Ubwandilo 46

U Yakobo akubuka ku Ijiputi

1Po u Yakobo akabunganika utwache tosi nukubuka ku Belisheba kuko akabika ivyakwiyipa kwa Chala uwa wise wache u Yisaki.

2Pabusiku, u Chala akanena nawe muchisetuka akati, “Yakobo! Yakobo!”

Po akamwamula akati, “Ane indi pano.”

3Po akati, “Ane ne Chala, u Chala uwa ghuso, utakanyilaye pakubuka ku Ijiputi, pakuti kulakula nkwiza pakukupela pakuba we luko ulukulu nkani. 4Ane nkwiza pakubuka nawe ku Ijiputi, sona nkwiza pakunyokako nawe. Bo wafwa u Yosefu akwiza pakuba kulakula.”

5U Yakobo akepamo mukaya aka Belisheba. Abana bache bakamusenda uwise na bizukulu bache, sona na balasagha bache, pangolo zizyo u Falabo akabatumila ukuti zibanyamule. 6#Imbo. 7.15Bakanyamula sona ni vitekwa vyabo poka nu katundu yuyo bakakaba bo bakwikala muchisu icha Kenani. Po u Yakobo na baluko lwache losi bakabuka mu Ijiputi, 7na bana bache, abalumendo na bizukulu abalumendo, na bana bache abalindu na bizukulu bache abalindu.

8Amatabwa agha bantu abaluko ulwa Yakobo, babo bakabuka ku Ijiputi, sona na bana bache abalumendo bakaba bo aba:

U Lubeni, ukatote uwa Yakobo,

9na bana aba Lubeni:

U Hanoki nu Palu nu Heziloni nu Kalimi.

10Abana aba Simiyoni bo aba:

U Yemuweli nu Yamini nu Ohadi nu Yakini nu Zohala nu Shabuli yuyo unyina akaba waku Kenani.

11Abana aba Levi bo aba:

U Gelishoni nu Kohati nu Melali.

12Abana aba Yuda bo aba:

U Eli nu Onani nu Shela nu Pelezi nu Zela. U Eli nu Onani bakafwila mu Kenani.

Abana aba Pelezi bo aba:

U Heziloni nu Hamuli.

13Abana aba Isakala bo aba:

U Tola nu Puwa nu Yashubi nu Shimiloni.

14Abana aba Zebuloni bo aba:

U Seledi nu Eloni nu Yaleli.

15Aba bakaba bana aba Leya babo akamupapila u Yakobo bo bali ku Mesopotamiya poka nu mwana wache umulindu u Dina. Bosi poka abana bache abalumendo na balindu bakabapo 33.

16Abana aba Gadi bo aba:

U Zefoni nu Hagi nu Shuni nu Ziboni nu Eli nu Alodi nu Aleli.

17Abana aba Asheli bo aba:

U Imuna nu Ishiva nu Ishivi sona nu Beliya poka nu muyemba wabo umulindu u Sela.

Abana aba Beliya bo aba:

U Hebeli nu Malikiyeli.

18Bosi banaba bakaba bana aba Yakobo babo bakapapiwa mwa Zilipa babo u Labani akamupa umwana wache u Leya, bosi poka bakaba 16.

19U Lakelo, umuchi uwa Yakobo, akamupapila abana babili: U Yosefu nu Benjamini. 20#Ubw. 41.50-52Sona kwa Yosefu muchisu icha Ijiputi kukapapiwa: U Manase nu Efulayimu. Asenati akamupapila u Yosefu abana banaba, yuyo akaba mwana wa Potifela umuputi waku Oni.

21Abana aba Benjamini bo aba:

U Bela nu Bekeli nu Ashibeli nu Gela nu Naamani nu Ehi nu Loshi nu Mupimu nu Hupimu sona nu Alidi.

22Banaba bakaba bana aba Lakelo babo bakapapiwa kwa Yakobo bosi poka bakabapo 14.

23Umwana uwa Dani we uyu:

U Hushimu.

24Abana aba Nafutali bo aba:

U Yahizeli nu Guni nu Yezeli sona nu Shilemu.

25Banaba bakaba bana aba Biliha babo u Labani akamupa u Lakelo umwana wache sona banaba akamupapila u Yakobo abana, bosi poka bakaba seveni.

26Abantu bosi babo bakabuka ku Ijiputi poka nu Yakobo ukusita kubelengelako abachi aba bana babo abalumendo, bakabapo 66. 27#Imbo. 7.14Abana aba Yosefu babo bakapapiliwa mu Ijiputi bakabapo babili, po abamunyumba iya Yakobo bosi babo bakiza mu Ijiputi, bakabapo 70.

U Yakobo na bamunyumba yache mu Ijiputi

28U Yakobo akamutuma u Yuda kwa Yosefu ukuti amulabe pakukomana nawe ku Gosheni. Bo bafika muchigaba icha Gosheni, 29u Yosefu akakwela mungolo yache pakukomana nu wise u Yakobo ku Gosheni. Bo afika akamukukila, sona akalila akabalilo akatali nkani.

30U Yakobo akamubuzya u Yosefu akati, “Ilelo ningafwa, pachifukwa ichakuti nachennya icheni chako ukuti uchili we mumi.”

31Po u Yosefu akababuzya abawamwabo sona na bamunyumba iya wise abanji akati, “Imbaghiye imumanyisye u Falabo nizya awe nukumubuzya ukuti, ‘Abawamwitu na banji abamunyumba iya tata babo bakaba muchisu icha Kenani, biza kukwane. 32Sona abantu banaba badimi pachifukwa ichakuti bakaba bateka ng'ombe, sona biza ni vitekwa vyabo ivyinji nkani navyosi vivyo bangaba navyo.’ 33Polelo nanti u Falabo akubitizya nukubalalusya akuti, ‘Nkimba mukubomba mbombo yoni?’ 34Mwamulaye ukuti, ‘Ababombi bako bateka ng'ombe mubumi bwabo bosi ngati mumo bakabombelagha abanyenya bitu.’ Nanti mwanena bunubu mukwiza pakwikala muchisu icha Gosheni.” U Yosefu akanena zinizi pachifukwa ichakuti aba Ijiputi batakahobokagha na badimi.

Currently Selected:

Ubwandilo 46: LMB2024

Highlight

Copy