Matiö 12
12
Wiili Jesu 'paa' juifëa ‑fʋflʋpasrɩa ‑gʋ
Marëkë 2.23-28; Lukë 6.1-5
1Juifëa ‑fʋflʋpasrɩ 'lɩ nɩ, Jesu ‑srörö ɩ ‑bleeeputu 'lɩ, ‑bɛ ‑gbëka 'blaa' 'ɔa 'wʋnyɛrɛnyüü nɩ, 'ünya 'sa ‑bleee#12.1 ‑bleee: Juifëa 'brea jijri; 'i ‑beere ‑kɔpʋ. Deteronɔɔmë 23.25. ‑bɛ 'ü ta. 2‑Maa Farisinyüü 'jäa' 'imɩ nɩ, 'ünya ‑gbala Jesu: «‑Jää ‑na 'wʋnyɛrɛnyüü nö wiili 'nyɩa' nʋnʋsa bä ‑fʋflʋpasrɩ 'lɩ!» 3'Iibäa' Jesu nɩ: «‑Gbëka 'bla käa' Daviidë nyra 'ɔa 'wʋnyɛrɛnyüü nɩ, wiili 'ü nʋa' 'anyɩ 'iin ‑täsä ‑a ‑täsä#12.3 1 Samiɛɛlë 21.6.? 4'Sɩrɩ 'ɔ paa' Nyɔsʋaanyuku ‑wälɩ, ‑bɛ 'ɔ jia' 'flɔɔlʋ 'ü 'saraa' Nyɔsʋaa 'nyrɩklɩ, ‑bɛ ima 'nyɩ ‑gbɔsapɛrɩnyüüa 'doo ‑a bä, nyɔɔ ‑moloo 'nyɩ ji 'ia dɛɛ ‑a; 'palɩ 'ɔɔ Daviidë nyra 'ɔa 'wʋnyɛrɛnyüü. 5‑Ale 'anyɩ Moisëa ‑Dɔ ‑a jre? ‑Gbɔsapɛrɩnyüülü ‑fɛɛɛrɛa' Nyɔsʋaanyuku kpaku ‑wälɩ 'jrʋpa ‑fʋflʋpasrɩ 'lɩ nɩ, ‑Dɔ 'ü 'pɩɛ 'saa ‑gälɩ? 6‑Maa, 'mɔɔ ‑gbala 'amɩ: dɛɛ bä ‑pɩ 'ɛ 'bʋawliklɩ 'ɛnya ‑si Nyɔsʋaanyuku kpaku 'wʋ! 7'Ama jre ɩ nyɔsʋaawiili bäa': ‹Nyatɛplɛ 'n 'bata, ‑mää ‑gbɔ 'sasakʋ 'nyɩ 'bataa#12.7 Osee 6.6.› ‑gba ɩ nɩ, 'a ‑nëmä ɩ nyüülü kʋa' ‑pɩ wii ‑a 'kplara. 8'Be Nyɔɔa 'Jʋ bä 'nɩmɩ ‑fʋflʋpasrɩa käkänyɔɔ.»
Nyɔɔlɔ kä klʋgba jäa'
Marëkë 3.1-6; Lukë 6.6-11
9Jesu sɔa' ‑plɩɩ nɩ, 'ɔnya pa 'üa 'sraaplanyuku ‑wälɩ. 10‑Jää 'ua ‑wälɩ nyɔɔ 'doo bä ɩ 'lɩ 'ɔa klʋgba jä, 'ünya 'bete Jesu 'ümä 'ɔɔn wii 'kplara, ‑maa: «Ana ‑dɔ 'nyie 'ümä nyɔɔ 'pʋɔ ‑fʋflʋpasrɩ 'lɩ?» 11Jesu ‑nëma: «Nyɔɔ 'plɛɛ bä 'ana ‑tɔrʋpɩɔ ɔ ‑nëmä 'ɔa ‑bablɛɛlɛ blöa' 'bütügba 'lɩ 'lɩba ‑fʋflʋpasrɩ 'lɩ le? 12Nyɔɔ ‑si ‑bablɛɛ 'wʋ, 'wʋ ‑glʋɩpʋ 'wʋ! 'Ia ‑gʋ, nyɔɔ 'mrɛɛ 'ɔ nʋ nyɔɔ 'mʋfagbi ‑gba ‑fʋflʋpasrɩ 'lɩ ana ‑dɔa 'mlɩ.» 13'Ɔnya ‑gbala nyɔɔlɔ: «To ‑na klʋgba.» Nyɔɔlɔ toa' 'ɔa klʋgba, 'änya 'pʋ; 'änya ‑beere klʋgba ‑mälä.
