Aba Levi 4
4
Ichakwiyipa ichakupepesezya imbibi
1U Mwene akamubuzya u Mozesi akati, 2“Ubabuzye aba Izilayeli uti, ‘Izi zyo zizyo babaghiye pakubombagha nanti umuntu ananga indaghilo izya Mwene umwakusita kumanya, pamo abomba ivyamwiko.
3“ ‘Nanti umuputi usongo ananga, kokuti akubapela abantu bosi ukuti babanje ninongwa, po ize kwa Mwene ni nkambaku inyana yiyo yite ni chilema nachimochimo ukuti yibanje chakwiyipa ichakupepesezya imbibi. 4Umuputi yula ize ni ngwata inyanavuli yila pamaso pa Mwene pamulyango uwa Chisakasa. Abike inyobe yache pamutu uwa nkambaku yila nukuyibolela palapala pamaso pa Mwene. 5Po umuputi umupakiwa asende ibanda limo ilya nkambaku yila nukwiza nalyo mu Chisakasa icha Mwene. 6Umuputi yula adwibike akafingwi kache mwibanda, alinyafile akaseveni pamaso pa Mwene kuntazi ukwa mwenda uwakuzighila Ubuzilo Ubuzelu nkani. 7Po apake ibanda limo pampembe izya chighemo ichakufukizizyapo utwakununkila pamaso pa Mwene tuto umunusi wache ghukumuhobosya u Mwene. Ibanda ilyakusyala lila alipungulile muntende umwa chighemo ichakochelapo ichakwiyipa ichakocha, chicho chili mu Chisakasa pamaso pa Mwene. 8Umuputi yula efye amafuta ghosi agha nkambaku inyana yila, kokuti amafuta ghosi ghagho ghamamatiye amala, 9ni figho zyosi zibili na mafuta ghache, sona ni chigaba ichiza nkani icha itima. 10Umuputi asende amafuta ghanagha nukughocha pachighemo ichakochelapo ichakwiyipa ichakocha, ukuyana bulo namumo akaghochela amafuta agha nkambaku yiyo yikochiwa ukuti yibanje chakwiyipa ichabupoka. 11Loli asende inkambaku yosi yila, kokuti ikwela poka ni nyama yache nu mutu wache ni vinama vyache na mala ghache sona ni sakwi yache, 12abuke navyo kuzi ukwa visakasa ubuzilo bubo bwitikiziwe nu Chala kuko bakusumbilako itoyi nukuvyocha vyosi pankwi izya moto kulakula.
13“ ‘Nanti aba Izilayeli bosi bananga umwakusita kumanya nukubomba ivyamwiko pamaso pa Mwene, napapo umwakusita kumanya, kokuti bosi bapalaghula inongwa. 14Loli nanti ukunanga kulakula kwamanyikwa, ichilundilo chosi chize ni nkambaku inyine ukuti chibanje chakwiyipa ichakupepesezya imbibi pamulyango uwa Chisakasa icha Mwene. 15Abalongozi bosi aba chilundilo babike inyobe zyabo pamutu uwa nkambaku yila, po bayibolele pamaso pa Mwene. 16Umuputi umupakiwa asendepo ibanda limo ilya nkambaku yila nukubuka nalyo mu Chisakasa icha Mwene. 17Adwibike akafingwi kache mwibanda mula nukulinyafila pamaso pa Mwene akaseveni kuntazi ukwa mwenda uwakuzighila. 18Apake ibanda limo pampembe izya chighemo chicho chili pamaso pa Mwene mu Chisakasa. Po apungulile ibanda ilyakusyala muntende umwa chighemo ichakochelapo ichakwiyipa ichakocha chicho chili pamulyango uwa Chisakasa icha Mwene. 19Pisinda pache efye amafuta ghosi nukughocha pachighemo. 20Abombaye bunubu ni nkambaku yiniyi ukuyana namumo akochela inkambaku yiyo yikapeghiwa ukuti chibanje chakwiyipa ichakupepesezya imbibi. Bunubu umuputi usongo akwiza pakubika ichakwiyipa ichakupepesezya imbibi izya bantu, po zikwiza pakuhobokeliwa. 21Po ayisendele kuzi ukwa visakasa inkambaku yila nukuyocha, ukuyana namumo akochela inkambaku iyakwanda yila. Ichi cho chakwiyipa ichakupepesezya imbibi izya bantu bosi.
