Akëtë 15

'Bölökʋa 'blarʋ

1Nyüü ‑mölöö sɔ Judeea 'bre 'ünya ji Antiɔɔsëbätä ‑bɛ 'ü 'kpɩa ‑wlajü. 'Ü nɩnɩa: «'Ama 'nyɩ 'bölö ‑a 'bölö 'sɩrɩ Moisëa ‑Dɔ ‑gbalaa' 'amɩ nɩ 'a ‑nëmä 'lɩmlɩ ‑a 'wʋ.» 2‑Topokʋ kpaku nya blö 'üa ‑tɔrʋpɩɔ. 'Pɔɔlë nyra Banabasë 'nyɩ 'üün 'nyiere ‑a 'nyiere. 'Ünya 'balɩ 'Pɔɔlë nyra Banabasë nyra 'üa ‑tɔrʋpɩɔa nyüü ‑mölöö 'ümä Jerusalɛɛmë mi, 'ümä apotrë nyra tagbü 'jä, 'ia wiilia ‑gʋ. 3'Cɛcɩlɛ bäa' Antiɔɔsë nya ‑nyɩ 'üün diili kä 'fɩɔ 'ümäa' fa ‑bɛ 'ümäa' mi. 'Ünya ‑srörö Fonisii nyra Samariia ‑tʋtʋ ‑gälɩ. 'Ü ‑gbala nyüü 'sɩrɩ nyüülü 'nyɩa' juifë bä ‑nyɩa' 'üa polu Nyɔsʋa kälɩ. 'Inya bä 'cɛcɩnyüüa 'fɩɔa dɔrʋ. 4'Ü 'tɔa' Jerusalɛɛmë nɩ, 'cɛcɩnyüü nyra apotrë nyra 'cɛcɩtagbü nya 'kʋɛɛlɩ 'üün. 'Pɔɔlë nyra Banabasë nya 'saralɩ 'üün 'sɩrɩ Nyɔsʋa ‑sröröa' 'üün kälɩ ‑bɛ 'ɔ nʋa' dii 'kɔkɔmlɛ. 5‑Maa Farisinyüü ‑mölöö ü toroa' Jesu plɛ nya sɔwʋ, 'ü ‑nëma nyüülü 'nyɩa' juifë bä kä 'ümä 'bölö ‑bɛ 'ümä bɩa 'lɩ Moisëa ‑dɔ ‑träärä.

Jerusalɛɛmëa dɛtʋ kpaku

6Apotrë nyra 'cɛcɩtagbü nya trara wiilia ‑gʋ. 7'Ü ‑topoa' ‑topo, Piɛɛrë nya sɔwʋ 'ɔ ‑nëma: «'Na ‑wlajü 'amɩ, 'a jre 'iin, 'i 'saa' 'klɩ dotro 'mɔɔ Nyɔsʋa 'balɩ ana#15.7 ana: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'ana. ‑tɔrʋpɩɔ 'mä wii 'pa, nyüülü 'nyɩa' juifë bä 'mä 'Mʋfagogo 'wlinu, ‑bɛ 'ümä nyɔsʋaplɛ nʋ 'ümä 'lɩ 'iin 'kʋɛɛ. 8‑Bɛ Nyɔsʋa jrea' nyɔɔa plɛ nɩ, 'ɔnya 'kʋɛɛlɩ 'üün; 'ɔ srara 'iin 'taɩn 'lɩ 'ɔ ‑nyɩa' 'üün 'Nyüna ‑Susu, 'sɩrɩ 'ɔ ‑nyɩa' bɩa amɩ 'uun#15.8 Akëtë 2.4; 10.44.. 9'Ɔnyɩ amɩ ‑tɩa ‑a 'bö, 'be 'üa nyɔsʋaplɛ 'ɔ tɛklɩ 'ɔnya kpëtä 'üa polu. 10‑Bɛ dɛplɛɛ kä ‑gʋ 'a 'traɩn Nyɔsʋa le? 'A 'bata 'amä ‑gblɛ#15.10 ‑gblɛ: Grɛɛkëa ‑nyɛɛ nɩ, waklöölä kʋa' ‑pɩ nɩ, 'sɩrɩ ü ma ‑tʋʋäa' tuu klöö bruu ‑gälɩ 'umä ‑pɩɔ 'doo 'wʋ kʋ, ‑bɛ 'umä tuu 'aiɛ dete 'kʋɛɛ ‑bɛ putu 'mä 'lɩgoglo. ‑Gögbiiwii 'lɩ 'ü nɩnɩa «juugë». ‑Tɛklɩ üma 'daa juugë nɩ, 'a ‑dɔ 'kɔkɔmlɛlë 'cɛcɩnyüü ‑mölö 'daaa' abɩa nyüülü ‑ka jre ɩa' Nyɔsʋa, nyüülü 'nyɩa' juifë bä, 'daaa' ü nʋa'. 'I ‑beere juugë; 'a ‑dɔ bäa': sriia 'böbökʋ nyra Moisëa ‑dɔ ‑mɩdoo (Matiö 23.4; Matiö 11.29-30). 'wʋnyɛrɛnyüüa ‑plɩ ‑gälɩ 'pie, wiili ana tʋɩɩ nyra amɔ 'nyɩa' 'lɩbɩa amäa' ‑gbötö! 11‑Maa a jresaa 'Pläkänyɔɔ Jesu#15.11 'Pläkänyɔɔ Jesu: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'Pläkänyɔɔ Jesu 'Kriisë.» 'pʋɔ amɩ 'ɔa ‑gbinanakʋ 'lɩ 'sɩrɩ 'ɔ 'pʋɔa' bɩa 'üün.»