14 Farisinyüü nya 'cie 'ünya pla 'sraa 'sɩrɩ 'ümä 'ɔɔn 'bla.
Jesu bä Nyɔsʋaa 'jrʋpafɛnyɔɔlɔ 'ɔ 'baa' 'lɩ
15‑Maa Jesu 'nua' 'iin 'wli, 'ɔnya bereklɩ. Nyüü 'kɔkɔmlɛ prɛ 'ɔɔn dɛrɩ; ‑bɛ 'ɔ 'pʋɔ 'üa 'fɩɔ. 16'Ɔnya ‑sɔɔrɔ wii 'wʋ 'ɔnya ‑gbala 'üün 'ünyɩ srara 'ɔɔn nyüü 'klɩ. 17'Kä wiili nyɔsʋaamlɩpalanyɔɔ Esaii ‑gba käa' 'mä nrörö; 'ɔ nɩnɩa kä:
18 ‑Jää 'na 'jrʋpafɛnyɔɔlɔ 'n 'baa' 'lɩ, 'na ‑wawanyɔɔ. 'Ɔɔ kä 'mɩ tʋ ‑gböösa.
'Ɔɔ ‑gälɩ 'mä 'na ‑Susu 'cere,
'kä 'ɔnya 'pläa 'fɩɔ 'klɩgägäkʋa ‑gogo 'sa.
19 'Ɔ ‑nëmä ‑golu ‑a ‑fu, 'ɔ ‑nëmä 'kpö ‑a 'kpö.
Nyɔɔ ‑nëmä 'ɔa mlɩa wii ‑jria 'lɩ 'wli ‑a 'nrörö.
20 'Ɔ ‑nëmä 'kugbasulu 'kpria' 'lɩ ‑a 'kata,
'ɔ ‑nëmä bɩa 'napɛlɛ nyaa' 'nyrɔlɔkʋ bɩa ‑a 'nyrɔlɔ.
'Asɩ 'ɔnya nʋ nʋ 'kä 'klɩgägäkʋ nya 'wʋsi ‑gböösa.
21 'Kä 'pläa 'mlɩa ‑glügbü nya 'ɔɔn plɛgälɩpie # 12.21
Esaii 42.1-4
..
Farisinyüü sröröa' Jesu
Marëkë 3.22-27; Lukë 11.14-23; Matiö 9.32-34
22'Ünya ja 'ɔɔn nyɔɔ 'doo domoo bäa' 'lɩ, 'i kä ‑gʋ 'ɔ 'sua' ‑bɛ ɔ 'nɔɔa'. 'Ɔnya 'pʋɔ 'susunyɔɔlɔ 'nɔɔa', 'ɔnya 'pawii, 'ɔnya 'jäkä. 23'Ii prɛ 'üa ‑gälɩa 'ku, 'ü ‑nëma: «‑Mää Daviidëa 'Jʋ 'nyɩ ‑pɩ kʋ?» 24‑Maa Farisinyüülü 'nua' 'iin 'wli, 'ü ‑nëma: «‑Taa nyɔɔlɔ, domüüa 'cifi Bɛlësebuulë 'ɔ ‑srörö kälɩ ‑bɛ 'ɔ prɛ domüü.»
