1 Corinthians 14
14
1ချစ်ခြင်းမေတ္တာနောက်ကိုလိုက်ကြပြီး ဝိညာဉ်ရေးဆိုင်ရာဆုကျေးဇူးတို့ကိုလိုချင်ကြလော့။ အထူးသဖြင့် ရှေ့ဖြစ် ဟောနိုင်သည့်အခွင့်ကိုလိုချင်ကြလော့။ 2အကြောင်းမူကား အခြားသောဘာသာစကားအားပြောဆိုသောသူသည် လူတို့အားပြောခြင်းမဟုတ်ဘဲ ဘုရားရှင် ပြောခြင်းဖြစ်သည်။ ထိုသူတို့၏စကားကို မည်သူမျှနားမလည်ကြပေ။ သူသည် လျှို့ဝှက်နက်နဲသောအရာတို့ကို ဉာဏ်အလင်းတော်အားဖြင့်ပြောခြင်းဖြစ်သည်။ 3ရှေ့ဖြစ်ဟောသောသူတို့သည်ကား လူတို့အားခွန်အားရစေရန်၊ အားပေးရန်၊ နှစ်သိမ့်ရန်အလို့ငှာ ဟောပြောကြသည်။ 4ဘာသာစကားအမျိုးမျိုးပြောသောသူသည် မိမိကိုယ်ကိုသာတည်ဆောက်သည်။ သို့သော် ရှေ့ဖြစ်ဟောပြော သောသူသည်ကား အသင်းတော်တစ်ခုလုံးကိုတည်ဆောက်ပေးသည်။ 5အကျွန်ုပ်သည် သင်တို့အားလုံးကိုဘာသာစကားအမျိုးမျိုးပြောစေလိုသည်။ သို့သော်လည်း အကျွန်ုပ်သည် သင်တို့ကို ရှေ့ဖြစ်ဟောပြောနိုင်သောဆုကျေးဇူးကိုပို၍ရစေလိုသည်။ ရှေ့ဖြစ်ဟောပြောသူသည် ဘာသာစကားအမျိုးမျိုးပြောတတ်သူထက် ပို၍ကြီးမြတ်ပေသည်။ အဘယ်ကြောင့်ဆိုသော် ဘာသာစကားအမျိုးမျိုးကိုပြောသောသူသည် အသင်းတော်တည်ထောင်ရာတွင် ထိုဘာသာစကား၏အနက်အဓိပ္ပာယ်ကိုဖော်ပြနိုင်ရမည်ဖြစ်သည်။ ထိုသို့မဟုတ်လျှင် ရှေ့ဖြစ်ဟောပြောခြင်းကို ပို၍ကောင်းသည်။ 6အကျွန်ုပ်၏ညီအစ်ကိုမောင်နှမတို့၊ အကျွန်ုပ်သည် သင်တို့ရှိရာသို့လာ၍ သင်တို့မသိသောဘာသာစကားဖြင့် ဟောပြောသော် သင်တို့အတွက်မည်သည့်အကျိုးရှိမည်နည်း။ အကျွန်ုပ်ဟောပြောသောစကားများသည် ဘုရားရှင်၏ဗျာဒိတ်တော်ကိုဟောပြောခြင်း၊ ရှေ့ဖြစ်ဟောသောစကား၊ ဆုံးမသွန်သင်ချက်အချို့ကိုပြောပြသော စကားများဖြစ်နေစေကာမူ သင်တို့အတွက်အကျိုးရှိလိမ့်မည်မဟုတ်ပေ။ 7ထိုနည်းတူ ပလွေ သို့မဟုတ် စောင်းကဲ့သို့သော သက်မဲ့တူရိယာများသည် ကြည်လင်ပြတ်သားသောတေးသံများ ထွက်ပေါ်မလာလျှင် မည်သည့်တီးလုံးကိုတီးမှုတ်နေကြောင်း မည်သူကသိနိုင်မည်နည်း။ 8တံပိုးခရာသည်လည်းကြည်လင်ပြတ်သားသောအသံမထွက်လျှင် စစ်တိုက်ရန်ခေါ်နေကြောင်း စစ်သားများသည် မည်ကဲ့သို့သိနိုင်မည်နည်း။ 9သင်တို့သည်လည်းထိုနည်းတူပင်ဖြစ်သည်။ သင်တို့သည် အခြားသောသူများနားလည်နိုင်သောစကားဖြင့် မဟောပြောလျှင် သင်တို့ဟောပြောနေသည့်အရာကိုမည်သူကနားလည်နိုင်မည်နည်း။ သင်တို့၏စကားသည် လေထဲ၌ပျောက်ကွယ်သွားသကဲ့သို့ပင်ဖြစ်လိမ့်မည်။ 10ဤလောကတွင် ဘာသာစကားများစွာရှိသော်လည်း အဓိပ္ပာယ်မဲ့သည့်ဘာသာစကားဟူ၍မရှိပေ။ 11တစ်စုံတစ်ယောက်ပြောသောဘာသာစကား၏အနက်အဓိပ္ပာယ်ကိုအကျွန်ုပ်နားမလည်လျှင် ထိုသူသည် အကျွန်ုပ်အတွက်လူမျိုးခြားသာဖြစ်သည်။ ထိုသူ့အတွက်လဲအကျွန်ုပ်သည် လူမျိုးခြားသာဖြစ်သည်။ 12သင်တို့သည်လည်းထိုနည်းတူပင်ဖြစ်သည်။ အဘယ်ကြောင့်ဆိုသော်သင်တို့သည် ဝိညာဉ်ရေးဆိုင်ရာဆုကျေးဇူး ကိုအလွန်ရလိုကြသည့်အတွက် အသင်းတော်တည်ထောင်ရာတွင်အကျိုးပြုမည့်ဆုကျေးဇူးကိုရရန်ကြိုးစား ကြလော့။ 13ထိုကြောင့် အခြားသော ဘာသာစကားကိုပြောသောသူသည် ထိုစကား၏အနက်အဓိပ္ပာယ်ကို ဖော်ပြနိုင်ရန် လည်းဆုတောင်းသင့်ပေသည်။ 14အဘယ်ကြောင့်ဆိုသော် အခြားသောဘာသာစကားဖြင့် အကျွန်ုပ်ဆုတောင်းလျှင် အကျွန်ုပ်၏စိတ်ဝိဉာဉ်သည် ဆုတောင်းနေသော်လည်း အကျွန်ုပ်၏အသိဉာဏ်သည်ကားပါဝင်ခြင်းမရှိသောကြောင့်ဖြစ်သည်။ 15ထိုသို့ဆိုလျှင်အကျွန်ုပ်သည်မည်ကဲ့သို့ပြုလုပ်ရမည်နည်း။ အကျွန်ုပ်သည်မိမိ၏စိတ်ဝိဉာဉ်ဖြင့်ဆုတောင်းလျှင် အကျွန်ုပ်၏အသိဉာဏ်ဖြင့်ပါဆုတောင်းရမည်ဖြစ်သည်။ အကျွန်ုပ်သည်မိမိ၏စိတ်ဝိဉာဉ်ဖြင့်သီချင်းသီဆိုလျှင် အကျွန်ုပ်၏အသီဉာဏ်ဖြင့်ပါသီဆိုရမည်ဖြစ်သည်။ 16သင်၏ စိတ်ဝိဉာဉ်ဖြင့် ဘုရားရှင်အားချီးမွမ်းလျှင် သင်ပြောနေသောချီးမွမ်းစကားကိုနားမလည်သည့် လူတို့သည် “အာမင်” ဟုမည်ကဲ့သို့ခေါ်နိုင်ကြမည်နည်း။ 17သင်သည် ကျေးဇူးတော်ကိုကောင်းမွန်စွာချီးမွမ်းသည်မှန်သော်လည်း အခြားသောသူအတွက်မူကား အကျိုးမရှိပေ။ 18အကျွန်ုပ်သည် သင်တို့အားလုံးထက် ဘာသာစကားများစွာကိုပြောဆိုရသောအခွင့်ကြောင့် ဘုရားရှင်၏ကျေးဇူး တော်ကိုအကျှန်ုပ်ချီးမွမ်းပါသည်။ 19သို့သော်လည်း အသင်းတော်၌ဘာသာစကားများစွာဖြင့် စကားတစ်သောင်းကိုပြောနိုင်သည်ထက် သူတစ်ပါး နားလည်သောစကားငါးခွန်းကိုသာ အကျွန်ုပ်ပြောဆိုမည်။ 20အကျွန်ုပ်၏ညီအစ်ကိုမောင်နှမတို့၊ ကလေးငယ်ကဲ့သို့တွေးခေါ်နေကြသည်များကိုရပ်တန့်ကြလော့။ မကောင်းမှုများနှင့် ပတ်သက်လျှင်ကလေးငယ်များကဲ့သို့ဖြစ်ကြပြီး စဉ်းစားတွေးခေါ်မှုနှင့်ပတ်သက်လျှင် အရွယ်ရောက်ပြီးသောသူကဲ့သို့ဖြစ်ကြလော့။ 