Ubwandilo 43
43
Abawamwabo banyokela ku Ijiputi nu Benjamini
1Izala yikendelela pakukula nkani muchisu icha Kenani. 2Bo abamunyumba iya Yakobo bennya ivyakulya vivyo bakafuma navyo kuchisu icha Ijiputi vyamala, u Yakobo akababuzya abana bache akati, “Bukagha pakughula ivyinji panandi.”
3Loli u Yuda akamwamula akati, “Umulaghili uwa chisu chila akatusoka nkani ukuti atakwiza pakutwitikizya ukufika pamaso papache nanti tutakubuka nu muzuna witu. 4Nanti ukwitikizya pakututuma nu muzuna witu, tukwiza pakubuka nukukughulila ivyakulya. 5Loli nanti utakututuma poka nawe naswe tutakubukako, pachifukwa ichakuti umuntu yula akatubuzya akati tutakwiza pakufika pamaso papache nanti tutakubuka nu muzuna witu.”
6U Yakobo akalalusya akati, “Nkimba choni chicho mukanyonjelezya intamyo pakumubuzya umuntu yula ukuti muli nu wamwinyu uyunji?”
7Bakamwamula bakati, “Umuntu yula akatulalusya nkani nizya twebenecho sona na bakamu bitu ukuti, ‘Nkimba ughuso achili mumi? Nkimba muli nu wamwinyu uyunji?’ Po tukamula ukuyana na malalusyo ghache. Po ngali tukazimanya bulibuli ukuti angatulalusya ukuti akwiza pakutubuzya ukuti tubuke poka nu muzuna witu.”
8U Yuda akamubuzya uwise u Yakobo akati, “Umutume umulumendo uyu poka naswe, po tukwiza pakunyamuka. Pakubomba bunubu twebosi, awe, na bana bitu poka naswe tutakwiza pakufwa nizala. 9Ane nkwiza pakuba chikole icha bumi ubwa Benjamini. Nanti ntakunyokela nawe mumi, po inongwa yosi yibanje pamutu papane bwila na bwila. 10Nanti tutakabagha ngali twanyokezannya kabili kosi.”
11Po uwise u Yakobo akababuzya akati, “Nanti zingaba bunubu, mubombe ichi: Mumusendele umuntu yula ivikomwa ivyiza nkani ivya muchisu chitu ichi mumasaka ghinyu pakuba chabupi: Amafuta aghakupakazya nu buchi panandi, amafuta aghakununkila aghakulekanalekana nu mila ni mbalala, sona ni seke izya muposya. 12Musende indalama izyakukwana kabili pachifukwa ichakuti mubaghiye pakunyosya indalama zizyo bakabika pamwanya pamasaka ghinyu. Naloli bakapuvya bulo. 13Mumusende nu muzuna winyu, po munyamuke pakubuka sona ku muntu yula. 14U Chala Uwamaka Ghosi abapelele ichisa pamaso pa muntu yula, umwakuti abitikizye pakwiza nu Benjamini poka nu Simiyoni. Nanti chisimbiwe ukuti abana bane imbataghe bunubu, awe, chibombiwanje.”
15Po abantu bala bakasenda ivyabupi sona ni ndalama izyakukwana poka nu Benjamini, po bakanyamuka pakubuka ku Ijiputi. Kulakula bakabuka pamaso pa Yosefu. 16Bo u Yosefu amwennya u Benjamini ali poka nabo, akamubuzya usongo uwa bambombo wache akati, “Bukagha na bantu banaba kunyumba yane. Ughoghe inyama nukupiya akiza nkani, pachifukwa ichakuti abantu banaba bakwiza pakulya nane ichakulya icha pamusanya.”
17Uwambombo yula akabomba vivyo u Yosefu akamubuzya, akabuka na bawamwabo aba Yosefu kunyumba yache. 18Bakanyila nkani pachifukwa bakabuka nabo kunyumba iya Yosefu po bakati, “Akutwinjizya munyumba pachifukwa icha ndalama zizyo tukazyagha mumasaka ghitu pakwanda pala. Akulonda alwaghilepo ulusako ulwakutulemela nukutupela pakuba twe bazya bache poka ni mpunda zyitu.”
19Po bakabuka kwa songo uwa bambombo aba Yosefu munyumba yila nukunena nawe pamulyango, 20bakamubuzya bakati, “Wee mwene wane, tukizapo pabwandilo pakughula ichakulya. 21Bo twafika pabuzilo ubwakughonapo tukasatula amasaka ghitu, wesi akazyagha indalama zyache zyosi mwisaka lyache; po twiza nazyo sona. 22Po twiza ni zyamwabo ukuti tughulile, tutakamumanya nayuyo akatubikila indalama zyitu mumasaka.”
