Ukufuma 21

Nizya kikalile na bazya

(Ukk. 15.12-18)

1“Izi zyo ndaghilo zizyo ubaghiye pakubapa aba Izilayeli:

2 # Lev. 25.39-46 “Nanti wamughula umuzya umu Hebeli, akubombelaye amaka sikisi. Loli umwabule mumwaka uwaseveni, mutakalipilepo nachimochimo ichintu. 3Nanti akaba mukenja bo ukumughula, atakabwelaye nu muchi. Loli nanti akiza nu muchi, abwelaye nawe. 4Nanti u mwene wache akamupa umukolo nukuti akapapa nawe abana abalumendo pamo abalindu, umukolo yula poka na bana bakwiza pakuba bamwene wache, loli umwanavuli akwiza pakubwela mwene.

5“Loli nanti umuzya yula akwitika pabuzelu akuti, ‘Imughanite u mwene nu muchi wane, sona na bana bane, po intakulonda pakubwela,’ 6Po u mwene wache amusendele pantazi pa balongi.#21.6 pantazi pa balongi: Pamo pantazi pa Chala. Kulakula ize nawe palwiyi pamo mulubazu ulwa mulyango nukumudobola ikutu ni chidobolelo. Po akwiza pakuba muzya wache mubumi bwache bosi.

7“Nanti umuntu akumughulizya umwana wache umulindu pakuba muzya, umwana yula atabaghiye pakuba musatuke ukuyana namumo abazya abanavuli bakubela. 8Nanti atakumuhobosya umuntu yuyo amughula pakuba muchi wache, kokuti angamwitikizya ukuti bamutabule. U mwene wache yula ate nu bulaghili nabumobumo uwakumughulizya ku bayeni, pachifukwa ichakuti atakaba musubiliwa. 9Nanti umuntu yula akumughula umuzya umulindu pakuba muchi uwa mwana wache umulumendo, abaghiye amusende umuzya yula ngati po mwana wache umulindu. 10Nanti umuntu akusenda umukolo uyunji, abaghiye endelele pakumupa umuchi wache usongo ivyakulya na menda, sona atakaluvye pakughonamo munyumba yache ukuyana namumo akubombela bwila. 11Nanti umwanavuli yula atakumupa umukolo ivintu vitatu vinivi, abaghiye pakumwabula umukolo yula, ukusita ukulipila indalama.

Nizya ndaghilo palombwa

12 # Lev. 24.17 “Umuntu wesi yuyo akumukoma umuntu nukumughogha, naloli wepe aghoghiwanje. 13#Ukb. 35.10-34; Ukk. 19.1-13; Yos. 20.1-9Loli nanti ghukaba mukosi bulo, sona nukuti atinong'oneyeko pakumughogha umuntu yula, angachimbilila ku buzilo ubwakuponelako. 14Loli nanti umuntu abatika pakumughogha umuntu uyunji madinko ghene, wepe aghoghiwanje napapo angachimbilila ku chighemo chane ukuti apone.

15“Umuntu wesi yuyo akumukoma uwise pamo unyina, aghoghiwanje.

16 # Ukk. 24.7 “Umuntu wesi yuyo akumwiba umuntu uyunji, manyi akumughulizya, manyi akumusunga bulo ngati muzya, aghoghiwanje.

17 # Lev. 20.9; Mat. 15.4; Mlko. 7.10 “Umuntu wesi yuyo akumutuka uwise pamo unyina, aghoghiwanje.

18“Nanti abantu babili bakulwa, po weka amutiza uyunji nibwe pamo akumukoma ninkumi, ukusita ukumughogha, loli umuntu yula akubina bulo nukulambalala muchitala, 19nanti umuntu yula anyamuka nukwanda pakwenda, napapo akwendela indisa, umuntu yuyo akamukoma atabaghiye pakufundiwa, loli amulipile bulo pachifukwa icha kabalilo kako akatagha bo alambalaye, sona amusungilile mupaka apole.

20“Nanti umuntu akumukoma ni ndisa umuzya wache umwanavuli, pamo umukolo, po umuzya afwa, umuntu yula afundiwanje, 21loli nanti umuzya yula atafuye bo pachilapo isiku lyoka pamo mabili, umuntu yula atabaghiye pakufundiwa, pakuti umuzya yula bo bukabi bwache.

22“Nanti abantu babili bakulwa nukumuvulazya umukolo uwa lwanda, umwakuti ulwanda lula lwepa, loli atafuye, umuntu yuyo akamuvulazya alipile ichilipo chicho umulume amupimila, sona ukuyana namumo abalongi bapimila. 23Loli nanti umukolo yula avulaziwa nkani, ukufundiwa kwache kukwiza pakuba ulu: Ubumi bulipile ubumi 24#Lev. 24.19-20; Ukk. 19.21; Mat. 5.38ilyiso lilipile ilyiso, ilyino lilipile ilyino, inyobe yilipile inyobe, sona ulwayo lulipile ulyayo, 25ukocha kutanizyepo ukocha, ichilonda chitanizyepo ichilonda, ukuvimba ukwa ndisa kutanizyepo ukuvimba.

26“Nanti umuntu akumukoma umuzya umwanavuli pamo umuzya umukolo pilyiso nukulituzula, abaghiye pakumwabula umuzya yula pakuba chilipo icha lyiso lyache. 27Nanti amukumpula ilyino, pakumwabula umuzya yula pakuba chilipo icha lyino lyache.

Nizya ndaghilo pa benecho aba vitekwa

28“Nanti ing'ombe yamughogha umwanavuli pamo umukolo pakumupula ni mpembe, ing'ombe yila yighoghiwanje pakusumbiwa na mabwe, sona mutakalye inyama yache. Loli umwenecho uwa ng'ombe yila atakwiza pakuba ninongwa. 29Nanti ing'ombe yila yizubiye pakupula abantu, sona nanti umwenecho bamusokitepo, loli atakayipinyagha, po nanti yamughogha umwanavuli pamo umukolo, ing'ombe yila yighoghiwanje, sona nu mwenecho wepe aghoghiwanje. 30Loli nanti bakumupimila ichilipo, abaghiye atabule ubumi bwache pakulipila ichilipo chosi chicho bamupimila. 31Nanti ing'ombe yila yamughogha umulumendo pamo umulindu pakumupula ni mpembe, ululaghilo lwache lubanje bulo lo lunulu. 32Nanti ing'ombe yila yamupula umuzya umwanavuli pamo umukolo, umwenecho abaghiye amulipile umwenecho uwa muzya yula isalabazya izya siliva 30, po ing'ombe yila yighoghiwanje pakusumbiwa na mabwe.

33“Nanti umuntu efyapo ichikupikizyo pachiziba pamo akumba ichiziba nukuchileka bwazi, po ing'ombe pamo impunda yawilamo, 34umwenecho uwa chiziba abaghiye amulipile umwenecho uwa chitekwa chila, loli asende ichitekwa ichifwe chila pakuba chache.

35“Nanti ing'ombe iya muntu yaghogha ing'ombe iya muntu uyunji, abantu babili babaghiye baghulizye ing'ombe inyumi nukugabana indalama. Babaghiye bagabane pakasi na pakasi ing'ombe ifwe yila. 36Nanti chamanyikwa ukuti ing'ombe yila yikizubila pakupula abantu, loli umwenecho atakayipinyagha, umwenecho yula abaghiye atanizyepo ing'ombe inyumi, sona abaghiye asende ing'ombe ifwe yila pakuba yache.

Currently Selected:

Ukufuma 21: LMB2024

Highlight

Copy