Matthew 23
23
1အဲနော့ ကိုယ်တော်ယေရှုဟ ဗြိတော်ဒွေဝို မိကြားတော်မူဇာဟ 2"ဖာရိရှဲဒွေန မောရှေကျမ်းတတ်ဆရာဒွေဟ မောရှေရဲ့တရားဂါးဒွေဝို ပလန်ဆိုသူဒွေဖြစ်ရယ်။ 3အဲဂျော့ သူနို့သွန်သန်ပြောဆိုသမျှဒွေဝို လိုက်နာကျင့်သုံးဂေ့လော့၊အယ်ဘေမဲ့ သူနို့ပြုမူတိုင်း ပြုမူဂေ့န၊ ဟဲဂျော့ဆိုဝါ သူ့နို့ဟ မောရှေကျမ်းဒွေဝို ဟောပြောဘေမဲ့ လိုက်နာကျင့်သုံးဇာမှေ့ဂေ့ရ။ 4သူ့နို့ဟ လေးလံဝို ဝန်ထုပ်ဝန်ပိုးဒွေဝို ထုပ်ပိုးပြီး လူဒွေရဲ့ပခုံးပေါ်ဝို တံပေးတတ်ဂေ့ဘေမဲ့ သူနို့ဟ အဲမိုဝန်ထုပ်ဝန်ပိုးဒွေဝို သယ်ဝို့ လက်ဂိုမှ မြော့ရှင်ဂေ့ရ။ 5သူနို့ဟ သူ့နို့ပြုလုပ်ဇာမှန်သမျှဝို လူဒွေဗြင်သာစေဝို့ ဟန်ပြမျှဘဲ့လုပ်ဂေ့ရယ်။ ဆော်လက်ဖွဲ့ဒွေဝို ကီးစွာပြုလုပ်ဝတ်ဆင်ဂေ့ပြီး ရှည်လျားဝိုဝတ်ရုံဒွေဝိုလည်း ဝတ်ဆင်တတ်ဂေ့ရယ်။ 6စားသော့ပွဲဒွေမှာ ထူးဧည့်သည်ဒွေတွက် ခင်းကျင်းရားဝို ထိုင်ခုံန ဓမ္မာရုံဒွေမှာ ရေးကီးဝိုပုဂ္ဂိုလ်ဒွေထိုင်ဝို ထိုင်ခုံဝိုလည်း ကြိုက်နှစ်သက်ဂေ့ပြီး 7ဈေးထဲမှာ လူဒွေရဲ့ တလေးတစားနုဆစ်ဇာန၊ သူ့နို့ဝို 'ဆရာ' ဆိုပီး ခေါ်ခံရဇာဝို ရားဒိုင်းနှစ်သက်ဂေ့လေရယ်။ 8အယ်ဘေမဲ့ နန်းနို့ဟ 'ဆရာ' ဆိုပီး ခေါ်ဝေါ်ဇာဝို ခံယူဂေ့န၊ ဟဲဂျော့ဆိုဝါ 'ဆရာ' ဟ ဘားဒဲဘဲ့ရှေ့ပီး နန်းနို့ဂူလုံးဟ ညီကိုမော်နှမဒွေဘဲ့ဖြစ်ဂေ့ရယ်။ 9အယ်မိုဘာမလေပေါ်မှာ ဟယ်သူ့ဝိုမှ 'အဖ' ဆိုပီး ခေါ်ဆိုဂေ့န၊ ဟဲဂျော့ဆိုဝါ နန်းနို့မှာ ရွှေဗြို့တော်မှာရှေ့တော်မူဝို 'အဖဘုရားရှင်' ဘားဒဲဘဲ့ရှေ့ရယ်။ 10နန်းနို့ဝို လူဒွေဟ ခေါဆော်ဆိုပီး ခေါ်ဇာဝိုလဲ ခံယူဂေ့န၊ ဟဲဂျော့ဆိုဝါ နန်းနို့ရဲ့ခေါဆော်ဟ မေရှိယ ဘားဒဲဘဲ့ဖြစ်ရယ်။ 11နန်းနို့မှာ ကီးမြတ်ဆုံးဆိုဝိုသူဟ နန်းနို့ရဲ့ စေခံဖြစ်ရမယ်။ 12ကိုယ်ကိုယ့်ကိုယ် ချီးမြော့ဝိုသူဟ နှိခလဇာခံရမှာဖြစ်ပြီး ကိုယ်ကိုယ့်ကိုယ်နှိခလဝိုသူဟ ချီးမြော့ဇာဝို ခံရမှာဖြစ်ရယ်။ 13သူတော်ဂေါယော်ဆော်ဝို ဖာရိရှဲဒွေန ကျမ်းတတ်ဆရာဒို့၊ နန်းနို့ဟ ရားဒိုင်းဆိုးရွားလှရယ်။ ဟဲဂျော့ဆိုဝါ ရွှေဗြို့တော်ရဲ့သာသနာတော်ဝို ဝမ်ဝိုခေါ့ပေါ့ဝို လူဒွေရှေ့မှာ ကာဆီးပိရားပြီး နန်းနို့ကိုယ်တိုင်လည်းဝမ်ရ၊ ဝမ်ဝို့သူဒွေဝိုလဲ ဝမ်ခွမ့်ပြုရ။ 14သူတော်ဂေါယော်ဆော်ဝို ဖာရိရှဲဒွေန ကျမ်းတတ်ဆရာဒို့၊ နန်းနို့ဟ ရားဒိုင်း အမြင်ဂလာရှေ့ဂေ့ရယ်။ ဟဲဂျော့ဆိုဝါ နန်းနို့ဟ မုဆိုးမဒွေရဲ့ ပစ္စည်းဥစ္စာန အီဒွေဝို လှည့်ဖျားပီး မတရားသီးယူဂေ့ပြီး ဟန်ပြ ဆုတောပေးတတ်ဂေ့ရယ်။ အဲဂျော့ နန်းနို့ဟ ပိုပီးကီးလေးဝို ပြစ်ဒဏ်စီရင်ဇာဝို ခံဂေ့ရမှာဖြစ်ရယ်။ 15သူတော်ဂေါယော်ဆော်ဝို ဖာရိရှဲဒွေန ကျမ်းတတ်ဆရာဒို့၊ နန်းနို့ဟ ရားဒိုင်း အမြင်ဂလာရှေ့ဂေ့ရယ်။ဟဲဂျော့ဆိုဝါ နန်းနို့ဟ လူဒွေဝို နန်းနို့ရဲ့ဖွဲ့ဝမ်ဖြစ်လာစေဝို့ ကူးမလေန ပမ်လယ်ဒွေဝိုဖြတ်ကျော်ပီး လှည့်လည်စီးရုံးဂေ့ရယ်။ နန်းနို့ရဲ့ဖွဲ့ဝမ်ဖြစ်လာဝိုခါမှာ အဲမိုသူဒွေဝို နန်းနို့ထက် နှေ့ဆပိုဆိုးဝို ငရဲသားဒွေဖြစ်စေဂေ့ရယ်။ 16မျစ်မမြင်လမ်းပြပေါဒို့၊ နန်းနို့ဟ အမြင်ဂလာရှေ့ဂေ့ရယ်။ ဟဲဂျော့ဆိုဝါ "ပြုရားဝို ဒိခုတွက် ဗိမာန်တော်ရဲ့မည်နာမန တိုင်တည်ပြောဆိုဇာဟ ဓိပ္ပါယ်မှေ့ဘဲဝို ချည်းနှီးဘဲ့ဖြစ်ရယ်။ အယ်ဘေမဲ့ ဗိမာန်တော်မှာရှေ့ဝိုရွှေဝို တိုင်တည်ပြောဆိုရယ်ဆိုဝါ ဒိပေးရားဝိုတိုင်း ပြုလုပ်ဝို့ တာဝန်ရှေ့ရယ်" ဆိုပီး ပြောဂေ့ရယ်။ 17မိုက်မဲဝို မျစ်မမြင်ပေါဒို့၊ ဟဲရာဇာဟ ပိုပီးကီးမြတ်နူး၊ ရွှေလော၊ အဲမျိုးမုဘဲနေဆိုဝါ ရွှေဝိုမြင့်မြတ်စေဝို ဗိမာန်တော်လော။ 18အဲမိုပြင် နန်းနို့ဟ "ပူဇော်ဆုတောရာ ပုလ္လင်တော်မှာ တိုင်တည်ပြောဆိုရယ်ဆိုဝါ ကျုံးမဝမ်ရ၊ ပုလ္လင်ပေါ်မှာရှေ့ဝို လှူဖွယ်ပစ္စည်းဝို တိုင်တည်ပြောဆိုရယ်ဆိုဝါ အဲမိုပြောဆိုတိုင်း ပြုလုပ်ပေးဝို့ တာဝန်ရှေ့ရယ်" ဆိုပီး ပြောဂေ့ရယ်။ 19မျစ်မမြင်ပေါဒို့၊ ၊ ဟဲရာဇာဟ ပိုပီးကီးမြတ်နူး ပုလ္လင်ပေါ်မှာရှေ့ဝို လှူဖွယ်ပစ္စည်းလော၊ အဲမျိုးမုဘဲနေရယ်ဆိုဝါ လှုဖွယ်ပစ္စည်းဝို သန့်ရှင်းစင်ကြယ်ဇေဝို ပုလ္လင်တော်လော။ 20အဲဂျော့ ပူဇော်ဆုတောရာပုလ္လင်တော်ဝို တိုင်တည်ပြောဆိုဝိုသူဟ ပုလ္လင်တော်နတကွ ပုလ္လင်တော်ပေါ်မှာ ရှေ့သမျှဇာဒွေဝို တိုင်တည်ပြောဆိုရယ်။ 21အဲမိုမျိုးဘဲ့ ဗိမာန်တော်ဝို တိုင်တည်ပြောဆိုဝိုသူဒွေဟလည်း ဗိမာန်တော်နတကွ ဗိမာန်တော်မှာ ကိန်းဝပ်အုပ်စိုးတော်မူဝို ဘုရားရှင်ဝိုလည်း တိုင်တည်ပြောဆိုရာရော့ရယ်။ 22ကောကံဝို တိုင်တည်ပြောဆိုဝိုသူဒွေဟလည်း ဘုရားရှင်ရဲ့ပုလ္လင်တော်နတကွ ပုလ္လင်တော်ပေါ်မှာ ထိုင်တော်မူနေဝို ဘုရားရှင်ဝိုလည်း တိုင်တည်ပြောဆိုရာရော့ရယ်။ 23သူတော်ကောယော်ဆော်ဝို ဖာရိရှဲ န ကျမ်းတတ်ဆရာပေါဒို့ နန်းနို့ဟ ရားဒိုင်းအမြင်ဂလာရှေ့ဂေ့ရယ်။ ဟဲဂျော့ဆိုဝါ နန်းနို့ဟ ပင်စိမ်း၊ စမှုန်စပါး၊ ဇီယာဒွေဝို ဆယ်ဖို့တစ်ဖို့ပေးလှူဂေ့ဘေမဲ့ ပညတ်တရားဒွေထဲမှာ ပိုပီးရေးကီးဝို တရားမျှတခြင်း၊ နားဂရုဏာထားခြင်း၊ သစ္စာတရားစော့သိခြင်းဒွေဝို ချန်လှပ်ထားဂေ့ရယ်။ အဲမိုဇာဒွေဝို ပြုလုပ်ရမှာဖြစ်သော်လည်း ပဉာတ်တရားထဲမှာရှေ့ဝို ရေးကီးဝိုရာဒွေဝိုလည်း ချန်လှပ်ထားသင့်ရ။ 24မျစ်စိဗြင်ဘဲဝို လမ်းပြပေါဒို့၊ နန်းနို့ဟ ဖြုတ်ကောဝို မျိုခလမမိစေဝို့ ရေဝိုစစ်ပြီးသော့ဘေမဲ့ ကုလားအုပ်ဝိုကလလော မျိုခလဂေ့ရယ်။ 25သူတော်ကောယော်ဆော်ဝို ဖာရိရှဲ န ကျမ်းတတ်ဆရာပေါဒို့ အမြင်ဂလာရှေ့ဂေ့ရယ်။ ဟဲဂျော့ဆိုဝါ နန်းနို့ဟ ခွက်န ဇံဒွေဝို သန့်ရှင်းစင်ကြယ်စွာဆေးကြောဂေ့ဘေမဲ့ တွမ်းဖက်မှာလော မတရားလုယူခြင်း၊ ကိုယ်ကောဆန်ခြင်း ဒွေန ပလဲ့နက်နေလေရယ်။ 26မျစ်စိမဗြင်ဝို ဖာရိရှဲဒို့၊ ခွက်တွမ်းဖက်ဝို ဦးစွာသန့်ရှင်းစင်ကြယ်စေဝို့ ဆေးကြောဂေ့ပါလော့၊ အဲမျိုးလုပ်မယ်ဆိုဝါ ခွက်ပလန်ဖက်မှာလည်း သန့်ရှင်းစင်ကြယ်လာလိမယ်။ 27သူတော်ကောယော်ဆော်ဝို ဖာရိရှဲဒွေန ကျမ်းတတ်ဆရာဒို့ နန်းနို့ဟ ရားဒိုင်း အမြင်ဂလာရှေ့ဂေ့ရယ်။ဟဲဂျော့ဆိုဝါ နန်းနို့ဟ ထူးဖလူသုဝါးဝို သန်းခလိုင်းဂူဒွေနတူရယ်။ ၎င်းဒို့ဟ ပလန်ဖက်မှာ လှပတင့်တယ်ပြီး ထံရှားနေဘေမဲ့ တွမ်းဖက်မှာကလလော လူဒွေရိုးန ညစ်ညမ်းဝိုရာဒွေန ပလဲ့နက်နေလေရယ်။ 28အဲမိုမျိုးဘဲ့ နန်းနို့ဟလည်း ပလန်ဖက်မှာ လူဒွေပေါ် ကောမွန်ဖြော့မတ်ပုံရှေ့ဘေမဲ့ တွမ်းစိကလလော ကော့ကျစ်ခြင်း၊ လျှိုဝှက်ခြင်းန သူတော်ကောယော်ဆော်ဇာဒွေနသာ ပလဲ့နက်နေလေရယ်။ 29သူတော်ကောယော်ဆော်ဝို ဖာရိရှဲဒွေန ကျမ်းတတ်ဆရာဒို့ နန်းနို့ဟ အမြင်ဂလာရှေ့ဂေ့ရယ်။ဟဲဂျော့ဆိုဝါ နန်းနို့ဟ ပရောဖက်ဒွေရဲ့ သန်းခလိုင်းဂူဒွေဝို ကောမွန်စွာတည်ဆောက်ပေးဂေ့ပြီး ဖြော့မတ်သူဒွေရဲ့ သန်းခလိုင်းဂူဒွေဝို လှဆင်ပီး 30"နို့ဘိုးဘေးဒွေလက်ထက်မှာ ငါဒို့ရှေ့နေခဲ့မယ်ဆိုဝါ ပရောဖက်ဒွေဝိုသတ်ခါမှာ ဟယ်သောခါမှ ပါဝမ်မှာမုဝ" ဆိုပီး ပြောဆိုဂေ့ရယ်။ 31အဲမိုမျိုးန နန်းနို့ဟ ပရောဖက်ဒွေဝိုသတ်ခဲ့သူဒွေရဲ့ မျိုးဆစ်ဒွေဖြစ်ကြောဝို နန်းနို့ကိုယ်တိုင် 32နန်းနို့လည်း နန်းနို့ဘိုးဘေးဒွေစတံခဲ့ဝိုရာဒွေဝို ပြီးစီးစေဝို့ ပြုလုပ်ဂေ့ပါလော့။ 