23Akamula akati, “Mufwase bulo, sona mutakanyilaye. U Chala winyu sona u Chala uwa ghuso weyuyo akabika indalama mumasaka ghinyu; nkapokela indalama zyinyu.” Po akabizila nu Simiyoni.
24Sona bo umuntu yula abinjizya abantu munyumba iya Yosefu po akabapa amizi ukuti basukusule munyayo zyabo. Bakazipa impunda zyabo ivyakulya. 25Bakamuyanizizya u Yosefu ivyabupi ukuti bamupe pamusanya, pachifukwa ichakuti bakivwa ukuti akwiza pakulya nabo ichakulya pamusanya kulakula.
26Bo u Yosefu afika munyumba bakiza ni vyabupi munyumba vivyo bakaba navyo, po bakafughamila. 27Akabalamukizya nukubalalusya ukuti, “Ughuso ali akiza, umuntu umughosi? Nkimba achili mumi?”
28Bakamwamula bakati, “Uwambombo wako utata witu ali akiza, sona achili mumi.” Bakinama nukumuchindika. 29Po akatalankannya nukumwennya uwamwabo u Benjamini, umwana uwa nyina nukulalusya ukuti, “Nkimba uyu weyuyo muzuna winyu umunandi nkani, yuyo mukambuzya? Mwana wane, u Chala abanje ni chisa papako!” 30U Yosefu akepapo umwakusita kumanyikwa akiza pakuti akizula ni chitima. Akinjila muchipinda ichinji mumo akalililaghamo.
31Po akasukusula kumaso nukufumila kuzi, akijimbilizya umwakuti nayumo umuntu atakazimanye ukuti ichitima chimulemite akati, “Mungiza ni chakulya.”
32Bakamupa ichakulya pamwene, na bope pabene, sona bope aba Ijiputi babo bakalyanga nawe pabene, pachifukwa ichakuti aba Ijiputi batakaba bakuti bangalya naba Hebeli, pakuti chikaba chintu chamwiko. 33Po u Yosefu akabikazya abawamwabo pantazi papache, ukuyana ni nyiho zyabo, ukwandila usongo mupaka nukufika ku munandi nkani, po bakaswigha nkani. 34U Yosefu akabalamula abambombo bache ukuti bamusendele umuntu wesi ichakulya pitebulo lyache, loli ichakulya icha Benjamini chikaba ka fayivi ubukulu ukuchila abamwabo. Po bakalya nukung'wela poka nu Yosefu umwakuhoboka nkani nawe.
Currently Selected:
Ubwandilo 43: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
Ubwandilo 43
43
Abawamwabo banyokela ku Ijiputi nu Benjamini
1Izala yikendelela pakukula nkani muchisu icha Kenani. 2Bo abamunyumba iya Yakobo bennya ivyakulya vivyo bakafuma navyo kuchisu icha Ijiputi vyamala, u Yakobo akababuzya abana bache akati, “Bukagha pakughula ivyinji panandi.”
3Loli u Yuda akamwamula akati, “Umulaghili uwa chisu chila akatusoka nkani ukuti atakwiza pakutwitikizya ukufika pamaso papache nanti tutakubuka nu muzuna witu. 4Nanti ukwitikizya pakututuma nu muzuna witu, tukwiza pakubuka nukukughulila ivyakulya. 5Loli nanti utakututuma poka nawe naswe tutakubukako, pachifukwa ichakuti umuntu yula akatubuzya akati tutakwiza pakufika pamaso papache nanti tutakubuka nu muzuna witu.”
6U Yakobo akalalusya akati, “Nkimba choni chicho mukanyonjelezya intamyo pakumubuzya umuntu yula ukuti muli nu wamwinyu uyunji?”
7Bakamwamula bakati, “Umuntu yula akatulalusya nkani nizya twebenecho sona na bakamu bitu ukuti, ‘Nkimba ughuso achili mumi? Nkimba muli nu wamwinyu uyunji?’ Po tukamula ukuyana na malalusyo ghache. Po ngali tukazimanya bulibuli ukuti angatulalusya ukuti akwiza pakutubuzya ukuti tubuke poka nu muzuna witu.”
8U Yuda akamubuzya uwise u Yakobo akati, “Umutume umulumendo uyu poka naswe, po tukwiza pakunyamuka. Pakubomba bunubu twebosi, awe, na bana bitu poka naswe tutakwiza pakufwa nizala. 9Ane nkwiza pakuba chikole icha bumi ubwa Benjamini. Nanti ntakunyokela nawe mumi, po inongwa yosi yibanje pamutu papane bwila na bwila. 10Nanti tutakabagha ngali twanyokezannya kabili kosi.”
