Matthew 16
16
1နေ့မှာ ဖာရိရှဲဒွေန ဇဒ္ဒုကဲဒွေဟ စမ်းသပ်ရှင်ရိ ကိုယ်တော့်ဆီဝိုလာပြီး ရွှေဗြို့တော်ဟ အံ့ဖွယ်နမိလက္ခဏာဒွေဝို ပြသဝို့ တောဆိုဂေ့လေရယ်။ 2ကိုယ်တော်ဟလည်း "နေဝမ်ခီမှာ ကောကံဟ နီရော်သန်းနေရိ နန်းနို့ဟ ရာသီဥတုသာယာလိမယ်ဆိုပီး ပြောဂေ့ရယ်။ 3အဲမိုပြင် မိုးလန်းစောစောမှာလည်း ကောကံဟ နီမြန်းပြီး အုံ့မှိုင်းနေရယ်ဆိုဝါ နန်းနို့ဟ မိုးရွာလိမယ်ဆိုပီး ပြောဂေ့ရယ်။ နန်းနို့ဟ ကောကံရဲ့ပုံပန်းလက္ခဏာဝိုကေ့ပီး ရာသီဥတုဝို ခန့်မှန်းနိုင်ဘေမဲ့ အယ်ခီမှာရှေ့ဝို နမိလက္ခဏာဒွေဝိုကေ့ပီး နန်းနို့ပြောနိုင်မှာမုဝ။ 4ယုတ်ညံ့ဝိုသူန ယုံကြည်မှုကင်းမဲ့သူဒွေဟ အံ့ဖွယ်နမိလက္ခဏာဒွေဝို ဗြင်ရှင်ဂေ့ဘေမဲ့ ယောနရဲ့နမိလက္ခဏာဟနေလွှဲပီး ခြားဟဲရာနမိလက္ခဏာဝိုမှ ပြသလိမှာမုဝ။" ဆိုပီး မိတော်မူပြီးနော့ ကိုယ်တော်ဟ သူ့နို့ဆီဟ ထွက်ရားလေရယ်။ 5ဗြိတော်ဒွေဟ ဂါလိလဲအိုင်တဖက်ကမ်းဝိုသွားခါမှာ မုဒွေဝို ယူဆော်ဝို့ မေ့ရားလေရယ်။ 6ကိုယ်တော်ယေရှုဟ သူ့နို့ဝို "ဂရုစိုက်ဂေ့လော့၊ ဖာရိရှဲ န ဇဒ္ဒုကဲဒွေရဲ့ တဆေးဝို ဒိထားဂေ့လော့" ဆိုပီး မိတော်မူလေရယ်။ 7အယ်ဘေမဲ့ သူ့နို့ဟ "နို့ ပါမုဒွေ ယူဆော်လာဘဲရိတွက် အယ်မိုမျိုး မိတော်မူဇာဖြစ်ရယ်" ဆိုပီး ချင်းချင်း တိုင်ဘန်ပြောဆိုဂေ့လေရယ်။ 8အဲမိုမျိုး ပြောဆိုဂေ့ဇာဝို ကိုယ်တော်ယေရှုသိတော်မူခီမှာ "ယုံကြည်ချင့်အားနည်းဝိုသူဒို့၊ ပါမုပါဘဲဇာဝို ဟဲရာဂျော့ နန်းနို့ချင်းချင်း ဂျင်းနေဂေ့နူး။ 9နန်းနို့ နားမလည်ဂေ့သေးရလော၊ ပါမုငါးလုံးဝို လူငါးထော်ဝိုဝွီပေးဝိုခါမှာ တောဟယ်မျှတောရရယ်ဆိုဇာဝို နန်းနို့မှတ်မိဂေ့ရလော။ 10ပါမုခုနှေ့လုံးဝို လူလေးထော်ဝို ဝွီပေးခါမှာလဲ တောဟယ်မျှတောရဇာဝို နန်းနို့မှတ်မိဂေ့ရလော။ 11ငါပါမုကြောဝို ပြောနေဇာမုဝဆိုဇာဝို နန်းနို့ဟဲရာဂျော့နားမလည်ဂေ့နူး။ ဖာရိရှဲ န ဇဒ္ဒုကဲဒွေရဲ့ တဆေးဝို ဒိထားဂေ့လော့။" ဆိုပီး မိတော်မူလေရယ်။ 