33ဗွီဆိုးဒို့ ၊ ဗွီဆိုးရဲ့မျိုးဒို့၊ နန်းနို့ဟ ငရဲဘုံမှာ ပြစ်စီရင်ခံရဇာမဟနေ ဟဲမျိုး လွှတ်မြော့နိုင်ဂေ့မယ်နူး။ 34ငါ့ရဲ့ရားဂါးဒွေဝို နန်းနို့ဝို သွန်သန်ပေးမဲ့ ပရောဖက်ဒွေ၊ ပညာရှေ့ဒွေန ကျမ်းတတ်ဆရာချို့ဝို လက်ဝါးကပ်တိုင်မှာ သံမှိုနရိုက်သတ်ပြီး ချို့ဝိုခြားနည်းန သတ်ပစ်မယ်။ ချို့သူဒွေဝို ဝတ်ပြုဆုတောကလောဒွေန ဓမ္မာရုံဒွေမှာ ဒဏ်ခတ်ရိုက်နက်ပီး ဗြို့ဟနေဗြို့ဝို လိုက်လံ ညှင်းဆဲဂေ့လိမယ်။ 35အဲဂျော့ နန်းနို့ဘိုးဘေးဒွေသတ်ခဲ့ဝို အာဗေလရဲ့သွီးဟနေစပီး ဗိမာန်တော်မှာရှေ့ဝို ပူဇော်ပုလ္လင်ဘေးမှာ သေခံခဲ့ဝို ဗာရခိရဲ့သား ဇာခရိရဲ့သွီးတိုင်အော် မလေကီးပေါ်မှာသွန်းလောခဲ့ရဝို ဖြော့မတ်သူဒွေရဲ့သွီးကြွေးဟ နန်းနို့ပေါ်ဝိုကလရော့ပီး ဘုရားရှင်ဟနေ နန်းနို့ဝို ပြစ်ပေးလိမယ်ဖြစ်ရယ်။ 36နန်းနို့ဝိုငါမှန်ဆိုမယ်၊ အယ်မိုရားစီရင်ဇာဟ ခုသက်ရှင်ပီးရှေ့နေဝို မျိုးဆစ်ဒွေပေါ်ဝို ကလရော့လိမယ်။ 37"အို ဂျေရုဆလင်ဗြို့၊ ဂျေရုဆလင်ဗြို့။ သင်ဟ ပရောဖက်ဒွေဟနေစပီး ဘုရားရှင် စေလွှတ်တော်မူဝို ပုဂ္ဂိုလ်ဒွေဝို ကလော့ခဲနပစ်ဝိုဗြို့၊ ကြစ်မဟ ကြစ်ရားဒွေဝို သူ့တော်အော့မှာ စုသီးမျိုး ငါဟ နန့်လူဂူလုံးဝို စုသီးဝို့လိုရှေ့ခဲ့ဘေမဲ့ သင်ဟ ငါ့ဝို လိုမှေ့ရ။ 38ကေ့ကေ့လော့၊ နန်းနို့ရဲ့အီဟ မကြာမှီ လူသူမှေ့ဘဲဝိုနေရာဖြစ်လာလိမယ်။ 39အယ်မိုဇာဝို စိထဲမြဲမြဲမှတ်ထားလော့၊ "ဘုရားရှင်ရဲ့ ခွမ့်အာဏာ န ကြွလာတော်မူဝို အယ်လူဝို ဘုရားရှင်ဟ မှန်တဂယ် နှစ်သက်တော်မူရယ်" ဆိုပီး နန်းနို့မပြောခံထိ နန်းနို့ဟ ငါ့ဝိုတွီ့ရလိမှာမုဝ" ဆိုပီး မိတော်မူလေရယ်။
Currently Selected:
Matthew 23: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