21ပညတ်ကျမ်းထဲတွင် “အရှင်သည် ‘ဤသူတို့အားငါဟောပြောလျှင် တိုင်းတစ်ပါးသားတို့၏နှုတ်မှထွက်သော ဘာသာခြား စကားဖြင့်ငါဟောမည်။ သို့သော်သူတို့သည်ငါစကားကိုနားထောင်ကြလိမ့်မည်မဟုတ်ပေ။’ ဟုမိန့်တော်မူသည်” ဟုရေးသားထားသည်။ 22သို့ဖြစ်၍ အခြားသောဘာသာစကားတို့သည် ယုံကြည်သောသူတို့အတွက် နိမိတ်လက္ခဏာမဟုတ်ဘဲ မယုံကြည်သောသူများအတွက်ဖြစ်သည်။ 23ထိုကြောင့် အသင်းဝင်အားလုံးအတူတကွရောက်ရှိလာပြီး အခြားသောဘာသာစကားများဖြင့် ဟောပြောနေကြ စဉ် နားမလည်သောသူတို့ သို့မဟုတ် မယုံကြည်သူတို့ရောက်ရှိလာလျှင် သင်တို့အားရူးနေကြသည်ဟုပြောဆိုကြ မည်မဟုတ်လော။ 24သို့သော် အသင်းဝင်အားလုံး ဘုရားရှင်၏နှုတ်ကပါတ်တော်အား ရှေ့ဖြစ်ဟောပြောနေစဉ် နားမလည်သောသူ များနှင့် မယုံကြည်သူတို့ရောက်ရှိလာလျှင် သူတို့သည်အပြစ်ရှိသောသူများဖြစ်ကြကြောင်းနှင့် သူတို့အားလုံးအပြစ် စီရင်ခြင်းခံရမည်ဖြစ်ကြောင်းကိုနားလည်သွားကြမည်ဖြစ်သည်။ 25ထိုသို့သူ၏ စိတ်နှလုံး၌ မထင်ရှားသောအရာတို့သည် ထင်ရှားသွားကြမည်ဖြစ်သောကြောင့် သူတို့သည် ပျပ်ဝပ်လျက် “သင်တို့နှင့်အတူဧကန်အမှန်ပင်ဘုရားရှင်ရှိတော်မူသည်” ဟုကြှေးကြော်ကာ ဘုရားရှင်ကိုကိုးကွယ် ကြလိမ့်မည်ဖြစ်သည်။ 26ထို့ကြောင့်အကျွန်ုပ်၏ညီအစ်ကိုတို့၊ အကျွန်ုပ်ပြောလိုသည်မှာအဘယ်သို့နည်း။ သင်တို့အတူတကွ စုဝေးကြသောအခါ တစ်ဦးသည်ဓမ္မသီချင်းများကို သီဆိုခြင်း၊ တစ်ဦးသည်ဟောပြောသွန်သင်ခြင်း၊ တစ်ဦးသည်ရှေ့ဖြစ်ဟောပြောခြင်း၊ တစ်ဦးသည် ဘာသာစကားအမျိုးမျိုးကိုပြောဆိုခြင်း၊ တစ်ဦးသည်ထိုဘာသာစကားတို့၏အနက်အဓိပ္ပာယ်ကိုရှင်းပြခြင်း စသည်ဖြင့်အသီးသီးဆောင်ရွက်ကြလော့။ ထိုအရာအားလုံးကိုသင်တို့လုပ်ဆောင်ရာတွင် အသင်းတော်အတွက်တည်ထောင်ရန်အတွက်ဖြစ်စေကြလော့။ 27ဘာသာစကားအမျိုးမျိုးဖြင့် ဟောပြောမည်ဆိုပါက နှစ်ဦး သို့မဟုတ် သုံးဦးအများဆုံးဟောပြောသင့်ပြီး တစ်လှည့်စီဟောပြောသင့်သည်။ တစ်ဦးဟောပြောနေစဉ်တွင် ကျန်တစ်ဦးသည် ထိုစကား၏အနက်အဓိပ္ပာယ်ကို ရှင်းပြရမည်ဖြစ်သည်။ 28အကယ်၍ဘာသာစကား၏အနက်အဓိပ္ပာယ်ကိုပြန်ပေးမည့်သူမရှိလျှင် အသင်းတော်ထဲတွင်တိတ်ဆိတ်စွာနေ၍ မိမိကိုယ်ကိုလည်းကောင်း၊ ဘုရားရှင်ကိုလည်းကောင်းပြောဆိုနေရမည်။ 29ပရောဖက်နှစ်ဦး သို့မဟုတ် သုံးဦးကသာဟောပြောသင့်သည်ဖြစ်ပြီးကျန်သောသူများသည် ထိုသူတို့ပြောသော