Luke 24
24
1နှိုပ်ဆိ့ပတ်ဟှတ်တောလ်စိပ်စိပ်ဆုံးနှိုပ်၊ တနင်္ဂနွေနှိုပ် အငူတိအောလ် မုတောလှီ့နား အမွှေးနံ့သာသွီးလှီ့ ဈိအယ်ထေ့နား ကိုယ်တော်ယေရှု စုဝေါလ်အာမ်ဈာတ်။ 2အင်(မ်)လှီ့အာမ်ခိုက်ယေဟိုဝေါလ် စူပေါက်ကာဝေါလ်ကိ လုံးနူးခေါမ် ပွလ်ဟှတ်ဟှတ်နား အလှောက်ခန်းနောလ် အလှမ်းမာလ် အမယ်ယေခေါမ် အာမ်မုဝေလောဒ့်။ 3အင်(မ်)လှီ့ စူဒုလ်ကာလ် အာမ်ဝင်ငယ်ဟိုဝေါလ် ကိုယ်တော်ယေရှု ရုတ်မုတိယော်ဟ။ 4အင်(မ်)လှီ့နား ဟိဘော်ထောလ်နောက်ခေါမ် စဉ်းစားဝေါလ်လောဒ့်ယဟနောလ် အာမ်ထောလ်ဟိုဝေါလ် စါစ်နောက်မိုတ်ကာလ် ဆူဆောက်ဘို့ခုအယ်ထေ့နား ကိုယ်ရောင်ကိုယ်ဝါတောက်ပတိ နတ်ဒေဝါပွလ်နှိ အင်(မ်)လှီ့ကာဝေါလ် အာမ်ဟီတုလ်လူး။ 5မုတောလှီ့ အာမ်ကိအယ်တောင်းထေ့နား သပ်ကာလ် ဒူးထောက်ကာလ်နား အာမ်ခခ်။ အင်(မ်)ဘော်နားခါ အင်(မ်)ခေါင်ပွလ်နှိနား "ဘာလ်တိလှီ့တောဒ့်နောက် စုဒုလ်ကာလ် ဟိဘော်ဟိုင်ရိုး အဆောက်ဟင်(င်)တိ နာမ်ဆူလ်လူး။ 6ကိုယ်တော် နီဓိလ်နောလ် မယ်တိယော်။ အဘာလ်ခေါမ်ငေါလ်ကိ အဆောက်ဟင်(င်)ဘွာလ်ပါလ်။ အင်(မ်)နား နာ(င်)မီးဓေါလ် ဟှတောလ် ဂါလိလဲရိုး အမယ်ဟိုဝေါလ် အဟောင်ဟိလ့်ခေါမ် သတိလောဒ့်ဘွတ်စူး။ 7ခေါင်စိုးခေါမ် ဒုစရိုက်အပစ်ဆော်လှီ့ ကွတ်ဒုလ်ကာလ် အာမ်အပ်ပိုက်။ အင်(မ်)လှီ့နား ခေါင်စိုးခေါမ် လက်ဝါးကပ်တိုင်ရိုး တင်ထေ့နား အာမ်ဓုတ်ကိုက်။ အင်(မ်)ဘော်နားခါ အထုမ်နှိုပ်ပ်ပါလ် အဆောက်ဟင်(င်)လူးဘွာလ်ဝိုက်" တိရို အမိန့်ဟိလ့်။ 8အင်(မ်)ဟိုဝေါလ် အင်(မ်)မုတောလှီ့နား ကိုယ်တော်ယေရှု မိန့်ဟိလ့်ခေါမ်လှီ့ သတိလောဒ့်ဘွာလ်ထေ့နား 9စူဝေါလ်ကိ ဈာတ်ဘွာလ်ထေ့နား သာဝက ကုလာဟှတ်လား အစွာခေါင်လှီ့ကိမ်ကိမ်ငေါလ် အင်(မ်)အကြောင်းလှီ့ အာမ်ဆိုက်ယေ။ 10သာဝကလှီ့အောလ် အင်(မ်)အဖြစ်ပျက်လှီ့ ဆိုက်ယေတိလှီ့စေ့ မာဂဒလလုဆော်နူးမာရိ၊ ယောဟန္န၊ ယာကုပ်နူး မာရိလား အစွာမုတော အချို့လှီ့အောလ် အာမ်ထောလ်။ 11သာဝကလှီ့နား အင်(မ်)မုတောလှီ့ ဟောင်ခေါမ် ခေခေါလှီ့ ယုတ္တိမယ်ယခန်းနောလ် ယုံယော်ဟ။ 12အင်(မ်)ဘော်နားခါ ပေတရု စူဝေါလ် ဈာလ်ထေ့နား