Ukufuma 16
16
Umana ni nkwale
1Aba Izilayeli bosi bakanda ubulendo bwabo pa Elimu nukufika munkolongo iya Sini, pakasi pa Elimu nu Sinayi pisiku ilya 15 ilya mwezi uwabubili, bo bepamo muchisu icha Ijiputi. 2Munkolongo mula, ichilundilo chosi chikilumbusya kwa Mozesi nu Aloni 3nukuti, “Chikaba chizapo ngali u Mwene akatughoghelagha muchisu icha Ijiputi. Kulakula inyama yikalindagha musonta, sona tukalyanga ivyakulya vyosi vivyo tukalondagha. Loli amwe mwiza naswe munkolongo muno ukuti mutughoghe twebosi nizala.”
4 #
Yoh. 6.31
Po u Mwene akamubuzya u Mozesi akati, “Nkwiza pakubawisizya ichakulya ichakufuma kumwanya. Abantu babaghiye pakufuma kuzi isiku ni siku nukuseba ivyakulya ivyakubayana isiku lilalila lyene, umwakuti imbayele nanti bakwiza pakukonka amalamulo ghane. 5Pisiku ilyasikisi nanti bakubuka pakuseba, basebe nukupiya ivyakulya ivyakubayana amasiku mabili.”
6Po u Mozesi nu Aloni bakababuzya aba Izilayeli bosi bakati, “Pachamabwila mukwiza pakumanya ukuti akaba we Mwene yuyo akabefyamo mu Ijiputi. 7Pandabindabi mukwiza pakwennya ubuchindamu ubwa Mwene, pachifukwa ichakuti ivwa amilumbusyo ghinyu. Nkimba aswe twe bawenu ukuti mwilumbusye kukwitu?” 8U Mozesi akati, “We Mwene yuyo akwiza pakubapa inyama iyakuti mulye pachamabwila, sona nukubapa ivibama pandabindabi ichakuti mulye nukwikuta, pachifukwa ichakuti ivwa amilumbusyo ghinyu ghosi. Nkimba aswe twe bawenu? Mutakwilumbusya kukwitu, awe, loli kwa Mwene.”
9Po u Mozesi akamubuzya u Aloni ukuti ababuzye aba Izilayeli bosi bala ukuti, “Zagha pamaso pa Mwene pachifukwa ichakuti ivwa amilumbusyo ghinyu.”
10Bo u Aloni achili akunena naba Izilayeli, ichilundilo chosi chikaghalabukila kunkolongo nukubwennya ubuchindamu ubwa Mwene mwibingu.
11U Mwene akamubuzya u Mozesi akati, 12“Nivwa amilumbusyo agha ba Izilayeli. Ubabuzye ukuti, ‘Pachamabwila mukwiza pakulya inyama, sona pandabindabi mukwiza pakulya ivibama. Po mukwiza pakummanya ane ukuti ne Mwene u Chala winyu.’ ”
13Ichamabwila chilachila abazungwa bakawa nukubulukabuluka pasi posi na posi pavisakasa pala, sona pandabindabi inganda yikawa posi na posi pavisakasa pala. 14Bo inganda yapwa pasi posi na posi munkolongo mula, pakaboneka utuntu tumo utupapate utuswepu ngati we kabefu. 15#1 Kol. 10.3 Bo aba Izilayeli batwennya utuntu tula batakavimanya ukuti vikaba vyo vyoni, po bakalalusannya bakati, “Nkimba vyo vyoni vinivi?” Pakuti batakavimanya.
U Mozesi akababuzya akati, “Vinivi vyo vibama vivyo u Mwene abapiye amwe ukuti mulyanje. 16U Mwene alamula ukuti, ‘Umuntu wesi uwa amwe asebe uwakumuyana. Umuntu wesi izuzye amalita mabili agha mana muchisakasa chache.’ ”
17Aba Izilayeli bakabomba vivyo u Mozesi akabalingannya, bamo bakaseba umana umwinji nkani sona abanji bakaseba munandi bulo. 18#2 Kol. 8.15Bo bapima ni chipimilo icha malita mabili, abantu babo bakaseba umwinji nkani batakaseba umwakuchilapo, sona abantu babo bakaseba munandi, batakaseba panandi nkani. Umuntu wesi akaseba bulo uwakumuyana.