12Nyüülü kä 'fɩɔ trara ɩa' nya 'kpla 'më 'ümä Banabasë nyra 'Pɔɔlë 'nyaklipo. 'Ünya ‑gbala 'üün 'sɩrɩ Nyɔsʋa ‑srörö 'üün kälɩ ‑bɛ ‑saragbia tie nyra plɛklɩkalawii nröröa' nyüülü 'nyɩa' juifë bäa ‑tɔrʋpɩɔ. 13'Ü bɩaa' wii 'papakʋ nɩ, Jaakë ‑nëma: «'Na ‑wlajü 'amɩ, 'ba po 'mɩ 'nyakli o! 14Simɔɔ#15.14 Simɔɔ: Piɛɛrë 'ü 'dara bɩa 'saa. Tɛ Matiö 4.18. 'sa ‑plɩɩ 'lɩ 'sɩrɩ 'ia 'käkolofa 'wʋ Nyɔsʋa jia' nyüülü 'nyɩa' juifë bäa ‑nyɛɛ, 'ɔmä 'lɩ 'üa ‑tɔrʋpɩɔ ‑glügbö 'döö 'ba 'ämä 'ɔa nä bä. 15'Ii ‑bɛ nyɔsʋaamlɩpalanyüüa wii bä dɛɛ 'dee, 'be 'i ‑jɩjra ‑maa:

16 'Ia wiili ma ‑si nɩ, 'nyaa jia,

'kä 'nyaa Daviidëa nyukulu ‑gbloooa' 'pa;

'nyaa ‑plɩɩ 'ua böblödii 'baa, 'kä 'nyaa 'uun 'klɩgä.

17 'Kä nyüü ‑mülü tɩɔa' 'lɩ 'mä 'Pläkänyɔɔ 'bata,

'üü ‑bɛ nyüülü kä 'fɩɔ 'nyɩa' juifë bä ü 'klaaa' 'na 'nyrɩ # 15.17 Amɔɔsë 9.11-12 ..

‑Jäsɩ 'Pläkänyɔɔlɔ nöa' diili ‑gbaaa',

18 ‑bɛ diili kä 'fɩɔ 'ɔ nʋa' # 15.18 ‑bɛ diili kä 'fɩɔ 'ɔ nʋa': ‑Taa ‑waklüülü 'nyɩ grɛɛkë kätɩpɔɔkɩ ‑mɩdooa 'mlɩ ‑a bä. , 'i jrerea' 'i 'a 'lɩ ‑wlɛ#15.16-18 Amɔɔsë 9.11-12..

