YouVersion Logo
Search Icon

Matiö 11

11
1Jesu bɩaa' 'ɔa 'wʋnyɛrɛnyüü nyüüpʋnyüüsɔɔlü ‑gbalakʋ nɩ, 'ɔnya sɔ 'lɩ 'ɔnya mi 'üa ‑tʋtʋ ‑gälɩa bätë ‑mölööa 'mlɩ 'kpɩara ‑bɛ 'ɔ 'sara 'lɩ nyɔsʋaawii.
Wiili Jaan Batiisë 'betea' Jesua ‑gʋ
Lukë 7.18-35
2‑Bɛ Jaan Batiisë ‑ka bä käa' ‑jie 'lɩ nɩ, 'ɔ 'nu wiili 'Kriisë nöa' 'wli. 'Ɔnya blɔ 'ɔa 'wʋnyɛrɛnyüü 'sɔɔ, 3ü 'bete 'ɔɔn: «‑Mɔ bä nyɔɔlɔ nëmäa' ji, ‑ale 'ia nɔ ‑ka bä dɛrɩ?» 4Jesu nya 'sa 'üün ‑gälɩ, 'ɔ ‑nëma: «'Ama mi nɩ, 'ba ‑gbala Jaan wiili 'a 'nua' 'wli ‑bɛ 'a 'jäa': 5‹'Nɔnɔnyüü 'jääkä, kpakpanyüü 'nyɛɛ, 'jrʋklanyüü 'pʋɔ, 'susunyüü 'nöö, jäjänyüü tɛtɛkä, ‑bɛ 'ü 'sara 'lɩ 'pʋablanyüü 'Mʋfagogo#11.5 Esaii 25.5-6; 61.1.. 6Abɩa dɔrʋ 'bla nyɔɔlɔ 'nyɩ blöa' ‑balʋ 'lɩ 'na 'nyrɩa ‑gʋ!› »
7'A mö nyüülü mö ɩ, ‑bɛ Jesu 'paa Jaan a ‑gä ‑jria 'klɩ: «Dɛplɛɛ 'a mi ‑aaga 'lɩ 'järä le, 'kugbasugö ‑fʋflʋ 'dögöa' 'kä? 8‑Bɛ dɛplɛɛ 'a mi 'jä le? Nyɔɔ bälɩ 'ɔ 'sroo 'mʋfakoti, 'ɔɔ 'a mi 'jä? ‑Bɛ nyüülü 'srooa' 'mʋfakoti nɩ, 'kɩɩɩa nyüköli 'ü kɔkɔ. 9Nyɔɔ 'plɛɛ ‑gbaa 'iin 'a mi 'jä le? Nyɔsʋaamlɩpalanyɔɔ? ‑Yɛɛ, 'amɔ 'n ‑gbala, 'ɔ ‑si 'nɩmɩ nyɔsʋaamlɩpalanyɔɔ 'wʋ. 10'A 'ɔɔlɔ kä ‑gä ‑jɩjraa' nyɔsʋapɔɔkʋ 'lɩ:
‑Jää, 'n ‑taara 'na bɔblɔnyɔɔ 'nyʋfɔ 'ɔmä ‑mɩ 'nyʋfɔ 'klɔɔtrʋ ‑ta,
'ɔmä ‑na 'nyʋfɔ 'känyɩgla # 11.10 Malasii 3.1; Marëkë 1.2; Lukë 7.27..
11«'Asɩ i bä, 'cɩcasa 'n ‑gbala 'amɩ, nyüülü kä 'fɩɔ 'ŋlëgë ‑gua' nɩ, nyɔɔ 'nyɩ Jaan Batiisë 'wʋ ‑a ‑si. ‑Maa Cɛɩɩa 'kamapläa 'mlɩa blaaadɩɔ 'bʋa 'ɔnya ‑si 'ɔɔn 'wʋ. 12Sɔrɔ Jaan Batiisëa jrüü ‑gälɩ ‑a ‑tɔɔ 'saarɩ nɩ, nyüü fa Cɛɩɩa 'kamaplä#11.12 'I 'mrɛɛ i bä bɩa: «Cɛɩɩa 'kamaplä ja 'klü 'ä jö». 