22“ ‘Nanti umulongozi ananga umwakusita kumanya, nukubomba ivyamwiko pamaso pa Mwene u Chala wache, kokuti umulongozi yula apalaghula inongwa. 23Po nanti imbibi yache yamanyikwa, umulongozi yula ize nu sabwe umusita chilema nachimochimo pakuba chakwiyipa. 24Umuntu yula abike inyobe yache pamutu uwa sabwe yula nukumubolela pamaso pa Mwene pabuzilo bubo ichakwiyipa ichakocha chikuboleliwapo. Ichi cho chakwiyipa ichakupepesezya imbibi. 25Umuputi adwibike akafingwi kache mwibanda ilya sabwe yula, nukupaka pampembe izya chighemo ichakochelapo ichakwiyipa ichakocha. Po apungulile ibanda ilyakusyala muntende umwa chighemo. 26Pisinda pache oche amafuta ghosi pachighemo, ukuyana namumo akaghochela amafuta agha nyama yiyo yikabikiwa ukuti chibanje chakwiyipa ichabupoka. Bunubu umuputi akwiza pakubika ichakwiyipa ichakupepesezya imbibi izya mulongozi yula, po imbibi zyache zikwiza pakuhobokeliwa.
27 #
Ukb. 15.27-28
“ ‘Nanti muntu bulo ananga umwakusita kumanya pakubomba ivyamwiko pamaso pa Mwene, kokuti umuntu yula apalaghula inongwa. 28Po nanti ukunanga kwache kwamanyikwa, umuntu yula ize ni mbuzi inkolo yiyo yite ni chilema nachimochimo pakuba chakwiyipa ichakupepesezya imbibi. 29Umuntu yula abike inyobe yache pamutu uwa mbuzi inkolo yila nukuyibolela papo ivyakwiyipa ivyakocha vikuboleliwapo. 30Po umuputi adwibike akafingwi kache mwibanda ilya mbuzi inkolo yila, nukupaka pampembe izya chighemo ichakochelapo ichakwiyipa ichakocha. Po alipungulile ilyakusyala muntende umwa chighemo. 31Pisinda pache efye amafuta ghache ghosi ukuyana namumo akefesezya amafuta agha chakwiyipa ichabupoka nukuyocha pachighemo umwakuti umunusi wache ghumuhobosye u Mwene. Bunubu umuputi akwiza pakubika ichakwiyipa ichakupepesezya imbibi izya muntu yula, po zikwiza pakuhobokeliwa.
32“ ‘Nanti umuntu akwiza ni ng'ozi ukuti yibanje chakwiyipa ichakupepesezya imbibi, ing'ozi yilayila yibanje nkolo yiyo yite ni chilema nachimochimo. 33Umuntu yula abike inyobe yache pamutu uwa ng'ozi yila nukuyibolela papo ichakwiyipa ichakocha chikuboleliwapo. 34Umuputi adwibike akafingwi kache mwibanda ilya ng'ozi yila, nukulipaka pampembe izya chighemo ichakochelapo ichakwiyipa ichakocha. Po alipungulile ilyakusyala muntende umwa chighemo. 35Pisinda pache efye amafuta ghache ghosi ukuyana namumo akefesezya amafuta agha ng'ozi yiyo yikabikiwa ukuti chibanje chakwiyipa ichabupoka nukuyocha pachighemo, poka ni chakwiyipa chicho chikabikiwa kwa Mwene. Bunubu umuputi akwiza pakubika ichakwiyipa ichakupepesezya imbibi izya muntu yula, po zikwiza pakuhobokeliwa.
Currently Selected:
Aba Levi 4: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