19«'Ii känyrɩ ‑jäsɩ 'n ‑gbaa' nɩ: anyɩ ‑sie nyüülü 'nyɩa' juifë bä ‑bɛ ü toroa' Nyɔsʋa plɛ ‑sʋɩ. 20‑Maa ‑kaa' ‑jɩjra 'üün 'wʋ amä 'üün ‑gbala ünyɩ ji mlaalü 'ü 'blaraa' ‑wäsɩa, 'ünyɩ nʋ ‑sagbili Nyɔsʋa 'nyɩ 'bataa', 'ünyɩ ji mlaalü jäa' 'ünyɩa' ‑plɛlɩbölö, 'kä 'ü 'cɛrɛ ‑toru ‑wälɩ#15.20 Ɛgësɔɔdë 34.15-17; Levitiikë 7.10-16; 18.6-23.. 21'Be sɔ ana tʋɩɩa 'taɩn 'lɩ nɩ, nyüü bä kä bätëa 'fɩɔa 'mlɩ 'ü ma 'kpɩa Moisëa ‑Dɔ, 'ü ma ‑täsä 'uun a 'doo juifëa 'sraaplanyüköli ‑fʋflʋpasrɩ 'lɩ.»

‑Pɔɔkʋlʋ 'ü faa' nyüülü 'nyɩa' juifë bä ‑bɛ ü toroa' Nyɔsʋa plɛ

22'Ia ‑gʋ apotrë, 'cɛcɩtagbü nyra 'cɛcɩnyüüa 'fɩɔ nya 'nönrö 'wli, 'ünya 'ba 'üa ‑tɔrʋpɩɔ nyüü ‑mölöö, 'üü ‑bɛ 'Pɔɔlë nyra Banabasë, 'ünya blɔ 'üün Antiɔɔsëbätä. 'Ünya 'balɩ Judasë 'ɔ 'ü 'daraa' bɩa Basabasë nyra Silasë. 'Üa 'sɔɔlë bä 'cɛcɩnyüü kpakü. 23‑Jäsɩ 'ü ‑jɩjraa' ‑pɔɔkʋlʋ:

«Amɔ Apotrë, 'cɛcɩtagbü nyra ‑wlajü ‑mölöö 'trɛɛ 'amɩ, 'amɔlɔ 'nyɩa' juifë bä ‑bɛ 'a kʋa' Antiɔɔsëbätä, Sirii nyra Silisiia ‑tʋtʋ ‑gälɩ.

24A 'nu 'sɩrɩ ana nyüü ‑mölöö sɔa' ‑tɛ ana ‑nyɛɛ ‑bɛ 'ü 'caklaa' 'ana bobowli 'lɩ: wiili bäa' ‑maa nyɔɔ kä 'ɔmä 'bölö ‑bɛ 'ɔmä 'lɩ ‑Dɔ ‑träärä#15.24 Wiili bäa' ‑maa nyɔɔ kä 'ɔmä 'bölö ‑bɛ 'ɔmä 'lɩ ‑Dɔ ‑träärä: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. ‑Mää amɔ 'nyɩ 'üün blɔ. 25'Ia ‑gʋ anya 'nönröwli, anya 'balɩ nyüü, 'üü ‑bɛ ana ‑wawanyüü Banabasë nyra 'Pɔɔlë, anya blɔ 'üün 'ana ‑nyɛɛ, 26'ü ‑nyɩ 'üa 'klä ana 'Pläkänyɔɔ Jesu 'Kriisëa 'nyrɩa ‑gʋ. 27'Ia ‑gʋ anya blɔ Judasë nyra Silasë 'ümä 'amɩ ‑gbala 'imä 'üa mlɩ ja 'ümä 'amɩ watu 'doolʋ ‑gbala.

