Zekaliya 2
2
Ichisetuka icha lukusa ulwakupimila
1Po nkatalankannya, nukumwennya umuntu pamaso papane alemite ulukusa ulwakupimila munyobe zyache! 2Nkalalusya nkati, “Nkimba ukubuka kwiyi?”
Akanyamula akati, “Nabuka pakupima u Yelusalemu mumo abeleye ububaba bwache sona nu butali.”
3Po uwantumi yuyo akanenagha nane akabuka, uwantumi uyunji akiza pakukomana nawe. 4Uwakwanda yula akamubuzya uyunji yula akati, “Chimbila, mubuzye umulumendo yula ukuti, ‘U Yelusalemu akwiza pakuba kaya kako katakwiza pakuba nu lupaso pachifukwa icha bwinji ubwa bantu sona ni vitekwa vivyo vikwikala mulamula. 5Po ane nkwiza pakubanga ne lupaso ulwa moto sona nkwiza pakubanga ne buchindamu bwache mulamula, u Mwene anena.’ ”
Abazya bitiziwa pakubwela kukaya
6U Mwene ati, “Zagha! Zagha! Mwee, chimbilako kuchisu icha kumitu, pakuti nabanyampanizizya mumpepo folo izya mumwanya.
7“Zagha chimbilila ku Ziyoni, amwe mwe bantu bosi mwe mukwikala muchisu icha Babiloni!” 8Pakuti chinichi cho chicho u Mwene umuchindamu nkani Uwamaka Ghosi anena ati, “Inko zyosi zizyo zyababombela abantu bane ububibi zyambombela nane bulo ububibi. 9Naloliloli, nkwiza pakuzikoma inko zinizi ni nyobe yane, po abazya babo bakwiza pakubafyula ivintu ivya inko zila.” Po mukwiza pakumanya ukuti u Mwene Uwamaka Ghosi antuma.
10U Mwene akati, “Wee Ziyoni, kolomoka sona sekela, pakuti nkwiza lunulu sona nkwiza pakwikala pakasi papinyu!” 11Pakabalilo kalakala, inko inyinji zikwiza pakwiza kwa Mwene, sona zikwiza pakuba bantu bache. Nkwiza pakwikala pakasi papinyu, mukwiza pakumanya ukuti u Mwene Uwamaka Ghosi antumite pakasi papinyu. 12Abantu aba mu Yuda bakwiza pakuba mpyana iya Mwene muchisu ichizelu, po akaya aka Yelusalemu kakwiza pakuba kaya kache akapamoyo. 13Mwe bantu mwebosi, mubanje bulo myee pamaso pa Mwene, pakuti avundumuka ku buzilo bwache ubuzelu bubo akwikalako.
Currently Selected:
Zekaliya 2: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