'klü ‑gba ‑bɛ 'ü käa' 'klü 'üü dɔrʋ 'ään 'wʋ. 13'Be sɔ nyɔsʋaamlɩpalanyüüa 'fɩɔ nyra Moisëa ‑Dɔ ‑gälɩ ‑a ‑tɔɔ Jaan a 'taɩn 'lɩ nɩ, 'üa 'fɩɔ 'a kälɩ wiili nëmä ɩa' 'lɩtɔrɔ 'sa. 14'Ama nya 'mɩ 'wlinu nɩ, 'ɔɔ bä Eliilɔ nëmäa' ji#11.14 Malasii 3.23.. 15Nyɔɔlɔ käa' 'nununyakli, ɔ 'nu!
16«‑Maa nyɔɔ 'plɛɛ 'nëmä ‑taa nyüüglügbölä kʋa' ‑pɩ 'klɩpapla le? 'Ü ‑beere 'sɩrɩ 'jü kʋa' ‑saplɛ 'klɩ ‑bɛ 'ü ‑gbala ‑mölöö 17‑maa:
‹'Ana ‑gʋ a bö ‑gbaprʋkɔ,
'anyɩ yɛ ‑a yɛ!
Anya brɩ 'dügbödʋ,
'anyɩ 'wu ‑a 'wu!›
18'Be Jaan jia', 'ɔnyɩ ji kä dɛɛ ‑a, 'ɔ ma 'nyɩ 'mlamla ‑a, 'ü nɩnɩa: ‹Domoo bä 'ɔɔn 'lɩ.› 19Nyɔɔa 'Jʋ nya ji, 'ɔ jödɛɛ, 'ɔ 'mlaa, 'kä 'a nö: ‹‑Jää nyɔɔ jöa' jijri, 'nʋmlanyɔɔ ‑susugbee, dapookälɩpɛrɛnyüü nyra ‑balʋnyüüa ‑bei!› 'Lɩgaglakʋa nʋnʋdii 'ii srara 'sɩrɩ 'lɩgaglakʋ ‑gäa' 'klɩ.»
Bätëlë jraraa' Jesu 'nyüamlɩ
Matiö 10.15; Lukë 10.12-15
20Jesu nya 'daa bätëlë kä 'mlɩ 'ɔ nröröa' ‑saragbi 'kɔkɔmlɛ, 'be 'ünyɩ 'üa ‑balʋ ‑wälɩ ‑a 'cɛrɛ: 21«A busukʋ jrä 'amɩ ‑gälɩ Korasɛɛnyüü 'amɩ! Busukʋ jrä 'amɩ ‑gälɩ Bɛtësaidaanyüü 'amɩ! ‑Saragbili nröröa' 'ana bätä, 'ima 'daa Tiirë nyra Sidɔɔn#11.21 Tiirë nyra Sidɔɔn: Nyüüa 'fɩɔ jre 'iin 'sɩrɩ 'cɩcasa 'nyɩa' 'ia bätëlëa 'mlɩ bä. 'i nrörö kä nɩ, 'ia nyüü 'a 'kä ‑balʋ ‑wälɩ 'cɛrɛ; 'ü 'a kä ‑bɛjʋ 'sroo 'ümä 'dugu 'lɩ pa, 'kä 'ünya 'pʋpʋ 'lɩ 'käwawla#11.21 Juifëa 'brea ‑dɔ bäsaa. 