Zekaliya 12

Ukusatuliwa ukwa Yelusalemu ukwa muntazi

1Agha gho mazyu aghabulaghuzi agha Mwene ghagho ghakunena nizya Izilayeli. U Mwene yuyo akapela ichisu ichakumwanya, weyuyo akala ulwalo ulwa chisu ichapasi, sona weyuyo akaghupela umuzimu ghugho ghuli mumuntu akuti, 2“Ennya, nkwiza pakumupela u Yelusalemu pakuba ngati lubako ulwa vinyo, inko zyosi zizyo zibazyunguliye zikwiza pakung'wela nukutantalila ngati bantu babo bakolizwe. Chope ichisu icha Yuda chikwiza pakuzyunguliliwa poka nu Yelusalemu. 3Pisiku lilalila, bo inko zyosi izya pachisu ichapasi zimubunganiye, nkwiza pakumupela u Yelusalemu pakuba libwe lilyo litakuyingana pakasi pa inko zyosi. Abantu bosi babo bakuyezya pakuliyingannya bakwiza pakwivulazya bene. 4Pisiku lilalila nkwiza pakuzipelela ubogha ifalasi zyosi, sona abakukwelapo bakwiza pakuvulungana. Nkwiza pakuyenelezya inyumba iya Yuda, loli nkwiza pakuzidobola amaso ifalasi izya inko zyosi. U Mwene anena. 5Po abalongozi aba mu Yuda bakwiza pakunena bene mumoyo ghabo ukuti, ‘Abantu aba mu Yelusalemu bamaka, pachifukwa ichakuti u Mwene Uwamaka Ghosi we Chala wabo.’

6“Pisiku lilalila nkwiza pakubapela abalongozi aba mu Yuda pakuba ngati moto mumusitu, sona ngati nkose izya ngano inyumizu. Zikwiza pakuzilungulizya inko zyosi zizyo zibazyunguliye kundilo na kumongo, loli u Yelusalemu akwiza pakwikala mubuzilo bwache.

7“Ane ne Mwene nkwiza pakutupoka tasi utwaya utwa mu Yuda, umwakuti umuchizi uwa bamunyumba iya Devedi sona nuwa bantu babo bakwikala mu Yelusalemu ghutakabanje mukulu nkani ukughuchila uwa Yuda. 8Pisiku lilalila ane ne Mwene nkwiza pakubavighilila abantu aba mu Yelusalemu, umwakuti abadedebazu nkani pakasi papabo bakwiza pakuba ngati we Devedi, sona abamunyumba iya Devedi bakwiza pakuba ngati we Chala, sona ngati Wantumi uwa Mwene, babo bakubuka pamaso papabo. 9Pisiku lilalila, nkwiza pakuzinangannya inko zyosi zizyo zikulwana nu Yelusalemu.

10“Po nkwiza pakubapungulila umoyo uwa chisa nuwa nyiputo pabanyumba iya Devedi sona napa bantu babo bakwikala mu Yelusalemu. Bakwiza pakumwenelezya umuntu yuyo bakamulasa, bakwiza pakumulila, ngati mumo umuntu akumulilila umwana wache mwene na mwene, sona akuba ni chitima nkani ngati mumo umuntu akubela ni chitima numwana wache ukatote. 11Pisiku lilalila kukwiza pakuba ukulila ukukulu nkani mu Yelusalemu, ngati mumo bakamulilila u Hadadi Limoni mwikombe ilya Megido. 12Ichisu chikwiza pakulila sona inko yoka yikwiza pakulila payene, bope abachi babo bakwiza pakulila pabene. Aba nyumba iya Devedi na bachi babo bakwiza pakulila pabene, sona abaluko ulwa nyumba iya Natani na bachi babo bakwiza pakulila pabene, 13abaluko ulwa nyumba iya Levi na bachi babo bakwiza pakulila pabene, abaluko ulwa nyumba iya Shimeyi na bachi babo bakwiza pakulila pabene, 14sona inko zyosi izinji na bachi babo zikwiza pakulila pazyene.”

Currently Selected:

Zekaliya 12: LMB2024

Highlight

Copy