1 Corinthians 3
3
1အကျွန်ုပ်၏ညီအစ်ကိုမောင်နှမတို့၊ အကျွန်ုပ်သည် ဉာဏ်အလင်းတော်ရရှိထားသောလူတို့အား ဟောပြောသကဲ့သို့ သင်တို့အား ဟောပြော၍မရနိုင်ပေ။ သို့သော် ဤလောကရှိလူသားတို့အားဟောပြောရာတွင် ယေရှုခရစ်တော်အားစတင်ယုံကြည်သည့် ကလေးသူငယ်များကဲ့သို့ဟောပြောရသည်။ 2အကျွန်ုပ်သည် သင်တို့အားအရွယ်ရောက်ပြီးသောသူတို့စားသည့်အစားအစာကိုမကျွေးပဲ သောက်သုံးရန်နို့ရည် ကိုသာပေးခြင်းဖြစ်သည်။ အဘယ်ကြောင့်ဆိုသော် သင်တို့သည်ထိုကဲ့သို့သောအစားအစာကိုစားရန်အဆင်သင့် မဖြစ်ကြသေးသောကြောင့်ဖြစ်သည်။ ယခုပင်သင်တို့သည်ထိုအစားအစာကိုစားရန်အဆင်သင့်မဖြစ်ကြသေးပေ။ 3သင်တို့သည် ဤလောကရှိလူသားတို့နေထိုင်ကြသည့်အတိုင်း နေထိုင်နေကြသေးသောကြောင့်ဖြစ်သည်။ အဘယ်ကြောင့်ဆိုသော် သင်တို့တွင် အချင်းချင်းမနာလိုမှုများနှင့် အချင်းချင်းငြင်းခုံကြခြင်းများရှိနေကြ သေးသည်ဖြစ်သောကြောင့် သင်တို့သည် ဤလောကရှိလူသားတို့နေထိုင်ကြသည့်အတိုင်းနေထိုင်နေကြသည် မဟုတ်လော။ သင်တို့သည် ဘုရားရှင်အားမသိသောသူများအတိုင်းပြုမူနေကြသည်မဟုတ်လော။ 4အဘယ်ကြောင့်ဆိုသော် သင်တို့ထဲမှတစ်ယောက်ယောက်သည် “အကျွန်ုပ်သည် ပေါလုတပည့်ဖြစ်သည်” ဟူ၍လည်းကောင်း၊ အခြားတစ်ယောက်သည် “ငါသည် အာပေါလုတပည့်ဖြစ်သည်” ဟူ၍လည်းကောင်း ပြောဆိုနေကြခြင်းသည် ဘုရားရှင်အားမသိသောလူသားများကဲ့သို့ပင်ပြုမူနေကြခြင်းမဟုတ်လော။ 5ထို့အပြင် အာပေါလုကား မည်သူနည်း။ ပေါလုကား မည်သူနည်း။ အကျွန်ုပ်တို့သည် ဘုရားရှင်၏အစေခံများသာ ဖြစ်သည်။ အကျွန်ုပ်တို့သည်သင်တို့အား ယေရှုခရစ်တော်ကိုယုံကြည်စေရန်ကူညီပေးခဲ့ကြသည်။ အကျွန်ုပ်တို့တစ်ဦးခြင်းစီသည် အရှင်ပေးအပ်သောတာဝန်ကိုထမ်းရွက်ကြခြင်းသာဖြစ်သည်။ 6အကျွန်ုပ်သည် စိုက်ပျိုးသောသူဖြစ်သည်။ အာပေါလုသည် ရေလောင်းသောသူဖြစ်သည်။ အပင်ကိုကြီးပွားစေသောသူသည်ကား ဘုရားရှင်ပင်ဖြစ်သည်။ 