'Asɩ 'ü pa 'dugu 'lɩ, 'asɩ 'ü 'cie 'üa nyüfë 'wʋ, 'asɩ 'ü toro 'lɩ ‑balʋ ‑gälɩ.. 22'A 'ia ‑gʋ 'n ‑gbala 'amɩ, ‑gätʋsrɩ 'lɩ nɩ, Tiirë nyra Sidɔɔn a ‑gä ‑nëmä dɛɛ ‑a bä 'kä 'ana näa ‑gʋ, 23nyra 'amɔ Kapɛrënaumëa nyüü 'amɩ, 'amɔ boboa' ‑maa 'anya 'a cɛlɩ 'jra, 'anya 'wʋciecie 'kä 'anya 'kuaabre 'tɔ! 'Be ‑saragbili nröröa' 'ana ‑nyɛɛ, 'ima 'daa Sodɔɔmë 'i nrörö kä nɩ, 'ä ‑ka nya ɩ 'lɩbäa 'saarɩ. 24'A 'ia ‑gʋ 'n ‑gbala 'amɩ, ‑gätʋsrɩ 'lɩ nɩ, Sodɔɔmëa ‑gä ‑nëmä dɛɛ ‑a bä 'kä 'ana näa ‑gʋ.»
Jesu srara Tʋ
Lukë 10.21-22
25'Ia 'taɩn 'lɩ Jesu ‑nëmä: «Tʋ, cɛ nyra ‑tʋtʋa 'Pläkänyɔɔ, 'n 'trɛɛ ‑mɩ 'sɩrɩ nʋa' ‑bɛ ‑sisrea' wiili 'lɩglanyüü nyra ‑pɔɔkɩjrenyüü ‑gba, ‑bɛ ‑sraraa' 'iin 'jütɛtɛɛ. 26‑Yɛɛ Tʋ, 'a wiili käa' ‑mɩ 'tʋ, 'ii nʋ!
27«'Na Tʋ ‑nyɩ 'mɩ diia 'fɩɔ kälɩ. Nyɔɔ 'nyɩ 'Jʋ ‑a jre, ima 'nyɩ Tʋ ‑a bä. Nyɔɔ 'nyɩ Tʋ ‑a jre, ima 'nyɩ bɩa 'Jʋ nyra nyɔɔlɔ 'Jʋ 'bataa' 'ia srarakʋ ‑a bä.
28«'Ba ji ‑tɛ 'n bäa' 'amɔ nyüülü ‑sɩaa' ɔ järäa' kälɩbä ‑gblɛ ‑wälɩ, ‑bɛ 'mä 'amɩ ‑fʋflʋpapakʋ ‑nyɩ. 29'Ba 'pie 'na ‑gblɛ ‑plɩ ‑gälɩ#11.29 'pie 'na ‑gblɛ ‑plɩ ‑gälɩ: Grɛɛkëa ‑nyɛɛ nɩ, waklüülü kʋa' ‑pɩ nɩ, 'sɩrɩ üma ‑tʋʋäa' tuu klöö bruu ‑gälɩ 'umä ‑pɩɔ 'doo 'wʋ kʋ, ‑bɛ 'umä tuu 'aiɛ dete 'kʋɛɛ ‑bɛ putu 'mä 'lɩgoglo. ‑Gögbiiwii 'lɩ 'ü nɩnɩa «juugë». ‑Tɛklɩ üma 'daa juugë nɩ, 'a Jesua 'kpɩkpɩakʋlʋ 'nyɩa' 'lɩkla. Tɛ Matiö 23.4. 'kä 'a 'cɛrɛ 'na 'kpɩkpɩakʋ ‑wälɩ 'umä 'amɩ 'tiere, 'be 'n 'wlalɩkä 'na plɛ nya 'jɔrɔ; ‑bɛ 'amä ‑fʋflʋ 'pa#11.29 Jeremii 6.16.. 30'Be 'na ‑pootu ‑blɛkälɩ, 'na ‑gblɛ nya 'fʋma.»

Currently Selected:

Matiö 11: Bakwé

Highlight

Share

Copy

None

Want to have your highlights saved across all your devices? Sign up or sign in