Matthew 11
11
1ကိုယ်တော်ယေရှုဟ သူ့ဗြိတော်ဆယ့်နှေ့ယော့ဝို ဆုံးမသွန်သန်တော်မူပြီးခါမှာ ဂါလိလဲပြည်မှာရှေ့ဝို ဗြို့ဒွေမှာ လူဒွေဝို သွန်သန်ဟောပြောဝို့ အဲနေရာဟနေ ထွက်ခွာလာလေရယ်။ 2အဲခီမှာ ထော်ထဲမှာရှေ့နေဝို ယောဟန်ဟ ခရစ်တော်ပြုလုပ်ဆော်ဝက်ဝို မှုကိစ္စဒွေဝို ကြားသိရဝိုခါမှာ သူ့ဗြိတော်ဒွေဝို ဒန်းဂါးပါးပီး ကိုယ်တော်ဆီဝို စေလွှတ်လိုက်လေရယ်။ 3ယောဟန်ရဲ့ ဗြိဒွေဟ ကိုယ်တော်ယေရှုဆီဝို ရော့လာပြီး "အရှင်ဟ ကြွရော့လာမယ်ဆိုပီး ဟောပြောထားဝိုသူဖြစ်ပါလော။ အဲမျိုးမုဘဲနေရယ်ဆိုဝါ ကျနော်ဒို့ နော့ထပ်တယော့ဝို ထပ်မံစော့ရဝို့ပသေးလော" ဆိုပီး မေးဂေ့လေရယ်။ 4အဲခါ ကိုယ်တော်ဟ "နန်းနို့ဗြင်တွီ့ကြားသိခဲ့ရသမျှဝို ယောဟန်ဝိုသွားပီး ပြောပြဂေ့လော့။ 5မျစ်မမြင်ဒွေ မျစ်စိပလန်ဗြင်ဂေ့ရပြီး ခေဒေါ့သန်စွမ်းဘဲဝိုသူဒွေဟလဲ လမ်းရှော့နိုင်ဂေ့ပြီဖြစ်ရယ်။ နာဂီးရောဂါသည်ဒွေဟ ပျော့ကမ်းကျန်းမာရားဂေ့ပြီး နားကြားဘဲဝိုသူဒွေဟလဲ နားပလန်ကြားနိုင်ဂေ့ပီ။ သေနေဝိုသူဒွေဟ ပလန်လည်သက်ရှင်ဂေ့ပြီး ဆင်းရဲသားဒွေဟလည်း မြင်ဂလာဒန်းဂေါ်ဝို ကြားဂေ့ရရယ်။ 6ဘုရားရှင်ဟ ငါ့ဝို ငြင်းပယ်ဘဲဝိုလူဒွေဝို နှစ်သက်တော်မူရယ်" ဆိုပီး မိတော်မူလေရယ်။ 7ယောဟန်ရဲ့ဗြိဒွေ ပလန်ရားဝိုခီမှာ ကိုယ်တော်ယေရှုဟ လူထုပရိသတ်ဝို ယောဟန်န ပတ်သက်ပီး "နန်းနို့ဟ တောကန္တာရထဲမှာ ဟဲရာဝိုကေ့ရှင်ရိသွားဂေ့နူး။ လေတိုက်ရာမှာ ဟို့ဖက်အယ်ဖက် ယီးယိုင်နေဝို ဗြစ်ပံရှယ်ဂီးဒွေဝိုလော။ 8အဲမိုဇာမုဘဲနေရယ်ဆိုဝါ ဟဲရာဇာဝို ကေ့ဝို့ သွားဂေ့နူး။ တန်ဖိုးကီးဝိုဝတ်စားဒွေဝတ်ဆင်ရားဝို ယော့ကျားတယော့ဝိုလော။ တန်ဖိုးကီးဝို ဝတ်စားဒွေဝတ်ဆင်ရားဝိုသူဒွေဟ ဘုရင်နန်းတော်ထဲမှာဘဲ့ ရှေ့ဂေ့မယ်ဖြစ်ရယ်။ 9အဲမျိုးဖြစ်မယ်ဆိုဝါ နန်းနို့ ဟဲရာဇာဝို ကေ့ဝို့ သွားဂေ့နူး။ ပရောဖက်တယော့ဝိုလော။ အယ်ဘဲ့၊ ငါ နန်းနို့ဝို ပြောရှင်ဇာဟလောဝါ ယောဟန်ဟ ပရောဖက်တစ်ဦးဆိုဇာထက် သာလွန်ပေရယ်။ 10ကျမ်းစာထဲမှာ 'နားထော်ဂေ့။ ငါဟသင့်ရှေ့မှာ သင့်လမ်းဝို ပြင်ဆင်ပေးဝို့သူတစ်ယော့ဝိုစေလွှတ်မယ်' ဆိုပီး ရှေးဒူးဟ ပရောဖက်ရေးသားရစ်ဝိုသူဟ ယောဟန်ဘဲ့ဖြစ်ရယ်။ 11နန်းနို့ဝို ငါမှန်တိုင်းပြောရမယ်ဆိုဝါ မျိုးမီးဒွေဆီဟ မွီးဖွားလာဝို သူဒွေထဲမှာ ရေနှစ်မြင်ဂလာပေးသူဆရာယောဟန်ထက် ကီးမြတ်ဝိုသူတစ်ယော့မှ ပေါ်ထွန်းသေးရ။ အယ်ဘေမဲ့ ရွှေဗြို့တော်ရဲ့သာသနာတော်မှာရှေ့ဝို နိဆုံးဝိုလူဒွေဟ ယောဟန်ထက် ကီးမြတ်ပေရယ်။ 12ရေနှစ်မြင်ဂလာပေးသူ ဆရာယောဟန်လက်ထက်ဟနေ ခုခီထိ ရွှေဗြို့တော်ရဲ့သာသနာတော်ဟ ပြင်းပြင်းထန်ထန် တိုက်ခိုက်ဇာခံခဲ့ရပြီး ရစ်စစ်ကြမ်းကြုတ်ဝိုသူဒွေဟ အဲမိုနိုင်ငံတော်ဝို တင်းကျပ်သီးပိုက်ဝို့ကြိုးစားဂေ့ရယ်။ 13ဟဲဖြစ်ရိနူးဆိုဝါ ပရောဖက်ဂူလုံးရဲ့ကျမ်းဒွေန ရွှေဗြို့တော်န ပတ်သက်ပီးကြိုတံဟောပြောရားဝို ပညတ်ကျမ်းဒွေဟ ယောဟန်ပေါ်ထွန်းလာန မှန်ကန်လာမှာဖြစ်ရိတွက်ဂျော့ဖြစ်ရယ်။ 14အဲမိုဇာဝို နန်းနို့လက်ခံဝို့ ဆန္ဒရှေ့ဂေ့ရယ်ဆိုဝါ ပရောဖက်ဒွေကြိုတံဟောကြားရစ်ဝို ရော့ရှေ့လာဝို့ဧလိယဟ ယောဟန်ဘဲ့ဖြစ်ရယ်။ 15နားရှေ့ပီး နားထော်နိုင်သူဒွေဂူလုံး ကြားဂေ့စေလော့။ 16 အယ်ဘေမဲ့ အယ်မိုကာလမှာရှေ့ဝို လူဒွေကလလောဝါ ဟဲရာဇာန ခိုင်းနှိုင်းရမယ်နူး။ သူ့နို့ဟ ဈေးမှာထိုင်နေဂေ့ပီး သူ့နို့ဆော့ဖော်ဆော့ဖက်ဒွေဝို 17'နို့ဟ ပုလွေမှုဘေမဲ့ နန်းနို့ကဂေ့ရ။ နို့ဟ ငိုချင်းဝို သီဆိုနေဘေမဲ့ နန်းနို့ငိုကြွေးဂေ့ရ' ဆိုပီး အော်ဟစ်လှမ်းခေါ်နေဝို သားဂန်းရားဒွေနတူရယ်။ 18ဟဲဂျော့ဆိုဝါ ယောဟန်ရော့လာပီး စားသော့ဘဲနနေရယ်ဆိုဝါ သူ့နို့ဟ "သူဟ ကောဆိုးဝါး ပူးကပ်နေရယ်" ဆိုပီး ပြောဂေ့လိမယ်ဖြစ်ရယ်။ 19ဘုရားရှင် စေလွှတ်လိုက်ဝို လူ့သားတော်ရော့လာပြီး စားသော့နေရယ်ဆိုဝါ သူ့နို့ဟ 'သူ့ဝိုကေ့ကေ့။ သူဟ စားသော့လွန်ကြူးသူဖြစ်ပြီး ခွန်ကော့သူဒွေန ပြစ်ဒုဇရိုက်မားဒွေရဲ့မိဆွေလဲဖြစ်ရယ်' ဆိုပီး ပြောဆိုဂေ့လိမယ်ဖြစ်ရယ်" ဆိုပီး မိတော်မူလေရယ်။ 20အဲနော့ ကိုယ်တော်ယေရှုဟ သူ့ရဲ့အံဖွယ်မှုဒွေဝို များဆုံးပြုလုပ်ပေးရစ်ဝို ဗြို့ဒွေမှာရှေ့ဝိုလူဒွေဟ နော်ဒသံဝေဂမရဂေ့ဘဲရိတွက် စပီးပြစ်တံပြောဆိုလေရယ်။ 21"ခေါရာဇိန်ဗြို့၊ နန်ဟ ဒုက္ခရော့ရလိမယ်။ ဗက်ဇဲဒဗြို့လဲ ဒုက္ခရော့ရလိမယ်။ ဟဲဂျော့ဆိုဝါ နန်းနို့မှာ ပြုလုပ်ရစ်ဝိုအံ့ဖွယ်မှုဒွေဝို တိုင်ရာဗြို့န ဆီဒုန်ဗြို့ဒွေမှာဘဲ့ ပြုလုပ်ခဲ့မယ်ဆိုဝါ အဲမိုဗြို့မှာရှေ့ဝို လူဒွေဟ စဒဲဟ ထည်ဂျမ်းဒွေဝို ဝတ်ဆင်ပီး