25‑Maa Jesu jrea' wiili 'ü boboa' nɩ, 'ɔnya ‑gbala 'üün: «‑Glügbö 'dööa 'mlɩa nyüü ma kä toufujrʋpa nɩ, 'ia ‑glügbölä bɩa. ‑Bɛ bätä o bätä 'aiɛ ‑gbööö o ‑gböööa 'mlɩa nyüü ma 'bölötɩa nɩ, 'ünyɩ ‑wɩara ‑wɩara ‑a. 26Sataan ma prɛ Sataan nɩ, ‑asɩ 'ɔa 'plä nya ‑wɩara le? 27‑Bɛ 'mɔɔlɔ nɩ, ama nʋ Bɛlësebuulëa 'klü ‑bɛ ama prɛ domüü nɩ, ‑bɛ 'ana 'jü le, nyɔɔ 'plɛɛ ‑nyɛɛ 'üün 'klü ‑bɛ 'ü prɛ 'üün le? 'A 'ia ‑gʋ, 'ana 'jüa 'mʋgbɛ nëmä 'amɩ ‑gbala 'sɩrɩ 'a bäa' ‑gbagblɛ 'lɩ. 28‑Maa ima 'daa Nyɔsʋaa ‑Susu 'n ‑srörö kälɩ ‑bɛ 'n prɛ domüü nɩ, 'ba jresaa Nyɔsʋaa 'kamaplä 'a 'ana ‑nyɛɛ 'tɔ. 29‑Asɩ nyɔɔ 'mrɛɛ 'ɔmä 'wʋsɔɔrɔnyɔɔa nyüköli pa 'ɔmä 'ɔa käkädii 'jie ɔma 'nyɩ ‑kätɩ 'wʋsɔɔrɔnyɔɔlɔ ‑a kpasa le? 'Ia 'taɩn 'lɩ 'ɔ 'mrɛɛ ɔ 'jie nyükölia dii. 30Nyɔɔlɔ nyra 'mɔɔ 'nyɩa' po nɩ, 'na 'nyüamlɩjraranyɔɔ 'ɔ bä. ‑Bɛ nyɔɔlɔ 'nyɩ jia' 'mɩ ‑gba amäa' ‑gbapapla nɩ, 'pläkägbanyɔɔ 'ɔ bä.
Nyɔɔa 'papawii nëmä 'ɔa ‑gä tʋ
Marëkë 3.28-29; Lukë 12.10
31«'A 'ia ‑gʋ 'n ‑gbala 'amɩ, nyɔɔa ‑balʋa 'fɩɔ nyra ‑jejreekʋlʋ kä 'fɩɔ 'ɔ ‑jejreea' nya 'ɔɔn cerea; ‑maa nyɔɔ o nyɔɔ nëmäa' Nyɔsʋaa ‑Susu nɔpɔ, 'ia ‑balʋlʋ ‑nëmä 'ɔmɩ ‑a cere. 32Nyɔɔ o nyɔɔ 'mäa' Nyɔɔa 'Jʋa ‑gʋ bʋbɔwii 'pa nɩ, 'ɔa ‑balʋ bä ceresa. ‑Maa nyɔɔ o nyɔɔ nëmäa' 'Nyüna ‑Susua bʋbɔwii 'pa nɩ, 'ia ‑balʋlʋ ‑nëmä 'ɔmɩ ‑a cere 'plɔʋplɔʋ ‑taa 'pläläa 'mlɩ, nyra 'plälä jöa' 'äa 'mlɩ.
