Ukufuma 19
19
Aba Izilayeli pighamba ilya Sinayi
1Pisiku ilyakwanda ilya mwezi uwabutatu bo aba Izilayeli bepamo mu Ijiputi, bakafika munkolongo iya Sinayi. 2Bo bafuma pa Lefidimu, bakafika munkolongo iya Sinayi. Kulakula aba Izilayeli bakazengako ivisakasa vyabo muntende mwighamba ilya Sinayi.
3U Mozesi akakwela pighamba pakukomana nu Chala. Po u Mwene akamwitizya mwighamba mulamula akati, “Ubabuzye abaluko ulwa Yakobo, sona naba Izilayeli bosi uti: 4Amwe mwebene muvyenizye vivyo nkababombela aba Ijiputi, sona namumo nkabanyamulila nukwiza namwe kukwane ngati mumo izwanga likunyamulila abana bache pavipapande. 5#Ukk. 4.20, 7.6, 14.2, 26.18; Tit. 2.14; 1 Pit. 2.9Nanti ilelo mukunyivwila nukusunga ulufingo lwane, kokuti mukwiza pakuba mwe bantu abane na bane pakasi pa inko zyosi. Pakuti ichisu chosi ichapasi chane. 6#Ubv. 1.6, 5.10Amwe mwe luko ulupaghuliwa, sona mukwiza pakuba mwe baputi. Ubabuzye amazyu ghanagha aba Izilayeli.”
7Po u Mozesi akika pighamba pala nukubitizya abalongozi aba Izilayeli. Akababuzya amazyu ghosi ghagho u Mwene akamulamula. 8Po abantu bala bakamulila poka bakati, “Tukwiza pakubomba vyosi vivyo u Mwene anena.” Pisinda pache u Mozesi akamubuzya u Mwene amazyu ghagho abantu bakamula.
9U Mwene akamubuzya u Mozesi akati, “Nkwiza pakukwizila mwibingu ifitu, umwakuti abantu banyivwe, bo nkunena nawe, sona nukuti basubile akabalilo kosi.” U Mozesi akamubuzya u Mwene amazyu ghagho abantu bakamula.
10U Mwene akamulamula u Mozesi akati, “Bukagha ku bantu ukuti ilelo ni ndabi biswefye nukuchapa amenda ghabo. 11Pisiku ilyabutatu biyannye pakuti pisiku lilalila ane ne Mwene nkwiza pakwikila pighamba ilya Sinayi, bo abantu bosi bakunyennya. 12#Heb. 12.18-20Gaba impaka ukuzyungulila ighamba lyosi nukubabuzya abantu ukuti, ‘Muchebaye, mutakakwelaye pighamba pamo pakupalamila bulo kupipi. Umuntu wesi yuyo akulipalamasya akwiza pakughoghiwa. 13Naloli akwiza pakusumbiwa na mabwe pamo ukulasiwa nu tulasilo. Po nayumo umuntu atakaghupalamasye umuvimba uwa muntu yuyo aghoghiwa. Manyi muntu, manyi chinyamana chicho chapalamasya ighamba lila, chighoghiwanje. Loli nanti ipati lyalila, po abantu bangakwela pighamba.’ ”
14U Mozesi akika pighamba pala nukubuka ku bantu pakubaswefya, sona abantu bakachapa amenda ghabo. 15U Mozesi akabalamula abantu bala akati, “Pisiku ilyabutatu mwiyannye mwebene. Mukabalilo kanaka atakabepo nayumo umuntu uwakughona nu mukolo.”
16 #
Ubv. 4.5
Pandabindabi pisiku ilyabutatu kukaba ukupaya na kamesya. Ibingu ifitu likaboneka pighamba, sona kukivwika ukulila ukukulu ukwa lipati. Abantu bosi muvisakasa mula bakatetemagha pachifukwa icha bogha. 17U Mozesi akabalongolela abantu ukwepamo muvisakasa nukubuka nabo pakukomana nu Chala. Bakimilila muntende mwighamba. 18Ighamba lyosi ilya Sinayi likakupikiliwa ni lyosi, pachifukwa ichakuti u Mwene akikila pighamba pala mumoto. Ilyosi likakwelagha kumwanya ngati lya mumuvuno, sona abantu bosi bakatetemagha pachifukwa icha bogha. 19Sona ipati likendelela pakulila. Bo u Mozesi akunena, u Chala akamwamula nukupaya. 20U Mwene akikila pighamba ilya Sinayi nukumwitizya u Mozesi ukuti akwele pamwanya pighamba. Po u Mozesi akakwela, 21u Mwene akamubuzya akati, “Ika ubasoke abantu ukuti batakachile impaka nukunyennya ane ne Mwene, nanti bakubomba bunubu abinji bakwiza pakufwa. 22Na baputi bulo babo bakumpalamila biswefye bene, lumo u Mwene akwiza pakubafunda.”
23U Mozesi akamubuzya u Mwene akati, “Abantu batangakwela pighamba ilya Sinayi, pachifukwa ichakuti awe wemwene ukatusoka ukuti, ‘Gaba impaka ukuzyungulila ighamba nukulipaghula pakuba lizelu.’ ”
24U Mwene akamula akati, “Ika, kamusende u Aloni, loli abaputi na bantu batakachile impaka pakwiza kukwane, lumo ningabafunda.”
25Po u Mozesi akika nukubabuzya abantu amazyu ghagho u Mwene akanena.
Currently Selected:
Ukufuma 19: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