အဓေါလ့်ဝေဟိုဝေါလ် ဆူဆောက်လှီ့ယောင် အမယ်ယေဟိလ့်။ အင်(မ်)အဖြစ်အပျက်လှီ့ စါစ်နိုးဗာန် အိမ်မာလ်အဈာတ်ဘွာလ်။ 13အင်(မ်)နှိုပ်ကုံးငေါလ် တပည့်တော်ပွလ်နှိ ဂျေရုဆလင်လုအောလ်ကထု မိုင်ဆိဘောင်လှမ်းတိ ဧမောက်နာမ်(မ်)မာလ် အဟီဈာတ်။ 14အင်(မ်)ဟွဒ်ပွလ်နှိနား ကိုယ်တော်ယေရှု ဖြစ်ပျက်ဟိလ့်ခေါမ် အကြောင်းအရာလှီ့ ဆွေးနွေးဗာန် အဟီဈာတ်။ 15အင်(မ်)ဘော် ပွလ်ဟှတ်လားပွလ်ဟှတ် ခေဝေဗာန် အဟီဈာတ်ဟိုဝေါလ် ကိုယ်တော်ယေရှုခေါမ် ချဉ်းကပ်လူးထေ့နား အင်(မ်)ဟွတ်ဓေါလ်ဟှတောလ် လာမ်းလျှောက်ကာလ်နား အကြွ။ 16ဖုလော်ရှင်နား အင်(မ်)လှီ့အောလ် ကိုယ်တော်ယေရှု မှတ်တောလ်လောဒ့်ယဟနောလ် အစိုင်းခန်းနောလ် အင်(မ်)ဟွဒ်နား ကိုယ်တော်ခေါမ် မှူနားခါ မှတ်ယော်ဟွဒ့်။ 17ကိုယ်တော်ယေရှုနား "နာ(င်)ဟီ လာမ်းမယ်ဈာတ်ဗာန် ဟအီနာဟီဟောင်" တိရို အဟိ့ဟိုဝေါလ် အင်(မ်)ဟွဒ် ဝမ်းနည်းဗာန် အဟီတုန့်ငယ်လှာလ်။ 18အင်(မ်)ဟွတ်ဒုလ်ကာလ် 'ကလောဖ' မိန်နိုးတိနား ကိုယ်တော်ယေရှုအောလ် "မယ်ဟိလ့်တိ နှိုပ်လှီ့အောလ် ဂျေရုဆလင်လုအောလ် ဟအီလှီ့ ထောလ်ဟိလ့်နောက်ခေါမ် စူးယတိ နာ(င်)ပွလ်ဟှတ်ယောင်နာမယ်" တိရို အဟောင်။ 19ကိုယ်တော်ယေရှု နား "ဟအီလှီ့ထောလ်ဟိလ့်" တိရို အဟိ့ဟိုဝေါလ် အင်(မ်)ခေါင်နား "နာဇရက်လုအောလ်ကိ ကိုယ်တော်ယေရှု အဖြစ်ပျက်လှီ့အောလ် အထောလ်။ အင်(မ်)ခေါင်ခေါမ် ကြီးကျယ်တိ စါစ်နောက်ဟိုင်လှီ့ ဆောင်ရွက်ဗာန် မင်္ဂလာဆတင်းခေခေါလှီ့ ဟောဟိလ့်တိ ပရောဖက်ပါးဟှတ်တောလ် အထောလ်။ အင်(မ်)နား အဟောဟိလ့်ခေါမ်လှီ့တက တန်ခိုးအာနုဘော် အကြီးမားတိရို ခေါင်လှီ့နား အာမ်ခိလ်ဟိလ့်။ 20အင်(မ်)ဘော်နားခါ ကေးမီး ပုရောဟိတ်အကြီးကဲလှီ့လား ဂျူးခေါင်းဆောင်လှီ့နား အင်(မ်) မင်ထေ့နား ရောမအာဏာပိုင်ကွတ်ဒုပ်ကာလ် အာမ်အပ်ဟိလ့်။ အင်(မ်) အာဏာပိုင်လှီ့နား သေဒဏ်အာမ်ပက်ခန်းနောလ် အင်(မ်) လက်ဝါးကပ်တိုင်ရိုး တင်ထေ့နား အာမ်ဓုတ်ဟိလ့်။ 21အင်(မ်)အရှင်ခေါမ် ကေးမီး အစ္စရေးခေါင်ယှီလှီ့ ရွေးနှုတ်တိ အရှင်ငေါလ်ထောလ်နိုက် တိရို ကမျော်လင့်ဟိလ့်။ အင်(မ်)ဘော်နားခါ နီအဖြစ်ပျက်လှီ့ကိမ်ကိမ် မယ်ဟိလ့်တိ ခုနှိုပ်လှီ့အောလ် အဖြစ်ပျက်ဟိလ့်ပါလ်။ 22အင်(မ်)ဘော်နားခါ ကေးမီးအဖွဲ့ရိုးကိ မုတောအချို့လှီ့နား ကေးမီးရိုး စါစ်နောက်ဟိုင်လှီ့ အာမ်ဟောင်ဟိလ့်။ အင်(မ်)လှီ့ အငူတိ စူဝေါလ် အာမ်ဈာတ်ဟိုဝေါလ် 23အင်(မ်)လှီ့နား ကိုယ်တော် ရုတ် မုဟိလ်ယော်ဟ။ ဖုလော်ရှင်နတ်ဒေဝါ ပါးနှိနား ကိုယ်တော်ယေရှု အဆောက်ဟင်(င်)ဘွာလ်ပါလ် တိရို ဟောင်ခေါမ် အင်(မ်)လှီ့ အာမ်လူးဘွာလ်ဟိုဝေါလ် ကေးမီးရိုး အာမ်ဆိုက်ဘွာလ်။ 24အင်(မ်)ပါလ်နောလ် ကေးမီးအဖွဲ့ရိုးကိ ခေါင်အချို့နား စူဒုလ်ကာလ် ဈာတ်ထေ့နား အာမ်ဓေါ့်ဝေဟိုဝေါလ်ခါ အင်(မ်)မုတောလှီ့ ဟောင်ဘော် အင်(မ်)လှီ့နားခါ ကိုယ်တော်ယေရှု အရုတ် မုဟိလ့်ယော်င" တိရို အာမ်ဆိုက်။ 25အင်(မ်)ပါလ်နောလ် ကိုယ်တော်ယေရှုနား အတပည့်ပွလ်နှိရိုး "ဟိဘော်ဟိုင်ရိုး ရောစူးခွတ်ယော်တီဟီ။ ပရောဖက်လှီ့ မိန့်ဟိလ့်ခေါမ်အချက်လှီ့ ယုံဟိုင်ဟိဘော်ဟိုင်ရိုး နာဟီနှောင့်နှေး။ 26'ကယ်တင်ရှင်မေရှိယ' နား အဘုန်းတန်းခိုးလှီ့ အလောဒ့်လှောင်(င်)နောလ် ဒုက္ခဝေဒနာ ခါမ်လောဒ့်အိုက်နောက်ခေါမ် စူးယော်စုယအာ" တိရို အဟောင်။ 27အင်(မ်)ပါလ်နောလ် ပရောဖက်လှီ့ကျမ်းစော်လှီ့အောလ် ပူတိလှီ့ အကြောင်းအရာကိမ်ကိမ်လား မောရှေပညတ်ကျမ်းဝေါလ် အင်(မ်)အကြောင်း ဖော်ပြဟိလ့်တိ အနက်ဓိပ္ပါလ်ခေါမ် အင်(မ်)လှီ့အောလ် အရှင်းပြ။ 28အင်(မ်)ဟွဒ်ပွလ်နှိ ဈာတ်နောက် နာမ်(မ်)ကာဝေါလ် ခိုက်ဟိဟိုဝေါလ် ကိုယ်တော် အလှမ်းမယ် ဆက်ကာလ်နား ဈာတ်ဟိုင် ပုံစံမုခန်းနောလ် 29အင်(မ်)ဟွဒ်နား ယေရှုအောလ် "ခူအမီပါလ်ခန်းနောလ် ကေးမီးဓေါလ်ဟှတောလ် တည်းခိုဝြာ" တိရို ကိုယ်တော် အဟီဖိတ်။ အင်(မ်)ဘော်ခန်းနောလ် ကိုယ်တော်ခေါမ် အင်(မ်)ဟွဒ်ဓေါလ် ဟှတောလ် တည်းဟိုင် အိမ်ဒုလ်ကာလ် အဝင်။ 30ဘုအေနောက် ခုံငေါလ်အငွဟိုဝေါလ် ကိုယ်တော်နား ပေါင်မုန့်ကိုင်ငယ်နား ဖုလော်ဂုဏ်တော် အချီးမွမ်း။ ပေါင်မုန့် ဖတ်ထေ့နား အင်(မ်)ဟွဒ်ရိုး အပက်။ 31အင်(မ်)ဟိုဝေါလ် ချက်ချင်းကုံး အင်(မ်)ဟွဒ် အမြင်အာရုံ ဖွင့်ပက်ဘွာလ်ခန်းနောလ် အင်(မ်)ဟွဒ်နား ကိုယ်တော်ယေရှုနောက်ခေါမ် အဟီစုတ်(င်)ဘွာလ်။ အင်(မ်)ဘော်နားခါ အင်(မ်)ခေါင်ပွန်နှိုမော်မှူအောလ်ကိ ကိုယ်တော်အခိတ်ဓိမ်း။ 32"ကိုယ်တော်ယေရှုနား ကေးမီးရိုး လာမ်းမယ် ကျမ်းစော်ကြောင်းလှီ့ အဆိုက်ဟိုဝေါလ် ဟီဟိလုန်ဒုလ်ကာလ် ရင်းရင်းနှီးနှီး စုတ်(င်)ကာလ်ဘော် ခံစားလောဒ့်ဆဝါ" တိရို အဟီခေဝေတောင်။ 33အင်(မ်)ပါလ်နောလ် အင်(မ်)ဟွဒ် ချက်ချင်း ဂျေရုဆလင်အင်(မ်) အဟီဈာတ်ဘွာလ်လား သာဝက ကုလာဟှတ်လှီ့ အစွာခေါင်လှီ့ဓေါလ် ဟှတောလ် စုအယ်ခေါမ် အဟီမုလောဒ့်။ 34စုဝေးထေ့နားမယ်တိ တပည့်တော်လှီ့လား ကိုယ်တော်ယေရှု ဘာလ်ခေါမ်ငေါလ်ကိ ရှင်ပြန်ထမြောက်ထေ့နား ပေတရုအောလ် ဖူးမြင်ခွင့်ပက်ဟိလ့်" တိရို အာမ်ဆိုက်။ 35အင်(မ်)ဟိုဝေါလ် ဧမောက် နာမ်(မ်)မာလ်ကိ ခေါင်ပွလ်နှိုခါလာမ်းမယ် အဟီကြုံတွေ့ဟိလ့်ခေါမ် တကလား ပေါင်မုန့်ဖတ်ဟိုဝေါလ် ကိုယ်တော်ယေရှုနောက်ခေါမ် စုတ်(င်)လောဒ့်ခေါမ်လှီ့ အဟီဆိုက်ဘွာလ်။ 36အင်(မ်)ဘော် တပည့်လှီ့နား အင်(မ်)အကြောင်းရာ အဖြစ်ပျက်လှီ့ အာမ်ဟောင်ဝေးဟိုဝေါလ် ကိုယ်တော်နား အင်(မ်)လှီ့အောလ် ကိုယ်ထင်အဓေါင်ထေ့နား အင်(မ်)လှီ့အောလ် "ဖုလော်ရှင်နား နာ(င်)မီးရိုး ငြိမ်းချမ်းခေါမ် မာနောလ်ပက်ဆတ်" တိရို အမိန့်။ 37အင်(မ်)ဘော်နားခါ တပည့်လှီ့နား သရဲနား အခိ့အယ်တိရို အာမ်ခိလ်ထေ့နား အာမ်ကိအယ်တောင်။ 38အင်(မ်)ဘော်နားခါ ကိုယ်တော်ယေရှုနား "ဟိဘော်ဟိုင်ရိုး နာမ်ကိအယ်။ဟိဘော်ဟိုင်ရို သံသယနာမ်ဝင်လောဒ့်။ 39ကေးကွတ်၊ ခူလှီ့ ဓေါ်ဝေါလ်။ကေးထိစမယ်။ သရဲဝေါလ်စေ့ အယိလှီ့အဆော်လှီ့ မယ်ယော်။ ကေးရိုစေ့ ကေပုန်း၊ အယိမယ်" တိရို အမိန့်။ 40အင်(မ်)ဘော် အဟောင်ပါလ်နောလ် အကွတ်ခူလှီ့အောလ်ကိ ဒဏ်ရာလှီ့ အဓေါင်နယ်။ 41အတပည့်လှီ့နားခါ အာမ်ပျော်ဗာန် ယုံခွတ်ယဟနောလ် အာမ်စါစ်နောက်ကြ။ ကိုယ်တော်နား အင်(မ်)လှီ့အောလ် "အေဟိုင် အူဟှဟှတ် အမယ်ယား" တိရို အဟိ့ 42အင်(မ်)ဟိုဝေါလ် အင်(မ်)လှီ့နား ငေါဟိုက် အာမ်ပက်ဟိုဝေါလ် 43ကိုယ်တော်နား အင်(မ်)လှီ့ မော်ဝေါလ်အအေလှာယ်။ 44အင်(မ်)ပါလ်နောလ် ကိုယ်တော်ယေရှုနား "မောရှေ ပညတ်ကျမ်းလား ပရောဖက်လှီ့ စော်အုပ်၊ ဆာလံကျမ်းလှီ့အောလ် ကိုယ်တော်အကြောင်း ဖော်ပြအယ်ဘော်တိုင် အမှန်ထောလ်လူးဝိုက် တိရို နာ(င်)မီးရိုး ဟောင်ဟိလ့်ခေါမ် အကြောင်းလှီ့နောက်ခေါမ် တုအောလ်ကိ အဖြစ်ပျက်လှီ့ရိုးအထောလ်" တိရို အမိန့်။" 45အင်(မ်)ပါလ်နောလ် ကျမ်းစော်ဒုလ်ကာလ် ရေးသားယေတိ ကိုယ်တော်တောလ် ပတ်သတ်တိအကြောင်းအရာလှီ့ နားလည်ဟိုင်တွက်ကာလ် တပည့်တော်လှီ့အောလ် လာမ်းအဓေါင်ပက်။ 46အင်(မ်)ပါလ်နောလ် အင်(မ်)လှီ့အောလ် "ကျမ်စော်ဝေါလ် မေရှိယခေါမ် ဆိတ်ခေါမ်စက်ကာလ်လှီ့ ခံဟိလ့်လောဒ့်ထေ့နား အထုမ်နှိုပ်ပါလ်စေ့ ဘလ်ခေါမ်ငေါလ်ကိ ရှင်ပြန်အထမြောက်ဘွာလ်ဝိုက်။ 47နောင်တလောဒ့်ခေါမ်လား ဒုစရိုက်အပြစ်လှီ့တွက် ခွင့်လွှတ်ခြင်းလောဒ့်ဟိုင် ဂျေရုဆလင်လုအောလ် ကထုစအယ်နား ခေါင်ယှီအပေါင်းလှီ့အောလ် အဟောဝိုက်" တိရို အဖော်ပြအယ်။ 48အင်(မ်)ခန်းနောလ် နာ(င်)မီးခေါမ် နီအဖြစ်ပျက်လှီ့တွက် မျက်မြင်သက်သေလှီ့ရိုးထောလ်။ 49''ကေးနား ကေးခမည်းတော်ဝေါလ် ကေပက်ခေါမ် ကတိတိုင် နာ(င်)မီးစငေါလ် ဉာစ်အလင်းတော်အသက်ရောက်ဝိုက်။ အင်(မ်)ဘော်ခန်းနောလ် နာ(င်)မီးလား ဟြားလုအောလ်ကထု တန်ခိုးတော်အပက်ဝှေ့ ဂျေရုဆလင်လုအောလ် စောင်ဘွတ်စူး" တိရို အမိန့်။ 50အင်(မ်)ပါလ်နောလ် ကိုယ်တော်ယေရှုနား အတပည့်လှီ့ ဗိုင်နယ်ထေ့နား ဗေသနိနာမ်(မ်) ပြင်ဓိလ်ဟှတ်ဓေါလ် အကြွ။ အင်(မ်)ဓိလ်နောလ် အာမ်ခိုက်ဟိုဝေါလ် တပည့်တော်လှီ့ ကိမ်ကိမ်တွက် ကွတ်မြှောက်ထေ့နား ကောင်းချီးအပက်။ 51အင်(မ်)ဘော် အစိုင်းပါလ်နောလ် ကိုယ်တော်ယေရှု ဟြားလုအောလ် အကြွဘွာလ်။ 52အင်(မ်)ခန်းနောလ် တပည့်တော်လှီ့နား ကိုယ်ယေရှု ခခ်ထေ့နား ပျော်ဗာန် ဂျေရုဆလင်လုအောလ် အာမ်ဈာတ်ဘွာလ်။ 53အင်(မ်)လှီ့ ဂျေရုဆလင် အာမ်ခိုက်ဟိုဝေါလ် ဗိမာန်တော်ဝန်းရိုး ဖုလော်ရှင်ဂုဏ်တော် ပျက်ကွက်ကောဝေါလ် ချီးမွမ်းထေ့နားအာမ်မယ်။
Currently Selected:
Luke 24: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