11Po uwise u Yakobo akababuzya akati, “Nanti zingaba bunubu, mubombe ichi: Mumusendele umuntu yula ivikomwa ivyiza nkani ivya muchisu chitu ichi mumasaka ghinyu pakuba chabupi: Amafuta aghakupakazya nu buchi panandi, amafuta aghakununkila aghakulekanalekana nu mila ni mbalala, sona ni seke izya muposya. 12Musende indalama izyakukwana kabili pachifukwa ichakuti mubaghiye pakunyosya indalama zizyo bakabika pamwanya pamasaka ghinyu. Naloli bakapuvya bulo. 13Mumusende nu muzuna winyu, po munyamuke pakubuka sona ku muntu yula. 14U Chala Uwamaka Ghosi abapelele ichisa pamaso pa muntu yula, umwakuti abitikizye pakwiza nu Benjamini poka nu Simiyoni. Nanti chisimbiwe ukuti abana bane imbataghe bunubu, awe, chibombiwanje.”
15Po abantu bala bakasenda ivyabupi sona ni ndalama izyakukwana poka nu Benjamini, po bakanyamuka pakubuka ku Ijiputi. Kulakula bakabuka pamaso pa Yosefu. 16Bo u Yosefu amwennya u Benjamini ali poka nabo, akamubuzya usongo uwa bambombo wache akati, “Bukagha na bantu banaba kunyumba yane. Ughoghe inyama nukupiya akiza nkani, pachifukwa ichakuti abantu banaba bakwiza pakulya nane ichakulya icha pamusanya.”
17Uwambombo yula akabomba vivyo u Yosefu akamubuzya, akabuka na bawamwabo aba Yosefu kunyumba yache. 18Bakanyila nkani pachifukwa bakabuka nabo kunyumba iya Yosefu po bakati, “Akutwinjizya munyumba pachifukwa icha ndalama zizyo tukazyagha mumasaka ghitu pakwanda pala. Akulonda alwaghilepo ulusako ulwakutulemela nukutupela pakuba twe bazya bache poka ni mpunda zyitu.”
19Po bakabuka kwa songo uwa bambombo aba Yosefu munyumba yila nukunena nawe pamulyango, 20bakamubuzya bakati, “Wee mwene wane, tukizapo pabwandilo pakughula ichakulya. 21Bo twafika pabuzilo ubwakughonapo tukasatula amasaka ghitu, wesi akazyagha indalama zyache zyosi mwisaka lyache; po twiza nazyo sona. 22Po twiza ni zyamwabo ukuti tughulile, tutakamumanya nayuyo akatubikila indalama zyitu mumasaka.”
23Akamula akati, “Mufwase bulo, sona mutakanyilaye. U Chala winyu sona u Chala uwa ghuso weyuyo akabika indalama mumasaka ghinyu; nkapokela indalama zyinyu.” Po akabizila nu Simiyoni.
24Sona bo umuntu yula abinjizya abantu munyumba iya Yosefu po akabapa amizi ukuti basukusule munyayo zyabo. Bakazipa impunda zyabo ivyakulya. 25Bakamuyanizizya u Yosefu ivyabupi ukuti bamupe pamusanya, pachifukwa ichakuti bakivwa ukuti akwiza pakulya nabo ichakulya pamusanya kulakula.
26Bo u Yosefu afika munyumba bakiza ni vyabupi munyumba vivyo bakaba navyo, po bakafughamila. 27Akabalamukizya nukubalalusya ukuti, “Ughuso ali akiza, umuntu umughosi? Nkimba achili mumi?”
28Bakamwamula bakati, “Uwambombo wako utata witu ali akiza, sona achili mumi.” Bakinama nukumuchindika. 29Po akatalankannya nukumwennya uwamwabo u Benjamini, umwana uwa nyina nukulalusya ukuti, “Nkimba uyu weyuyo muzuna winyu umunandi nkani, yuyo mukambuzya? Mwana wane, u Chala abanje ni chisa papako!” 30U Yosefu akepapo umwakusita kumanyikwa akiza pakuti akizula ni chitima. Akinjila muchipinda ichinji mumo akalililaghamo.
31Po akasukusula kumaso nukufumila kuzi, akijimbilizya umwakuti nayumo umuntu atakazimanye ukuti ichitima chimulemite akati, “Mungiza ni chakulya.”
32Bakamupa ichakulya pamwene, na bope pabene, sona bope aba Ijiputi babo bakalyanga nawe pabene, pachifukwa ichakuti aba Ijiputi batakaba bakuti bangalya naba Hebeli, pakuti chikaba chintu chamwiko. 33Po u Yosefu akabikazya abawamwabo pantazi papache, ukuyana ni nyiho zyabo, ukwandila usongo mupaka nukufika ku munandi nkani, po bakaswigha nkani. 34U Yosefu akabalamula abambombo bache ukuti bamusendele umuntu wesi ichakulya pitebulo lyache, loli ichakulya icha Benjamini chikaba ka fayivi ubukulu ukuchila abamwabo. Po bakalya nukung'wela poka nu Yosefu umwakuhoboka nkani nawe.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.