28'I kä 'Nyüna ‑Susu 'tʋ, 'inya kä bɩa amɩ 'tʋ a ‑pɩ 'amɩ kälɩbädii ‑gälɩ 'pa, 'ima 'nyɩ i kʋa' ‑pɩ ‑a 'doo ‑a bä 'i 'naa': 29‑Nyɩ ji mlaalü 'ü 'blaraa' ‑wäsɩaa, ‑nyɩ ji ‑toru, nyra mlaalü jäa' 'ünyɩa' ‑plɛlɩbölö, ‑nyɩ nʋ ‑sagbili Nyɔsʋa 'nyɩ 'bataa'. 'Ama ‑träärälɩ 'iin nɩ, 'i 'na.

'A ‑plɩɩ a 'blörö.»

30'Ü nyra ‑mülü sɔsrɔa' ‑gba nɩ, 'ünya mi Antiɔɔsëbätä. 'Ünya 'paplaa' 'cɛcɩnyüüa 'fɩɔ ‑gba nɩ, 'ünya ‑nyɩ 'üün ‑pɔɔkʋlʋ. 31'Ü bɩaa' 'uun ‑täsäkʋ nɩ, dɔrʋ nya 'blaa 'üün 'be wiili 'palaa' 'lɩ ‑nyɩ 'üün 'klü. 32Judasë nyra Silasëa 'mʋgbɛ bä nyɔsʋaamlɩpalanyüü, 'ünya 'jrara bɩa ‑wlajülü 'klü 'lɩ ‑gböösa. 33'Ü ‑sia' 'üün jrüü ‑gba nɩ, 'cɛcɩnyüü nya ‑nyɩ 'üün 'nyʋfɔ 'ümä apotrëlü blɔa' 'üün a ‑nyɛɛ#15.33 apotrëlü blɔa' 'üün a ‑nyɛɛ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «nyüülü blɔ ɩ 'a 'üün a ‑nyɛɛ» dɛrɩ 'blöö. 34‑Maa Silasë ‑nëma 'ɔnya 'lɩ tɩɔa#15.34 ‑Taa 'pɛlɛ (34) 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. 35'Pɔɔlë nyra Banabasë nya tɩɔ bɩa Antiɔɔsëbätä. 'Üü ‑bɛ nyüü 'kɔkɔmlɛ ‑mölöö 'kpɩa ‑bɛ 'ü 'saa 'Mʋfagogolä 'paa' 'Pläkänyɔɔa ‑gä.

'Pɔɔlë nyra Banabasë sɔsrɔa' ‑gba

36Jrüü jie ‑sia' nɩ, 'Pɔɔlë nya ‑gbala Banabasë: «A 'blöö, a mi bätëlë kä 'fɩɔa 'mlɩ, i a 'palaa' 'Pläkänyɔɔa wii, amä ana ‑wlajülü bäa' 'lɩ 'jä, 'sɩrɩ 'üa nyɔsʋaplɛ bäa'.» 37Banabasë 'bata 'ɔmä ɩ Jaanlɔ 'ü 'daraa' Marëkë fa bɩa, 38‑maa 'Pɔɔlë 'nyɩ 'nyie ‑a 'nyie 'kä Marëkë 'mä 'üün fala, 'be 'ɔ 'sɔ 'üün dɛrɩ Pamëfiliia ‑tʋtʋ ‑gälɩ; 'jrʋpalä 'ü ‑fɛa' 'ɔnyɩ 'üün ‑gba ‑a ji. 39'Ü ‑kanyɩ 'wli ‑a nönrö 'ünya sɔsrɔgba. Banabasë nya fa Marëkë, 'ünya 'jra 'mɩɩ 'lɩ 'ünya mi Siiprë. 40'Pɔɔlë nya dɔrʋ Silasë 'wʋ. 'Cɛcɩnyüü bɩaa' 'üün 'Pläkänyɔɔa#15.40 'Pläkänyɔɔa: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: Nyɔsʋaa. ‑gbinanakʋ kälɩ ‑nyɩnyɩkʋ nɩ, 'ünya mi. 41'Ünya ‑srörö Sirii nyra Silisiia 'bre ‑bɛ 'ü 'jrara 'cɛcɩnyüüa 'klü.

Currently Selected:

Akëtë 15: Bakwé

Highlight

Copy