ခေါပေါ်မှာ ပလာမုဒွေလူးပီး နော်ဒသံဝေဂရခဲ့ဂေ့လိမယ်ဖြစ်ရယ်။ 22အယ်ဘေမဲ့ အဲမိုလူဒွေ နော်ဒသံဝေဂမရဂေ့ဘဲနေဂိုမှ နန်းနို့ဝို ငါပြောရှင်ဇာဟလောဝါ ရားစီရင်တော်မူဝိုနေ့ဝို ရော့ဝိုခါမှာ တိုင်ရာဗြို့န ဆီဒုန်ဗြို့ဝို ကလရော့မဲ့ပြစ်တရားဟ နန်းနို့ဆီ ကလရော့မဲ့ပြစ်တရားထက် များဂီးနည်းပါးပေလိမယ်။ 23ပီးရယ်ဆိုဝါ ကပရနောင်ဗြို့၊ နန်လဲ ရွှေဗြို့တော်ဝို ပို့ဆော်ဇာခံရမယ်ဆိုပီး ထံနေလော။ နန်ဟ ငရဲဝိုဘဲ့ ပစ်ခလဇာခံရမှာဖြစ်ရယ်။ ဟဲဂျော့ဆိုဝါ နန့်မှာပြုလုပ်ရစ်ဝို အံ့ဖွယ်မှုကိစဒွေဝို သောဒုန်ဗြို့မှာသာ ပြုခဲ့မယ်ဆိုဝါ အဲမိုဗြို့ဟ ခုထိရှေ့နေဦးမယ်ဖြစ်ရယ်။ 24နန်းနို့ဝို ငါပြောရှင်ဇာဟလောဝါ ရားစီရင်တော်မူဝိုနေ့ဝို ရော့ဝိုခါမှာ သောဒုန်ဗြို့မှာ ကလရော့မဲ့ပြစ်တရားဟ နန်းနို့ဆီ ကလရော့မဲ့ပြစ်တရားထက် များဂီးနည်းပါးပေလိမယ်ဖြစ်ရယ်" ဆိုပီး မိတော်မူလေရယ်။ 25အဲခီမှာ ကိုယ်တော်ယေရှုဟ "ကောကံ န မလေဂီးရဲ့ရှင်သခင်ဖြစ်တော်မူဝို အဖဘုရားရှင်၊ ပညာရှေ့ဒွေန ဥာဏ်ထက်မြတ်သူဒွေဆီဟနေ အဲမိုကြောရာဒွေဝို ကွယ်ဝှက်ရားပြီး သားငယ်ရားဒွေမျိုးဖြစ်နေဝို လူဒွေဝို ပြသတော်မူတွက်ဂျော့ အဖဘုရားရှင်ရဲ့ ဂုဏ်ကျေးဇူးဝို ချီးမွမ်းပါရယ်။ 26အယ်မိုမျိုးပြုလုပ်ဇာဟ အဖဘုရားရှင်ရဲ့ ဘောဆန္ဒဖြစ်ရိတွက်ဂျော့ မှန်ကန်ပါရယ်။ 27ခပ်သီးဝို ခွမ့်အာဏာဒွေဝို ငါ့ရဲ့အဖဘုရားရှင်ဟ ငါ့ဝိုအပ်နှံရားတော်မူပြီဖြစ်ပြီး အဖဘုရားရှင်ဟနေလွှဲပီး သားတော်ဝို ဟယ်သူမှသိနိုင်ဘဲမျိုး သားတော်န သားတော်ဝွီးချယ်ရားဝိုသူဒွေဟနေလွှဲပီး အဖဘုရားရှင်ဝို ဟယ်သူမှသိနိုင်ရ။ 28လေးလံဝိုဝန်ထုတ်ဝန်ပိုးဒွေဝို ထမ်းပိုးပြီး ပမ်ပန်းနွမ်းနှယ်နေသူပေါဒို့၊ ငါ့ဆီဝိုလာဂေ့လော့။ ငါဟ နန်းနို့ဝို နားခိုရာဝိုပေးမယ်။ 29ငါ့ရဲ့ထမ်းပိုးဝိုထမ်းပီး ငါ့ဆီဟနေသန်ယူဂေ့လော့။ ငါဟနူးညံ့သီမွေ့ပီး နှိခလဝိုစိရှေ့ရိတွက်ဂျော့၊ နန်ဟ နန့်စိဝိဉာဉ်ငြီးချမ်းရာဝို တွီ့လိမယ်ဖြစ်ရယ်။ 30ဟဲဂျော့ဆိုဝါ ငါ့ရဲ့ထမ်းပိုးဟ ထမ်းရလွယ်ကူပြီး ငါ့ဝန်ထုပ်ဟလဲ ပေါ့ပါးရိတွက်ဂျော့ဖြစ်ရယ်" ဆိုပီး မိလေရယ်။
Currently Selected:
Matthew 11: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
