Zekaliya 4
4
Nizya chisetuka ichakubikapo inyale
1Po uwantumi yuyo akanenagha nane akiza sona nukundamusya ngati muntu yuyo bamulamusya bulo mutulo. 2Akandalusya akati, “Nkimba ukwennya ichoni?”
Nkamwamula nkati, “Nkwennya ichakubikapo inyale icha golide, pamwanya pakaba akabeseni. Palapala pakabapo inkozyo seveni, inyale yosi yili nubutambi seveni. 3Palubazu pachakubikapo inyale pali amakwi agha misyunguti mabili, lyoka kundilo sona ilinji kumongo.”
4Nkamulalusya uwantumi nkati, “Wee songo, nkimba ivintu vinivi vikung'anamula ichoni?”
5Akandalusya akati, “Nkimba utavimenye ivintu vinivi?”
Nkamula nkati, “Wee songo, intavimenye.”#4.5: Ivesi ilya 10b mupaka vesi 14 lyabikiwa pano umwakuti ulubatiko ulwi pangwi lwivwike akiza.
10bUwantumi akambuzya akati, “Inyale seveni gho maso agha Mwene, ghagho ghakuchennya ichisu chosi ichapasi.”
11Po nkamulalusya sona uwantumi yula nkati, “Nkimba amakwi agha misyunguti ghagho ghali kumongo na kundilo agha chakubikapo inyale, ghakung'anamula ichoni?”
12Nkamulalusya sona nkati, “Nkimba isamba zibili izya misyunguti zizyo zili papipi na mapayipi agha golide mumo mukwenda amafuta agha golide zikung'anamula ichoni?”
13Nkamula nkati, “Nkimba utavimenye ivintu vinivi?”
Nkamula nkati, “Awe, songo wane.”
14Po akati, “Banaba bo bantu babili babo u Chala abasala nukubapakazya ukuti bamubombelaye u Mwene uwa chisu chosi ichapasi.”
U Mwene akumulayizya Zelubabeli
6Uwantumi akambuzya amazyu ghanagha aghakufuma kwa Mwene akati imubuzye u Zelubabeli ukuti, “Utakupota ubwite pachifukwa icha maka, loli pachifukwa icha Muzimu wane.
7“Ghope na maghamaba amakulu nkani ghakwiza pakuba makombe pamaso pa Zelubabeli, akwiza nibwe ilya pankuto bo abantu bakukolomoka bakuti, ‘Mwee yikuboneka akiza! Mwee yikuboneka akiza!’ ”
8U Mwene akambuzya sona akati, 9“U Zelubabeli weyuyo aluzenga ulwalo ulwa Nyumba iya Chala, sona weyuyo akwiza pakuyimalizya. Po mukwiza pakumanya ukuti u Mwene Uwamaka Ghosi antuma kukwinyu.
10a“Pakuti umuntu wesi yuyo alisula isiku ilya vintu ivinandi nkani vinivi, akwiza pakusekela, bo u Zelubabeli alemite ulukusa ulwakupimila.”
Currently Selected:
Zekaliya 4: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