7ထို့ကြောင့်စိုက်ပျိုးသောသူနှင့် ရေလောင်းသောသူနှစ်ဦးစလုံးသည်အရေးပါသောသူများမဟုတ်ပေ။ အပင်အားကြီးထွားစေသော ဘုရားရှင်သာလျှင်အရေးပါသောသူဖြစ်ပေသည်။ 8စိုက်ပျိုးသောသူနှင့် ရေလောင်းသောသူသည် ရည်ရွယ်ချက်တစ်ခုတည်းသာရှိပြီး နှစ်ဦးစလုံးသည် မိမိလုပ်ဆောင်သည့်အတိုင်း အကျိုးကျေးဇူးကိုခံစားကြရလိမ့်မည်ဖြစ်သည်။ 9အကျွန်ုပ်တို့သည် ဘုရားရှင်ထံ၌ အလုပ်လုပ်သောသူများဖြစ်ကြသည်။ သင်တို့သည် ဘုရားရှင်၏လယ်ယာများ ဖြစ်ကြသည်။ သင်တို့သည်ဘုရားရှင်၏အဆောင်အအုံလည်းဖြစ်ကြသည်။ 10အကျွန်ုပ်အားပေးအပ်ထားသောဘုရားရှင်၏ကျေးဇူးတော်အညီ ကျွမ်းကျင်သောအိမ်ဆောက်သူကဲ့သို့ အုပ်မြစ်ကိုချခြင်းဖြစ်သည်။ အခြားတစ်ယောက်သည် ထိုအပေါ်၌အဆောက်အအုံဆောက်မည်ဖြစ်သည်။ သို့သော်သူမည်ကဲ့သို့တည်ဆောက်သည်ကို လူတိုင်းသတိပြုရမည်ဖြစ်သည်။ 11အကြောင်းမူကား ယေရှုခရစ်တော်ချထားခဲ့ပြီးဖြစ်သော အုတ်မြစ်မှတစ်ပါး အခြားသောအုတ်မြစ်ကို မည်သူမျှ မချနိုင်ပေ။ 12မည်သူမဆိုထိုအုတ်မြစ်အပေါ်၌ ရွှေ၊ ငွေ၊ ကျောက်မျက်ရတနာ၊ သစ်သား၊ မြက်ပင် သို့မဟုတ် ကောက်ရိုး စသည်တို့ဖြင့် တည်ဆောက်လျှင် 13ထိုသူ၏လုပ်ဆောင်မှုများသည် တစ်နေ့ထင်ရှားလာလိမ့်မည်ဖြစ်သည်။ အဘယ်ကြောင့်ဆိုသော် ယေရှုခရစ်တော်ပြန်လာသောအခါတွင် ထိုအရာများကိုကိုယ်တော်သည်ရှင်းလင်းအောင်ပြုလုပ်လိမ့်မည်ဖြစ်သည်။ ထိုနေ့သည် မီးနှင့်အတူပေါ်ထွန်းလာလိမ့်မည်ဖြစ်သည်။ မီးသည် လူတစ်ဦးတစ်ယောက်ခြင်းစီ၏လုပ်ဆောင်မှု အရည်အသွေး အားစမ်းသပ်စစ်ဆေးလိမ့်မည့်ဖြစ်သည်။ 14ထိုအုတ်မြစ်အပေါ်၌ တည်ဆောက်ထားသော သူ၏အဆောက်အအုံသည်လောင်ကျွမ်းပြာကျမှုမရှိလျှင် သူသည်ဆုလာဒ်ကိုရလိမ့်မည်ဖြစ်သည်။ 15သို့သော်သူ၏လုပ်ဆောင်မှုသည် လောင်ကျွမ်းပြာကျသွားလျှင် ထိုသူသည်မည်သည့်အရာမှရရှိလိမ့်မည်မဟုတ် ပေ။ သို့သော်လည်း မီးဘေးမှလွတ်မြောက်ရုံသာလွတ်မြောက်သကဲ့သို့ သူသည် ကယ်တင်ခြင်းကိုခံရလိမ့်မည်ဖြစ် သည်။ 16သင်တို့ကိုယ်တိုင်သည် ဘုရားရှင်၏ ဗိမာန်တော်ကဲ့သို့ဖြစ်ကြပြီး ဘုရားရှင်၏ဉာဏ်အလင်းတော်သည် သင်တို့အထဲ၌ကိန်းဝပ်တော်မူသည်ကို သင်တို့မသိကြသလော။ 17မည်သူမဆို ဘုရားရှင်၏ ဗိမာန်တော်ကို ဖျက်ဆီးလျှင် ထိုသူကို ဘုရားရှင်သည်ဖျက်ဆီးတော်မူလိမ့်မည်။ အဘယ်ကြောင့်ဆိုသော် ဘုရားရှင်၏ ဗိမာန်တော်သည် မြင့်မြတ်သောကြောင့်ဖြစ်ပြီး သင်တို့ကိုယ်တိုင်သည် လည်းထိုဗိမာန်တော်ဖြစ်ကြသောကြောင့်ဖြစ်သည်။ 18မည်သူမျှ မိမိကိုယ်ကိုမလှည့်စားကြနှင့်။ သင်တို့ထဲမှတစ်စုံတစ်ယောက်သည် ဤလောက၌ ပညာရှိဖြစ်သည်ဟု ကိုယ့်ကိုကိုယ်ထင်နေလျှင် ထိုသူသည် ပညာရှိအဖြစ်သို့ရောက်လိုသောလူမိုက်တစ်ဦးပင် ဖြစ်မည်ဖြစ်သည်။ 19အဘယ်ကြောင့်ဆိုသော် ဤလောကရှိလူတို့ ဉာဏ်ပညာရှိသည်ဟုထင်နေသောအရာအား ဘုရားရှင်သည် မိုက်မဲသောအရာဖြစ်သည်ဟုသာမိန့်တော်မူသောကြောင့်ဖြစ်သည်။ ဤအရာသည်ကျမ်းစာထဲတွင်ရေးသားထား သော “ဘုရားရှင်သည် ပညာရှိ တလောကီပညာသည် ဘုရားရှင်ရှေ့၌ မိုက်မဲခြင်းဖြစ်၏။ ကျမ်းစာလာသည်ကား၊ ဘုရားရှင်သည် ပညာရှိတို့အား သူတို့၏ပရိယာယ်အားဖြင့် ဖမ်းဆီးတော်မူသည်” ဟူသည့်အတိုင်းပင်ဖြစ်သည်။ 20တစ်ဖန်ကျမ်းစာထဲတွင် “ပညာရှိတို့၏ အကြံအစည်တို့သည် အချည်းနှီးဖြစ်ကြောင်းကိုဘုရားရှင်သည် သိတော်မူသည်” ဟူ၍လည်းရေးသားထားသည်။ 21ထိုကြောင့် သင်တို့၏လူသားခေါင်းဆောင်များအကြောင်းကိုကြွားဝါပြောခြင်းအားရပ်ကြလော့။ အရာခပ်သိမ်း အားသင်တို့ပိုင်ဆိုင်ကြသည်။ 22ပေါလုဖြစ်စေ၊ အာပေါလုဖြစ်စေ၊ ကေဖဖြစ်စေ၊ ဤလောကဖြစ်စေ၊ အသက်ရှင်ခြင်းဖြစ်စေ၊ သေခြင်းဖြစ်စေ၊ မျက်မှောက်ကာလ၌ရှိသောအရာဖြစ်စေ၊ နောင်ကာလ၌ဖြစ်လာမည့်အရာဖြစ်စေ၊ ခပ်သိမ်းသော အရာတို့သည် သင်တို့အပိုင်ပင်ဖြစ်ကြသည်။ 23သင်တို့ကို ယေရှုခရစ်တော်ပိုင်ဆိုင်သကဲ့သို့ ယေရှုခရစ်တော်အားလည်း ဘုရားရှင်သည်ပိုင်ဆိုင်တော်မူသည်။
Currently Selected:
1 Corinthians 3: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
