်အားထင်ရှားစေကြလော့။
Currently Selected:
1 Corinthians 6: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