စကားများကိုဂရုတစိုက်ဆင်ခြင်းသုံးသပ်နေရမည်ဖြစ်သည်။ 30ထိုင်လျက်နေသောသူများထဲမှတစ်စုံတစ်ယောက်သည် ဘုရားရှင်ထံမှဗျာဒိတ်တော်ကိုရရှိလျှင် ရှေ့ဖြစ်ဟောပြောနေသောသူသည်တိတ်ဆိတ်စွာနေရမည်ဖြစ်သည်။ 31အဘယ်ကြောင့်ဆိုသော် လူတိုင်း၏ ယုံကြည်မှုသစ္စာတရားပိုမိုခိုင်မြဲစေရန် သင်တို့အားလုံးသည် အလှည့်ကျ ရှေ့ဖြစ်ဟောပြောနိုင်သောကြောင့်ဖြစ်သည်။ 32ပရောဖက်တို့သည် မိမိတို့၏စိတ်ဝိညာဉ်ကို ချုပ်တည်းနိုင်ကြသည်။ 33အဘယ်ကြောင့်ဆိုသော် ဘုရားရှင်သည် စည်းမဲ့ကမ်းမဲ့ရုတ်ရုတ်သဲသဲဖြစ်ခြင်းကိုမလိုလား။ ငြိမ်ဝပ်အေးငြမ်းမှု ကိုလိုလားသောဘုရားဖြစ်သည်။ ထို့ကြောင့် အသင်းတော်အတွင်းတွင်ရှိသော ဘုရားရှင်၏မြင့်မြတ်သောသူတို့ အားလုံးသည်လည်း ထိုကဲ့သို့ပင်ဖြစ်ရမည်ဖြစ်သည်။ 34အမျိုးသမီးတို့သည် အသင်းတော်အတွင်းတွင် တိတ်ဆိတ်စွာနေသင့်ပေသည်။ သူမတို့သည် ဟောပြောရသော အခွင့်မရှိကြဘဲ ပညတ်တရားတွင်ဆိုထားသည့်အတိုင်း လိုက်နာစောင့်ထိန်းကြရမည်ဖြစ်သည်။ 35အမျိုးသမီးတို့သည် တစ်စုံတစ်ခုကိုသိလိုလျှင် အိမ်၌ရှိသော မိမိခင်ပွန်းတို့ကိုမေးမြန်းကြစေ။ အဘယ်ကြောင့် ဆိုသော်အသင်းတော်အတွင်းတွင် အမျိုးသမီးများဟောပြောခြင်းသည်မသင့်လျော်သောကြောင့်ဖြစ်သည်။ 36ဘုရားရှင်၏ နှုတ်ကပတ်တရားတော်သည် သင်တို့မှစတင်၍ထွက်လာခြင်းဖြစ်သလော။ သို့မဟုတ် သင်တို့ထံသို့သာရောက်လာခြင်းဖြစ်သလော။ 37မိမိကိုယ်ကိုပရောဖက်ဖြစ်သည်ဟုလည်းကောင်း၊ ဝိညာဉ်ရေးရာဆုကျေးဇူးကိုရရှိထားသည့်သူ ဟုလည်းကောင်း သက်မှတ်ထားလျှင် အကျွန်ုပ်သင်တို့ထံ ရေး၍ပေးလိုက်သောအကြောင်းအရာတို့သည် ဘုရားရှင်၏ ပညတ်တော်ဖြစ်ကြောင်းကိုသိရှိကြပါစေ။ 38ဤအကြောင်းအရာတို့ကိုအသိအမှတ်မပြုလျှင် ထိုသူသည် သူကိုယ်တိုင်အသိအမှတ်မပြုခြင်းပင်ဖြစ်သည်။ 39ထို့ကြောင့် အကျွန်ုပ်၏ညီအစ်ကိုမောင်နှမတို့၊ သင်တို့သည် ရှေ့ဖြစ်ဟောပြောရန်အလိုရှိသင့်ပေသည်။ ဘာသာစကားအမျိုးမျိုးဖြင့်ဟောပြောခြင်းကိုလည်းမတားမြစ်သင့်ပေ။ 40သို့သော်ခပ်သိမ်းသောအမှုကိစ္စတို့အား သင့်တင့်လျောက်ပတ်စွာ အစဉ်အတိုင််လုပ်ဆောင်ကြလော့။
Currently Selected:
1 Corinthians 14: TPV-RV
Highlight
Share
Compare
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
