Ukufuma 3
3
U Chala akumwitizya u Mozesi
1U Mozesi akadimagha ing'ozi ni mbuzi izya wisevyala umuputi u Yetulo uwamu Midiyani. Po isiku limo akabuka nu mudimo pakudumusannya munkolongo nukufika pighamba ilya Sinayi, ighamba ilya Chala. 2#Imbo. 7.30-34Kulakula uwantumi uwa Mwene akamubonekela muchivwati ichakwaka umoto. U Mozesi akachennya ichivwati chila chikwaka, loli chitakalungulilagha. 3Akanena mwene akati, “Nkimba zili bulibuli ukuti ichivwati ichi chitakalungulilagha? Leka impalamile ukuti nennye akiza.”
4Bo u Mwene amwennya u Mozesi ukuti akupalamila, akamwitizya muchivwati chila akati, “Wee Mozesi! Mozesi!”
U Mozesi akamula akati, “Indi pano.”
5U Chala akati, “Utakapalamilaye, vula inkwato zyako, pakuti ubuzilo bubo wimitepo buzelu.” 6Po akati, “Ane ne Chala uwa banyenya bako, u Chala uwa Abulahamu nu Chala uwa Yisaki sona nu Chala uwa Yakobo.” U Mozesi akavwinka icheni chache, pachifukwa ichakuti akanyilagha pakumwennya u Chala.
7Po u Mwene akati, “Naghennya amayimba agha bantu bane babo bali mu Ijiputi. Nivwa amilumbusyo ghabo nizya bantu babo bakubayivya. Napalamasiwa nkani mumoyo namumo bakuyimbila. 8Po nika pakubapoka munyobe izya bantu aba mu Ijiputi nukubefyamo muchisu chilachila nukubinjizya muchisu ichikulu nkani icha mboto mumo mukwikala aba Kenani naba Hiti naba Amoli naba Pelezi naba Hivi sona naba Yebusi. 9Naloli nivwa inkuta iya ba Izilayeli, sona nkughennya amayimba ghagho aba Ijiputi bakubayivya nagho. 10Losi ulu nkukutuma kwa Falabo u mwene wamu Ijiputi, umwakuti ubefye abantu bane aba Izilayeli muchisu chila.”
11Loli u Mozesi akamulalusya u Chala akati, “Nkimba ane ne wenu ukuti imbuke pamaso pa Falabo pakubefyamo aba Izilayeli mu Ijiputi?”
12Po u Chala akamwamula akati, “Nkwiza pakuba nawe. Ichi cho chimanyilo ichakuti naloli nene nakutuma. Bo wabefyamo abantu bane mu Ijiputi, mukwiza pakunyiputa pighamba ili.”
13U Mozesi akamula akati, “Buli nanti nabuka pakasi paba Izilayeli nukubabuzya ukuti u Chala uwa banyenya binyu antuma, po nanti bakundalusya ukuti, ‘Nkimba itabwa lyache wewenu?’ Imbabuzye ichoni?”
14 #
Ubw. 1.4, 8 U Chala akamubuzya u Mozesi akati, “Itabwa lyane ne ANE NENE. Izi zyo zizyo ubabuzye aba Izilayeli: ‘ANE NENE antuma kukwinyu.’ ”
15U Chala akamubuzya sona u Mozesi akati, “Ubabuzye aba Izilayeli uti, ‘U Mwene, u Chala uwa banyenya binyu nu Chala uwa Abulahamu nu Chala uwa Yisaki sona nu Chala uwa Yakobo antuma pakasi papinyu.’ Ili lyo litabwa lyane bwila na bwila, sona inkulilo zyosi izya muntazi zikwiza pakulikumbukagha.
16“Bukagha ubabungannye poka abalongozi aba Izilayeli nukubabuzya ukuti, ‘Ane ne Mwene, u Chala uwa Abulahamu nu Chala uwa Yisaki, sona nu Chala uwa Yakobo akambonekela.’ Ubabuzye ukuti, ‘Nazyennya zizyo aba Ijiputi bakubabombela. 17Nadumula ukuti nkwiza pakubefyamo mu Ijiputi muchisu icha mayimba nukubuka nabo kuchisu icha mboto, mumo aba Kenani naba Hiti naba Amoli naba Pelezi naba Hivi sona naba Yebusi bakwikalamo.’
18“Abalongozi aba ba Izilayeli bakwiza pakukuteghelezya. Po awe na balongozi mubuke kwa mwene uwamu Ijiputi mumubuzye ukuti, ‘U Mwene u Chala uwa ba Hebeli ivumbula mwene kukwitu. Losi ulu tukukulaba ukuti utwitikizye twende ubulendo ubwa masiku matatu munkolongo pakubika ivyakwiyipa kwa Mwene u Chala witu.’ 19Inzimenye ukuti u mwene uwamu Ijiputi yula atakwiza pakubitikizya ukuti mubukaye pene papo namufyenga na maka ghane. 20Po nkwiza pakubakoma na maka ghane, sona nkwiza pakubafunda aba Ijiputi ni viswigho vivyo nkwiza pakubabombela. Pisinda pache bakwiza pakubalekezya ukuti mubukaye.
21 #
Ukf. 12.35-36
“Nkwiza pakubapela aba Ijiputi ukuti babachindikaye abantu bane, umwakuti bo bakubuka, batakabuke nyobe zyene. 22Umukolo wesi umu Izilayeli abukaye kumupalamani wache umu Ijiputi, sona ku mukolo wesi yuyo akwikala munyumba yache. Akwiza pakulaba ivyakwibonesekezya akiza ivya siliva nu golide. Aba Izilayeli bakwiza pakubavwika ivintu vinivi abana babo abalumendo na balindu, po bunubu mukwiza pakufyula ubukabi bosi ubwa ba Ijiputi.”
Currently Selected:
Ukufuma 3: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