19U Mozesi akababuzya akati, “Umuntu wesi atakasungepo ivyakulya vimo mupaka indabi.”
20Loli abanji bakaghasula amazyu agha Mozesi, po bakasungako vimo mupaka indabi. Loli pandabindabi bakagha ukuti vikanda pakununka, sona vikaba ni somi. Po u Mozesi akabakalalila nkani.
21Indabindabi yosi umuntu wesi akasebagha ivyakulya ivyakumuyana, sona bo izuba lyocha vikasungulukagha. 22Pisiku ilyasikisi bakaseba ivibama ivyakubayana amasiku mabili, umuntu weka amalita folo. Abalongozi aba ba Izilayeli bala bakiza pakumubuzya u Mozesi nizya vinivi, 23#Ukf. 20.8-11nukuti, “U Mwene alamula ukuti: Indabi Lisiku Ilyakutuzya izelu ilya Mwene. Po piya ivyakulya vyosi vivyo mukulonda pakupiya, sona ocha vyosi vivyo mukulonda pakocha. Ubwika bosi mubusunge palubazu mupaka pandabindabi.”
24Abantu bala bakabusunga ubwika bula mupaka pandabindabi ukuyana namumo u Mozesi akabalamulila, po butakanunka pamo ukuwa isomi. 25U Mozesi akati, “Ichi cho chakulya chinyu icha ilelo, pakuti ilelo lyo Lisiku Ilyakutuzya ilya Mwene. Mutakwiza pakuvyaghako kuzi. 26Musebe ivyakulya vinivi amasiku sikisi, loli pisiku ilyaseveni, lyo Lisiku Ilyakutuzya, vitakwiza pakwaghiwako.”
27Pisiku ilyaseveni, abantu bamo bakabuka pakuseba ivyakulya, loli batakavyaghako. 28Po u Mwene akamulalusya u Mozesi akati, “Nkimba mukwiza pakukana kalinga pakughivwila amalamulo ni ndaghilo zyane? 29Mukumbuke ukuti ane ne Mwene imbapiye Isiku Ilyakutuzya. Ichi cho chifukwa pisiku ilyasikisi nkubapa ivyakulya ivyakubayana amasiku mabili. Umuntu wesi ikalaye panyumba pisiku Ilyakutuzya, atakabepo nayumoyumo ukufuma kuzi.” 30Po abantu bakatuzya pisiku ilyaseveni.
31 #
Ukb. 11.7-8
Aba Izilayeli bakachita ichakulya chila ukuti we mana.#16.31mana: Izyu ili likwivwika ngati ilya mu Chihebeli kokuti, Nkimba ichi cho choni? (Ennya mwivesi ilya 15). Umana yula akabonekagha ngati tumbeyu utuswepu utwa busambya, tukanonagha ngati tuvitumbuwa utwakuyaniziwa nu buchi. 32U Mozesi akati, “U Mwene atulamuye ukuti, ‘Mubasungileko abaluko lwinyu umana yumo, umwakuti bope bangachennya ichakulya chicho nkabapa amwe munkolongo, bo nabefya mu Ijiputi.’ ”
33 #
Heb. 9.4
U Mozesi akamubuzya u Aloni akati, “Senda isonta nukubikamo umana uwa kukwana amalita mabili. Uyibike pamaso pa Mwene ukuti yisungiwe nukubalanjizya abaluko lwinyu babo bakwiza muntazi.”
34Ukuyana namumo u Mwene akamulamulila u Mozesi, u Aloni akabika umana pamaso pa Bokosi ilya Lufingo ukuti asungiwe. 35#Yos. 5.12Aba Izilayeli bakalyanga umana amaka 40 mupaka bakafika muchisu icha Kenani, mumo bakikalana.
36Amalita mabili chikaba chipimilo chicho abantu bakabombezya mumasiku ghanagho.
Currently Selected:
Ukufuma 16: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
