Zefaniya 3
3
Imbibi iya Yelusalemu nukutabuliwa
1Chighune kukaya akakulu nkani,
akasambuke na kanyazu,
kako kakubayivya abantu bache!
2Katakumwivwila nayumoyumo,
sona katakwitika ukuchemeliwa.
Katakumusubila u Mwene,
katakupalamila kwa Chala wache.
3Amakambala ghache ghakubuluma ngati nkalamu,
abalaghili bache bali ngati bo bakambwe
babo bakwenda pachamabwila,
batakuchilekapo nachimochimo
ichakulya icha pandabindabi.
4Abalaghuzi bache bakwituvya
sona te basubiliwa.
Abaputi bache bakubunyazya Ubuzilo Ubuzelu
nukuzinangannya indaghilo.
5U Mwene umugholosu ali mukaya,
atakunangapo nakamokamo.
Indabindabi ni ndabindabi
akuvumbula ubwanaloli bwache,
sona kubuche bosi atakupotwapo,
loli babo te bagholosu bate ni soni.
6U Mwene akakabuzya akaya kala akati,
“Nazinangannya inko zyosi,
sona amalinga ghabo naghamongolannya.
Imisebo yabo nayinangannya
atalipo nayumoyumo umuntu uwakudumusannyamo.
Utwaya twabo twananganika
sona mute nu muntu nayumoyumo.
7Nkakabuzya akaya akakulu nkani nkati,
‘Naloliloli ukwiza pakunnyila
nukwitika ukuchemela kwane!’
Po akaya kache katangananganika,
pamo ukuti ulufundo lwane lukawile.
Loli pope bulo bakaba bengo nkani
pakubomba ivyamabeko vyabo vyosi.
8Mundindilile pisiku lilyo nkwiza pakubikila ubwakaboni
pakuti nadumula pakuzibungannya inko,
nukububungannya ubumwene.
Pakubapungulila ubukali bwane ubwakoghofya.
Ichisu chosi ichapasi chikwiza pakulungulila
numoto uwa buzuba bwane.”
U Mwene anena.
9“Pakabalilo kalakala
nkwiza pakuyiswefya imilomo iya inko
umwakuti abantu bosi
balichindikaye itabwa ilya Mwene,
nukumubombela nu moyo ghoka.
10Ukwandila ko kwisila ilya lusoko ulwa Etiyopiya,
abantu bane abakunyiputa na bakunyampana
bakwiza pakubika ivyakwiyipa kukwane.
11Pisiku lilalila mutakwiza pakukoziwa isoni,
pachifukwa ichakuti munsambukiye,
pakuti nkwiza pakubefyamo mukaya kinyu,
abantu babo bakwikwezya.
Mutakwiza pakwituvya sona
pighamba lyane izelu.
12Loli nkwiza pakubaleka pakasi papinyu
abololo na bakwiyisya,
babo bakuchimbilila kukwane, kune Mwene.
13Abakusyalako aba Izilayeli
batakwiza pakunanga,
batakwiza pakunena ubumyasi,
pamo ubuzimbuli ukuti bwaghiwe mumilomo yabo.
Bakwiza pakulya nukulambalala,
sona atalipo nayumoyumo yuyo akwiza pakuboghofya.”
Ulwimbo ulwa lusekelo
14Wee Ziyoni, imbagha nkani!
Wee Izilayeli, kolomokagha nkani!
Wee Yelusalemu, hobokagha
nukusekela nu moyo wako ghosi!
15U Mwene efyapo ulufundo lwinyu,
nukubachimbizya abalwani binyu.
U Mwene, umulaghili uwa ba Izilayeli ali namwe,
mutakwiza pakunyila sona intamyo zimo.
16Pisiku lilalila
bakwiza pakumubuzya u Yelusalemu ukuti,
“Wee Ziyoni, utakanyilaye
utakawanje amaka.
17U Mwene u Chala winyu ali namwe,
wamaka nkani pakupoka.
Akwiza pakuhoboka nkani namwe
mulughano lwache akwiza pakubapa ubumi ubupya,
akwiza pakusekela namwe pakwimba inyimbo.”
18“Pa masiku agha lusekelo
nkwiza pakwefya intamyo kukwinyu,
umwakuti mutakakoziwanje isoni nalumolumo.
19Pakabalilo kalakala nkwiza pakubafunda
babo bakabayivyanga.
Nkwiza pakubapoka abalemazu,
nukubabungannya babo banyampanite.
Nkwiza pakubapala nukubachindika
muchisu chosi ichapasi
mumo bakakoziwa isoni.
20Pakabalilo kalakala nkwiza pakubabungannya,
nukubabwezya kukaya.
Nkwiza pakubachindika nukubapala,
pakasi pabantu bosi aba muchisu ichapasi.
Nkwiza pakubanyosezya ubwiza bwinyu,
bo mukwennya na maso ghinyu.”
U Mwene anena.
Currently Selected:
Zefaniya 3: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
