Ukufuma 24
24
Ulufingo lwasimikiziwa
1U Mwene akamubuzya u Mozesi akati, “Kwela pighamba pano, awe nu Aloni nu Nadabu nu Abihu, sona na balongozi 70 aba ba Izilayeli. Po munyiputaye bo muchili muli pabutalipo. 2Loli u Mozesi mwene weyuyo apalamile, abantu abanji bosi batakapalamile, sona batakakwele pighamba pano poka nu Mozesi.”
3U Mozesi akababuzya abantu amazyu na malamulo ghosi ghagho u Mwene akamubuzya, po bosi bakamulila poka bakati, “Tukwiza pakuzibomba zyosi zizyo u Mwene anena.” 4U Mozesi akasimba amazyu ghosi ghagho u Mwene akanena.
Pandabindabi nkani akazenga ichighemo muntende mwighamba nukusimika impanda izya mabwe 12 pakwimilila inko 12 izya ba Izilayeli. 5Po akabatuma abalumendo bamo pakubika ichakwiyipa ichakocha kwa Mwene, sona bakabika inkambaku ukuti chibanje chakwiyipa ichabupoka. 6U Mozesi akasenda ibanda pakasi na pakasi nukulipungulila mumbale, po ilyakusyala akalinyafila pachighemo. 7Pisinda pache akasenda ibuku ilya lufingo nukubabelengela abantu. Po abantu bala bakamula bakati, “Tukwiza pakwivwila nukuzibomba zyosi zizyo u Mwene alamula.”
8 #
Mat. 26.28; Mlko. 14.24; Luk. 22.20; 1 Kol. 11.25; Heb. 9.19-20, 10.29 Po Mozesi akasenda ibanda nukubanyafila abantu nukuti, “Ili lyo libanda ilya lufingo lulo u Mwene akafingana namwe ukuyana na malamulo ghosi ghanagha.”
9U Mozesi nu Aloni nu Nadabu nu Abihu poka na balongozi 70 aba ba Izilayeli bakakwela pighamba 10nukumwennya u Chala uwa ba Izilayeli. Pasi panyayo zyache pakaba ichintu chimo ichakuboneka ngati musebo uwa mabwe agha safile, sona ichabuluu ngati ko kumwanya. 11Loli u Chala atakababombela nachimochimo ichintu ichibibi abalongozi aba ba Izilayeli. Bakamwennya u Chala, po bakalya nukung'wela.
U Mozesi pighamba ilya Sinayi
12U Mwene akamubuzya u Mozesi akati, “Kwela wize pighamba pano nukwikala kunuku. Nkwiza pakukupa amabwe amapapate mabili papo nabasimbila abantu amalamulo.”
13U Mozesi nu mwavwilizi wache u Yoshwa, bakabuka kwighamba, po u Mozesi akakwela pighamba ilya Chala. 14U Mozesi akababuzya abalongozi bala akati, “Mutulindililaye pano mupaka tunyokeko. U Aloni nu Huli bali poka namwe, po nanti umuntu yumo ali ninongwa angabuka kukwabo.”
15Bo u Mozesi akwela pighamba, ibingu likalikupikila, 16po ubuchindamu ubwa Mwene bukiza pighamba ilya Sinayi. Ibingu likakupikila ighamba lila amasiku sikisi, pisiku ilyaseveni U Mwene akamwitizya u Mozesi mwibingu. 17Aba Izilayeli bakabwennya ubuchindamu ubwa Mwene ngati moto uwakwaka pamwanya pighamba. 18#Ukk. 9.9Po u Mozesi akinjila mwibingu mula nukukwela mupaka pamwanya pighamba nukwikala palapala amasiku 40 umusanya nu busiku.
Currently Selected:
Ukufuma 24: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