Tuua 'bö 'ü nö ‑bɛ 'ü jre 'umɩ
Matiö 7.16-20; Lukë 6.43-45
33«Tuu ma 'na 'ua 'bü 'naa; tuua 'bü ma bʋbɔ 'u bʋbɔ, 'be tuua 'bü 'ü nö ‑bɛ 'ü jre 'umɩ. 34'Mëmlɛtapaa ‑glügbö 'a bä! ‑Asɩ 'ana polu bʋbɔ ‑bɛ 'a 'paa 'mʋfa wii le? 'Be wii ma nyaa' plɛklɩ 'si, 'a ‑plɩɩ 'mä 'paa wii ‑o. 35'Cɩcanyɔɔlɔ nɩ, 'ɔa plɛ 'si 'cɩcadii 'klɩ; 'ii 'ɔ 'baa 'cɩcadii. Plɛbʋbɔnyɔɔlɔ nɩ, 'ɔa plɛlɛ 'sia' bʋbɔgbi 'klɩ nɩ, 'ii 'ɔ 'baa plɛbʋbɔdii. 36'Amɔ 'n ‑gbala: ‑Gäa ‑srɩlɩ nɩ, ‑moloo ma bälɩ 'ɔnya Nyɔsʋa ‑gbalaa wiili kä ‑gʋ 'ɔ 'paa' wiili 'ɔ ‑nëmä ɩa' 'pa. 37‑Na 'papawii 'mä ‑srɩɩ ‑mɩ ‑gä ‑nyɩ, 'aiɛ ‑na 'papawii 'mä ‑mɩ ‑gä kälɩ 'ba.»
Farisinyüü nɩnɩa abɩa Jesu nʋ ‑saragbi
Matiö 16.1-4; Marëkë 8.11-12; Lukë 11.16,29-32
38 ‑Dɔkpɩanyüü nyra Farisinyüü nya 'bete 'ɔɔn, ‑maa: «'Kpɩkpɩanyɔɔ, nʋ ‑saragbia tie amä 'saa jre 'sɩrɩ Nyɔsʋa blɔa' ‑mɩ.» 39Iibäa' Jesu nɩ: «Nyüüglügbölä kä plɛ bʋbɔa', ä sɔa' Nyɔsʋa dɛrɩ, 'ää 'bata ‑saragbia tie. ‑Maa ‑saragbi ‑mɩdoo ‑nëmä nrörö ‑a nrörö ima 'nyɩ ‑saragbili jräa' nyɔsʋaamlɩpalanyɔɔ Jonaasë ‑gälɩ ‑a bä. 40'N ‑gbaa' 'iin nɩ, 'sɩrɩ Jonaasë ‑si käa' ‑sre kpakia 'mlɩ jrüü tää, ‑gbia tää nɩ, 'asɩ Nyɔɔa 'Jʋ 'mä ‑tʋtʋa mlɩ jrüü tää, ‑gbia tää ‑si. 41‑Srɩlɩ kä 'mlɩ Nyɔsʋa 'mäa' nyüüa ‑gä ‑tʋ nɩ, Niniivëa bätäa nyüü nya 'wʋsɔa, 'kä 'ünya 'üün 'klɩ 'nyüglö 'ümä 'üün ‑gbala 'sɩrɩ 'ünyɩa' ‑gä kä. 'Be Niniivëa nyüülü, 'ü poa' Jonaasëa 'papawii 'nyakli, 'ü toro 'lɩ ‑balʋ ‑gälɩ#12.41 Jonaasë 3.5,8,10. ‑bɛ nyɔɔ bä ‑pɩ 'ɔ ‑si Jonaasë 'wʋ! 42‑Srɩlɩ kä 'mlɩ Nyɔsʋa 'mäa' nyüüa ‑gä ‑tʋ nɩ, 'ŋlʋʋlɔ 'kamaa' Saba#12.42 'ŋlʋʋlɔ 'kamaa' Saba: Grɛɛkëwii 'lɩ 'iibä «'blɩlɩ bäa' 'jrʋa 'wʋsɔrɔfaa 'dupa 'lɩ.» 'A Etiopiia 'brea a ‑kätɩ bätä. Juifënyüü ma 'dara 'ia nyüü, nyüülü 'nyɩ toroa' Nyɔsʋa plɛ ‑bɛ ü 'bööa' 'ɔɔn 'klɩ. ‑Bɛ Jesu nö 'a 'ia nyüülü nëmä juifënyüüa ‑gä tʋ 'üa 'nyakliwisusukʋa ‑gʋ. nya 'wʋsɔa, 'kä 'ɔnya ‑taa nyüüglügbölä kʋa' ‑pɩ srara 'sɩrɩ 'ünyɩa' ‑gä kä. 'Ɔɔlɔ nɩ, 'ɔ sɔ 'blɩa blöröfa 'wʋ 'ɔnya ji kä 'Kɩɩ Salomɔɔa 'lɩgaglakʋ 'nyaklipo#12.42 1 'Kɩɩ 10.1-10.; ‑bɛ nyɔɔ bä ‑pɩ 'ɔ ‑si Salomɔɔ 'wʋ!
