Ukufuma 37

Ukupanga Ibokosi ilya Lufingo

(Ukf. 25.10-22)

1U Bezaleli akapanga Ibokosi ilya Lufingo ilya matabwa agha mungwina. Mubutali likaba amasentimita 110, mububaba likaba amasentimita 66, sona mumwanya likaba amasentimita 66. 2Akalipaka nu golide umwenecho, mukasi na kuzi. Akalilaba nu muzele uwa golide umwakuzyungulila. 3Akalipangila impete folo izya golide izyakunyamulila, nukuzipinyilila kuvinama vyache folo, impete zibili kulubazu loka, sona zibili kulubazu ulunji. 4Akapanga amakwi mabili aghakunyamulila agha mungwina, nukughapaka nu golide. 5Po akinjizya amakwi mabili ghala mumpete zizyo zili kumbazu zyosi zibili izya bokosi, ukuti zibanje zyakunyamulila. 6Akapanga ichikupikizyo icha golide umwenecho, mubutali chikaba amasentimita 110, sona mububaba chikaba amasentimita 66. 7Akasyana abakelubi babili aba golide kumbazu zyosi zibili izya chikupikizyo chila. 8Akapanga ukelubi weka kulubazu loka, sona uyunji kulubazu ulwamwabo ulwa chikupikizyo chila. Akabamamatizya abakelubi bala kuchikupikizyo. 9Abakelubi bala bakakuzulila mumwanya ivipapande vyabo, nukuchikupikila ichikupikizyo chila. Abakelubi bala bakenannya, bo ivyeni vyabo vyenizye ku chikupikizyo.

Ukukomela itebulo

(Ukf. 25.23-30)

10Akapanga itebulo ilya matabwa agha mungwina. Mubutali likaba amasentimita 88, mububaba likaba amasentimita 44, sona mumwanya likaba amasentimita 66. 11Akalipaka nu golide umwenecho nukulilabannya nu muzele uwa golide umwakuzyungulila. 12Akapanga sona ifulemu ipapate, mububaba likaba amasentimita eyiti, nukulilabannya nu muzele uwa golide umwakuzyungulila. 13Akapanga impete folo izya golide, nukuzipinyilila ku nkuto folo kuvinama ivya tebulo. 14Impete zila zikaba papipi nu tumatabwa utupapate tula ukuti tuleme amakwi aghakunyamulila itebulo. 15Akapanga amakwi agha matabwa agha mungwina, po ghakapakiwa nu golide ukuti ghabanje ghakunyamulila itebulo. 16Akapanga imbale ni mbako ni sonta sona na mabeseni aghakubikila ichakwiyipa ichakung'wela. Vyosi vinivi vikaba vya golide umwenecho.

Nizya chakubikapo inyale

(Ukf. 25.31-40)

17Akapanga ichakubikapo inyale icha golide umwenecho. Mubwikalilo bwache na mubulemelo bwache vikaba vya golide uwakusyana bulo. Ubwezya bwache ubwakulabannya, na mani ghache, sona na mani ghache vibanje vyakulemenkana. 18Isamba sikisi zikadobosannya mulubazu ulwa chakubikapo inyale. Isamba zitatu zibanje kulubazu loka, sona zitatu kulubazu ulunji. 19Patusamba tosi pakaba imbako zitatu zizyo zikaba ngati bwezya ubwa mposya, amani nu bwezya bwache vikaba pakasamba koka. Imbako zitatu zikaba patusamba utunji, isamba sikisi zyosi zila zikadobosannya pachakubikapo inyale. 20Pa chakubikapo inyale pakabapo imbako folo izyakuyana bulo nu bwezya ubwa mposya sona na mani nu bwezya bwache. 21Ubwezya boka bukaba muntende musamba zibili izyakwanda zizyo zikadobosannya ichakubikapo inyale. Ubwezya ubwabubili bukaba muntende musamba zibili izyabubili, ubwabutatu bukaba muntende musamba zibili izyabutatu. 22Ubwezya poka ni samba zila vikaba vyakulemenkana ni chakubikapo inyale, ichakusyaniwa nu golide umwenecho. 23Akapanga inyale seveni nu tulemelo, ni vyakuyolela itoyi ivya golide umwenecho. 24Ichakubikapo inyale ni vibombelo vyosi akavipanga nu golide umwenecho uwakung'wama amakilogalamu 34.

Ukupanga ichighemo ichakufukizizya utwakununkila

(Ukf. 30.1-5)

25Akapanga ichighemo ichakochelapo ivyakununkila icha matabwa agha mungwina. Chikayana bulo, mubutali chikaba amasentimita 45, mububaba mope chikaba amasentimita 45, po sona mumwanya chikaba amasentimita 90. Impembe zyache zikamamatilana poka ni chighemo. 26Akachipaka nu golide umwenecho pamwanya ni mbazu zyosi folo sona ni mpembe zyache, akalabannya akamuzele aka golide umwakuzyungulila. 27Akapanga impete zibili izya golide izyakunyamulila nukuzimamatizya kuntende kuchighemo kumbazu zibili umwakuti zileme amakwi aghakunyamulila. 28Akapanga amakwi mabili aghakunyamulila agha mungwina nukughapaka nu golide.

Ukwenga amafuta aghakupakazya nutwakununkila

(Ukf. 30.22-38)

29 # Ukf. 30.22-38 Akenga sona amafuta amapaghuliwa aghakupakazya poka nutwakununkila akiza ngati mumo akubombela ufundi pakupanga ivyakununkila.

Currently Selected:

Ukufuma 37: LMB2024

Highlight

Copy