12အဲနော့ သူ့နို့ဟ ကိုယ်တော်ဟ ပါမုထဲဟ တစေးဝိုဒိထားဝို့ ပြောနေဇာမုဘဲန ဖာရိရှဲ န ဇဒ္ဒုကဲဒွေရဲ့ သွန်သန်မှုဒွေဝို ဒိထားဝို့ပြောနေဇာဝို နားလည်ရားလေရယ်။ 13ဆီဇာရီးယားဖိလိပ္ပိနယ်မလေဝိုရော့ခါမှာ ကိုယ်တော်ဟ သူ့ဗြိဒွေဝို "လူ့သားတော်ဝို လူဒွေဟ ဟယ်သူဖြစ်ရယ်ဆိုပီး ပြောဂေ့နူး။" ဆိုပီး မေးမြန်းတော်မူလေရာ 14ဗြိတော်ဒွေဟ "ချို့ဟ ရေနှစ်မြင်ဂလာဆရာယောဟန်၊ ချို့ဟ ပရောဖက် ဧလိယ၊ ချို့ဟ ယေရမိ န ပရောဖက်ဒွေထဲဟယော့ ဆိုပီး ပြောနေဂေ့ရယ်" ဆိုပီး ရှော့တံဂေ့လေရယ်။ 15အဲခါ ကိုယ်တော်ဟ ဗြိဒွေဝို "နန်းနို့ရော ငါ့ဝို ဟယ်သူဆိုပီး ထံနူး။" ဆိုပီး မေးတော်မူဝိုခါမှာ 16ရှိမုန်ပေတရုဟလည်း "ကိုယ်တော်ဟ သက်ရှိထင်ရှားရှေ့တော်မူဝို ဘုရားရှင်ရဲ့သားတော် ခရစ်တော်ဖြစ်ပေရယ်။" ဆိုပီး ပလန်လည်ရှော့တံလေရယ်။ 17ကိုယ်တော်ယေရှုဟလည်း "ယောဟန်ရဲ့သား ရှိမုန်၊ နန်ဟ မြင်ဂလာရှေ့ပေရယ်၊ ဟယ်သူမှ အဲမိုဇာဝို နန့်ဝို မပြသခဲ့ဘေမဲ့လည်း ရွှေဗြို့တော်မှာရှေ့ဝို အဖဘုရားရှင်ဟလော အဲမိုဇာဝို နန်ဝို ပြသတော်မူခဲ့ရယ်။ 18နန့်ဝို ငါပြောမယ်။ နန်ဟ ပေတရုဖြစ်ရယ်၊ အယ်မိုနော်မယ်ဟ ကလော့တုံးဆိုပီး ဓိပ္ပာယ်ရရယ်။ အဲဂျော့ အယ်မိုကလော့တုံးပေါ်မှာ ငါ့ရဲ့သင်းတော်ဝို ငါတည်ဆော့မယ်။ သေခြင်းတရားဂိုမှ အယ်မိုသင်းတော်ပေါ်မှာ စိုးမိုးနိုင်မှာမုဝ။ 19ငါဟ ရွှေဗြို့တော်ရဲ့သာသနာတော်ရဲ့သော့ဝို နန့်ဝိုပေးမယ်။ မလေဂီးပေါ်မှာ နန်တားမြစ်ဝိုဇာဝို ရွှေဗြို့တော်မှာ ဘုရားရှင် တားမြစ်တော်မူလိမယ်။ မလေဂီးပေါ်မှာ နန်ခွမ့်ပြုဝိုဇာဝို ရွှေဗြို့တော်ဟ ဘုရားရှင်ဟ ခွမ့်ပြုတော်မူလိမယ်" ဆိုပီး မိတော်မူလေရယ်။ 20အဲနော့ ကိုယ်တော်ယေရှုဟ သူဟ ခရစ်တော်ဖြစ်ဇာဝို ဟယ်သူဝိုမှ မပြောဝို့ မိမှာတော်မူလေရယ်။ 21အဲခီဟနေစပီး ယေရှုဟ ဂျေရုဆလင်ဗြို့ဝိုသွားပီး ဂျူးလူမျိုး ခေါဆော်ဒွေ၊ ဂျူးပုရောဟိတ်ကြီးကဲဒွေန ကျမ်းတတ်ဆရာဒွေရဲ့လက်မှာ ဒုက္ခဝေဒနာဒွေခံစားရပြီး သတ်ခံရဝို့ကြောန သုံးရစ်မြော့နေ့မှာ သက်ပလန်ရှင်ရမယ်ဆိုဇာဝို ဗြိတော်ဒွေဝို စပီးရှင်းပြတော်မူလေရယ်။ 22ပေတရုဟ "ကိုယ်တော်၊ ဘုရားရှင်ဟ သင့်ဝို အယ်မိုမျိုး ဖြစ်စေဝို့ ဟယ်ခါမှခွမ့်ပြုမှာမုဝ။ အဲမိုမျိုး သေချာဘော့ ဖြစ်မှာမုဝ" ဆိုပီး ပြောပြီး ကိုယ်တော်ယေရှုဝို ဘေးဝိုခေါ်ပီး ဆင်းရဲဒုက္ခ န သေခြင်းကြောဝို ထပ်ပီးမပြောဝို့ ဒိပေးခဲ့လေရယ်။ 23ကိုယ်တော်ဟလှည့်ပီး ပေတရုဝို "အသင်မာရ်နတ် ငါ့ဆီဟ နော့ဆုလော့၊ နန်ဟ ငါသွားမဲ့လမ်းမှာ တားဆီးတစ်ခုဖြစ်ရယ်။ ဟဲဖြစ်ရိနူးဆိုဝါ နန်ဟ ဘုရားရှင်သာသနာတော်န သက်ဆိုင်ဝိုဇာဒွေဝို ဂရုပြုပဲန လူသားဒွေန သက်ဆိုင်ဝိုဇာဒွေဝိုဘဲ့ စွဲလမ်းနေရယ်" ဆိုပီး မိတော်မူလေရယ်။ 24အဲနော့ ကိုယ်တော်ဟ သူ့ဗြိတော်ဒွေဝို "ငါနော့ဝို လိုက်ရှင်သူ ဟယ်သူမဆို ကိုယ့်ကိုကိုယ်ငြင်းပယ်ပီး ကိုယ့်လက်ဝါးကပ်တိုင်ဝို ကိုယ်ထမ်းပီး ငါ့နော့ဝို လိုက်ရမှာဖြစ်ရယ်။ 25အဲနော့ ကိုယ်တော်ဟ သူ့ဗြိတော်ဒွေဝို "ငါနော့ဝို လိုက်ရှင်သူ ဟယ်သူမဆို ကိုယ့်ကိုကိုယ်ငြင်းပယ်ပီး ကိုယ့်လက်ဝါးကပ်တိုင်ဝို ကိုယ်ထမ်းပီး ငါ့နော့ဝို လိုက်ရမှာဖြစ်ရယ်။ 26လူတယော့ဟ စင်္ကြာဝဠာခုလုံးဝိုရဘေမဲ့ သူ့နို့သက်ဝို ဆုံးရှုံးရရယ်ဆိုဝါ အဲမိုသူတွက် ဟဲရာကျိုးရှေ့မယ်နူး။ သူ့နို့သက်ထက် တန်ဖိုးကီးဝိုရာရှေ့ရိလော။ 27ဟဲဖြစ်ရိနူးဆိုဝါ လူ့သားတော်ဟ နတ်ဒေဝါဒွေနတူတူ ခမည်းတော်ရဲ့ဘုန်းအသရေတော်ဝို ဆော်ပီး ကြွလာလိမယ်။ အဲနော့ သူဟ လူဒိုင်းဝို သူ့နို့ရဲ့ လုပ်ဆော်ချင့်ဒွေတွက် ကျိုးပြစ်ဒွေဝို ပေးတော်မူလိမယ်။ 28နန်းနို့ဝို ငါမှန်ပြောရမယ်ဆိုဝါ အယ်မိုနေရာမှာ ရပ်နေဝိုသူဒွေထဲဟ ချို့ဟ လူ့သားတော်ဟ အုပ်ချုပ်ဝို့ကြွလာဇာဝို မဗြင်ရမချင်း သေဆုံးလိမှာမုဝ" ဆိုပီး မိတော်မူရယ်။
Currently Selected:
Matthew 16: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