‑Balʋsusu ma 'blöö nyɔɔa 'kläa 'mlɩ dɛrɩ
Lukë 11.24-26
43«‑Frepasusu ma sɔ nyɔɔ 'lɩ nɩ, ‑aaga 'lɩ 'u mö kʋfa 'batra. Uma 'nyɩ kʋfa ‑a 'jä nɩ, 44'kä 'u nö: ‹'Mä 'na nyukulu kä ‑wälɩ 'n sɔa' dɛrɩblöö.› Uma 'blöödɛrɩ nɩ, nyukulua ‑wälɩ wɔplɔ, 'ua ‑wälɩ ‑nyɩglakä 'mʋfasa, ‑bɛ nyɔɔ 'nyɩ 'lɩ ‑a kʋ. 45'Kä 'u mö 'u we ‑sisi ‑uunsɔɔ ‑mɩdoo, i bʋbɔa' i ‑sia' 'uun 'wʋ, 'kä 'i pa, 'kä 'i kʋä nyukulua ‑wälɩ. ‑Sʋɩlɩ 'ia nyɔɔlɔ 'mäa' 'jä nya ‑kätɩa ni ‑sʋɩ 'wʋsia. 'Ii nëmä 'saarɩa ‑taa plɛbʋbɔnyüü ‑gälɩjrä.»
Jesua 'tasɩrɩa ‑gbööö
Marëkë 3.31-35; Lukë 8.19-21
46Jesu 'pala ɩ nyüü wii ‑gba, ‑bɛ 'ɔa 'yio nyra 'ɔa ‑wlajü 'tɔ. 'Ü bä ‑fälɩ 'ü 'bata 'ümä 'ɔɔn wii ‑gba 'pala ɩ. 47Nyɔɔ 'doo nya ‑gbala 'ɔɔn: «‑Na 'yio nyra ‑na ‑wlajü bä ‑fälɩ, 'ü 'bata 'ümä ‑mɩ wii ‑gba 'pala.» 48‑Maa 'ɔnya ‑gbala nyɔɔlɔ 'palaa' 'ɔɔn wii ‑gba, 'ɔ ‑nëma: «Ɔ bä 'na 'yio le? Ɔ bä 'na ‑wlajü le?» 49'Ɔnya to 'ɔa 'wʋnyɛrɛnyüü wlu, 'ɔ ‑nëma: «‑Jää 'na 'yio nyra 'na ‑wlajü! 50Nyɔɔ o nyɔɔ nöa' wiili 'na Tʋlɔ bäa' cɛlɩ 'bataa' nɩ, 'ɔɔ bä 'na ‑wlajʋ, 'ɔɔ bä 'na ‑wladia nyra 'na 'yio.»
Currently Selected:
Matiö 12: Bakwé
Highlight
Share
Copy

Want to have your highlights saved across all your devices? Sign up or sign in
© Wycliffe Bible Translators, Inc.